وش رايكم في مشروع المخيمات ؟؟؟

[عآبر سبيل]

السلام عليكم ورحمة الله وبركاته

حي الله الاخوان .. هذي اول مشاركة لي معكم بالمنتدى .. واتمنى اكون خفيف ضل عليكم , وأرجوا ان يكون الموضوع داخل قسمه الصحيح والمناسب

بدخل بالموضوع على طول :

ابيكم تنصحوني في هذا المشروع اللي هو " المخيمات " مثل اللي موجود بالثمامة ( ولكن أرقى ) وين تنصحوني احط موقع المخيم ؟ لاني ابيه يكون قريب من مدينة الرياض من ناحية الجنوب على بعد 50 كيلوا بمكان مرتفع شوي

هل لها تصاريح ؟


علماً ان المخيم مخصص للعوائل فقط وميزانيتي فوق الـ100الف


لاتبخلون علي بنصايحكم لاني جديد على هالفكرة وناوي اتعب على المخيم وبيكلفني واجد وخططت للعمل به بجميع المستلزمات بحيث يكون متكامل بالصيف والشتاء اضافة الى وجود 4 مكيفات سبليت موزعة على 4 خيام ودورات مياه ( شينكوا ) وبيوت شعر للنوم وموكيت ذو جودة عالية

حاب اجيب مولد كهرباء 40 كيلوا ياباني او 50 كيلوا " مستعمل " + خزان كبير فايبر جلاس مستعمل

يبقى السؤال : كيف احافظ على الاغراض من السرقة ؟ لدي خطة جهنمية لتجنب الحرامية وهي مكلفة نوعاً ما ولكني اراها هي الحل الأمثل .. سأتطرق إليها بعد أراء الجميع

لاتبخلون علي بالنصيحة والتوجيه والارشاد وهل هو مشروع ناجح ام لا ؟

وحياكم الله جميع

[جراح الجر]

حبيت اقدم نصيحة لك فقط وليست من باب خبرة ولكن هي من ناحية الارقام و انت اسآل
هي انك تستخدم اجهزة كهربائية قليلة استهلاك للواط ، مثل لمبات الليد ، و سمعت عن مكيفات استهلاكها مره قليل و تلفزيون يجي نوع استهلاك قليل ، ،
صحيح بالبدايه راح تكون اغلا بفرق واضح عن الادوات الكهربائية العاديو او التقليديه
لكة راح تحتاج لمكينة اقل من ناحية الانتاج للواط لانك استخدمت اجهزة موفرة
بكذا راح تدفع زود بالاجهزة و توفر بالمكينة و تقدر ،
تقرا عن الطاقة الشمسية يمكن اوفر ، و طاقة الرياح

[Obu-Nasser]

السلام عليكم
اذا انت تبي المخيم للاستثمار، فنصيحتي لك تترك هالفكرة، وذلك لعدة اسباب:
1-المردود المادي قليل مقارنة بالتكاليف
2-المخيمات اصبحت اكثر من شعر الراس، وهذا ماهو من صالح المستثمر
3-المخيم يحتاج حارس ثقة والا سرقك (اما بتاجير المخيم وانت ماتدري، او بالادعاء ان الماطور انسرق او الخيمة انسرقة وهو اللي سارقها وبايعها)
4-سهولة تعرض المخيم للسرقة، او للتخريب من بعض المستأجرين.
5-الخيام اذا بقت فترة طويلة منصوبه وخصوصا في الصيف تنهري عليك بسرعه مما يؤدي لخسارتك (والناس ماتبي خيام مهتريه)
6-اكثر شي بتغيره و تجدده هو الفرشات لانها دايما تتعرض للتخريب اما بسقوط جمر عليها من الشيشة او النار او.....الخ.
7-ايام الصيف خصوصا عز الصيف وهي فترة لاتقل عن ثلاث اشهر راح يكون المخيم خاوي من المستأجرين.
8-اذا كان المخيم منعزل ولاحوله مخيمات، راح تتعب في جلب وايت للماء او في جلب عمال لصيانة الماطور.
9-ممكن تتخسر وتسوي مخيم وبعد شهرين يطردونك البلدية من المكان او صاحب الارض، او اي جهة مخولة بذلك وصارت مع ناس وخسروا خساير مهيب سهلة.

[سورينتو]

^^

عين الصواب يابو ناصر

فعلاً زي ماتفضلت

[الصيادالمليح]

من الافضل انك تشتري ارض بالمزاحمية بمساحة كبيرة

و تسورها و تحط فيه من البيوت الجاهزة و تزرعها و تحط فيها محمية للارانب البرية و تستثمرها كتأجير او بيع للارانب البرية لأصحاب السلق عشان يدربون كلابهم

اولا الارض بيكون باسمك و الصك معاك .. وثانيا ما راح تخسر لأن المخيم ما تملك ارضها و اي وقت تتم الازالة مثل ما ذكره الاخوان من قبل

[تاهو2007]

أخوي عابر سبيل ... الرزق من الله ..وكل واحد يآخذ رزقه مهما كان عدد المخيمات اوموقعها .... المهم ممكن افيدك من خبرتي المتواضعه ...تواصل معي الله يحييك وابشر بالخير ولاتستعجل

0554646126

[GM_400]

من الافضل انك تشتري ارض بالمزاحمية بمساحة كبيرة

و تسورها و تحط فيه من البيوت الجاهزة و تزرعها و تحط فيها محمية للارانب البرية و تستثمرها كتأجير او بيع للارانب البرية لأصحاب السلق عشان يدربون كلابهم

اولا الارض بيكون باسمك و الصك معاك .. وثانيا ما راح تخسر لأن المخيم ما تملك ارضها و اي وقت تتم الازالة مثل ما ذكره الاخوان من قبل

:good2::good2::good2: هذا الراي السديد

اشتر ارض لو بعيده بميه كيلو عن الرياض بملغ 50 الف وسورها واشتغل فيها حبه حبه على مدى خمس سنوات مافي مشكله واستثمرها صيف وشتا وراح تسوى دبل سعرها ان شاء الله

وباسمك وحلالك ولاحد يكلمك



ليه احط ميه الف في البر واتعرض لمخاطره ماليه وامنيه



وتاجير المخيمات مردودها مايسوى تعبك وخسارتك ابد



بالتوفيق

[عآبر سبيل]

الله يجزاكم كل خير يااخواني كلامكم عين الصواب واقنعني

فعلاً ليه احط مبلغ 100 الف في ارض ماهي لي وقابل للمخاطر المالية والامنية

الله لايحرمكم الاجر يارب يعطيكم العافية

واشكر اخونا الغالي تاهو 2007 ماتقصر يالغالي رحم الله والديك وبيض الله وجهك