المساعد الشخصي الرقمي

مشاهدة النسخة كاملة : شراء سيارة



بيراوي وافتخر
04/11/2014, 01:29 AM
محدثكم مقبل على شراء سيارة ومزانيتي كحد اقصى 80 ويفضل انها دون ذلك ومحتار بين ثلاث سيارات
1- هايلوكس دبل ((جديد))
2- سييرا (( مستعمل ))
3-باترول شاص (( مستعمل ))
طبعا استعمالي لها بحكم اني طالب جامعي وبنفس الوقت راح اسافر كثير عليها والكشتات ماهي بواجد واغلبها بشعبان وقليل بالنفود
طبعا افضل الجيوب لكن اسعارها مرتفعة جدا سواء جديد ولا مستعمل
فشوروا علي ايهم افضل من ناحية
1- الخطوط ورساوة الموتر
2- قطع الغيار
3- سعر الشراء
واذا فيه خيارات اخرى بنفس السعر نسعد بمعرفتها

التعـ King ـديل
04/11/2014, 01:58 AM
نفس الترتيب اللي انت كتبته بس خذها بالعكس

بدل من 1 الى 3 خلها من 3 الى 1

تبدا بالشاص وتنتهي بالهايلكس

الشاص النيسان والسييرا اعتقد هذولي مناسبه لك الهايلكس خله برا التشكيله

الشاص النيسان سياره بر رقم 1 مقارنه بالسييرا خاصه من ناحيه الاعطال ولكن ميزه السييرا مريح اكثر من الشاص رغم ان الشاص مريح ولكن كمقارنه بين الاثنين

ارتفاعات الشاص وتعليقه ومواصفاته اشوف انه يستحق اختيارك ويستحق الرقم 1

السييرا مريح وطامن ووجهيته كبيره ممكن تسبب لك مشاكل في البر ولكن مع ذلك يستحق الرقم 2

الهايلكس مقارنه بالسيارتين اللي فوق يعتبر الاضعف الاقل راحه الاقل مواصفات لذلك انا قلت لك خله برا التشكيله

غار بن شعلان
04/11/2014, 04:48 AM
السلام عليكم

مابعد كلام اخونا كنق التعديل شي اعطاك الزبده الهايلكس موب تطلعه من التشكيله بس الا عطه مستحقاته ونسقه ههههه

لكن بما انك منت راعي بر واجد انا ارشح السييرا بعدين الشاص نيسان

السييرا ديره وبر خفيف واجمل منظر وبالخط ملك راحه وعزم ونشاط

موفق خير

الصيادالمليح
04/11/2014, 02:18 PM
بما أنك ذكرت الهايلكس دبل و جديدة و البقية كلها مستعملة

فأنا أرشح لك الهايلكس لأنها بتكون جديدة وتحت يدك

أما البقية المستعملة فما تدري وش جاها من خراب أو يكون فيه خراب مخفي وما باعها الا لعلة فيها

و هي مثل البطيخة يا تجيك حمرا بس بدون حلا و لا حلا بس ماهي حمرا

و تبلش بالصيانة ووجع الراس و انت طالب جامعي ومنت فاضي للورش و وجع القلب

و فيه عندك الايسوزو ديماكس ديزل قوة وعزم و الديزل رخيص
و النيسان اكستيرا جيدة و اعتمادية


ولا تنسى صلاة الاستخارة قبل كل شيء

عايض الاحمدي
04/11/2014, 03:17 PM
تبي شوري خذ لك ددسن بس وكالة وفقا بالباقي و عدل ب 5 آلاف اذا انت
راعي بر أو قل مساعدات وكراسي وكراسي حديد لسست الخلفيه
والله جود الهايلكس الآن زي الددسن بل الددسن سعره معقول وعملي أكثر
ومشاكله هيا هيا ما تغيرت
وشكراً

بحر الاشواق
04/11/2014, 05:22 PM
الشباب الى يقارنون بين السيرا والباترول الحوض بالراحه
بحكم اني من ملاك السيرا الا ان الباترول اريح من السيرا بشكل واضح اقصد اليايات مع ان السيرا مريح لكن اقل راحه
لكن من حيث القوة والعزل والتشطيبات والاقتصاد والشكل كلها من صالح السيرا

---ابو يوسف-
04/11/2014, 05:51 PM
الامريكي ممتاز بالراحه ويكد وارشح لك f150 فورد ملك التركات الامريكيه

وعندك الشاص النيسان ممتاز واعتمادي ومريح بس غماره ويشبل اثنين بس

الهايلوكس ممتازه اعتماديه غمارتين وماسكه سعره ولكن من هانوع ارشح لك ايسوزو اريح من الهايلوكس

وجهت نظري انا مجرب الهايلوكس والفورد والجيوب افضل الفورد عليهن

أبو براك 511
04/11/2014, 06:30 PM
خذ هايلكس والله يوفقك

محب الجهاد
05/11/2014, 11:59 AM
الباترول الشاص افضل لك وكد ومد

طلال مكشاتي
05/11/2014, 01:03 PM
ارشح لك ونيت السييرا

يكفيني نظرة
05/11/2014, 01:31 PM
انا ارشح الفورد اف 150 قطع غيار رخيص والموتر يتحمل يعيبه حجمه كبير زي السييرا .