التغريز مايعوق باذن الله اللي يعوق هوالتصرف الاعمى

[فهد88]

بسم الله الرحمن الرحيم
السلام عليكم ورحمة الله وبركاته
اول شي يااخون انا شفت مواضيع لناس مفقودين
والاسباب واجد لاكن السبب الريسي هو التغريز سوا بسياره دفع رباعي او ثنائي
وشفت ناس ماتت وناس نجت بأذن الله
ياناس التغريز مايعوق باذن الله لاكن اللي يعوق هو التصرف الاعمى
انا والله الحمد ظربت نفود وقيعان وسهال وجبال ماخفت الا من شيئين فقط
هو التعطل خراب السياره عطل مكانيكي او السبخه(الطين بوسط الماء)
نرجع لتغريز
التغريز سياره غرزت وتعلق البطن خلاص ماتطلع ؟؟ لازم سحب ولااقعد؟؟
ياخي انت معك عفريته وهذي اهم شي في التعلق يعني غرزت السياره
وش المشكله ماارفع السياره في العفريته
تغوص العفريته في الرمله؟؟ حط حصاه تحتها ..خشبه .. قشع خيشه املاها رمل اي شي حولك من السياره من الارض
من العزبه .. تلقى لاتقولي ماالقى
طبعا انا اتكلم عن واحد غرز وتعلقت السياره وعارف ان ماحوله احد خلا خالي
نكمل
طبعا قبل العفريته شوف المكان الزين لرفع بعده احفر
الحفر وتركيب العفريته واللي تحت العفريته كله بحذر
وكل الشغل يصير بحذر وتفكيروالاستعجال مرفوض اطلاقا
عشان ماتزل العفريته وتطيح عليك السياره ولا على يدك ولا تاخذ مجهود بدون فايده
نكمل
نبدا برفع كل ماترفع ادفن الكفر من الداخل والخارج لو ترفع الاربع كلهن
وين المشكله؟؟؟ المشكله هنا انا اقولك المشكله الماء بس ماء الشرب لوتقعد ثلاث ايام
وانت تحفر وتدفن وتحاول فيه مشكله ومعك ماء؟؟ يمكن تقول ايه تعب!! بس اللي وراه
الهلاك بيقول لا عسل اهم شي اطلع
نكمل
رفعت السياره
وضبط بطنها وش اسوي
هنا اقولك خذ الامورعلى اكبر الضمانات !
يعني لاتقول والله برجع اجرب ولا بقدم اجرب لالا
لازم تحط حصى وقشع وكل شي عندك اهم شي تمشي وانت ضامن ميه بالميه انك طالع بعد الله
لو تحط حصى وترجع متر وترجع تاخذ اللي ماله مافيده من الاول وتستفيد منه ثانيه مره
قبل تحرك السياره نزل الهواء الين عشره اذا معك ماطور مافيه مشكله ارجع اعبيهن
قبل تحرك اذا السياره دبل تشبكه تعديل اللكفر عدال وبااذن الله طالع طالع لوانك في رباضه والسياره
بدون دبل
واحد يقول انت مصعب الامور والامر سهل وبسيط وفيه طرق واجد
انا اقوله ايه انت ماشاء الله مافيه مثلك لاكن اذا اذا اذا ماقدرت في محاولتك وشفت ان ثقتك نكبتك
جرب هذي انتهى
اضافات
تطلع لبر اهم شي اهم شي لازم معك عفريته عصاها طويل ماطور هواء كمية مااااااااااااااااااااااااااء
بااذن الله ماعليك خوف
بعده تجنب ياخي السيوف و الاماكن العسره والطين والهقاوي تبي تقول والله انا فنان مع الطعوس ولاعلي خوف من التغريز وسيارتي دبل
لاياخي حنا نقول هذا ماهو عشانك تغرز بس لا
اول شي تلعن والدين السياره تعرض نفسك لخطر اكبر تعطل سياره انقلاب حفرة سيف
واجد الامور
امش على راحت لاتسرع مع البر
خذ معك عده بشنطه صغيره مفاتيح وسكاريب وحبوب وزراديه ومعجون خلط لحام
خلها معك بسياره على طول تبي تقول والله مااعرف افك واربط ولاافهم شي اقول خذها يمكن تستفيد
منها يمكن تعطل السياره اقل شي لو تهرب السياره ماء تسده بهلمعجون
انا اقول الله انعم عليك بعقل تفكر فيه قبل تطلع وش تاخذ واذا واجهت مشكله كيف تحلها
مهما كان

[الخيال الواقع]

الله يجزاك خير على حرصك وبورك فيك وبجهودك

[عشقتك يامكشات]

بارك الله فيك يالغالي ونصائح من ذهب ، فعلاً التصرف الصحيح و أخذ الاحتياطات مهمه جداً في هذه الامور

[ذيب الفقارة]

وعليكم السلام ورحمة الله وبركاته

نعم الهدوء مطلوب والاستعداد مطلوب

يعني لو معك قطعتين بلاكاش كان الأمر أكثر سهولة

وكما ذكرت أخي الكريم احرص على وجود الماء فذلك

يعطيك الكثير من الراحة والاطمئنان

نصائح مهمة جزاك الله خيرا

تحياتي

[طلال مكشاتي]

بارك الله فيك على النصايح
فعلا الواحد اذا غرز وبعيد عن الخط تلقاه مايعرف يتصرف او مستعجل ولا ياخذ الماء والتمر الكافي معه..
موضوع مفيد
شكرآآ لك،،

[الدبل الثقيل]

وعليكم السلام ورحمة الله وبركاته
جزاك الله خير
كلامك صحيح

[قوقل النفود]

الله يعكيك العافيه علئ هالنصائح

[ذيب ذهلان]

الله يجزاك خير واهم نقطه عدم الاستعجال وقبل كل شي صلى ركعتين وادع الله يسر امرك

[راعي الطيب 55]

الله يعطيك العافية على النصائح

[ابوزياد 2000]

الله يعطيك العافيه

[fahad al jaid]

الله يجمل حالك ماقصرت

[ابوصالح3]

موضوع جميل واهم شيء بالكشتات الماء والتمر

[mamool]

ماشا الله لاحول ولا قوة الا بالله

[mamool]

رجاحة العقل قبل كل شي

[ساهر اليل2010]

السلام عليكم

يعطيك العافيه والله على النصيحة والله ممتازة جدا لمن هم قليلي الخبرة

ولكن : حاول تغير لون الخط لانه مجهر ويعمي العين وتكبر الحجم شوي للفايدة


بالتوفيق

[الذيب الأبيض]

السلام عليكم

يعطيك العافيه والله على النصيحة والله ممتازة جدا لمن هم قليلي الخبرة

ولكن : حاول تغير لون الخط لانه مجهر ويعمي العين وتكبر الحجم شوي للفايدة


بالتوفيق



ههههه اي والله انعميت

مشكور على النصايح

[الكدن1]

نصائح مفيد ة
وانا اقول الذي مااخذ بالاسباب
قبل الخروج للبر يتحمل تفريطه فلا اقل من جوال الثريا مستعمل ب1000 ريال وخاصة للذهاب بسيارة واحده في اماكن وعره وبعيدة عن الديار
وكلما كثرت السيارات قل الخطر
لان النفس غاليه فلاتبخل عليها
ومن الاشياء المتفق عليها ان الهدؤ والثقة من اسباب النجاة بعد التوكل على الله

[tarnado]

فكره زينه ونصيحه لاهل البر الدائميمن :r:cانا شفت زي الطربال
تحذفه تحت السياره وله خرطوش تشبكه في الشكمان
يشقل السياره شقل اكثر من متر جنب كامل
زي القطعه هاذي لازم تكون من الظروريات اقصداهل البر
ولا ننسي الماء والتمر وجوال الثرياء للاحتياط والتوكل علي الله
وهاذا الرابط https://youtu.be/zQp8c7ntrNI

[طحنون]

كل الكلام اللي قلته ماعليه غبار
والكل راح يتصرف
واهم نقطه
الارتباك والخوف هاذا اهم شي
اذا تخلص منه الشخص انتهی الوضع
بعد التوفيق من الله عزوجل

[ابو البر]

كلام موزون ومن ذهب
الماء ثم الماء ثم الماء
وجلعنا من الماء كل شي حيا .

[مناسبات]

كلامك صح وسليم والأفضل من العفريتة الرافعة البلاستيكية اللي تركب في الشكمان افضل من مية عفريتة وعن تجربة .

[areeen]

اذا كل السيارات فيها كذا انسى التغريز بالرمل والطين ومشاكله

https://www.youtube.com/watch?v=f4JEkDcfnbc

والبنشر والعفريته معه

[فهد88]

اذا كل السيارات فيها كذا انسى التغريز بالرمل والطين ومشاكله

https://www.youtube.com/watch?v=f4JEkDcfnbc

والبنشر والعفريته معه



الله يعطيكم العافيه جميعا اللي شاركونا بكل صغيره وكبيره
وكل واحد حاول يجيب ماعنده لخدمة اخوانه الكشاته والصياده
لاكن انا افضل الواقع
العالم ماهي كلها حريصه على اللي نقوله وتتقيد فيه
مثال _ الحين اهم شي الماء للكشات والمسافر والصياد ووو...
طيب هذا جدانا وابوانا واخوانا يحرصون على الماء من قبل لانعرف الكهرباء
وهذا حنا اللي ايامنا هذي نسمع فلان مات عطش مانقول شي يومه والله يرحم اموات المسلمين
انا جايب المثال هذا عشان اللي ينصح ويقول
خذ معك بالون هوائي يرفع السياره
واللي يقول خذ بلاكاش
واللي عارض مقطع فيديو رفع السياره بلعفريته الكهربائيه
واللي واللي واللي
طيب يااخوان انا معكم بشي هذا حلو وجميل جدا
لاكن نبي نشوف اللي قراو النصايح وشافوه
نبي نفرض ان اللي قروها 100 سياره
تتوقعون الميه هذي لو افتشها بلقى كم بالون هواء معهم او بلاكاش او شراع او مركب اله هيدرليك
اكيد ماارح يتعدون الخمس سيارات
لاكن لو نرجع للعفريته تتوقعون كم سياره من الميه معها عفريته؟؟
اكيد تبي تقول محد طالع للبر الا بعفريته مو عشان يتعلق لا عشان لو يبنشر لاسمح الله
حتى المهمل وهو المهم تحصلها معه لان مكانه الاساسي في السياره
ياما ناس غرزو وتعلقوا والعفريته معهم ولا استخدموها لانه ماينتبه للفكره هذي
انا ماجبت الموضوع الا عشان العفريته وكيفيت استخدامها
وستخدام ماحولك من مواد مثل الحجر والخياش والمشايات والسبير
والعزبه والصحن اي شي حت لو الثوب تملاه رمل وحبيت اوضح كيف تخدم خدمه جنونيه
واقرب مثال شف مقطع الاخ هذا الله يعطيف العافيه
والعفريته ترفع مثله بضبط لانه هو بلااساس عفريته
صح انت تدري وانا ادري لاكن فيه واحد مايدري عن العفريته
واتمنى ماحد يفهمني غلط

[السيل يدربي]

كلام سليم من جميع المشاركين ولكن عندى وجهة نضر قد يوافقنى بعض المهتمين وهو اغلب من وقعو فى مصيدة التغريز وراحو ضحايا هم من اصحاب السيارات الدفع الرباعى لماذا؟
الجواب هو سؤال لماذا متسلقو الجبال او الاشخاص اللذينا يعملن على ارتفاعات عالية يرتدون احزمة السلامة
لكى لاقدر الله سقط يكون الحزام منقذ لة بعد ارادة الله وهو من الاخذ بلاسباب
لذلك لاتتوهق وتقول موترى جديد ومعى دبل ومانى فاضى انسم الكفرات وعبى اجل وش فائدة الدبل ومن ها الكلام انا اقول نسم الكفرات قبل الدخول للرمل ولا تشغل الدبل الا فى ضروف صعبة وتتوقع ان تشغيل الدبل سوف
يمكنك من الخروج خاصتا فى القعور المحاطة من الاربع جهات من الرمال
وافضل الطرق عند التورط فى الرمال الرجوع مع نفس الطريق الذى اتيت من منة حتى ولو طال بك المسير
واخيرا يجب عليك ان تاخذ فى الاسباب ولحمد لله ميسرة ولا تعول على فلان او فلان وتقول الجماعة قدامى
ومعهم جميع الاغراض وما يحتاج اخذ شى معى او يطرى عليك طارى وتقول ودى امشى من عند ربعى
واثناء العودة يحصلك حاجة ويتعطل الموتر او تغرس او تضيع. الثريا مهمة وحياتك اهم مهما بلغ الثمن والله من ورا القصد ولسلام عليكم

[الحربي حاتم]

جزاك الله خيرا

[faisal 506]

الحقيقة المفروض الواحد يبعد عن الطرق الصعبه
يعني مثلا تبي تطلع تله فيه لها طريقين واحد سهل بس تلف شوي
وواحد قريب بس صعب الاغلب يتجه للصعب وهذا خطا
بعدين اذا جيت تطعس ياخي نسم اذا مهوب عشان ماتغرز
عشان تريح الموتر ياخي اشتر منفاخ هواء٢٠٠ ريال
ويجلس معاك ٥ سنين او زود
بالعربي ولم العصابه قبل الفلقه

[newhorizon]

جزاك الله كل خير
نصائح قيمه يستفاد منها

[أطلال نجد]

وعليكم السلام ورحمة الله وبركاته

نعم الهدوء مطلوب والاستعداد مطلوب

يعني لو معك قطعتين بلاكاش كان الأمر أكثر سهولة

وكما ذكرت أخي الكريم احرص على وجود الماء فذلك

يعطيك الكثير من الراحة والاطمئنان

نصائح مهمة جزاك الله خيرا

تحياتي


الماء و التمر

[CoAsT BoY]

الطريقة مشهورة طلعت بها قراند ماركيز قبل شهرين وكان بطنها واصل للتراب مدفون

[صقرحايل]

ماشاالله عليك
الله يجزاك خير ويوفقك