البطاريات

[شيخ بني تميم]

السلام عليكم ياخوان انا معي جيب لكزس ومركب لمبة في الكبوت وثنتين جانبيه الد الي تجي8واط ولمبة تحت للتانكي ومحول 700 واط وش تنصحون اي نوع من البطاريات او اركب بطارية اضافيه مع الكنود 65 واط عطوني نصايحكم

[مجالس الرجال]

اذا تشغيل لمبات ليد ماله داعي بطارية اضافية واذا بتبدل الاساسية فكثير من البطاريات الموجودة عمرها الافتراضي متقارب

[نقا الحوميات]

انا معي الزرقا .. اوبتما كملت 3 سنوات ونصف الان وطيبة ماشاء الله .

[awadh8874]

والله دامك مركب كل هذي الافضل بطارية اضافيه وتحول جميع الاشيا اللي مركبها عليها من لمبة اضافية للكنود وضروري واهم شيء المحول

بحيث انك تتطمن هالاشيا تشتغل ماتأثر أبداً على البطارية الأساسية للسيارة حتى لو ضعفت الاحتياطيه او انعطبت البطارية الاساسية مرتاحة ولاحتياج السيارة فقط

[شيخ بني تميم]

طيب وش رايكم في بطاريات اوبتماء هل تشيل وتتحمل وهل يحتاج لها صيانه

[awn050]

طيب وش رايكم في بطاريات اوبتماء هل تشيل وتتحمل وهل يحتاج لها صيانه

لها معي سنه شغلت بها حاجات ماتطري علي بالك ادائه حلو ولحد الحين طيبه الصفراء 66 انبير يقول الي اخذتها منه تعادل 120 انبير بطاريه عاديه

[شيخ بني تميم]

طيب انا سمعت انها لها صيانه او تفضيها كل فتره هل هاذا صحيح وا ٧٥ انبير كم سعرها

[awn050]

طيب انا سمعت انها لها صيانه او تفضيها كل فتره هل هاذا صحيح وا 75 انبير كم سعرها

ماقالي شي الي شريتها منه لاكن الي شريتها اخذتها ب1150 ريال وتستاهل قيمتها للأمانه

[أبوصالح9]

ما لها داعي البطارية الاضافية - عندي لك حل منتاز ركب بطارية اعلى امبير من اللي عندك وكالة - يعني اذا بطارية موترك وكالة 75 غيرها 95 والحمد لله - مع اني ما اتوقع بطارية اللكزس 75 اتوقع اكثر - واهم من البطارية وانا اخوك نظافة البطارية - ولله الحمد كل بطارياتي تجلس من 4 سنين الى 5 سنين - لكن اعلمك كل شهر اشيك على الماء وكل 3 شهور او 4 شهور افكها واغسلها من الوسخ والاملاح اذا فيه املاح على الاقطاب واشد على الاصابع عند الربط ومستحيل اشرك لاحد لانه هو العدو اللدود مع الاملاح لخراب البطارية - اذا لقيت احد متعطل معي جهاز شحن اشركله ولا يعدم موتري ولا شي

طبعا بطارياتي كلها عادية ولا تقربك الالكترونية - الا اي سي دلكو اللي تجي من امريكا شد البلد اما اي سي دلكو اللي عندنا خرابيط ولو يقولك ببلاش لاتاخذه

نسيت شي مهم - اذا اخذت العادية لاتركبها على طول خل العامل يعبيها اسيد وخلها تنقع يوم كامل همن ركبها على الموتر وعز الله بتدعيلي

[دواك عندي]

فعلاُ يابو صالح بطاريات اي سي ديلكو مهب مثل أول

[ابوحسام9]

اذا تبي عندي بطارية اوبتيما شريتها من تقريبا شهر صفرا 66 امبير جديده

[الكدن1]

تجربتي مع البطارية الاحتياطية فاشلة وهذا من زمان وقد تكون الشغلة تطورت عن السابق لكن يكفي من عيوبها تأثرها بنفاذ البطارية ثم شحنها مرة أخرى وهذا يقصر عمرها والازعاج الذي يحصل من تشغيل السيارة وخاصة في وقت صيد الدخل
والحمد لله قبل أربع سنوات ركبت بطارية أوبتيما ولا زالت
ومن مميزاتها:
* لاتتأثر بالأهتزازات
* تشغيل ماطور الهواء والسيارة طافية
*تتحمل الأضافات
*تشحن بسرعة
*طاقة مستمرة لفترة طويلة
*تحافظ على دينمو السيارة(لأن السيارات الحديثة تعتمد كليا على الكهرباء فأي نقص يؤثر على أدائها)
الأضافات/انوار لد/ثلاجة/كنود/ماطورهواء
محول كهرب 1500 واط أشغل عليه الكاتم الكهربائي والغلاية وكاوي الرصاص والدريل مطبخ وورشة متنقلة هههههههههه
رأيي الشخصي.......... ركب اوبتيما 75 امبير الصفراء او الزرقاء وأبعد عن الاحتياطية
من الأفضل كل 6 شهور تفضي البطارية تماما من الكهرباء قرقر كثير

[ابوحسام9]

اخوي الكدن 1
ايش تقصد يوم تقول الازعاح الي يحصل عند تشغيل السياره وخاصه وقت الدخل

[الكدن1]

اخوي الكدن 1
ايش تقصد يوم تقول الازعاح الي يحصل عند تشغيل السياره وخاصه وقت الدخل
لأن السيارة في وقت صيد الدخل نادرا ماتتحرك بعكس صيد القمري أضف الى ذلك شدة حرارة الجو فالثلاجة تقريبا على طول شغالة فتستهلك البطارية بسرعة بمعدل ساعتين فيكثر تشغيل السيارة والازعاج ليس من الصوت بل من عادم الشكمان(وخاصة ان بعض الخويا يلزق السيارة بالجلسة ههههه)
لكن مع أوبتيما ريح بالك / المفروض يعطونن بطارية مجانية على هالدعاية هههههه

[ابوحسام9]

يعطيك العافيه على التوضيح
تستاهل الهديه

[شنطة عده]

ما لها داعي البطارية الاضافية - عندي لك حل منتاز ركب بطارية اعلى امبير من اللي عندك وكالة - يعني اذا بطارية موترك وكالة 75 غيرها 95 والحمد لله - مع اني ما اتوقع بطارية اللكزس 75 اتوقع اكثر - واهم من البطارية وانا اخوك نظافة البطارية - ولله الحمد كل بطارياتي تجلس من 4 سنين الى 5 سنين - لكن اعلمك كل شهر اشيك على الماء وكل 3 شهور او 4 شهور افكها واغسلها من الوسخ والاملاح اذا فيه املاح على الاقطاب واشد على الاصابع عند الربط ومستحيل اشرك لاحد لانه هو العدو اللدود مع الاملاح لخراب البطارية - اذا لقيت احد متعطل معي جهاز شحن اشركله ولا يعدم موتري ولا شي

طبعا بطارياتي كلها عادية ولا تقربك الالكترونية - الا اي سي دلكو اللي تجي من امريكا شد البلد اما اي سي دلكو اللي عندنا خرابيط ولو يقولك ببلاش لاتاخذه

نسيت شي مهم - اذا اخذت العادية لاتركبها على طول خل العامل يعبيها اسيد وخلها تنقع يوم كامل همن ركبها على الموتر وعز الله بتدعيلي


انا مطبق نفس طريقة الاخ ابو صالح وماشاء الله تبارك الله البطاريه تدوم معك فتره طويلة
باستثناء التفريغ الكامل ....البطاريه الجاهزه فلس ولا تنفع بريال
والمهم زيادة الماء(ماء مقطر) كل فتره وبالامكان معرفة مستواء الماء بالبطارية بوضع كشاف خلف البطارية (في الظلام) ثم هز السياره وبيوضح معك مقدار النقص

[أبوصالح9]

انا مطبق نفس طريقة الاخ ابو صالح وماشاء الله تبارك الله البطاريه تدوم معك فتره طويلة
باستثناء التفريغ الكامل ....البطاريه الجاهزه فلس ولا تنفع بريال
والمهم زيادة الماء(ماء مقطر) كل فتره وبالامكان معرفة مستواء الماء بالبطارية بوضع كشاف خلف البطارية (في الظلام) ثم هز السياره وبيوضح معك مقدار النقص


ترا مايحتاج تفريغ الماء فقط تنظيف الاقطاب والاسلاك

[منصورالشمري]

نصيحة مجرب ركب اظافيه اوبتما مع منظم رفيق الدرب وانس المشاكل