ياهل الحفر ابي مكان افصل لي طبق ودروج لسياره

[ابوضاري2007]

السلام عليكم ورحمة الله وبركاته

اسعد الله مساكم جميعا

والله انجبرت انزل الموضوع لاني والله بحثت بالصناعيه الحدادين كلهم يقولون مايعرفون

وشكلهم مايبون يشتغلون الصدق

لانها كلها مقاسات ويفصلون عليها بس لاحياة لمن تنادي

وفيه محل اسمه كشته وبصراحه سعره غالي بالحيل لتفصيل طبق ..؟

حتي الجاهز غالي وبصراحه ماهو مناسب لشغلتي بعد

اللي يخبر لي محل يفصل لسيارات ومتاكد منه يوصفه لي بارك الله

تعبت وانا اللف الصناعيه ولافيه فائده

[ابو_غاليه]

السلام عليكم. نفس المشكله تقريبا عندنا بالكويت

الحدادين فسقانين الله المستعان واللي افسق منهم النجارين ههههه مايبي يشتغلون شغل قيمته بسيطه

انا اشور عليك تروح لأبو المنيوم غدي ربك ماتدري لو انهم ابرك و ارخص من النجارين و ان مانفع حاول تاخذ القياسات الطول و العرض و الارتفاع ..الخ. و قول له فصل لي. ولاتعلمه انه طبق للسياره .. موفق

[أبو شيري]

أنا قبلك لفيت عليهم وشرحت لهم الفكرة اللي براسي

وكل حداد أجلس أشرح وهو يهز راسه وبالأخير يرد علي [ سديق مافيه معلوم هذا شغل]

وبالنهايه بحثت هنا في مكشات وتوصلت لأسم ورشة حدادة في القصيم - الرس
ورحت له مجرد قلت طبق عرض علي هو أفكار وتصاميم ما كانت بالحسبان

واشتغلت عنده طبق تعليق بمسمار الأمان الحديد فقط

وما شاء الله تبارك الله

لذلك أنسى موضوع الشغل في حفر الباطن وتوجه الى القصيم

لأن في الحفر لا يوجد ورشه اشتغلت هذا النوع سابقاً حتى ورحة كشته جيته خمس مرات بالاخير يقول ما أعرف

يوم سويت الطبق بالقصيم رحت له ووريته الشغل بقق عيونه شوي وتابع الحديد وقال هذا ما نسويه
لكن ممكن نعمل تجربه


عموما عليك بكم ورشة بالرس

ورشة النخيلان
ورشة الوادي
مركز شمس [ سعر نار ]


كلامي هذا قبل سنتين

[ابوضاري2007]

ابو غاليه وابو شيري الله يعطيكم العافيه وماقصرتو
والله العصر حصلت لي محل حداد وموجود كفيلهم وشرحت له الوضع وقال ابشر
وقال لي تعال بعد صلاة العشاء ركبه لكن مافضيت له لكن باذن الله اول ماراكبه
راح انزل موضوع عنه ان شاءالله وراح ابلغكم شخصيا لمشاركتكم موضوعي يمكن تعجبكم ^_^

[ابو_غاليه]

بالتوفيق ولاتنساا الصور ياكحيلان

[ابوضاري2007]

أبشر بعزك وباذن الله تعجبك
بكرا عندي دوام كامل ولااقدر انزل الموضوع
والجمعه مسكرين باذن الله السبت انزل الصور مع التركيب ان شاءالله