استفسار عن الكفرات الصينية

[sami200]

مساكم الله بالخير
لقيت بالسوق كفرات صينية مقاس جنط 17 وسعرها بـ 280 وعليها ضمان سنه وانا ناوي اركب كفرات اذا احد جرب هالنوع من الكفرات يخبرني الله يجراه خير وهل هي عملية

[المميـز]

:

الصيني اللي منتشر بالسوق نوعين
واحد وكيله المحيميد مايمدحونه والثاني وكيله بن شيهون يمدحون كفراته بالحيل ومنتشره على الجيوب
خصوصا مقاس ١٦ / ٨٥ / ٢٤٥ يركبونه على الجيوب وسعر الكفر ٣١٠ ريال
اسمها اعتقد انه اكسترا ملفوفه بلصق اصفر

:

[A7MAD-STYLE]

السلام عليكم ..
( من 6 سنوات تقريبا ) سبق وان ركبت طقم كفرات صيني ( تقريبا اسمه Runway ) أو اسم مشابه له ان ماني غلطان على سيارتي السابقه كابرس برجهام 87 بحكم سعره رخيص مقارنه بغيره من الشركات ، كاستخدام داخل المدينه ومشاوير خفيفه يمشي الحال .. لكن في أيام المطر ما ينفع بريال !! تخيل في يوم ماطر و على سرعة أقل من 30 كم تقريبا وانا ماشي بالسيارة وأول ما لفيت يمين من عند الإشارة تزحف علي السيارة وأصدم عمود الاشارة !!! وبعدها قلت تووبه اني أركب صيني ، وبعد سنه تقريبا يصادف ان لي سفرية لمكه والمدينة والطائف على السياره فاضطريت اني اركب طقم كفرات برجستون من الغرابي ( صحيح غالي شوي ) بس سعره فيه وبعدها شريت لي جيب هونداي وعطيت الكابريس أخوي الصغير وما شاء الله الكفرات تمت راكبه على السيارة الكابرس لأكثر من 5 سنوات تقريبا وأخوي رايح فيها جاي لين أعدمها بحكم انه ما يهتم فيها أنواع الحكات في الرصيف ويمشي عليه والكفر ناقص هواه لين أعدمها !!

و سيارتي الجيب الهونداي السنتافيه الحالية ما أركب عليها إلا كوري ( هانكوك ) بحكم انه أرخص من البرجستون وألين قليلا والحقيقه انها عملية وسعرها فيها مقارنة بأسعار برجستون وميشلان

لذا نصيحتي اذا انت مستخدم لسيارتك وليس بياع عليك بالنوع الزين ولا تسترخص أبدا وتشتري صيني .. يكفي انك تمشي عليها وانت متطمن بعد الله سبحانه وتعالى

وعليك باللي تاريخ صنعها جديد ( 2014 ) وحرارة A والتراكشن AA ومن الوكيل وانتبه من المحلات ترى أغلبهم أسعارهم أغلى من الوكيل ..

تقبل مروري