ابي ايعادة ترميم سياره عثا فيها الزمن

[(سكود)]

يا اخوان منسوبي مكشات الاعزاء عندي جيب كان عندنا في القريه اذكره وانا عمري خمس سنوات يسمونه التولتي
قديم بالحيل وذك الزمان ماكان في القريه الى ذالموتر وتشوف اهل القريه يسرحون عليه في الصباح للسوق الي راكب
على الكبوت والي على الرفارف مالكم في تطويل السالفه المهم انهم ذبحو الموتر كل يوم والشيبان مكبتنين في ظهره
لين خبط الموتر ولا ادري وش ماركته هونيسان ولا مريكي واستمارته بسم الامير محمد بن سعود الكبير رحمه الله
والدينا والديكم وابي ارممه دلوني على المرممين ونا ماطولت عليكم السالفه الا الموتر يستاهل ون كان ترميمه سهل
ولا باابيعه وكما قال راعي المثل وانتم تكرمون الكوي في مقفا الميت حرام وسلامتكم

[عبدالرحمن]

من تجربه لترميم بونتياك 84 كلفتني تقريبا 6000 ريال والسياره ماشيه تمام لكن ما اضمن انها توصلني 20 كيلو على بعضها , احتمال تخرب في اي لحظه لانها فتره من الوقت ما اتحركت وكل شي فيها تأكل وحاولت ابيعها ما قبلها الا التشليح ب 1200 ريال وتسقيط الاستماره علي ( 400 ريال ) . والخرابات البسيطه مثل سير ينقطع او بوجي يحتاج تغيير و شمعات والتماسات خذ وخل .

البيت والسياره عمارها الاستخدام الا اذا كانت جديده .