شاركونا حلول جيب VXR ثقيل

[آبوعزآم]

السلام عليكم ورحمة الله وبركاته ...

مساكم الله بالخير جميعاً .. جيب VXR 2001 فل كامل

لكن الموتر ميت ثقيل عزم وممشى ويختلف عن الجيوب نفس النوع والموديل

( شلت الدبات ) مع الشخالات وركبت مروحه كهرب لكن الموتر ثقيل جداً خصوصاً بالنفود
مايمشي طبيعي لازم ارجع القير لل، L
وش تنصحونا يا اخوان .. فلتر KN وهل يغير ؟ وبعض الشباب قال كلتشات الماكينه ؟

شاركونا الحلول الله يوفقكم ويجزاكم الف خير .

تحية لكم وتقدير

[المميـز]

:

شيك على البواجي واسلاك البواجي يمكن تحتاج تغيير
شيك على صفاية البنزين يمكن منسده وتحتاج تغيير
شيك على طرمبة البنزين يمكن ضعيفه ماتوصل البنزين للمكينه بالشكل الكافي
شيك على الثروتل قد يحتاج تنظيف وفلتر الهواء له دور بالعزم اذا كان قديم

:

[آبوعزآم]

الله يعطيك العافيه
كل اللي ذكرت مشيك عليها ماعدا الثروتل وش وظيفته

[Laith123]

وعليكم السلام

مرحبا ومسهلا

[Laith123]

انا مثلك معي vxr 2000 ثقيل جدا حتى قاومت مع جكسار وروح علي

فقمت غيرت صفاية لنزين وصفاية البنزين تغير سنويا أفضل .... فتحسن نوعا ما
وبعدها رفعت أبنص البنزين الى فوق بحدود الفرامل حتى كنت أخلبط بينهم بداية الامر وتحسن جذريا وشي واضح
وبعدها غيرت اسلاك البواجي والبواجي وكانت منتهية (شد بلد) وتغير كثير
وبعدها غيرت فلتر الهوا وتحسن أيضا
وأخيرا قام مهندس فلبيني بسد فتحة في المنظم ب مسمار


والان مافي جكسار الا أطلب معه حرش حححح

والحمد لله

[Laith123]

حتى صار ابنص البنزين خفيف الدعسة بعد ما كان ثقيل

[سلطان أبونايف]

الموتر ٨ سلندر وهي بدايات ال٨ سلندر فأغلبهم ثقيل نظرا لثقل المكينة أنا معي مثله بس متأقلم على طبيعته
واذا تبيه يخف اقلبه هدد غير جنوطه وكفراته

[سعيد العقير]

اسمحو لي يا اخوان

الفي اكس ار
اذا كانت المكينه صافيه وما فيها نفضه او ترتره والموتر قير اتومتك فغالبا يكون من كلشات القير وخاصه اللي ماشي 300 الف وفوق
اما اقلبه هدد بيصير خفيف هذا كلام مو صحيح اطلاقا والدليل ان الموتر الصاحي تحمل عليه قد وزنه وما يتغير عزمه

اما ان كان الموتر مو صافي ويترتر فهذي مشكله في مرور واحتراق البنزين مما يسبب ضعف في العزم

[الشمروخي]

افصل الدبل الرباعي وادع لي يكلفك 600

[الكونترولCONTROL]

السلام عليكم
أعتقد ما يقدر يفصل الدفع الرباعي بالفكسار إلا بتعديل في الميكانيكا ( القير )
لأن الحركة مشبوكة بين القيور ، و عند فصله يفقد ميزة الرساوة كـ vxr مدفوع فيه قيمة عالية !!
و لا أستبعد أن يكون الجيب كأنه ونيت في المنعطفات و سريع الإنزلاق الخلفي
بشكل يؤثر على التوازن عند الدعس القوي على البنزين


حلول مقترحة مساعدة :
1- : تأكد من البواجي أنها نفس رقم الوكالة
2- : شيك على فلتر و زيت القير
3- : أسلاك و كويلات البواجي ، يكون بعضها منشعر؛ و هذه المشكلة عادة يتم تنبيهك بالطبلون ( Check Engine )
( لكن (( قد )) يكون الحساس لم ينبهك بإشارة بالطبلون )
و هي غالية : الواحد بحدود 280 ريال و لا يتم تغييرها الا بواسطة فني أو كهربائي جيد و شغله نظيف
، و أما البواجي نفسها رخيصة .
4- : شيك على جميع زيوت الدفرنسات و القيور
5-: افحص تماتيك المروحة (( عادة يزيد صوت ( حنّة ) السيارة و تثقل قليلا عند خراب رمان أو تماتيك المروحة )
6:- اذا انك مركب كفرات مؤخرا ... ضع في حسابك أن كفرات البالون و الكفرات العريضة جدا تؤدي لهذه المشاكل
ركبت كفرات بالون و كان معي الديب يصل 190 كم / س بالراحة و بعد البالون لم يتعد 145 كم / س ، رجعت كفراته 245 و رجع الموتر طير ما شاء الله


و انتبه جيدا للنقطة (( 5 ))

[الكونترولCONTROL]

الموتر ٨ سلندر وهي بدايات ال٨ سلندر فأغلبهم ثقيل نظرا لثقل المكينة أنا معي مثله بس متأقلم على طبيعته
واذا تبيه يخف اقلبه هدد غير جنوطه وكفراته

اذا تقصد بدايات ال 8 سلنر بالنسبة لجيوب تويوتا ؟؟؟ ترى من التسعينات ..