المساعد الشخصي الرقمي

مشاهدة النسخة كاملة : اريد وصف واضح لشعيب الشوووووووكي


جنرال 2020
08/12/2006, 01:19 PM
السلام عليكم ورحمة الله وبركاته

ما ابي اطول عليكم

ابي وصف واضح من الرياض لشعيب الشوكي

وهل السيارات العادية تمشي فيه ولا

لازم سياره دفع رباعي

( تراي ماعرف شي عن الشوكي )




اخوكم / جنرال 2020
راعي الكيف
08/12/2006, 01:34 PM
الخ جنرال ... حياك الله

اولا .. شعيب الشوكي في تمير الواقعة على خط القصيم ... حيث انك تفرق لها من هالخط وانت مشمل (( وجهك شمال )) .. يمين ..

لادخلت الديرة ... تعدها بشوي وانت بالخط راح تقطع الشعيب .. وراح يكون على منظرك ..

وبالنسبة للغزات .. فشعيب الشوكي بالذات ماينغزا له إلا بالدفع الرباعي اللي ما عليه الكلام ... ولاهوب اي دفع رباعي يمشي بذاك الشعيب .. لوعورته الشديدة ... وما انصحك انك تغامر وتدخل فيه إلا اذا تحققت ان طريقك مافيه مناقع ... لان مناقعه تجيب لك العيد ... تشوفها تحسب انها قريبة ... وبالاخير تطلع مسبح اولمبي هههههههههه .... ومحاتسيك بغى يروح عشى بيعه عشان هالسالفة !!

اتمنى لك التوفيق في مكان رائع .. بس ترا لازم تصور وتورينا مكانك اللي لقيت ... زين ؟؟

موفق ان شاء الله ... تحياتي لك
فارس بريده
08/12/2006, 11:05 PM
.حياك اخوي جنرال 2020


ما قصر اخونا راعي الكيف لكن عندي لك طريق اكثر سهوله


شف طال عمرك

امسك طريق القصيم وبعد ما تطلع من الرياض بتقريبا 100 كيلوا يجيك مفرق جلاجل
اطلع من عنده يمين (( شرق ))
وخلك على الاسفلت الى الشوكي يجيك اول شي قرية بوضاء ثم مبايض ثم الشعب ثم يصير الشعيب على يمينك

ومارية المدخل محطة ابن قويفل على يدك اليمين

اما الوعوره فهي على حسب وقت هطول الامطار اذا كان المطر ما ابطى يعني قريب اسبوع وانت جاي فلا تقربه الا بجيب وانت حذر مثل ما قال اخوي

اما اذا جفت الارض فخذ راحتك لأن الارض حجريه وليست رمليه
عاشق البران99
08/12/2006, 11:26 PM
من ناحية وعورة الأرض في الشوكي معقولة ،،،

مرة من المرات رحت للشوكي على كابرس ( محدود الموتر في الورشة وما أصبر عن البر ) لكن مع ان الموتر وصلني إلا اني في الرجعة استعجلت وكلت جرف طير الكنداسة ( وخذ إزعااااج ) ،،،
الخلف2010
09/12/2006, 09:19 AM
صدق فارس بريدة بالوصف
ابو عبدالكريم
09/12/2006, 11:49 AM
السلام عليكم ورحمة الله

لعل اخونا جنرال يقصد شعيب الشوكي من جهة مصبه بروضة التنهاة ..

لانه شعيب طويل يبتدي من المناطق اللي ذكروها الأخوان ويصب في التنهاة ، عموماً جهة التنهاة اسهل ويمكن للسيارة الصغيرة الوصول إليه .
الخبوبي
09/12/2006, 11:53 AM
من ناحية وعورة الأرض في الشوكي معقولة ،،،

مرة من المرات رحت للشوكي على كابرس ( محدود الموتر في الورشة وما أصبر عن البر ) لكن مع ان الموتر وصلني إلا اني في الرجعة استعجلت وكلت جرف طير الكنداسة ( وخذ إزعااااج ) ،،،

اضحك الله سنك اخوي عاشق البران :p
جنرال 2020
09/12/2006, 06:49 PM
السلام عليكم ورحمة الله وبركاته


شكلي ابسوي سوات اخوي عاشق البران99

لان سيارتي كورولا

والحقيقه رحت عليها لتنهات وما قصرت

========================

يعني تنصحوني اروح ولا ؟؟؟؟؟؟؟؟؟؟؟؟؟؟؟؟؟


وذا كان لا وين اروح

========================================


(مشكورين على الردود )

اخوكم / جنرال 2020