هل نسيت شيء تحتاجه في الكشته ؟ أدخل وشارك .. مــــهـم

[قتال]

السلام عليكم ورحمة الله وبركاته ،،،

في كثير من الكشتات .. تفقد شيءً مهماً أو تنساه .. قد لا يطري على بالك لكن يكون مهم جداً وقت الحاجة .
النسيان من طبع البشر فكل إنسان ينسى بطبعه ، فمثلاً :

- مرة نسيت الكبريت ولا عندي ولاعة في السيارة ولا أحد يدخن معنا .. تخيل !! بعد تنزيل الأغراض تكتشف بأنك نسيت الكبريت أو الولاعة ، لأجل الكبريت تعيد أغراضك وتذهب مرة أخرى لأقرب مكان لتشتري كبريت .
- مرة إعتمدت على أحد الشباب أن يحضر معه خبز فعند سؤالي له عن الخبز أبلغني بأنه موجود ، تمشينا وعينا خير ويوم جينا نبات ونصبنا الخيمة وجهزنا العشا تصور مالقينا الخبز .. تذكر الحبيب أنه ناسيه بسيارته .
- اللي ينسى اللمبات و اللي ينسى الدربيل واللي ينسى كامرة الفيديو واللي ينسى فراشه واللي ينسى حذيانه وأنت ماشي وكل شي على حسب حاجته .. من هذا الباب حبيت أساهم في هذه المشاركة حتى نشوف الناس وش تنسى من أغراض وأكثر الأغراض المنسية ...

فيا الربع كل يقول عن رحلاته وش نسى فيها .. لنستفيد من هذا الأمور .. وأنا أولكم أبدأ ..

آخر مرة نسيت كتيب الإحداثيات وحنا طالعين يم لينه ، ونسيت كامرة الفيديو ، وخلص علينا السكر والزعفران .

أرجو المشاركة الجادة لتعم الفائدة ..

أخوكم / قتال

على فكره / أعرف أنه يوجد قائمة بلوازم الرحلة ، لكن الموضوع مختلف ..

[عود رمث]

نسيت كل هالدنيا !!! اجل وش اخذت للكشتة ؟؟ :D

عموما مرة نسيت الكبريت مثلك .. وحاولت اشب بطرق مختلفة لكن ولا حاجة .. وقعت احتري لين جو اخوياي وانا طالع قبلهم علشان اولم القهوة وابدا بالعشاء .. طبعا هذا قبل الجوال والكناود ..

ومرة نسيت الصحن ويوم جا وقت الرز ونكبه دورنا الصحن ما لقيناه .. قمت حوضت بالتراب حويض كبر الصحن وفرشت السفرة عليه وكبيت الرز على السفرة .. وما احلاك يارز ..

ومرة ........

ومرة ......

والله من المرارير ....

موضوعك زين بالحيل ..

لكن المهم إذا نسيت شي كيف اتصرف .. خاصة الكبريت ياهو على صغره غثيث إذا نسيته ..

ودنا نعرف وشلون تصرف في هالمواقف .. علشان يستفيد الجميع ..



اخوك \ عود رمث

[ابومدين]

موضوع رااااايق اخوي قتال
عادة اني اطلع دايم مع شيبان من الربع
وطبعآ اصير خادم بنغالي عندهم ودايم ينسون
مرة كبريت ومرة ملح وانت ماشي لكن اذا نسو
اي شي حطوها في راس البنغالي الي هوانا لكن
طنش وتصدق مرة تعشو في الطياس حقت الموتر
بعد ماغسلوها لأنهم ناسين الصحون عجااايب

[الهارف]

السلام عليكم


مساء الخير


اخوي قتال اذا نسيت الكبريت هذا شي بسيط تقدر تسوي شي بدال الكبريت

هة امك تاخذ مناديل وتولع لمبة الكبوت اذا صار فيه

واذا صار ما فيه عاد هذي المشكلة

المهم وتوله المناديل من حرارة اللمبة وعلى طول تحت الحطب او على المقباس

او على دبة الغاز اذا كان معك.؟.؟.؟.؟.؟

بس يصير معك لي طويل تبعده عن الدبة

واتمنى اني افدتك


بس اذا ولمت اغراضك قبل تنام وحطيت كل شي والطماط حطيته بالثلاجه

عشان ما يخرب

وقمت من بكرا ولا اخذته وش تسوي؟.؟.؟.؟.؟.؟.؟.؟.؟.؟.؟.؟.


ومشكوووور على الموضوع الحلو

[hunter]

هذي اول مشاركه لي واتمنى تعم فايدتها .
اذا نسيت الكبريت طول الله عمرك ربص لك خريقه اول منديل بشوي بنزين وقم طاول الله عمرك وخذ سلك من البطارية وسو لك شراره يحبها قلبك واقدحها في المنديل بس حاسب لا تلعب بالنار تحرق صبيعك والله يستر على الجميع .:cool:

[الشيخ]

انت تنسى كبريت
صغير بس يغثك لامنك نسيته
طلعت البر مرة مع شباب ناسيين راس الخيمة
نمنا برواقها لين حدر واحد للديرة وجاب الراس وجانا
هاذي الي والله شتحلها لو انك طالع مسافة بعيدة
ومن بعدها لازم اشيك على الخيمة كاملة قبل ما امشي

[عاشق النحم]

يا جماعة الخير الكبريت مقدور عليه بس الملح
هو الطامه

[بن زيدان]

السلام عليكم ورحمه الله وبركاته
اولا هذي اول مشاركه لي في منتداكم الرايق:D
بس اذا انت نسيت الكبريت تهون بس اللي يجي البر وينزل الخيمه وفي الاخير يطلع ناسي الاطناب :mad:

هذي الورطه:row:

ومره واحنا نطبخ اول يوم وفي نص الطبخه يخلص الغاز علينا والله انا احنا ورطنا بس الحمدالله كان عندنا حطب وكملناها عليه بس كانت خوش طبخه :good:

[راعي عنيزة]

يا مال العافيه على ذا الموضوع والنقاش الحلو منكم جميعا

النسيان مشكله كبيره ولكن فيه مشكله اشكل منها وهي انك تخطط لشي وما يجي على هواك :rolleyes:

مره كنا كاشتين من الفجر بنفطر بجراب وذي اول مره اجيها وكنت متوقع انها كبيره وبلقى فيها خباز عادي او في اقل الاحوال بقاله اخذ منها خبز اكياس

لكن المفاجاه اني يوم جيتها ولاها نتفه صغيره ومابه خباز وقلت ما من خبز الاكياس بد واروح للبقاله واثر ما عنده خبز واصلا ما يجيبونه ولا يتعاملون بذي الاشياء :p الظاهر يحسبون الخبز رجس من عمل الشيطان:D
واسئل الهندي وش اقرب بقاله عنده خبز ويكزني لبقاله ورا ب 25 كيلو وارجع لها واثر عنده خبز بايت من يومين واخذه وانا متشفق :mad:

ومن عقبه حرمت احرك من الديره الا وانا شاري خبز يكفي الكشته وزود

[شـــــــارد]

مشكور أخوي قتال على الموضوع اللي اتوقع يكون درس لكل واحد في كل كشته يكشتها

انا مره من المرات كنت طالع انا وشباب لروضة نوره ويوم نزلنا العفش وفلينا الخيمه والا الدعوه مافيه

عمود للخيمه وش نسوي وش نسوي عزمنا نرجع للرياض ونشوف هاك المخيم وحوله غنمه وننصاه

ويقابلنا واحد جزاه الله خير من ربعنا ونطلبه عمود (والله ياجماعه انها منطوله بالارض من كثرها عنده)

ويقول ماعندي شي (وحنا نشوفها على الارض) قلنا مشكور المهم وحنا راجعين لمكانا ويقابلنا راعي

الغنم (أخ سوداني)؟؟ قال وش تبغون قلنا له السالفه قال ابشروا:mad: بس بالله اذا سريتوا رجعوه

قلنا ابشر وفزع لنا وفكنا من الرجعه.

أخوكم : شــــارد

[قتال]

السلام عليكم ورحمة الله وبركاته ،،،

أخواني ..

عود رمث ، ياسـر ، الهارف ، hunter ، الشيخ ، عاشق النحم ، بن زيدان ، راعي عنيزة ، شـــــــارد .. بارك الله فيكم وبمشاركاتكم .. وشاكر لكم مرورك ..

[سيرفر]

شباب خذوها من مره زينت الكبسه بالكاتم وطلع كل شيء جاهز وجي افك الكاتم وتنكسر يد الفتح حقته في يدي والكبسه جو الكاتم ولا نقدر نطلعه وحنا جعنين من ومن بالزرديه وتنفك

[الروضة]

السلام عليكم ورحمة الله وبركاته
انا مره نسيت اطناب الخيمة يوم وصلنا البسيتنات بالليل واردنا ننصب الخيمة ماحصلنا الأطناب
ونقوم ننزل جراكل الموية ونربط فيها الحبال وبعضها بالسيارة واحضرنا كيس ووضعنا فيه رمل وربطنافيه الحبل ويوم اصبحنا صرنا نبحث عن اطناب متعفته وعدلناها المهم حصلناجميع اطناب الخيمة من زوايا ومواصير
والسلام عليكم ورحمة الله وبركاته

[أيمن]

للرفع وزيادة النفع

تحيتي

[بــرق الشمال]

خاص لأهل الحوضه(الشاصات)_بس لااحد يزعل مره نسيت
السناره وأشوى معي لمبه بس الصراحه ماش ضعيفه وصايرين
تقل ضعيفين حاولو ماتنسونه والله ياهي مووووووووووووت.:good: :good:

[الشاقي]

يوم من الأيام طلعنا وحنا مجموعة معينة وتكفل واحد منا يشيل الثاية ويوم وصلنا ودورنا ليفة الدلة قال :
ما حطتها بنت الكلب
وين الفناجيل يافلان قال:
ماحطتها بنت الكلب
يوم بدينا بالطبخ .. وين غطا القدر يافلان قال:
ماحطتها بنت الكلب
وتاليتها ان الأخ ماجاب اشياء كثيرة والسبة.. بنت الكلب
طلعت الخدامة اللي كانت مهتمة بالثــاية الله يخلف

[طيـــ بر ـــر]

طيب .. أنا أقول هذي المشكلة .. اللي هي مشكلة ( النسيان ) (1) عند كل واحد منّا .. لذلك أكثر المشاركين في الموضوع هذا صارت لهم قصص .. اللي نسى الكبريت .. واللي نسى الملح .. واللي نسى أخوياه <<< :D

المهم .. الحين هذي المشكلة ...

طيّب نبي الحلول .....


===============
أنا عندي ( حل بسيط ) لهذي المشكلة :
# النوته ... تعرفون النوته ؟‍‍‍‍ .. الدفتر الصغير .. المذكرة .. اللي بريال .... هذي ياشباب .. تفكّ أزمات ...

أنا دائما اذا أردت .. القيام برحلة .. قصيرة أو طويلة ... أخلّي الدفتر هذا بجيبي ... وأكتب ( طلبات الرحلة :: دجاج - لبن - ملح - شاهي - قهوة - لحم - خبز - ماء- خضار- ... الخ) وكذلك ( المشتريات :: ببسي - ثلج - شطّه - حطب - ماء للشرب ) وكذلك ( الأدوات :: كالخيام - أطناب - مسحاة - واير - عدة كهرب - ماطور- أنوار- سلاح- جراكل- صيدليّة ) وهلمّ جرّا....

ثم أقوم بشطب كل ( غرض ) وضعته في حوض السيّارة ...

ولا أذهب الى المنطقة اللي ناوي أخيّم فيها .... الا وكل هذي الطلبات اللي في الورقة ... مشطّب على أبوها ..

هذي طريقة بسيطة اراها مجدية لحلّ هذه المشكلة .
--------------------------------
(1) النسيان : قد يكون مشكلة وقد يكون نعمة .. فأنت حينما يموت قريب لك ( كأمك مثلا ) .. ستجد أنك ستعود الى حياتك الطبيعيّة بعد شهر مثلا .. وذلك بفضل الله ثم النسيان ..








طيـــ بر ـــر

[جكسار]

اذكر واحد من الشباب في المنتدى كان مسوي جدول.. قائمة بجميع احتياجات الكشتة مثل ملح سكر دله بيالات سكين الخ..

ماعليك الا تطبعها وتحط صح عند الشغله اللي اخذتها

الله يعطيكم العافية

[سليمان الراشد]

السلام عليكم ..
اول شي اشترلك كبريت بريال الي يجيك عشر حبات وزعها في السياره شين وراء المرتبه وفي البيبان وشين بدرج والملح خذلك شوي حطه بكيسه صغيره وخلها وراء المرتبه
واكثر شي تنساه خله بلموتر 24 ساعه وافتك
والطريقه الي قالها اخوي’’ طير بر’’ طريقه جديده وسلامتكم ...

[بين الغضا]

التانكي يوهق احيانا تتوقع انه مليان ويخلص عليك ليت فيه عيار يعلمك كم باقي

[فوتوغراف]

من صغري اتعودت قبل لااطلع لأي رحلة أكتب كل الاشياء الي احتاجها في ورقة
وقبل وضع الاشياء في السيارة اشييك عالاغراض غرض غرض والي يكون موجود اشخط عليه في الورقة
وبكذأ بإذن الله ماانسى شي
وسلامتكم

[أبوعبدالرحمن الأسعدي]

اسهل شي انك تنسى الكبريت او الولاعه

فيه الف طريقه وطريقه منها تولع من ولاعه السياره واذا ماهي موجوده تولع من شرار اصابع البطاريه تحط الشاخور على قريب بس انتبه تزيد للشعله واذا مافيه بشمعه اللمبه بالمنديل واذا مافيه عندك عدسه التكبير مع شعاع الشمس ومنديل واذا مافيه جب اي حجر صوان واقدح على الدافور واذا مافيه عندك الطريقه التقليديه القديمه وهي احتكاك الاعواد مع بعض واذا توكلت على الله وشبت نارك حط لك مجمار وحطيبات ومنها ولع الي تبي مايحتاج انك تعيد الطرق السابقه مره ثانيه

[ناصر الدوسري]

رتبت العزبة لكن نسيت الزيت ..... وما قصروا جيراننا بالبر الله يجزاهم خير فزعوا معنا وعطونا زيت

[وليد حايل]

اشكرك على الموضوع الرائع

لي عوده بالمشاركة

[عاشق الاتحاد]

احسن طريقة يعمل كشف
فمثلا انا عندي كشف بجميع محتويات العذبة
من الف الى الياء
وعند خروجي للبر بموجب الكشف اختار الي ابية
والحمدلله خرجت اكثر من مرة وعمري ما حصل لي شي
نسيتة
فالافضل عمل كشف لك بجميع اغراضك وعند الخروج حدد الاشياء التي تبيها