ماذا تفعل إذا طلعت البر واتضح أنك نسيت الكبريت؟؟؟ما البديل؟؟

[علي الشهري]

أرجو من الإخوة أن يدلي كل واحد بالحل اللي يشوفه نافع ويحل المشكلة حتى نستفيد من جمع الحلول في مكان واحد.

وسلامتكم

[عاشق النحم]

خذ طال عمرك سلك شحن البطاريه(حقت السياره)واشبكها وافتح الغاز وبعدين لامس راسين السلك مع بعض بيطلع شرار ويولع الدافور
وربنا ولك الحمد..........

[علي الشهري]

بيض الله وجهك يا عاشق النحم

وفيت وما قصرت

هل من مزيد يا الربع ؟؟؟؟؟

[IBRAHIM]

طيب وإذا ما كان عندك دافور ولا أي ما دة تساعد على الإحتراق في هالحالة وش تسوي ؟؟؟؟........

الظاهر تجيب منديل وقطع خشب صغار و تحاول تشب الضو بالمكبر أو نظارة أوشي يجمع ضوء الشمس وإنشاء الله تشب الضو ....................

وشكراً

[علي الشهري]

طريقة ممتازة يا IBRAHIM

بارك الله فيك

لكن أكيد النظارة تنفع؟ لأن المكبر احتمالات وجوده ضعيفة جداً

[العازمي]

الحقيقة موضوع مهم . وأشكركم أخواني.

لكن جربوا هالطريقة وأنا مجربها..
ولاعة السيارة حقت السجاير أبعدكم الله عنة.
خلها لما تحمر ودور حولك أكرمك الله (( جلة)) وفتها على الولاعة وشب نارك. أنا جربتها 100%
تحياتي

[علي الشهري]

بارك الله فيك يالعازمي

لكن بصراحة ما عرفت ((الجلة)) وإن كنت أفهم من قولك (أكرمك الله) إنها بعر وما شابهه

أشكرك على اهتمامك

[العازمي]

:D أظحكتني أخوي التنهات . (( الجلة )) طال عمرك مافية..أرض..فية(( أبل)) لازم تحصلها فية .....
أو أذا جيت أمراح ((الأ بل)) حنا نسميها بالشمال (( الجلة )) جلة الأبل يمكن لها عدة أسماء عند بعض الناس .
لكن هذا للي نسميها حنا ياهل الشمال.. وتحياتي

[عود رمث]

طريقة الجلة إذا انها فعلا مجربة مثل ماقال اخونا العازمي فهي ممتازة وميسورة ..

فيه طريقة قديمة - وهي قريبة من اللي قال اخوي عاشق النحم - أذكر سويناه قبل مالا يقل عن 25 سنة .. وذكرها احد الاخوان بالمنتدى وهي انك تحط بنزين على قماش او منديل وتمد سلكين من اقطاب البطارية وتبد عن السيارة قدر الإمكان بعدين تلامس السلكين عند القماش المبلل بالبنزين تولع على طول ..

وقد يكفي الغاز بدل البنزين ..

اما طريقة العدسة أوا لمكبر فهي متعبة نوعا ما ولا تنفعك بالليل .





اخوكم \ عود رمث

[علي الشهري]

بيض الله وجهك يالعازمي وغفر ذنبك ويسر أمرك على رحابة صدرك في التوضيح.

وبارك الله فيك أخي الفاضل:عود رمث على فكرتك الممتازة،بيض الله وجهك.

لكن لو ما عندي سلك اشتراك هل ينفع أي سلك،بمعنى سلك الجرس(الأبيض العادي) هل ينفع أو أنه سيميع ويتآكل؟؟

[عود رمث]

الحقيقة أنا ماجربت سلك الجرس .. لكن اتوقع انه ينفع لأن المسألة ماتجاوز الثانيتين أو ثلاث فما يمديه يحتمي ..

وإذا اضطريت وما عندك سلك سوها بدونه ( لكن فيه شوي خطوره .. يعني لازم تاخذ احتياطك ) تقول وشلوووون ؟؟

اقولك بمفتاح العجل أو أي حديدة أو سكروب لامس بين الأقطاب على البطارية مباشرة وخل القماش عند مصدر الشرارة ..

والسلام عليكم .

[علي الشهري]

وش الخطورة فيه يا عود الرمث؟

هل هي في التسخين أو شيء آخر؟

[أبرق الضيان]

إضافة إلى ماذكروه السناعيس ! هناك طريقة جربتها و ناجحة :
و هي إذا كان عندك لمبة كبوت غازية ، فأحضر منديل و قربه للمبة حتى يشتعل ثم ضعه تحت حطيباتك .
و السلام ......

[عود رمث]

ياحبيبي التنهات

الخطورة انك تبي تولع النار داخل كبوت السيارة عند البطارية .. وغيرك المعلم إن البنزين يصير قريب لك ( بالكلبليتر ) يعني المسألة فيها شوي خطورة من ان السيارة تحترق خاصة إذا كانت السيارة فيها تهريب بنزين أو حتى ريحة بنزين ...

الله لايقدر علينا الشر ..


اخوك \ عود رمث

[خالد الدلوع9999]

السلام عليكم ورحمة الله وبركاته
أوي التنهات مالك إلا طريقة أخوي العازمي أنت والخير ربع

[عاشق الصحراء]

تقدر تستبدل الجلة اذا ما حصلت بنشاف ( كلينكس )
و هذا مجرب , و لكن يجب ان تلامس الولاعة
اطراف الكلينكس و ليس الوسط لانها اسرع اشتعال.

[علي الشهري]

بيض الله وجيهكم وما قصرتوا

[هبة ريح]

بخصوص البديل للكبريت

والله حصلت يا جما عه حد يده و جاي معها برضه حد يد ه صغير ه تلامس الحد يدتين ببعض ويولد شراره ممكن تشب فيها نا ر بي وقت !! وسعر ها منا سب مع واحد من الشبا ب جا يبها من امريكا, والر جا ل يقو ل الى يبغا ممكن اجيب له! وسلامتكم

[ابو عمر اللاحم]

السلام عليكم

مشكورين على هالمشاركات المفيدة جزاكم الله خير .

بالنسبه لأخذ الشراره عن طريق اصابع البطاريه مباشره بمفتاح العجل او ما شابه له فيه خطر من ناحية انه قد يسبب انفجار البطارية .

حيث ان هذا الشئ حصل لي شخصياً ولاكن الله ستر والحمدلله لذلك احببت التنبيه لذلك لأخذ الحيطه والحذر

وتقبلوا تحياتي ،،،

[الرفيعه]

عليك بالولاعه وانا خوك:D

[ذيب على خفيف]

عرفط لك منديل ثم اكبسه في الولاعه وهي في اقصى حرارتها يقب لك المنديل نيران (مجرب)
لكن الهواء يطفيه زي الحلاوة .

[الروضة]

السلام عليكم ورحمة الله وبركاته
أنا عندي حل وإن كان متأخر لكن معليش
إذا كان مامعك كبريت احضر (سيم )ولامس به اصابع البطارية وسيصبح أحمر ثم احمله إلى مكان النار وضع عليه منديل ثم يشتعل على طول وهذي مجربها ولافيها خطوره وعلى شان مايحرق يدك (احتياط)ضع السيم على هاالشكل /ـــــــــ/ الرأس الأعلى مكان اليد - مدري مفهوم منى السيم وإلا لا؟ والسلام

[سامر]

بنزيم على منديل و شراره من سلك البواجي او غاز وشراره البوجي

[ابوفهـــــــد]

خذ معك للبر القز الي يولع من نفسه بس افرك مفتاحه وتطلع شراره ثم تشب بعدين خذ كسيره عود وشب ضوك واستانس .............. (( تفكير صعيدي ادري ادري ههههههه )):D :D :rolleyes:

[فـ(الجـوف)ـتى]

يارجال اسكب بنزيم على الارض طبعاً حيث انك تسوى خط بعيد عن الحطب مثلاً بحيث لاتولع فيك وبعدها اخوى


وجبلك سلك أو اشتراك وشبكهن في بطارية السياره لامسهن مع بعض تولع النار على الطول ولك تحياتي.

[نقا هشال]

مشكورين

على الحلول الممتازه

[علي الشهري]

بارك الله فيكم ياشباب على حلولكم الرائعة

أخوي:هبة ريح..ما نحصل الحديدة بالسعودية؟؟

أخوي: فـ(الجـوف)ـتى و سامر
....هل جربت هذه الطريقة لأني سبق أن بللت منديل فاين ببنزين وولعت ولاعة فاضية يعني ما تطلع إلا شرار وحاولت أولع الفاين المبلل بالبنزين بشرار الولاعة وما فاد؟؟؟

[أيمن]

( لقد تم إضافة هذا الموضوع إلى المواضيع المميزة والشيقة في هذه الخيمة (http://www.mekshat.com/vb/showthread.php?s=&threadid=8691) )
مع الشكر للجميع ،،
http://www.mekshat.com/pix/upload/images/flow12.gif

مشرف الخيمة

[علي الشهري]

أحرجتني بهذا التكريم يا مشرفنا العزيز

جزاك الله كل خير

[akhan]

مشكوووووووووووووووووووووووووور

[علي الشهري]

ومن الطرق المناسبة للمزنوقين:
فك لمبة نور السيارة وتوليعها على العالي وأخذ منديل فاين وتعريضه للإضاءة الشديد وبالتالي تحوله إلى لهب

هل أحد منكم جربها ؟

[ABU-AL-3eeS]

انا عندي حل لكن ماشاء الله الحلول واجد وانا بالصفحة الاولى مدري قالوه والا لا
----------------------------------------------------------------------------------------
الحل طول الله عمرك تشري لك المكعبات البيضا ((تنباع بالبقالات)) وتولع بطارية السيارة على اخر شي وتخليها تلمس المكعب 10ثواني((بالكثير)) بعدها تشوف ان المكعب شب وماعليك الا تجمع حطيباتك وتشبهن بهالبيض
وترا الطريقة مجربة
--------------------------
ملاحظة/استخدم في احراق الحطب مكعبين على الاقل لانه ماراح يكفيك واحد.

[علي الشهري]

بارك الله فيك

فكرة جيدة تضاف للأفكار السابقة

بيض الله وجهك وما قصرت

[الطريفاوي98]

السلام عليكم





والله الموضوع بالغ الاهمية من ناحية الفكره اما على اللي في المنتدى فمااظن انهم بينسون شيء الا ماشاء الله :rolleyes:

اما انا فحصلت لي مرة من المرات ان الولاعة اللي معي مارضيت تولع؟؟
رحت وصلت مفتاح الكفرات على البطارية وجبت من الكراتين ووالفاين ولعت النار !!!!!!!!!!! بس مثل ماقال احد الاخوة انها خطيرة ولكن الله سلم لاني ماقدرت امسك مفتاح الكفارات وايضا خفت من البطاريه لاسمح تنفجر وابعدت بيد العفريته (الجيك)ابعدته والحمدلله
المكعبات ممتازه وايضا ولاعة الدخان في السيارة 000
00 والشباب في المنتدى يمكن لديهم طرق جديدة ومجزيين بالخير كلكم وعساكم على القوة





الطريفاوي98

[شاص]

فيه طريقة قديمة ومعروفة وهي عن طريق ضرب حجرين من الصوان أو المرو مع بعض وبالتالي حدوث شرر بسيط حسب حجم الأحجار وتكون مجهز شي قابل للاشتعال وتقبس .. بالمناسبة الصوان والمرو ينتشر بكثرة في المنطقة الجنوبية ولونه أبيض وأحمر وإذا ضربتهم ببعض وشميتهم تلقى ريحه مثل الكبريت ولو تركت بالسيارة حصاتين منها ما أضنها بتضايقك وبتنفعك في يوم من الأيام .. وفيه الان بمحلات الرحلات قداحة ذكروها الاخوان وهي عبارة عن حديدتين بحجم مفتاح السيارة أو أكبر شوي إذا ضربتها ببعض طلعت شرارة قوية

[شاص]

فيه طريقة لكن فيها شئ من الخطورة وهي بواسطة ذخيرة السلاح فرد خرازة رشاش فك الرصاصة وخفف من البارود إلى النصف وحط محله قطة منديل أو خرقة واعد اغلاقها وارم في المكان الذي تريد اشعال النار فيه - كن حذراَ- بتلقى الخرقة طالعة وهي مشتعلة:confused:

[علي الشهري]

بارك الله فيكم جميعاً

وفكرة وضع مروتين بالسيارة جميلة جداً يا الشاص

لكن ماهي أنسب طريقة وماهي أفضل أدوات يمكن تعريضهل للمروتين بحيث تشتعل مباشرة؟

[نجمة سهيل]

والله اخوي ودنا نشارك لــــــــــــــــــــكـــــــــــــن!!






























الاخوان ماخلوا شي ماقالوه عيني عليكم بارده ماشاءالله .


مشكرو اخوي التنهات:heart:على هالموضوع السنع.

[علي الشهري]

بارك الله فيك يا نجمة سهيل

شاص...شاص...شاص..........أرسل..أرسل

[أيمن]

( لقد تم إضافة هذا الموضوع إلى مواضيع المبتكرات والاختراعات (http://www.mekshat.com/vb/showthread.php?s=&threadid=12308) )
مع الشكر للجميع ،،
http://www.mekshat.com/pix/upload/images/flow12.gif

مشرف الخيمة

[علي الشهري]

جزاك الله خيراً يا مشرفنا
أخجلتنا كثيراً

[خشم الحصان]

الاخوه الاعزاء
السلام عليكم
اخوتي في الله الموضوع جميل ولكن هنالك مقوله للاخ الروضه بوضع سيم بين الاصبعين للبطاريه
وهذه الطريقه خطره جدآ حيث من الممكن ان تسبب انفجار للبطاريه ثم يحدث مالا تحمد عقباه
هذا ما ارت ايظاحه ومن اراد المزيد من المعلومت عن هاذه الطريقه الرجوع الي كتاب
التعايش في الصحراء للنقيب المظلي صاعقه الشريف بنونه والكتاب قديم قليل
والسلام عليكم
اخوكم
خشم الحصان

ملاحضه
الرتبه قديمه مع صدور الكتاب بس مادري عن رتبته الحاليه

[علي الشهري]

بارك الله فيك ياخشم الحصان على هذه الفائدة المهمة

لكن السؤال هل الانفجار يحدث بمجرد تلامس طرفي السلك وتسخينهما أو إذا طولت الملامسة؟

[مفتش الريضان]

أفكار جميلة ولكن ما رأيكم بالصوان أي عن طريق الحجر وذلك عن طريق جمع أعواد وحشائش يابسة وتقريبهما من حجري صوان ويتم ضربهما ببعضهما البعض حتى يتم ايقاد أعواد الحطب ولكن أعتقد ان طفاية السيارة أو الاشتراك أسرع وأفضل.

[هواوي]

اخوي التنهات عندي حل من جد لو اقلك يمكك تجي يطقني وهو

اذا طلعت البر ما لقيت كبريت فجب ولاعه ((حقت الدخان ))

عموما من جد افضل طريقه يتهيئ لي هي ولاعه السياره لانها من اكثر الاشياء الي تضمن انها تكون في السياره

يعني ولاعه السياره ومناديل فقط

[علي الشهري]

صدقت يالهواوي
الولاعة مع الفاين أو ورق جرايد إذا اشتدت حمرتها مع نفخ بسيط تولع في الورق وأنا جربتها


http://nwl20.jeeran.com/DSCN2787.JPG

[علي الشهري]

السلام عليكم
أبارك لكم جميعاً هطول الأمطار وأسأل الله أن ينفع بها العباد والبلاد

وأظن الجو مناسب لرفع الموضوع

عسانا نلقى بعض الأفكار

[aahhhh2]

السلام عليكم ورحمة الله
الموضوع شيق جداً وفيه طريقه قديمه انا ما جربته ولكن معروفه وهي انك تجيب عود وتحكه في خشبه
وتحط تحته مناديل او ورق ونا جربت في الدريل على الخشب و اشتعل و ممكن تجرب مفك سكروب وخشب

[aldrawy]

السلام عليكم ورحمة الله وبركاته
اقول يلوموني في مكشات واهله يالربع حطولنا عللمات على سياراتكم علشان نعرفكم تكفوووووووووون
بس اعجبني تجربتين 1- الولاعه والجله ---2- تشريك اسلاك البطاريه



لكم مني كل الحب اخوكم - الدرعاوي

[ابو شكاع]

موضوع جميـــــــــــــــــــــــل

مشكورين جميعا

ولاهنتوا

[حد السيف]

الاخوة الاعزاء
اعضاء منتدى مكشات
السلام عليكم ورحمة الله وبركاته
كل عام وانتم بخير
هناك طريقة قديمة جدا واستخدمة منذ العصور القديمة قبل اكتشاف اعواد الكبريت وقبل اكتشاف المواد المشتعلة وهذة الطريقة بالاحتكاك بين الاخشاب ولكم الطريقة بالغم انهاء متعبة ولكن مفيدة جدا
احضار عود قاسي وناشف بسمك القلم او امتن شوى واحضار قطعتة خشب ناشفةوعمل ثفب صغير بنفس مقاس العود ويتم فرك العود بسرعة داخل الفتحة بين الكفين وعند انبعاث الدخان يتم وضع قش خفيف وسهل الاشتعال وتكرر العملية حتى تتم عملية الاشتعال امل انة تمةالاستفادة الاكيد ان العملية صعبة ولكن عند الحاجة سوف تجدها انها عملية مفيدة جدا


محبكم اخيكم
حد السيف

[ابو سمر]

جربتها ونجحت معي . لكن تحتاج الى سعة صدر ونفس زينة .

[SilverSniper]

طريقة جربتها ونفعت....
خذ فشقة الشوزن وفكها وطلع الحلبي وارمه.... حط مكان الحلبي خرقة... ما ينفع منديل ... حط الفشقة بالبندق وصوب على الحطب المبلل بشوي قاز أو بنزين.. أطلق وتطلع الخرقة على شكل كورة من النار ويشب حطبك.. طريقة ثانية.. علبة بيبسي .. أو صلصة .. المهم علبة معدن .. اقلبها على الغاز وافتحه... بعدين شلها وحطها على الحطب وهي مقلوبة... وأبعد عنها وصوب عليها الخرازة أو المسدس.. وأطلق وتشب النار علاطول...

[شرقاوي]

انا اريحك من كل الأسئلة الي تدور في راسك انت و غيرك حتى تعم الفائدة
فية كتاب اسمه" التعايش " تلاقي جميع ما يخطر في بالك و الي ما يجي على بالك
طبعاً هذا الكتاب موجود في مكتبة جرير
هذا للمعلومية
تحياتي للجميع

[خبير الغازات]

الحقيقة أن طريقة الولاعة والمنديل هي الأفضل والأسلم ولكني أضيف عليها أن تمسك الولاعة مضغوطة لمدة عشر ثواني تقريبا زيادة على الحد الأوتوماتيكي الذي (تنقز) عنده والولاعة عادةَ, بالطريقة هذي تطلع الولا عة حمرا زي الجمرة ويمكن شب المنديل بسهولة وخصوصا مع بعض النفخ وقد جربت هذه الطريقة مرارا....

لكن هذا كله قبل أن أقتني هذا المنتج الجميل من كوفيا.....


http://www.mekshat.com/pix/upload/images5/mk8869_TKT-9607_B.jpg

فهو يعمل على جميع أنواع الاسطوانات الصغيرة وفيه (زند) اوتوماتيكي....
والميزة الكبيرة أنك تستطيع استخدام نفس الاسطوانة لأغراض أخرى,,,
تحياتي,,,

[أبو فراس]

السلام عليكم ورحمة الله وبركاته

انا جربت منديل الكلينكس او الفاين ابرمه شوي واحطه على ولاعة السجاير بعد ما تحمر وشوي وهو ملهلب وبالتأكيد المشب مهب بعيد عن السيارة يعني تقريبا اربعة الى خمسة امتار كما جربتها بنفسي

[البلوا]

هلا فيكم
اذا كان بكبوت السياره شمعة اناره 50 شمعه والا 100 شمعه ولعه وهات منديل ولعه انا مجربه.

[علي الشهري]

هلا بالغالي:aahhhh2

مشكور على الإفادة والطريقة الجديدة

[العودالازرق]

الولاعه كما ذكرو الشباب

[الوراق]

السلام عليكم ورحمة الله وبركاته
يسعدني ويشرفني أن أنضم معكم في هذا المنتدى الأكثر من رائع وأن أستفيد من خبراتكم وتجاربكم البنائة .
بالنسبة لموضوع نسيان الكبريت دائما ما يقع فيه أهل الكشتات والبر وربما يبتل من المطر هناك طريقة لا أدري هل تعرفونها من قبل أم لا وهي أن يكون معك إشتراك وبطارية ضواية التي نسميها الحجار تكسر هذة البطارية ثم تخرج مابداخلها وهو عبارة عن عود أسود شبيه بالقلم نظع هذا العود الأسود بطرف الإشتراك ثم نوصل الإشتراك بالبطارية ويكون طرف الإشتراك الثاني ملامس لأي حديد ثم نلامس عودالبطارية الأسود بالحديد فيبدأ بالتوهج وهكذا تستطيع إيقاد النار ولايوجد خطورة إن شاء الله مع الحذر والإنتباه.
وآسفين للإطالة وسلامتكم . لا تنسوا الكبريت مرة ثانية تورطونامعكم.

[بدر بريدة]

تسلم على الموضوع الحلو اللي أنت قده وحنا نستاهله...!!!

ولاعة السيارة ممكن تستفيد منها
اذا كان عندك فحم أبيض((ولعة))تشب على الولاعة الين تطلع حمرا ثم تشب الفحم الأبيض وتنفخ عليه عشان تولع....واذا ما كان عندك ولعة المنديل يقوم المقام مثل ماقالوا الشباب.... وسلامتكم :burnout2:

[تبراق]

يازين الحزابة ياالربع ابي اقول لازم الواحد يتحرى مايحتاجة من ها الاغراض

يعني يحط الواحد منا له ولاعتين في السيارة واحدة تكون في متناول اليد والثانية يخبيها في مكان يعرف هو فقط يعني ينساها لحين مايحتاجها

وتسلموا يا الربع :j

[الكاسر23]

اخواني ...
فيه الحديدتين مربوطه ببعض بواسطة حبل صغير عشان ما تضيع، وهي تعمل بحكها في بعضها البعض لتولد شرارة قوية تشب النار في المنديل، وهي اللي طراها الاخ هبة ريح في ردود هذا الموضوع وقال ان خوي له جابها من امريكا.
هذه الحديدتين موجودة بعشرة ريالات في محلات تجهيزات الرحلات اللي في سوق الخيام في البطحاء، وهي صغيرة الحجم الى درجة انك تخليها في مكان دائم في داخل السيارة وما تنزل منها ابد.
هذه الحديدتين ايجابياتها كثيرة غير خفة وزنها، لانها تغني عن الولاعات اللي تنفجر احيانا من تعرضها للحرارة الزايدة سواء من الماكينة او حرارة الشمس.
للاسف انا قريت الموضوع وانا في المكتب، لكن أحاول اني اصور الحديدتين وارفق لكم الصورة بعدين.

[خيال الغلبا]

الله يعطيكم العافية جميعا

[ذيب ثهلان]

مشكورين جميعكم بس من خلال تجربتي المتواضعه فإن

طريقة العا زمي جداً ممتا زه ومجربه

ولكن هناك حل أخر لازم تروح او معك واحد مدخن فرب ضارة نافعة تحياتي للجميع وشكراً

[عزوز الليل]

فكرة اخوي عاشق النحم صحيحه ومجربه بس تخليك تقعد بدون لمبه ههههههههههه

[ملقط الجلة]

ياجمــــــــــــاعة خلو الجلة بحالها؟؟؟؟


قول فاين او قطعت كرتون اسهل؟؟


:hot: :hot: :hot: :hot:

[ذيب الجبال]

طريقه مجربه ممتازه لكنها تطول شوي!!
باستخدام الدربيل تجيب لك منديل وباستخدام الدربيل تجذب اشعة الشمس الحاره الى المنديل
اما اذا كنت بالليل(انتظر حتى تطلع الشمس :D ) والله الليل ماعندي له علاج

[ابو مشعل2]

خذ طال عمرك سلك شحن البطاريه(حقت السياره)واشبكها وافتح الغاز وبعدين لامس راسين السلك مع بعض بيطلع شرار ويولع الدافور
وربنا ولك الحمد..........
افضل حل في نظري لهاذه المشكلة
:D

[ولدعنيزه]

السلام عليكم ورحمت الله وبركاته

موضوع ممتاز تشكر عليه اخوي

انا من رئيي اشر كرتون كباريت ونسهن في السياره بس الطريقه حقت اخوي العازمي ممتازه

[راعي الهددGx]

فيه راي ماذكروه الاخوان
اذا رحت للبر ونسيت الكبريت مالك حل الا انك تديور الى اقرب بقالة وتشري كرتون كباريت

[القناص]

اسمحوا لي يالربع

افضل طريقة لمبة الكبوت المكشاتيه

ولعها من اللمبه اسهل

وسلامتكم

[النفود الشرقي]

إذا نسيتا الكبريت خذ معك ولاعة!


أو ولع الظو بأ سلاك البطارية مثل ما قال أخوي عاشق النحم





طيب إذا كنت طالع للبر على حمار (وأنتم بكرامة) وشلون تولع الظو؟؟؟؟؟؟؟؟؟؟؟؟؟؟؟؟

تحيات الكوميدي الشهير (!!مـستـر بن!!)

[أبو ثا بـت]

ههههههههه من جد نسيان الولاعة داهية . وذكرني الموضوع بشخص اعرفه دائما ينسى الولاعة اذا طلع البر . والا البريق مادري وش قصتها على الولاعة والبريق بس في الاخير لقاله حل مايخليه ينساها . تعرفون المغناطيس حق مفتاح السبير اللي يلزق تحت السيارة الرجال مسفط فيه كبيرت وملزقة تحت الرفرف يقول حطيته تحت وامتلى مويه وحط ولاعة وانفجرت مع حرارة الشمس . بس تحت الرفرف ممتاز !!

[عاشق النفد]

أفضل طريقة

تسحب بنزين من السيارة
واذا كان بها شبك سحب من فلتر البنزين

وشغل منديل بولاعة اليارة

[راعي الهواء]

ازين طريقه الي قاله اخوي العازمي

[علي الشهري]

بمناسبة موسم الخير والمطر
وحباً لجمع الأفكار الجديدة
اسمحو لي برفع الموضوع

[البر بريرة]

افضل حل هو ولاعة السيارة

و منديل سواءً مبلل ببنزين او ناشف او جرايد او اي ورق

[هاوي المستوي]

يالربع سوو مثل ماقال اخونا بالاشتراك بس مع بنزين شافطه من سيارتك بس انتبه
لاتشربه ولا يقب فيك وتروح الكشته عليك وتحترق بعد..............

[ALBDRANE]

أفضل حل تاخذ معك واحد يدخن !!!!

[علي الشهري]

جزاكم الله كل خير على ها الاقتراحات يا إخوان.
والمدخن حل زين لكن......

[قناص مطور]

الله يخلي البطاريه

والبنزين
خذ ورق او منديل وغرقه في البنزين
ثم اخذسلكين من البطايه وقربهم مع بعض + المنديل
راح تشتعل النار باذن الله .


وبعدين معكم لازم تنسون الولاعه هههههههههه (امزح)

[علي الشهري]

الشكر لك من أبدى فكرة

[علي الشهري]

الله يعجل بالغيث
ونشب الضوء
ونشوف الربيع

[ا لطرقي]

الشكر لك من أبدى فكرة

[barracuda]

افكار ممتازه ويعطيكم العافيه

[محمد111]

هذا الموضوع يا شيخ

عاشق النحم انت بطل

تحياااااااااااااااااااااااااااااتي

[ar22a]

يعطبك العافيه اخوي العازمي على هالتوضيح وتقبل تحياتي

[فلر]

السلام عليكم
اسهل طريقه في العالم ولا تخلوا سياره منها :confused:
وهي منديل (فاين)،ولاعه تتن حقه السياره
الطريقه اضغط الولاعه حتى تقفل ثم ضع المنديل بجانبها والباقي تعرفونه

[المرقب العالي]

إذا عند إشتراك وفحمه ضع الفحمه بين الاشتراك

امسكها من جهه السالب ومن جهه الموجب على طول تولع

[الهوى]

بيض الله وجهك

[almnsori]

الله يبيض وجيهكم و الله طرق حلوه

[camaro]

سبحان الله وبحمده
سبحان الله العظيم

[المجفل]

ياخوان صعبتوها وهي سهلة صب بنزين على راس عود وفصل سلك البوجي وجهه الشرارة الى العود وقول لخويك يدق سلف (يشغل السيارة) يولع على طول وثم حط بنزين على الحطب ولع النار ومافيها اي خطــــــــــــورة
وأذ ماعندك سيارة دور سلك معدن اوحديد لف عليه منديل وحركه حركة سريعة كأنك تبي تكسره رايح يسخن السلك ويدخن منديل الورق شغل بوزك ونفخ حتى تشب النار وسلامتكم

[التويبع]

سلك واحد يكفي
اشبك السلك بالكهرب (+)ولامسه بالصدام

[قرموش]

ما قصرت يالغالي ولا عدمناك

[أسامي]

ولاعة السياره وطرف منديل
سهله ومتوفره وآمنه بنفس الوقت

[دعاسم]

بارك الله فيكم

[ذبذبات]

أفكار رهيبة تدل على إبداعكم

[عوكاس]

جب منديل فاين اوحطة على ائي لانبة اولع الاصطب

[علي الشهري]

مبارك الخير والمطر على الجميع

[جبل خزة]

أفكار رائعة وسهلة وفي متناول اليد

أنا عندي فكرة شفتها عند واحد وهي انك تجيب بطارية من النوع اللي لها راسين في جهة وحدة يعني الموجب والسالب مع بعض وتكون مربعة الشكل ، وتجيب ليفة مواعين حديد ناعمة وتفرك البطارية من جهة الروس في الليفة وتصير جمر ثم تحط عليها الورق والاعواد اليابسة وتنفخ عليها وتشب

[مروووق]

مشكورين جميعا على هذا الموضوع الرائد والابتكارات الرايقة

[ahmed8883]

فكره جديدة وسيريعه لتشغيل النار
اذا نسيت الكبريت

ليفة حديد للجدور وبطاريه الي تجي الراسين جه واحده
افتح الرابط ونزل الفيديو
تحياتي


http://www.zshare.net/download/518173662f3177fe/ (http://www.zshare.net/download/518173662f3177fe/)
http://www.zshare.net/images/spacer.gif

[مفلت]

انا حلي اذا ماصار معك لا ولاعه ولاشي سريع الاشتعال افتح الكبوت طال عمرك وناضر من وين يجي البنزين (علبه)وفك طرفها اللي بيروح للمكينه وخل واحد يدق سلف بيصب البنزين ثمن جب اشتراك واشبكه في البطاريه ولا مسهن مع بعض بسرعه وان شاء الله بتنفعك واذا رجعت للديره خذلك بكيت كبريت ووزعهن في السياره توزيع

[tooto]

فيه طريقة قديمة ومعروفة وهي عن طريق ضرب حجرين من الصوان أو المرو مع بعض وبالتالي حدوث شرر بسيط حسب حجم الأحجار وتكون مجهز شي قابل للاشتعال وتقبس .. بالمناسبة الصوان والمرو ينتشر بكثرة في المنطقة الجنوبية ولونه أبيض وأحمر وإذا ضربتهم ببعض وشميتهم تلقى ريحه مثل الكبريت ولو تركت بالسيارة حصاتين منها ما أضنها بتضايقك وبتنفعك في يوم من الأيام .. وفيه الان بمحلات الرحلات قداحة ذكروها الاخوان وهي عبارة عن حديدتين بحجم مفتاح السيارة أو أكبر شوي إذا ضربتها ببعض طلعت شرارة قوية

والله امها فكره حلوه حتى تقدر تستخمها استخدامات اخر مثل واحد مضايقك بالخط تربيه فيها
او تثبه دعسه البانزين او انك ترفد الموتر لا يتدحدر وقت التنسيم

[الريموت]

انا صراحة جربت طريقة اشعال النار من الزر (اللمبة) اللى في الكبوت أو تفك لمبة الغاز اللي في الشيارة وتلف عليها منديل وهي والعة ثم تنفخ ويولع المنديل وتاخذه وتولع النار وجربتها وتعلمنها مرة كنا في البر وما معنا كبريت ونجحت الطريقة ولله الحمد والله يوفقكم وشكرا على طرح هالموضوع ويسلم الجميع

[ابورغودة]

سلك اشتراك وكرتون وتقوم بتبليل قطعة الكرتون بالبنزين من الصفايه البنزين حقة اسياره وتجيب الاشتراك وتشبكه با لبطاريه وتلمس الاشتراك حتى تطلع شراره وتولع الكرتون وتشب النار وتصلح القهوه والشاهي
والسسسسسسسسسسسسلام عليكم

[No.1]

فكرة الولاعة ، ولمبة الكبوت او النور ، والاشتراك ، والبوجي .. كلها مرتبطة بقربك
من السيارة .. .

كيف تتصرف إذا لم يكن لديك سيارة ؟؟؟؟
كيف ستتصرف لو كانت السيارة موجودة ولكن غير قريبة .. مثلا بروضة التنهات
وانت دخلت داخل الروضة ، وسيارتك خلف السياج ..؟؟

[الشاص عز لهله]

والله ما جربت الحركة لكن جربها و علمنا بنتيجة و الحركه هي انك تاخذ تيب او لزاق او خيط و تربط حديدة و حطبة مع بعض و تصب او تنقعهم في بانزين و تطلهم و تاخذ حديدة ثانية و تكفك الحديدة الملزوقة بالحطبة مع الحديدة العادية و تولع معهك انشاء الله

او اذا كنت في قار ارمي الحديدة المربوطة في الارض و بتولع

[موسى2002]

استخدم ولاعة السجاير التي في السارة واستخدام ورق صحي بطيه ثم وضعه على الولاعة والقيام بالنفخ عليه بوجود حطب رهف و خفيف

[همس الغدير]

طرق جدااااااااا ممتااااااازه

[بواردي الدلم]

هههههههههههههههههههههه


بعض العالم يقول جب لك بطاريه أم راسين هههههههههه

طيب جب ولاعه وريح عمرك

فيه ميداليات عباره عن ولاعه وفيه سكاكين في قفاها كبريت وولاعه وفيه بلاوي متلتله بعد

[فراج الفريح]

انا اقول بطارية جافه وسلك مواعين 100%
مجربة علطول تشتعل

[ابوفي]

مشكوووووووووووووووووووووورين على هذه الافكار

[طير ابابيل]

ياخوان صعبتوها وهي سهلة صب بنزين على راس عود وفصل سلك البوجي وجهه الشرارة الى العود وقول لخويك يدق سلف (يشغل السيارة) يولع على طول وثم حط بنزين على الحطب ولع النار ومافيها اي خطــــــــــــورة
وأذ ماعندك سيارة دور سلك معدن اوحديد لف عليه منديل وحركه حركة سريعة كأنك تبي تكسره رايح يسخن السلك ويدخن منديل الورق شغل بوزك ونفخ حتى تشب النار وسلامتكم
افضل واسهل الحلول .. بيض الله وجهك