السياره سرقت اليوم .... كيف نتجنب سرقة السيارات ....؟

[شـهـاب]

بسم الله الرحمن الرحيم


السلام عليكم ورحمة الله وبركاته


الحمد لله على قضائه وقدره


اليوم الفجر سرقت سيارة ولد عمي وهي جيب باترول ربع مديله 97

وكان واقف امام الباب والساعه 2 باليل كان موجود


فسبحان الله هناك فئه تهوى وتعشق الحرام ( السرقات )

ولم تقف عند حدود الله

والغريب مع انتشار ظاهرت سرقات السيارات ((( انني ))) لم اسمع ان فلان سرق سياره واقيم عليه الحد قص اليد او اي حد بل اغلب السيارات توجد واقفه اما على الحد او حوله

فلو سمعنا الحدود تنشر بيان عيان امام الناس لخاف هؤلا الشرذمه.

فما نقول الا يجيبه الله ان شاء الله

والحلال ما يضيع ..

-----

الســؤال الي اريده ويفيدنا ان شاء الله

هل هناك طرق تقي سيارتك بعد الله من السرقه

يعني مثل جهاز الانذار او غيره

موضوع يطرح للنقاش والفايده

ولا تنسون تدعون ان السياره يجيبه الله

والامل بالله كبير
وهو حسبنا ومرجعنا سبحانه

- عقبال ما نبشركم بلقيت الموتر ان شاء الله ...

اخوكم شهاب

[فتى الدهناء]

الله المستعـــــــان

[شـهـاب]

الله المستعـــــــان


وعليـــــــــــــــــــــــه التكلان

[بو نوير]

الله يعوض ولد عمك ان شاء الله والسارق راح يجيله يوم
يمهل ولا يهمل سبحانه

[aziz2727]

صحيح كلامك بس اعتقد ان للشرعة نظره تقصر معرفنا بها
ولاكن الكثير منا تسرق سيارته بسبب الاهمال اما ان يوقف السيارة والمفتاح عليها او للناس الي عندهم مواقف في بيوتهم ولا يوقفون السياره داخلها

بس فيه جهاز انتش مؤخرا" يوضع في السيارة يعمل على شريحة الجوال يستطيع من خلاله معرفة مكان مكان السياره وكذلك اطفاء المحرك

وان الله يرد لود عمك سيارته .

[Vortech]

الله لا يبلانا

الله يخلف على خـــويك

ويا اخوي رح لمحلات الزينه والاكسسوارات وقل لهم ابي جهاز انذار اركبه في السيساره

وامورك خالصه

[شـهـاب]

والامل بالله كبير
وهو حسبنا ومرجعنا سبحانه

- عقبال ما نبشركم بلقيت الموتر ان شاء الله ...



اخوكم شهاب




السلام عليكم ورحمة الله وبركاته



ازف اليكم البشرى ان الجيب لقينا اليوم في قرية السفن شمال حائل

وقد فككة كفراته والجنوط والبطاريه واخوذ منه بعض الامور

والحمد لله العوض ولا القطيعة


احمد الله حمداً كثيراً على نعمه التي لا تعد ولا تحصى فنحن افضل من غيرنا بكثير

الحمد لله

الحمد لله

[المميـز]

الحمد لله على سلامة الموتر

خله يركب له جهاز انذار من الزينه

[فتى الدهناء]

الحمد لله ......

[ابوعبدالمجيد]

قدر الله وما شاء فعل وان شاء الله ترجع لصاحبها وهؤلاء كما ذكرت ما لهم الا قطع اليد حتى لا تتكرر هذه المآسي على الامة والله اعلم واحكم

[شـهـاب]

الله يجزاكم خير على ردودكم ومروركم


اخوي عبد المجيد شكلك خذيت غفوه وتعديت ردي الي فوق ههههه

[المدرعم 2]

الحلال مايضيع لاكن لازم رادع لهذة الشرذمة

[aziz2727]

ما شاء الله ما شاء الله
مبروك وعلى قولة القايل العوض ولا القطيعه
وقل لود عمك يبيلها عشتو ولا تنسا تعزمنا معك ها ها ها

[ابو عادل1]

الحمد لله على العقلان

وعلى الله التكلان

ولعلها أخر الاحزان

[البرق]

سبحان الله الحلال مايضيع

[altheeeb79]

بسم الله الرحمن الرحيم000 ياصباح الخيرات000 اقروأ هذه القصه والعهده على الراوي(نقلتها مثل ماسمعتها) يقال فيه واحد عنده لاندكروزر جديد وكان دائما يوقف الموتر داخل البيت وخصوصا بالليل 0جاء مره لبيته باليل ويوم بغى يدخل السياره لقى باب الكراج مسدود 0كان فيه سياره واقفه قدام باب مدخل السياره 0فكر داخل نفسه يمكن هذه السياره تتبع لآحد الجيران (من طيبة قلبه ) قال اوقف السياره عند الباب وبعد شوى يبغى يروح اللى عند جاري ويوخر سيارته عن بابي 0مرت فتره بسيطه وقام الرجال يبغى يشوف السياره اللى واقفه قدام الباب راحت والا(لا) عشان يدخل موتره000 مع الاسف لاحصل موتره ولا حصل السياره اللى كانت واقفه(الله يخلف عليه وعلى جميع المسلمين00 كان الموضوع كله خطه من الحراميه عشان يسرقون موتره (لذلك ياشباب وشيبان مكشات وغيره اللى يطلع على الموضوع انتبهوا انتبهوا لاتتجاهل أي ملاحظه ولا تستهين بأي شئ تشوفه ولا تكون نيتك طيبه بزياده بأي غريب 0000 احنا في وقت عسى الله ان يستر علينا وعلى اولادنا ومحارمنا وحلالنا ومنازلنا وعلى كل من يخاف الله ويرجوا ماعنده0 حدود الله لاتقام فانتظروا الكثير من الفساد(لانقول انه لايوجد امن ولكن نقول انه يحتاج الى تكثيييييييييييييييييييييييييييييف وتكثيييييييييييييييف فيه ناس تخاف الله ومستعدين للتطوع مع الجهات الامنيه وبدون مقابل (يتطوعون للمراقبه والتبليغ والمتابعه الخفيه ولكن يجب التجاوب من الجهات الامنيه فورا وفي الحال قبل ان يقع هذا المتطوع في مشاكل في غنى عنها000 ويوجد طرق اخرى للتطوع ولا احتاج الى توضيحها لان اللي يطلع على موقعنا هم مثل حالتي لاحول له ولا قوه0000والله المستعان

[الابرق1]

الحمدلله على العقلان.

[شـهـاب]

الحمد لله على كل حال

[almobd3]

مايقام الحد الا اذا كان الحرامي سارق من حرز
يعني سارق من محل او سارق سيارة داخل البيت
اما اذا كانت السيارة عند البيت يعني بالشارع
فهذي فيها تعزير

[مكيشيت]

بسم الله الرحمن الرحيم

انا يا اخوان سرقت سيارتي مرتين ومن نفس المكان

وفي كل مرة اجدها مرمية في احد الشوارع بعد ما حاسوها لصوص التفحيط اللي اسأل الله ان يشل ايديهم وارجلهم بعد ان تساهلت السلطات في ردع هؤلاء الشرذمة

يا اخوان الوضع تدهور وماهو زي الاول كنا نادرا ما نسمع عن سرقة سيارة واذا رحت تبلغ تجد حالة استنفار قصوى وبحث وتحري

اما الان صار الوضع عادي عند الاقسام فعندما سرقت سيارتي المرة الاولى ذهبت لابلغ وانا في حالة يرثى لها واذا بالضابط بكل برود وهو مستلقي على كرسيه يقول ماهو انت لحالك اللي انسرقت سيارته اليوم انت خامس واحد تسرق سيارته وكان هذا الكلام حوالي الساعة السابعة صباحا يعني بعد الظهر كم ستكون وصلت الكمية؟؟؟؟؟؟؟؟؟

واللي يقول يقام الحد على سرقة المحرز المفروض ان السارة اللي واقفه عند البيت ولاهي شغالة تكون محرزة والا وين احط السيارة فوق السطح يعني

يعني اللي ساكنين في شقق مثلي ولا يوجد مكان للسيارة بالداخل وش يسوي؟؟؟؟؟؟؟؟؟

وفي المرة الثانية انسرقت ورحت ابلغ وكانت الاستمارة داخل السيارة (( لا احد يقول ليش خليتها بالسيارة انا كذا احب اخليها بالسيارة )) واذا بالضابط يقول ما اقدر اسوي لك بلاغ الا لين تجيب الاستمارة

الا ان توسط لي احد الاقارب كان يعرف عسكري بالقسم وكلم الضابط ووافق انه يسوي بلاغ (( قوة واسطة ))

ولا تسألون عن الاجراءات والروتين الطويل والممل والمرهق والمتعب اذا لقيت السيارة كنت احسب انهم بيقلون خذ سيارتك وتوكل على الله لا ياحبيبي اطلع فوق وانزل تحت ووقع من الضابط الفلاني ورح للضابط العلاني ورح لوحدة المتابعة ورح ورح ورح اعوذ بالله هذا كله تم والمجرم السارق متسدح في بيت امه يضرب بالخمس ويفكر في السيارة التالية اللي بيسرقها وش شكلها ووش لونها ووين مكانها

ادري اني طولت عليكم ولكن خذو هذه القصة التي رواها لي احد الاخوان
يقول ان قريب له دخل الى منزله بعد ان اوقف سيارته اللاند كروزر الي مشتريها من مده قصيرة وبعد دقائق نظر من النافذة الا والسيارة غير موجودة فجن جنونه طبعا هو يعلم عن سرقة السيارات وخاصة الجيوب يعني ان قعد يومين مالقاها خلاص عليه العوض ومنه العوض فماذا تتوقعون انه فعل؟؟؟

اتصل على الشرطة وقال كنت في سيارتي امام المنزل فهجم علي اثنين ملثمين ومعهم اسلحة وانزلوني من السيارة ومعهم اكياس سود كبيرة اظنها اسلحة ومتفجرات وهربوا

وماهي الا ساعتين فقط حتى اتصلوا عليه وقالوا تعال الى المكان الفلاني واذا بسيارته موجودة وقبض على الشخصين وطلبوا منه التعرف عليهم فقال لا ادري فهم كانوا ملثمين ولم ارى اشكالهم واخذوا بياناته وسلموه سيارته وتوهقوا هالحراميه
صحيح انه فيه تجني على الشخصين لانه يمكن يعاملوا كأرهابيين ويروحون في خرايطها ولكن يستاهلون ماجاهم

الله يسترعلينا من اللي جاي