انت مثلي

[الطبيعه 1400]

السلام عليكم

بالربع عجزت ألقى ربعن على نفس جوي يعني في سوالف مثلي في مزحهم مثل مزحي ....... بتقول هذا منت محصل لو تدور العالم كله بس يالربع الي اطلع معهم للبر كلما رجعت منهم احرم الطلعه معهم والسبب ما فيه تعاون للغايه بس اقل شي يكون في الطلعه ناس تقدر تحلس معهم هاك سنتن من السنين قلت اطلع بلحالي وجرب اخذت لي لحيمه وظبط العزبه وطلع قلت منيب مبعد بجرب الجو بالحالي والله وطلع وصلح القهوه والشاهي وكل من مر يحسبني مضيع ولا مهبول .... الشاهد من الكلام ودي يكون هناك مجموعات لاهل المكاشيت لان مهوب من كل مسك موتر بر صار راعي بر هناك ناي ظواهرولا رحت البر رجعك من نفس اليله ن

[wawo]

صحيح

البعض لاطلعت معهم لازم تتحمل كل شى وتقوم بالاعمال لوحدك

والطلعة الوحدانيه , انشهد انها دواء اوقات

لكن لاتكثر الكشتات الوحدانيه

[متقاعد مبكر]

والله وانا اخوك قل ما تجد الخوي الي يطربك ما معك الا الموجود وخصوصية انك عاد تطلع لك مع مجموعه ووقتها تختار بطريقتك

[Al3rands]

وش الله حادني اطلع واكشت وارجع متكدر اذ اتبي رايي سو مثل ماقالو الاولين <رح لحالك ترجع راضي >

[الانسيابي]

اقول اذكروا الله

[خالد الشمري20]

السلام عليكم ورحمة الله وبركاتة


لويحصل تعارف بين اعضاء مكشات


يتصادقون ويكشتون مع بعض ويتعرفون على بعض ويكونون صدقات


وانا متأكد ان هنا في موقع مكشات من يكون لحاله بعض الاحيان ويدور خوي ولا يلقى


وانا متأكد ان هنا في موقع مكشات من هم رجال يحبون التعاون مع بعض بالكشته ونفوسهم حلوه وخفيفه وكفو


ويحبون يكونون صدقات مع رجال شرواكم


بس نحتاج مبادره ...وفكره ... من الاخوان وطريقة لنجمع بين الكشاته ....على ما يحب ويرضى رب العالمين ...

[ابولولو]

الأخويا تغيروا مهب مثل اول الا من رحم ربي

اول فيه تعاون ويتحملون بعض والخوي يصبر على خويه مهما صار

أفضل الكشات اذا صاروا رفقه من الصغر وكبروا مع بعض يصيرون يعرفون بعض زين

التعارف عن طريق المواقع أكثرها فاشله ويتم الفراق مثل ماصار معي ومع غيري يمكن العيب فيني الله اعلم والشي جائز

اذا الواحد يحب البر مره وخرّم للربيع وللبر يروح لوحده بس لايكثر الروحات لان السفر والبعد عن المدينة لوحده الشخص مكروه شرعآ

حديث الرسول صَل الله عليه وسلم(الراكب شيطان والراكبان شيطانان والثلاثه ركب )

وقال الرسول صَل الله عليه وسلم (لو يعلم الناس مافي الوحدة ماسار راكب بليل قط )

ياقعدة بالبيت أفضل من ناس تغثك وتنكد عليك

اول طلعه قريبه وخفافيه ويرجع بليله

[salmx1919x]

بسم الله الرحمن الرحيم والصلاة والسلام على افضل الانبياء والمرسلين.
بخصوص ندرة الخوي هذه الأيام الي اذا طلعت للبر تتسابق انت وياه ايكم يضبط الغداء او القهوة, فهذ بالتأكيد نادر, واغلب الناس للأسف اتكالين واهم ما عنده يجلس ويمدد رجليه, بل ان ندرة الصديق على العموم نادر ويا كثرهم الي يبيع صداقتك عشان مصلحة, لذلك يا خوي انكانك رجال تحب الطلعة والروحة و الجية ما لك إلا عطية الله, خذلك غنم مناحي او ناقة بحوراها وحط شبك في شعيب يحبه قلبك وصبي وكل يومين رح محلك وتمش في الوديان الي حولك ووسع صدرك وبعض الايام خلك يوم بليلته واذا اصبحت اضبط الفطور مع الحليب الي يحبه قلبك ومن جاك في محلك الله يحييه. وعلى العموم هذي نهايتك يا راعي الموضوع صدقني.

[الذيب الأبيض]

كأن الموضوع مكرر والا انا غلطان ؟

الكشتات لاجاء الشتاء الحين غبار وقواريص

خلاص يالطبيعه ابكشت معك ولاتزعل جهز العزبه الين مايجي الشتاء ان شاء الله ههههههههه

[علوش1]

بعضهم مايكفي انه ممد كرعانه ولا يسوي شي
الا ينتقد شغلك
الملح ناقص ... السكر واجد ... نوعية شاهيك مهيب زينه ... الخ
وفوق ذا كله شغال بلع !!

[عابر الجوف]

بعضهم مايكفي انه ممد كرعانه ولا يسوي شي
الا ينتقد شغلك
الملح ناقص ... السكر واجد ... نوعية شاهيك مهيب زينه ... الخ
وفوق ذا كله شغال بلع !!