اقرب شعيب للرياض

[ابو العطاء]

السلام عليكم
مبرروك عليكم المطر

ناوي اطلع العيال للبر بعد المطر البارحه ومحتار

وتخبرون الجو بعد المطر يبي له طلعه وانا رجال ما أحب الأماكن البعيده

واللي يدلني على شعيب قريب أكون له من الشاكرين ،،

[عز الخوووي]

عليكم السلام ورحمة الله وبركاته
اقرب شعيب على طريق رماح شعيب الغيلانه
ورحله سعيده

[بن بليهد]

به شعيب قريب



تطلع على طريق الثمامه .. اذا جيت محطة خزام .. يجيك مفرق يمين مقابل المحطه



اطلع يمين وامش 16 الى 20 كيلو تلقا الشعبان يعترضن الطريق



والطريق يوديك الرمحيه

[ع السمدان]

مثل ماقالوا الشباب الخيارات اللي امامك غيلانه على طريق رماح

أو شعبان الرمحية مثل ماوصفولك من محطة خزام وهو اقرب من شعيب غيلانه

لكن لو تبي تبعد وتبي تكون في مكان ماعندك احد انصحك بشعيب الطيري ويبعد حوالي 160 كيلو عن الرياض

وبالتوفيق

[ارثمس]

ما قصروا الاخوان عطوك العلم وللمعلومية ان الشعيبين ارضهن قويه وبسرعه تسيل الشعبان لانها حزوم ارضهن

[دغيم1]

السلام عليكم ورحمة الله وبركاته
حياك الله أخوي
تحذيرات الدفاع المدني واضحة بالدعوة لتجنب الذهاب لتجمعات السيول والمستنقعات والأودية
والخيارات ولله الحمد كثيرة للإستمتاع بهذه الأجواء الرائعة ولله الحمد
ونسأل الله أن يطرح البركة فيما أنزل وأن يجعله برضى
ولديك الخيارات التالية حسب موقعك من مدينة الرياض.
الجنوب : لديك شعيب الحائر المتفرع من نساح .
الغرب : نزولك من القدية وتسلك إما طريق نساح أو طريق ظرما ولاتبتعد كثيرا.
الشمال : لديك كثير من الشعاب على طريق القصيم
وكذلك منتزه الملك سلمان في بنبان البري جميل ومناسب لمثل هذه الأجواء وأنا أفضله كثيرا لتكامل الخدمات فيه .
الشرق :
تسلك طريق الدمام لديك شعيب الجافي
ولديك بويب جهة محطة خزام في الثمامة قريب وجميل .
وأنصحك ونفسي والجميع بتوخي الحذر والتوكل على الله
تمنياتي لك بالتوفيق
أخوك / ابوفيصل

[جني صغير]

عندك الشعيب أمس يمشي بالليل.

بعد تفتيش سلطانه وانت متجه لحريملاء اول شعيب بعد التفتيش