ماعاد بالصدر الشمالي فضاوه

[ابو ياسر طريف]

السلام عليكم
مساكم الله بالخير جميع
قبل القصيده ودي اسأل الاخ المشرف عن قصيده نزلتها والا ادري وين تم نقلها وماهي الاسباب
اما القصيدة فهي متواضعه ارجو ان تنال بعض الرضى


ياصاحبي راحت سنين الشقاوه
من بعد ماراحت سنين الفتوه

والعمر نصف مالقينا طراوه
والحيل حدر من علاه وعلوه

ابنصحك من باب دين وبداوه
وابنصحك من باب حق الاخوه

ترا الخوي لابد ينقا انقاوه
وحتى تجنب قولة الناس لوه

خل البليد اللي ملته الغباوه
واترك ردي الساس لوفاض جوه

شفلك ولد زيزوم طيب وخاوه
يكفيك من طيبه نباه وسموه

وين النبيه اللي بذهنه صفاوه
يحل مدفون القصيد المموه

من لاعرف فرق السما والسماوه
وش عرفه فرق المرا والمروه

ومن لاسبق كبر الصحن بالحفاوه
ماهو من اهل الطيب لوشب ضوه

جاك الكلام اللي يشيل الغشاوه
من قلب شاعر عكر الوقت جوه

ماعاد بالصدر الشمالي فضاوه
ولا بقى بمخاوي الطيب خوه

من يوم شفت الفار هو والقطاوه
فيها على الذيب المسمى جروه

قامت علينا تستهيش الجراوه
وتنبح لشافتنا بعزمن وقوه

والكبد منهم لاحقتها حماوه
والسيل ماشفنا بروقه ونوه

ناخذ على بعض الليالي علاوه
ونصبر على الواقع ولو زاد سوه


بقلمي / صالح حمدان الطرفاوي
ابن رشيد

[قوافي ( أم نهار )]

عليكم السلام ورحمة الله وبركاته

مساك الله بالنور والسرور

صح لسانك قصيده ذات معاني ونصائح قيمه حفظك الله

بالنسبه للقصيده اللتي تسال عنها بالفعل وجدتها بالمحذوف وأعدتها لخيمة القصائد ولا اذكر انني قمت بحذفها وهذا رابط القصيده :

http://www.mekshat.com/vb/showthread.php?t=653460

ولو لا حظت اخي الفاضل هناك لي رد عليها وهذ يعني ان لا مشكله بالنسبة لو جودها بالخيمه وأذكر اننيي نسقتها ايضاً ،،ولكن ابن آدم خطاء ربما نقلتها سهواَ وأعتذر منك اخي الفاضل..

اشكرك عالتنبيه

تحياتي وتقديري واحترامي

..قوافي..

[الهاجري ج]

صح لسانك يابوياسر ملايين ولافض فوك


ماشاء الله عليك
كتبت فابدعت وأخرجت لنا هذه الدره
والله انها من أجمل ما قرأت من القصايد وأثقلها


بيض الله وجهك


وتقبل أعجابي بالقصيده


وتقديري لك

[ابو ياسر طريف]

اهلا وسهلا بالمشرف واشكرك على اعادة القصيده وعلى سرعة الاستجابه
صح بدنك ويشرفني مرورك
يامرحبا والله بالهاجري
صح بدنك وشهاده اعتز فيها