زيت البرادو الله لايهينكم ياشباب

[أنصر نبيك]

السلام عليكم ورحمة الله وبركاته
خلاص توكلنا على الله وشرينا ملينا من الانتظار
ابي حد يجاوب من اصحاب البرادو
عندي موتر 6 سلندر موديل 2013
ماهو فضل زيت له شريت موتر مخزن ماشي قل من الف ومارأيكم في كاسترول
وكم علبة مع السيفون وبدون السيفون البناشر يروجون لسوبر سبيشل وانا ما احبه
ولا ودي اروح الوكالة يعطونا زيت تويوتا تبعهم هذا وسلامتكم


من استشارك دخل في ذمتك وماخاب من استشار
قال صلى الله عليه وسلم : (لا يؤمن أحدكم حتى يحب لأخيه ما يحب لنفسه)

أتمنى عدم نقل الموضوع لخيمة ملاك تويوتا
ماعندك أحد ولا أحد رد علينا للأسف
وجزى الله كل خير من جاوب علينا

[الحربي 591]

اخوي انتبه من كاسترول وسيفون البناشر خرب موتري ...اللي موجود في السوق كلها مضروبه لو الختم تشوفه يمين ويسار وفوق وتحت
مضرووب وحتى اذا اصلي زيوت معفنه وخايسه ما تستاهل
........
والسيفون لا تشتري من اي محل غير الوكاله او الموزعين المعتمدين واهم شي يكون اصلي

والزيت انصحك بزيت الوكاله اذا ما تبي زيت الوكاله بترومين ممتاز من عند مراكزهم ولاازم تحط نفس اللزوجه

[م.سعيد]

زيت كاسترول 10-30 استخدمته في سيارتي اللومينا 2003 حتى بعتها سنة 2012 وهي ماشية 300 الف ومن اروع ما يمكن..
واستخدمتها في ارمادا 2009 من يوم كانت اصفار لحد الآن وهي ماشية 265 الف ولله الحمد والشكر بدون اي مشاكل..
اكثر مسافة قطعتها بدون ما اغير الزيت كانت بحدود 7 الاف كيلو..
دائماً اكون متواجد عند تغيير الزيت واقول له يصب الكمية اللي انا احددها..
هذه تجربتي انقلها لك..ولكن يبقى كتيب السيارة هو المرجع الصحيح..

[شنطة عده]

السلام عليكم ورحمة الله وبركاته
خلاص توكلنا على الله وشرينا ملينا من الانتظار
ابي حد يجاوب من اصحاب البرادو
عندي موتر 6 سلندر موديل 2013
ماهو فضل زيت له شريت موتر مخزن ماشي قل من الف ومارأيكم في كاسترول
وكم علبة مع السيفون وبدون السيفون البناشر يروجون لسوبر سبيشل وانا ما احبه
ولا ودي اروح الوكالة يعطونا زيت تويوتا تبعهم هذا وسلامتكم


من استشارك دخل في ذمتك وماخاب من استشار
قال صلى الله عليه وسلم : (لا يؤمن أحدكم حتى يحب لأخيه ما يحب لنفسه)

أتمنى عدم نقل الموضوع لخيمة ملاك تويوتا
ماعندك أحد ولا أحد رد علينا للأسف
وجزى الله كل خير من جاوب علينا
وعليكم السلام



استبدل الزيت مع السيفون وخل البنشري يحط اربع علب ثم شغل لين ياخذ الزيت دوره كامله ثم طفي
وانتظر دقيقة ثم عاير الزيت .... ثم يضاف كمية الزيت الناقصه الى ان يصل مستوى الزيت الى قبل الحد النهائي بملي او اثنين
ذاك الوقت انت الي بنفسك بتعرف الكمية الحقيقة لمقدار زيت سيارتك
والسيفون احذر ثم احذر تستبدل من نفس البنشري
اشتر من الوكاله لانه هو الاصلي والمضمون والاقل سعر
بالنسبة للزيت ومن تجربه شخصية الترا7
سوبر شل ينصح به اهل البناشر لانه مكرر ومعبى في جده والارخص لهم
العماله الاجنبية لا ضمه ولا ضمير اهم شي عنده ما في جيبك

[مستربوب]

شف وأنا اخوك بالنسبه للزيت حط 6علب فقط مع السيفون واحسن زيت بترومين 5/30 يمشيك 7000 كلم
انا سيارتي برادو 2010 وهذا شغلي والسيفون خذ اصلي

[أنصر نبيك]

يالله حيهم ويارب أكتب أجرهم
الحربي
سعيد
شنطة عده
مستر بوب

ماننحرم منكم واذا أحد عنده اضافة ياهلا وسهلا فيه
الوكالات صراحة ما اثق فيهم وأشك في صدقهم واخلاصهم لكن عند البنشري على الاقل
أشوف كلش أمام عيني

[asxz]

افتح كتيب السياره وشف كم ياخذ علبه مع السفون وبدون سيفون

[الرجل الحجري]

لازم تمر على الوكالة اول مرة لاجل يدخلون السيارة في الضمان وتغبر زيت عتدهم وسيفون وسعرهم دبل عن البنشر(لازم رقم الشاص يدخل الكمبيوتر)

[أنصر نبيك]

افتح كتيب السياره وشف كم ياخذ علبه مع السفون وبدون سيفون

ان شاء الله مشكور ياخوي

[أنصر نبيك]

لازم تمر على الوكالة اول مرة لاجل يدخلون السيارة في الضمان وتغبر زيت عتدهم وسيفون وسعرهم دبل عن البنشر(لازم رقم الشاص يدخل الكمبيوتر)
ماهي مشكلة السعر المشكلة ان ريحتهم فاحت وهم يلعبون بسيارات
المسلمين داخل الصيانة ولا حسيب ولا رقيب

[أطلال نجد]

وعليكم السلام ورحمة الله وبركاته

استخدم الزيت الموصى به في كُتيب دليل مالك السيارة بالأرقام و الرموز

بعدين زيت المكينة ما هوب لبن حتى تحبه أو ما تحبه

أتبع تعليمات صانع السيارة حرف بحرف ولا تسلم سيارتك للبنشري و لغيره

و نصيحة لا تأخذ الفلاتر إلا من الوكالة

و الزيت من محلات الجملة أو من الوكالة أضمن و أرخص ولايزيد عن العيار


بالتوفيق ،،،

[مسير عليكم]

الشباب ماقصرو معك بالنصيحه
ونصيحتي لك لا توسوس واجد ترا كلها ست شهور وبتعبيه زيت عافيه:D

اهم شي زي ما قالو الاخوان سيفون اصلي لان بصراحه تعبت ونا ادور بالبناشر ماحد منهم جاب اصلي حتي بترومين فصرت اشتري من الوكاله ارخص واضمن

الزيت الكتلوج يكتبون لك انا كاتبين الافضل حط 30-5 يوم سعرته ولا سعره فووق والبناشر حراميه جملته 21 ويبيعونه 40-45 وخذت 30-10 اوفر وقريب منه
اخيرا انتبه تحط 50-20 ثقيل علي الطرمبه وهذي نصيحه من اكثرمهندسي الوكاله بتقول نصابين انا معك بس خذ راي الي يتفقون عليه ومر اكثر من فرع وهذا الي سويته

واخيرا
الله يعطيك خير هالموتر وخير مافيه ويكفيك شره وشر مافيه ويبارك لك في ما عطاك

[Abdulkarim]

نصيحة اخ ومحب
اهم شي السيفون يكون اصلي
لاني طحت في موقف ما انساه ابداً ودرس لي
( غيرت الزيت عند بترومين والسيفون مو اصلي
وتسببت في قطع الربله الي تركب على السيفون
ومادريت الا انا واقف عند البيت بالزيت يصب والله سلمني
ماهرب الى القليل وانا كنت بسافر على طووول
وللامانه رجعت لشركة بترومين وشيكوا على الموتر وشالوه بسطحه
على حسابهم وكشفوا على المكينه وعوضوني )
المختصر السيفون خذه اصلي من الوكاله وتراه ارخص منهم
وخلك على زيت الوكاله
طبعاً البرادو ٦ سلندر بسيفون ٦ علب و ٢٠٠ ملي
وبدون سيفون ٦ علب
واي استفسار انا حاضر

[باوزير]

عندي برادو 2012 و استعمل زيت لكزس و اغير الزيت مع الفلتر كل 10 الاف كيلو

[أبوتركي الخالدي]

افتح كتيب السياره وشف كم ياخذ علبه مع السفون وبدون سيفون

بالسيفون 6 علب و200 مل

بدون السيفون 5 علب و700 مل

[كومبو]

أفادوك الشباب
بالنسبة لي تجربتي لأغلب مكاين تويوتا
هلي
فشفش
gx460
سيكويا
كامري
بريفيا
أفانزا
+ اكسيبديشن

أيسي دلكو 5w30
لأن سعره مناسب وأرخص من كاسترول

جربت الكاسترول لمدة 5 سنوات ممتاز لكنه غالي

[أنصر نبيك]

أولاً كل عام والجميع بألف خير وصحة وسلامة وتقبل الله منا جميعاً صالح الاعمال
حيا الله الجميع كل باسمه كتيب المالك مكتوب فيه 5w30 و 10w30
ولكن الشائع بكثرة هو 10w30وبأتوكل على الله وأستعمله والفلتر أكيد بأشتري
من الوكالة اما الزيت مايقدرو يغشون لأن الاصلي بيجي عليه ختم الشركة على القصدير
بعد فتح العلبة واللي مو اصلي مايجي عليه ختم الشركة وهي معلومة اتمنى من الجميع
الانتباه لها