اعطوني رأيكم بالسعر بخصوص المجلس التراثي [الأرشيف]

مشاهدة النسخة كاملة : اعطوني رأيكم بالسعر بخصوص المجلس التراثي

عضو فعال14

10/11/2014, 08:38 PM

السلام عليكم
حصلت سوري يقول بعمل لك الملحق التراثي بوية طينيه وجبس تراثي يقول ب8300 بدون مشب يقول المشب يكلف عليك مابين 1500 الى 3000
طبعا مساحة الملحق 4×6
ما ادري سعره زين ولا لا
انا خبرتي ضعيفه جداً بهذي الامور

ابوصالح3

10/11/2014, 08:54 PM

8300 على غرفة 4في 6 احس انه غالي شوي

وش بيعمل لك حزام جبس ولون ترابي او طيني

لاتستعجل ,,,اكتب في قوقل مملكة التراث او المملكة للتراث وتواصل معهم وشف الاسعار والله يوفقك

فتى الوادي

10/11/2014, 09:04 PM

شغل يد ب 8300 رخيص اذا فيها (بناء وتلييس وبوية طينية وجبس ) .

عضو فعال14

10/11/2014, 09:06 PM

الملحق جاهز اقصد مبني.. لكن بحوله لملحق تراثي ي
مملكة التراث اتصلت عليهم قالوا تقريباً 15 الف يكلف يمكن يزود المبلغ او ينقص

عضو فعال14

10/11/2014, 10:13 PM

بإنتظار البقية واللي عنده رقم مقاول سعره يب وشغله نظيف ياليت يتفضل برسالة على الخاص يرسل رقمه

ابولولو

11/11/2014, 12:35 AM

يارجال غالي مره مره

صطل البويه مشاشكو طين تبع ألجزيره ١٣٠ ريال ويمكن تحتاج براميل بويه من ٦الين ٩ تقريبآ ويمكن تزيد شوي او تنقص على حسب المعلم

جيب لك معلم بويه ان غلبك ب ٢٠٠ ريال يزينه لك وهو سهل مره مره مافيه فن يخلط البويه مع التبن بوجة العدو وبيدة

الجبص رخيص متره من ٤٠ الين ٥٠ ريال اي شكل وديكور تبيه

ملحق ٤/٦ =٢٤في ٤٠ ريال ٩٦٠ شفت الدعوة رخيصه بس العماله تبالغ وتستغل المواطن
تراء الشغلة بسيطه

وإذا تبي تريح نفسك هذا معلم باكستاني لي ٢٠ سنه اتعامل معه ٠٥٠١٣٢٣١٨٠. اسمه مؤمن قلة من طرف ابو محمد منصور المقاول

وقلة اذا عندك معلم بويه على الطريق يجيبه لك

والسوريين أكثرهم يبالغون بالسعر خاصه اذا شافوا واحد خشيم مره فرصه لهم المشب يكلف مع الرخام البلدي التعبان من ٢٠٠٠ الى ٢٥٠

اذا أنت باالرياض الامر سهل مر الصناعية اللي جنوب سوق حراج ابن قاسم وتلقي مئه معلم يطّلع معك وسعر خيالي والجبص موجود عندهم بالمصانع حمل واتفق واشتغل خخخخخ

ونصيحة سوي اول الجبص لانه يرسخ واجد وبعدين البويه

عضو فعال14

11/11/2014, 05:56 AM

جزاك الله خير ابو لولوه
اليوم بتصل على الاخ مؤمن
اكرر شكري لك

عاشق دياري

11/11/2014, 10:03 AM

اخي الغالي

انا عندي ملحق ٤*٥

سويت السقف جريد وأثل
والبوية مشاشكو طينية ( افضل من الطين )
وسويت حزام جبسي لكامل الغرفة
وسويت المشب طوب احمر ومن داخل رفوف جبسية للدلال والمعاميل
وأيضا زي الرفوف داخل الجدار ٤ حبات
وحزام جبسي حول الدريشة والباب .

كانت التكلفة ٩٠٠٠

وهذا رقمي اذا ترغب بصور لمراحل التجهيز وبعد الانتهاء لعلها تفيدك .

٠٥٣٤٣١١١٦١
اخوك فايز الشهري

alking

11/11/2014, 10:32 AM

غالي جداااا انتبه

بن نويشر

11/11/2014, 11:10 AM

يا خوي .. انت كل شوي فاتح موضوع جديد ؟؟!!
خلك في موضوعك الأول ، المهم
هالسوري خراط .. قل له وين مكتبك ،، هذا طرقي يتفق معك ويروح يدور عماله ويتفق معهم ويجيبهم لك ..

في الغالب هالأمور يبغى لك يمني أو رجل كبير في السن
أولاً .. لا تسلم المجلس ألا بعد ما تشوف شغله .
ثانياً .. اتفق معه على كل شيئ وقيده بإتفاق وعقد .
ثالثاً .. عليك بالسؤال من أهل الخبرة والأختصاص .

شغل الطين مكلف جداً ..
اولاً .. قيمة التكسير .
ثانياً .. قيمة التنفيذ .
ثالثاً .. قيمة الفرش .

أحرص على ما يلي ..
- ارتفاع السقف .
- مكان جلوس المعزب (راعي المجلس) .
- مساحة المشب ، والكمار وعدد الأرفف
- المشب يكون على مستوى الأرض أم مرتفع أم نازل (كلا ورغبته)
- المرابيع تكون عراض ويابس ولا تكون قليلة .
- يجب يكون الجريد مدقوق بمسار صلب ومتلاصق جنباً لجنب .
- الطين يجب أن يتخمر مع التبن تخميراً لعدة أيام .
- الديكور والأحزمه خليط من الجص والجبس
- لا تنسى عمل مغسلة وصنبور ماء .
- أسس لك دواليب لحفظ الفناجيل والبيالات .
- سلك مروحة للمدخنه .
- قم بإزالة البلاط والدفان لكي يكون الدخول نزولاً لكي يعطي منظراً جميلاً.
- قم بتأسيس الأفياش خط 110-220 بجوار مجلسك .
- الجدار الطيني (من طبقتين) أساس وديكور .
- رش المجلس بعد الأنتهاء بمادة غراء للجدار للمحافظة عليه وكذلك السقف .
- قم برش السقف ووضع المبيدات قبل الغلق .
- تجنب وضع السبوت لايت واستبدالها بالسراج أو النجف ، وقم بتوزيع الإضاءة بشكل فني .
- الأرفف بعد تثبيتها بالطين ، قم بكسوها بالجص .
- الكمار كلما كان 3 درف كان أجمل .
- وضع درجة داخلية من الطين والجص
- وضع حزام حول الباب والشبابيك .

هذا ما لدي وأي استفسار أنا جاهز ..

مطر وسم

12/11/2014, 02:00 PM

غالي جداً

الاغراض كلها يمكن تكلف 1500 الى 2000 بويه وجبس وشغل العمال يمكن 1000

يعني الدعوه كلها 3000 الى 3500 ما تتعدى السعر هذا

وبلاش نصير مضحكه للاجانب يلعبون علينا

تحياتي للجميع

عضو فعال14

12/11/2014, 04:27 PM

جزاكم الله خير جميعاً كلن بإسمه
وتم التواصل مع مؤمن اخوي ابو لولوه وقالي ب6500
ومدري سعره طيب مناسب يعني اتوكل على الله ولا فيه امكانيه احصل تحت 6000
لاني اتصلت على سعوديين وللاسف واحد قالي15 الف والثاني ب 17
مبالغ كبيره الصراحه

ابولولو

13/11/2014, 09:26 PM

عضو فعال14

15/11/2014, 05:38 PM

ابولولو

16/11/2014, 02:44 AM

جزاك الله خير ابو لولو اتفقت مع واحد يسوي لي كامل ب5000
طبعا الاجباس والديكورات حقت السقف والمشب والبوية الطينيه
وهذا ارخص واحد شفته البقية مابين 6500 الى 10الاف تقريباً
وفيه سعوديين توقعت انهم بيكونون منطقيين لقيتهم ب17 الف و15 الف
...
لكن الان ابي اقتراحكم المشب كم احطه متر ونص او متر

ويآك ياغالي ماسوينا الأ الوأجب ودي أخدمك اكثر بس الحمدلله انك لقيت واتفقت

مبروك عليك

ولا تستغرب الأسعار بالبلد ابدآ لأنهم يحصلون ناس سجذ وغشامين مره

الواحد اذا صار غشيم ماهب عيب ولا هو حرام يسئل كلنا كانا غشمان وتعلمنا ولله الحمد والمنه

اهم شي يحط لك بويه ألجزيره لانه لونه جميل وقريب من الطين فيه بويات طين البرميل 70 ريال تعبان مره مره لونه باهت وفاتح اذا رفض انت زِد شوي كل الشغلة 300. او 400

لو تبي شوري كل ماكبر كان اجمل وانظر للعين ودي تحطه 2م لاتستغرب ملحقي 4في 4 وحاطه 2 ونصف

ونصيحة ونصيحة خله يكثر التبن بوجه العدو جب له أنت الربطة كبيره يمكن ١٠ ريال بسوق الغنم او عند اي واحد غنم تعرفه وإذا مالقيت أبشر عندي لو تبي ١٠ هههههه

عضو فعال14

16/11/2014, 08:45 PM

جزاك الله خير ابو لولو
المشب بحطه مترين بإذن الله بعد ماكنت ناوي متر ونص ..مترين بكم يكون طيب كمساحه
وهل تنصحني عمل مغسله صغيره عند المشب وتكون الموية حار وبارد او بارد يكفي..؟

ابولولو

16/11/2014, 11:05 PM

سعره الحين أتوقع من ١٥٠٠ الين ٢٥٠٠ رخام بلدي شكله تعبان

المغسلة ظروريه جدآ لك وحار وبارد شي راجعلك اذا مايكلف عليك حط حار بارد لانه تبي تزيد عليك المصاريف

يبيلك سخانه وخطين مواطير حار وبارد وأكواع ولي سخانه وبعض الأمور

انت ومزاجك ومزانيتك

عضو فعال14

17/11/2014, 05:16 PM

جزاك الله خير
طيب طول المشب مع العرض اخليه كم
وهل تنصحني اخليه رخامي ولا عادي

ابولولو

17/11/2014, 08:19 PM

جزاك الله خير
طيب طول المشب مع العرض اخليه كم
وهل تنصحني اخليه رخامي ولا عادي

ويأكل ياشيخ

مترين كويس

هههه حلوه رخامي

الرخامي يبي يكلف وأجد وانت رجال تبي التوفير :eek::eek:

عضو فعال14

17/11/2014, 10:20 PM

هههههههههه صح بس كم بيكلف يمكن اغير قناعتي :)
يعني مترين في مترين اخليه
والانارة وش تنصحني اخليها

ابولولو

18/11/2014, 12:58 AM

هههههههههه صح بس كم بيكلف يمكن اغير قناعتي :)
يعني مترين في مترين اخليه
والانارة وش تنصحني اخليها

دوم هاالظحكه :D

شف الصلاة خيرآ من النوم

الرخام جميل ولَك وللزمن بس الزين مكلف ونصيحة لاتحط رخام بلدي صراحه دمار والطوب الأحمر اجمل منه

حط رخام إيطالي سيسليا او رخام روزا :good:

ولا ادري فيه إيطالي ألواح عريض للمشب

قوافي ( أم نهار )

18/11/2014, 01:34 AM

عضو فعال14

18/11/2014, 05:49 AM

جزاك الله خير ابو لولو ماقصرت والله معي من بداية الموضوع ولا يهون بقية الاخوان كلن بإسمه
اقتراحتكم تتنفذ :)

فتى الوادي

18/11/2014, 06:59 AM

الأن السعر هل شامل للبناء والتلييس والبوية ... الخ
حدد وش المطلوب .؟
هل المشب جاهز .. فقط تريد استكماله ؟ وش الأغراض اللي تبي تستكملها ؟ ممكن تصور وتنزل الصور هنا ؟
أو تريد ترميم مشب موجود ؟
حدد المساحة والأطوال ...

عضو فعال14

18/11/2014, 11:39 AM

البناء جاهز لكنه ملحق عادي.. اللي بسويه بوية حقت الجزيره مع الاجباس والديكورات والمشب
انا بدأت بالعمل

ابولولو

18/11/2014, 03:48 PM

السلام عليكم ورحمة الله وبركاته

حياكم الله اخواني الافاضل

بصراحه لالي بالبناء ولا غيره ولكن من باب الاطلاع تابعت الموضوع ..

واقدم شكري للجميع عامه وللفاضل ابو لولو خاصه لما يقوم به من طيبة نفس وسمواخلاق ومساعدة صاحب الموضوع للتوصل لأفضل الحلول لبناء المجلس ..

بارك الله بكم وحفظكم الله

تحياتي وتقديري واحترامي

عليكم السلام ورحمة الله وبركاته

حياك الله أختنا الفاضله قوافي

هذا واجب كل مسلم لآخوه المسلم والاعضاء جميعآ يستاهلون كل خير وأكثر الأعضاء

متساعدين ومتعاونون ولله الحمد مع بعض وبعضهم ماشاء الله يهدي ويعطي

بارك الله فيك ونفع بك وهذا من طيب خلقك

دمت بحفظ المولى عزوجل

ابولولو

18/11/2014, 03:56 PM

جزاك الله خير ابو لولو ماقصرت والله معي من بداية الموضوع ولا يهون بقية الاخوان كلن بإسمه
اقتراحتكم تتنفذ :)

وياك ماسوينا شي كله كلام في كلام :)

اهم شي انه يطّلع الشغل زين وتقعد فيه وانت مبسوط وسعيد :good:

وترأس حاضر بااي سوْال لا تتحرج حنا لبعض بالمنتدي الطيب والصرح النافع بارك الله بالجميع

ودي انك تحط وزره تحت جبص دار مادأر منظره جميل وأنيق مع الطين بارتفاع 60 سم

عضو فعال14

18/11/2014, 07:32 PM

ماتقصر ابو لولو
طيب الانوار وش افضل السراج التقليدي ولا غيره
واحط نجفات ولا مايحتاج

ابولولو

18/11/2014, 10:55 PM

http://imagizer.imageshack.com/img538/4917/6oaVdB.jpg

هذا صورت الوزره او الحزام يجمل المكان ويحفظ المساند والشمغ من التبن بوجه العدو

ابولولو

18/11/2014, 11:01 PM

ماتقصر ابو لولو
طيب الانوار وش افضل السراج التقليدي ولا غيره
واحط نجفات ولا مايحتاج

غلطان اذا حطيت نور او نجفات خله شمع ازين وتوفر كهرب :D:D

السرج ولا النجف زين منظرهن ماهب زين

فيه بشارع الملز انارة جميلة جدآ مر وشف الفرحه بلاش :good2:

ابولولو

18/11/2014, 11:07 PM

http://imagizer.imageshack.com/img673/9967/VvAtjs.jpghttp://http://imagizer.imageshack.com/img673/9967/VvAtjs.jpg

هذى اللمبه ويجي منه ثلاثي

ابولولو

18/11/2014, 11:12 PM

http://imagizer.imageshack.com/img912/2762/pevwaq.jpghttp://

فيه مشكلة بتحميل باقي الصور

ابولولو

19/11/2014, 12:11 AM

http://imagizer.imageshack.com/img674/1573/gy9Zod.jpg[QUOTE=ابولولو;10318855]http://imagizer.imageshack.com/img912/2762/pevwaq.jpghttp://

لمبه ثلاثيه أناره قويه وجميلة

عضو فعال14

19/11/2014, 05:07 PM

جزاك الله خير ابو لولو مبدع وراعي ذووووووق والله

ابولولو

19/11/2014, 11:21 PM

جزاك الله خير ابو لولو مبدع وراعي ذووووووق والله

الحمدلله فضل من الله سبحان

هذا من ذوقك ولطفك

عضو فعال14

23/11/2014, 01:25 PM

المشب الان كيف اعمله
العامل وضع بالمشب حديده كامله مع الكفرات يعني تشب النار فوق هذي الحديده وتدخل الحديده داخل المشب كامله علشان الدخان..مدري الطريقه صحيحه ولا لا وبحاول انزل له صورة

عضو فعال14

23/11/2014, 01:40 PM

هذي الصور

http://im77.gulfup.com/ScvliF.jpg

http://im77.gulfup.com/t1PfSe.jpg

ابولولو

23/11/2014, 06:24 PM

هذي الصور

http://im77.gulfup.com/ScvliF.jpg

http://im77.gulfup.com/t1PfSe.jpg

ماشاءالله تبارك الله ممتاز

نعم صحيح اذا خُف الدخان او جمرت الضو تسحبه عليك

الله يهنئك فيك ويعطيك خيره ويكفيك شر هاالنهار

ابولولو

23/11/2014, 06:30 PM

http://imagizer.imageshack.com/img633/6831/BnFK1D.jpghttp://imagizer.imageshack.com/img540/1608/79o2Ex.jpg

هذا زي اللي عندك ماعليك الا تسحبه اذا جمر أنت ومزاجك