المساعد الشخصي الرقمي

مشاهدة النسخة كاملة : الفزعه تكفون يارجال مكشات



E Teacher
18/11/2014, 11:00 AM
السلام عليكم ورحمة الله وبركانه ونبغا المشوره بعد الاستخاره
ان شاء الله نويت على برادو 6 سلندر باذن الله عزوجل جديد
ومحتار بين القير العايدي والاتوماتيك والفرق فقط 6000 ريال بينهم بسيط جدا
انا عارف ان الاتوماتيك اريح واسهل وخاصة داخل المدينه ولكن!!
هل القير العايدي اقوى واصبر وعطلاته اقل من الاوتوماتيك؟
لو كنت مكاني وطلعاتك محدوده للبر مثلي انا كل شهر مره اكشت بالبر هل تختار العايدي او الاوتو؟
علما ان طول عمري اسوق العايدي من 20 سنه واصبح جزء لا يتجزء مني هههههههههههه
وناس تمدح العايدي بالصبر وناس تقول كلهم مثل بعض بالصبر والعلم عند الله ثم اعضاء مكشات اهل الحل والعقد والمشوره والنصيحه الله لا يخلينا منكم

الطنب
18/11/2014, 11:14 AM
توكل على الله وخذه واختار التماتيك لانه يجي تماتيك وقير عادي في نفس الوقت ولا دخلت رمل استخدم القير العادي وعز الله انه موتر كان معي من 2010 اربع سنوات ماشفت منه الا المعزه

dhoomi
18/11/2014, 11:51 AM
98% من البرادو اللي بالشوارع تماتيك وماقد شفت خرابات منه
نادر مايخرب وسياره تستاهل كل قرش به الحقيقه..والقير العادي هو متعة القياده فقـط ومسألة خرابات هذي خرابيط
ومبروك مقدماً

E Teacher
18/11/2014, 05:36 PM
الطنب يا عل عيني ماتبكيك وشكرا على تفاعلك وانت اول شخص يؤيد الاوتو
بارك الله فيك ويحفظك لعين ترجيك

E Teacher
18/11/2014, 05:38 PM
دهومي ياسليل القرومي لا خلا ولا عدم ومعاك حق اغلبها اوتوماتيك
بارك الله فيك يالسنافي

الفهيد بدر
18/11/2014, 08:14 PM
خذ تماتيك وتوكل

اليامي قطر
18/11/2014, 08:53 PM
كلها تمام ومايلحقها عذروب ولانقص :)

لكن التماتيك كل 40 بتغير زيته وقازقيت وفلتر لازم

واذا ماغيرته راح تضر في عمر القير معكـ مع الطول

بعكس القير العادي انسى تغير زيته ابد ابد استعمله طول العمر

غير زيت المينه فقط ودق سلف

ولك حريه الاختيار :)

اسبيدر مان
18/11/2014, 09:07 PM
انصحك بالاوتو كثيرين اعرفهم يستخدمونه وماصار فيه اي مشاكل
احد اقاربي معه 2011 يطلع من الكويت الى قطر ينزل عياله هناك ويتله للسعوديه يجلس بالرياض كم يوم وبعدين يطلع للقصيم ويجلس كم يوم وبعدين يتله للقطر ياخذ عياله وعلى الكويت ماشاء الله كل ثلاث شهور او اربع شهور مره هذا غير مشاوير الصيفيه
العادي بعد فترة استخدام يحتاج تغيير فحمة القير بسبب انه دفع رباعي مستمر
ارجع لمنتدى تايوتا قسم البرادو يفيدونك اكثر

ايضا احرص على الى يجي اسبير علاقي وتانكيين بنزين اظنه متواجد عند اليحي والبازعي جميل شكله وممكن تستفيد من توانك البنزين
والله يكتب لك الى فيه الخير

E Teacher
18/11/2014, 09:24 PM
الاخ الفهيد بدر شكرا لردك ومشاركتك ياسنايدي
اليامي قطر صدقت كل اربعين لازم تشييك الله لا يحرمنا منك وانت من مؤيدين العايدي
سبايدر تجربه رائعه ومثال رائع الله يحرم وجيهكم على النار يابعد راسي

محمد ابن عيد
18/11/2014, 09:45 PM
توكل ع الله
لكن كم مديل اللي تبيه
و خذلك تماتيك اريحلك

E Teacher
18/11/2014, 09:47 PM
موديل 2015
وشكرا على نصيحتك

بن الشمال
19/11/2014, 12:28 AM
الأتوماتيك أفضل خاصة وأن الأعطال شبه منتهية من الموديلات السابقة فمابالك بالموديلات الحديثة ، ريح نفسك خاصة وان طلعاتك قليلة فهذا دافع مهم .
وفقك ربي

SaviorALAJMI
19/11/2014, 01:04 AM
انا عندي برادو 2010 ٤ سلندر قير عادي
ذبحني ذبحني بالتعشيق
والله ماكرهني فيه غير القير
وانا راعي بر اقل شي كل يومين لاف بر

انصحك اخذ اتوماتيك وريح راسك

المميـز
19/11/2014, 05:16 AM
:

خذ تماتيك ومبروك مقدما

:

أطلال نجد
19/11/2014, 05:40 AM
التماتيك أفضل و مرغوب أكثر في البيع و الشراء

E Teacher
19/11/2014, 09:13 AM
الاخوان بن الشمال والعجمي بيض الله وجيهكم على المشوره يامال الغنيمه

E Teacher
19/11/2014, 09:16 AM
مشرفنا الغالي المميز بارك الله فيك ونصيحه اعتز فيها واناخوك
اطلال نجد ياعل عينك ماتبكي الاطلال وبارك الله فيك على النصيحه

E Teacher
20/11/2014, 02:00 PM
اللي شاركو بيض الله وجوههم والاغلبيه يقولون اوتو
واللي مر على الموضوع ولا شارك الله يسامحه ومازال الامل بالله ثم فيهم انهم يبدون الراي والمشوره والنصيحه وهم اهلها ومن نخاهم مايردونه

أبو زبن
22/11/2014, 01:15 AM
التماتيك أريح خاصتن بالزحمه ومثبت السرعه بالخط وﻻهو شين بالبر ما دامت طلعاتك للبر قليلة خذ انصحك تاخذ التماتيك ومبروك مقدماً

E Teacher
22/11/2014, 05:31 PM
بارك الله فيك يابو زبن والله يصلح لك النيه والذريه يابعد راسي

ابوغلاالقصيمي
22/11/2014, 06:28 PM
انا معي 2011 تمتايك وزي الفل ولله الحمد

اذا دخلت بر احول للعادي واكرفه كرف

وبفضل من الله ماعانيت من اي شي

انصحك بالاوتو اريح وارغب عند البيع

E Teacher
22/11/2014, 06:30 PM
يابو غلا نصيحه جزله من رجال جزل بارك الله فيك يابعدي