احب الجيب "دفندر" من شركة لاند روفر ، فما رأيك أخي ؟

[برري]

أرغب في شراء سيارة جديدة برية ، ولقد جربت الجيب دفندر موديل 83 قديم فعلا واتعبني بالاصلاحات اللي ما لها آخر والسبب أنه كان موقف لمدة سنتين ، لكن بصراحة كان متعة في البران خاصة الشعبان وما قصر معي في الطعوس - الخرارة - المحلية ، يعني جبار وفي قوة ملفته ومساحة ورفاع عن الارض يعني ما يبي منك الا الدزززة بس ، والحين صرفته لأنه اتعبني بالمخاسير وهذي صورة للموديل اللي كان معي :
http://www.mekshat.com/pix/upload/images24/mk22489_land rover 1-.jpg


http://www.mekshat.com/pix/upload/images24/mk22489_land rover 2-.jpg



وهذي صورة الموديل الجديد من موقعهم :


http://www.mekshat.com/pix/upload/images24/mk22489_land rover 3-.jpg


أرجو تكرمكم أيها الأخوة في الإشارة علي بما تمليه عليكم خبرتكم وفزعتكم وجزاكم الله خيرا .

[تــــوني]

ما شاء الله سيارة ولا كل سيارة

وعلى قولتك جبارة ويعطيك العافية على الموضوع

[مسير عليهم]

طيب أخوي ماتحس ان قطع غيارةغالي ولا تلقى أحد يصلحه الا متخصصين


طبعاً انا معك في انه قوية ولا يقول لا في البر

وسعره بكم الجديد والمستعمل

[برري]

الأخ توني ، شكرا على زيارتك لموضوعي .

الأخ مسير عليهم ، اسعار قطع السيارة غالية نوعاً ما ، لكن في حدود المعقول ، واما من جهة اختصاص المهندسين فعلاً المجال هذا اتعبني لاني ما لقيت لها متخصصين الا ثلاث ورشات في الصناعية القديمة الأولى للمغربي وهي ورشة حرامية ونصابين والثانية ورشة عبد الكريم السوداني وما بعد تعاملت معهم لأني حالياً اتعامل مع ورشة التوازن ، عمالة فلبينية وشغلهم حلو واسعارهم سلخ ، لكن شغلهم ما هوب شين ، انا حالياً معي ديسكفري وناوي اشتري جديد بس حبيت اتأكد منكم هو يسوى تدفع فيه 180000ريال والا اشوف غيرها ، وانا معجبتني بصراحة مركبها راسي وصوتها فل وقوتها وخفتها محسوبة ، بس متخوف من تكرار موال الخرابات اللي انا طحت فيه مع الموديل القديم .

ارجو تفضلكم بالإشارة ، اللي سمع عنها والا جربها من اهل الخبرة يفيدنا تكفون ولكم الدعاء بالتوفيق في الدنيا والآخرة .

[بن حـــمـــد]

اخ برري من تجربتي الطويلة وباختصار اقول الدسكفري سيارة ليست قوية فقط بل جبارة ولم ارى في حياتي بمستواها
لكن لا تشتري الجديدة لأنها معقدة جدا وغالية جدا ولا تمسك سعر نهائي

واذا عزمت ولا بد فلا فعليك بموديل 2003 الو 2004 رح تحصله رخيص في حدود ال 60 الف

وتحياتي

[الكلاسك]

انحش من هالنوعيه انت منصوب عليك منصوب عليك سواء رحت للوكاله ولا ورش نصابين جرب جيوب باجيرو او هوندا النصب فيها اقل حنا في هذا الزمن ندور اقل نصب ولا النصب فيك فيك تحياتي

[برري]

جزاك الله خيرا يا ابا حمزة ، بالفعل فكرت في تقليل المصروفات وشراء موديل 2004 ومثل ما قلت راح تكون ارخص بكثير لأنها ما تمسك سعرها ، بس ابي اعرف بما إنك خبير بها ، شلون خراباتها عسى ما هي كثيرة ، لأن موديل 2004 يعني بيصير جديد نسبيا اذا قارنته بموديل 97 اللي معي ، ليتك تفيدني لأني بالفعل عزم عليها ان شاء الله .

الأخ الفاضل كلاسك مشكور على نصيحتك وفعلا الله يرحم حالنا ، منصوب علينا منصوب ، بس السيارة حلوة والله وتستاهل تتحمل نصبهم عليك من اجلها ، وتصدق إني متردد في شراء الهدد 2006 عشانها ، لكن اذا كانت بتسوي لي فيها سرداد مرداد على الورش بخراباتها فلا والله اتحمل فراقها ولا اتحمل تزحيفها بالسطحات ، تلقى الناس في ايام الربيع والخير يتمشون وانا انتظر المهندس الين يخلص من تزيينها ، هذا بس اللي مخوفني منها وغير ذلك فهي تمام التمام وشكرا لمرورك .

[بن حـــمـــد]

والله يا أخي برري اني كتبتلك رد طويل ومفصل واخذ مني اكثر من نص ساعة لكن يوم ارسلته انقطع النت وراح وقتك يا صابر :(

على العموم شف حبيبي بالعربي عيوب الدسكفري بشكل عام الى موديل 2004:
* تهريبات الزيوت وخصوصا من علبة الدركسون وتحتاج طال عمرك كل عامين تقريبا الى طقم اصلاح بحوالي 90 ريال من عند القاضي وتركيبب 150 ريال.
* تنك البنزين من البلاستك وكثيرا ما يتشقق ويهرب بنزين.
* حجم تنك البنزين صغيرمقارنة بستهلاك السيارة يعني ما يمديك تروح بعيد ( للعلم استهلاك السيارة احسن من الباترول واللاند كروزر)
* بعض اجزاء البدي وخصوصا السقف مصنوعة من الحديد على عكس معظم البدي من الألومنيوم وهذا يسبب صدأ في السقف حوالين الفتحات الزجاجية.
* ليس متميزا في طلوع الطعوس الحادة ولكنه جبار في هدوء..... ياولد :)
* لا يتحمل الحرارة الشديدة اثناء الوقوف والمكيف شغال.
* الدفاية دائما تخرب وتهرب ماء داخل السيارة (عليك بإلغائها).
* عدم توفر القطع في جميع ألمدن (في الرياض و الخبر و جدة فقط على حسب علمي)

مميزات السيارة يا أبو الشباب:
* اكثر سيارة متوفر لها قطع وإظافات بر.
* الدف لوك (الهزاز) يجي في كل الموديلات وهو افضل من حق الباترول لأنه على الأربع عجلات وليس على الخلفية فقط.
* أكثر سيارة لديها عزم دوران (تورك) وكم من مرة سحبت دينات مغرزة فيه.
* الموديلات فوق ال 2000 الشاص جا طويل شوي وفيه ثلاث صفوف مقاعد.
* استهلاك بنزينه احسن ما في فئته.
* لا يمكن يغرز (بإذن الله) إلا إذا السواق غشييييييييييييم أو إذا تعلق.
* مكيف ممتاز جدا.
* بالنسبة لأسعار القطع فهي في نزول مستمر بسبب أن القاضي صار يجيب قطعه، فعلى سبيل المثال كنت أشتري طقم الفرامل ب 280 ريال والآن ب 110 ريال فقط و الأذرعة كانت ب 145 ريال والآن ب 35 ريال وهكذا.....
* الى موديل 2004 جا بسيط ولا فيه كمبيوتر وخراباته اذا نظيف لا تذكر (شريت طال عمرك واحد 94 قير عادي وجلس معي سنين كرفته حتى شفقت عليه ولا خليت فيه بر تقريبا الى وطيته ولا سيارة مغرزة الى سحبته وبعته بعد مما مشى 200 الف ولم اغير فيه الا السلف (بسبب خطأ مني) والبواجي والزيوت وطقم اصلاح الدركسون وشريت بعدة واحد تماتيك FXi وركبت عليه مساعدات ويايات بر وونش وصدامات حديد وكرفته طال عمر زي اللى قبله ومشى حتى الآن 190 ألف أغلبها بر ورحلات وسفريات وعندي طال عمرك طراد وزنه 3.5 طن سحبت فيه لين طفشت، لكن ومن الطبيعي انه بدا يطلب صيانه هذي الأيام، وأنا ناوي اشتري موتر جديد لكني صدمت بسعر الجديد بعد ما كان ب 120 الف فقط في ال 2004. " وبيني وبينك ناوي على الفتك"

بعض النصائح اذا شريت واحد:
* لا تشتري واحد الأ نظييييييييييييييييييييييييييييييييييييييييف ولا هو ماشي كثير.
* فك ثيرموستات الحرارة.
* ركب تماتيك مروحة حق البر والتطعيس من عند القاضي ب 650 ريال بس ترى فيه العافية (صوته عالي شوي لكن معلش تحمل)
* ركب يايات ومساعدات بلستن مع ربلات بولي الزرقاء ومن عند القاضي.
* ركب تانكي حديد من عند الرماية.
* لا تشتري اللي فيه فتحة بالسقف ترى تصدي زي سلام عليكم خصوصا اذا انت ب الشرقية زيي.

وبعد هذا الدش كله اسمع يبن آخي اذا معزم حط في بالك التالي:
أي دسكفري ما يمسك سعرة و إذا جيت تبيع لازم يكون عندك طول بآآآآآآآآآآآآآآآآآل بالحيل، ورح تواجه هجوم عنيف من الفريب والبعيد وبتسمع كلمة "وش لك بهالبلا" كثير فعليك بالصبر والثقة بالنفس وتذكر طال عمرك مقولة " الي ما يعرف للصقر يشويه"

على فكرة أسعار الجديد كالتالي:
135 ألف للدفندر وما عاد يجي إلا ديزل.
161 الف للدسكفري 6 سلندر.
180 الف للدسكفري 8 سلندر.

وفي النهاية استخر الرحمن والله يوفقك.

[بن حـــمـــد]

على فكرة جربت الدفندر لفتره بسيطة وكان ربع ديزل موديل 86 واشهد انه سيارة بر بلا منافس وجبارة بشكل غير طبيعي ولكن الدفندر لا يصلح للعوائل وهو سيارة جدا خشنه وليس به اية رفاهية :)

[عريدان]

من مميزات لاندروفر (البريطاني) إنك معه دائما في الصناعيات والورش والله يستر عليك من التواهيق في البر شف عاد من يفزع لو بكفر!!!آسف قصدي جنط

[برري]

ابو حمزة ما قصرت ، وجزاك الله خير ، في الحقيقة احميت همتي للديفندر ، وماشا الله على خبرتك ، وانا ان شا الله ابتشوف لي واحد نظيف والهقوة اني ابشري جديد ، لاني اشوف ان 135 الف سعر معقول جدا ، واشكرك على نصيحتك الثمينة وجزاك الله خير .

اخوي عريدان ، الله يستر مثل ما قلت ، لكن مثل ما قال اخونا ابو حمزة وهو مجرب وانا مجرب "لا تاخذ الا نظيف " ويا رب التوفيق للجميع وشكرا لمرورك على هالموضوع .

[عريدان]

برري الله يفاولك بأطيب منه . أمين

[الربذي]

انحش من هالنوعيه انت منصوب عليك منصوب عليك سواء رحت للوكاله ولا ورش نصابين جرب جيوب باجيرو او هوندا النصب فيها اقل حنا في هذا الزمن ندور اقل نصب ولا النصب فيك فيك تحياتي

بسم الله السلام عليكم اشكر صاحب الموضوع اخوي برري بس شدتني هذة المشاركة من اخونا كلاسك
لاتصير مره تفائل بالخير تجده
تصدق فيه انا س غير نصابين بس 1 بالميه على الاكثر !!!!

[فورد]

انننننننننننننننننننننححححححححححححححححححححشششششششش ششششششششششششششششش

[GMC79]

انا مشيت في نفس الطريق اللي مشيت فيه وهذا اللي طلعت به
http://www.mekshat.com/vb/showthread.php?t=59517

[azd]

السلام عليكم

كنت فى قنص فى كينيا يوجد كثير من السيارات الانجليزية :j كنا 2 سيارة جيب ابو شنب وانيت ولاندروفر زئ الصورة :no2: لكن التيوتا اكل الانجليزئ بدون مقارنا

[برري]

السلام عليكم اخواني الكرام ، اشكر من تفضل بالإضافات الفريدات على هالموضوع اللي هو مهم بالنسبة لي ومالهم الا الدعاء فجزاهم الله خيرا والله يكفينا شر النصابين يا الربذي ، واشكرك اخوي عريدان على دعوتك والله يستجيب دعاك ويعافيك .

اخوي جمس 79 ياليتني شايف موضوعك قبل اكتب ، اظن فيه كفاية آراء واخبار ، وانت ما عطيتنا خبر ! وش اللي نويت عليه ؟ وش اللي طلعت به ؟ بالنسبة لي انا دعواي خربانة واظن اني ابشتري دفندر - وكالة - والله يوفق واحب اسمع رايك والله يوفق الجميع ويجزاهم خير.