اسال عن محل مبتكرات اهل القصيم في الرحلات [الأرشيف]

الرين

21/02/2003, 04:58 PM

السلام عليكم ورحمة الله
ان زرت القصيم قبل فتره وكنت اسال محل مبتكرات اهل القصيم الرائعه من شنط عز به ومبتكراتهم في اغراض الرحلات والكشتات الرائعه والجميله المشهورين بها اهل القصيم وزرت محل ا لسنيدي وجدت فيه اغراظ الرحلات ولكن لم اجد المبتكرات وزرت كم محل ولم يوصفني اجد الحل المختص
ارج من الاخوه الاعضاء وصف المحلات بالتفصيل مشكورين

ولكم جزيل الشكر

اخوكم الرين

ابوالوليد 1429

22/02/2003, 04:27 PM

يشرفني كلامك هذا عن اهل القصيم وهذي شهادة اعتز فيها :p وترا فيه محلات كثيرة بالقصيم تشتهر بالمبتكرات الجديدة مثل ماقلت السنيدي وفيه عندك محل المرباع بعنيزة واذا كنت من اهل الرياض هينا عندنا بعد محلات مستلزمات البر ممتازة :good: وفيها زي الي في القصيم من مبتكرات جديده (ترهيم) واصحابها قصمان مثل محل الحديثي بحي السلام ماشاء الله موجود فيه كل شي يخص البر ويتميزون بكل جديد من افكار وسراحه والله ماعرف راعيه ولا ادري منهو لاتقولون اني اسويله دعايه :D .
مقصدي من كل هذا انكم تستفيدون من افكارهم الحلوه ويفصلون لك اي شي تبيه مثل بيوت للقدور وبيوت للسكاكين وبيوت للدوافير وهذي الظاهر انه شي معروف

وانصحكم ياهل الجيوب الصالون مثل GXR و VXR والسفاري طبعاً عندهم طريقة ممتازة للحفاظ على شنطة الموتر :cool:
بس لازم تكون فاك المراتب الاخيرة
هذا يتكون من قماش تنزاني و سفنج وبلاستيك مخيطينها مع بعض ضد المويه وضد الكدمات وتجي مفروشه على الارضيه والجوانب والباب الخلفي وواصله الى المرتبه النصفيه يعني تحميلك المنطقة الخلفيه للجيب لا تقول مويه ولا حطب ولا اطناب ولا خيام ولا شي لا وازيدك من الشعر بيت يجي فيها مخابيت سحابات للعده وغيرها ويجي معها سحابات على جوانب المراتب الوصطية عشان تقدر تصفطهن
ومعليش ابلشتكم بس اني توي مارهم ولقيتهم مسوين الطريقة ذي واعجبتني وركبتها عقب ما اعدمت سيارتي من تحميل العفش بحصيان الزعبيه وماجاورها وودي انكم تحافظون على سياراتكم قبل يجيها شي من غير شر عليكم وعلى مواتركم :)
اتمنى انكم تقدرون تخيلون الفكرة علشان اللي مهب من الرياض يقدر يفصلها حتى لو تبون صور انتم تامرون امر مادامكم من منتدى مكشات

الخادم

22/02/2003, 05:10 PM

اخوي
وين محل الحديثي بالسلام و تكفى نبي صور . انت دوختني يالغالي .

اخوك
الخادم

ابوالوليد 1429

23/02/2003, 11:48 AM

معليش طولت عليكم :p :p

هذا المحل ياطويل العمر بحي السلام والوصف هو:
اذا جاك مستشفى اليمامه على يمينك وانت متجه شمال يعني رايح لطريق خريص ابتل على طول:redcar: الين اخر الشارع وبعدين ديور يسار كنك راجع للمستشفى يجيك المحل على اليمين محل كبير حوالي ثلاث فتحات:row:

:butt3:وتذكرت شي بعد تراه يفصل بيوت للاجهزة اللاسلكية مثل الايكوم وغيره:butt3:

وفيه محل ثاني بعد يمدحونه سراحه بس ما عرف اسمه والوصف هو :

هو موجود بنفس الشارع اللي موجود فيه المحل اللي وصفت لكم ----- خل محل الحديثي على يمينك وابتل سيدا كنك راجع لمستشفى اليمامه تبي تجيك اشاره خلها وابتل سيدا الين تجيك الاشارة الثانية ديور من عند الاشارة وامش شوي يبي يجيك المحل على يمينك . :row:

واشكرك على الرساله الخاصة اخوي الرين وتراها وصلت
--------
واخوي الخادم من ناحيت الصور والله انا بالدوام الحين بس انشاء الله اليوم اصور التفصيل اللي سويته بالسيارة وبكره احطلك الصور بأذن الله

وسامحوني على القصور

عبدالعزيز الدباسي

23/02/2003, 12:18 PM

تسلم اخويKdra1 على هذا التوضيح والتفاني في خدمة الاعضاء .

وكلنا عشم في امثالكم لتبادل الخبرات بين اعضاء مكشات .

و بودي اخوي ولا عليك كلافه تتأكد من اسم المحل ، لان الظاهر ان اسمه (اليوسف) ان كاني مانيب واهم .

ومن ناحية الشراع فانا مثلك انصح كل راعين الجيوب بتركيبه ، وهو موجود (تفصيل) على رغباتك في الغرابي عند محل اسمه الكردي ، الحقيقة عمل مميز ويخدم طويلاً .

وللجميع الف تحية

الرحـال

23/02/2003, 01:19 PM

والله ماقصرتو كلكم بركة وفائدة
بس اخوي kdra1 الله لايهينك نبي نشوف الصور عشان الواحد يفهم الفكره اكثر ولاتواخذونا على بطى الفهم :confused:

الخادم

23/02/2003, 01:22 PM

اخوي وعزيزي Kadral

اشكرك على اهتمامك و سرعة ردك عزالله ان المكشات ما بها الا الرجال الله يكثر من امثالك .

اخوك
الخادم

ابوالوليد 1429

23/02/2003, 01:52 PM

هلا والله بعمي الغالي شقردي والله اني مفتقدك يالغالي الحمد لله على السلامه وماتشوف شر والله لي الشرف بتأييدك لكلامي وصدقت من ناحية اسم المحل:good: بس المخ مهب مثل اول :p الواحد ماعاد يذكر وش عشاه
-----
وانت يابعدهم يالخادم
تراي ماسويت شي لو تبيني اروح وادلك على المحل انت تامر امر وانا اخوك
-----
ويا هلابكم يالرحال
الصور انشاء الله بأذن واحد احد بكره تلقاها ومالومك على انك مافهمت حتى انا يوم قريت شرحي مافهمت بعد:looney:

هذا شي واجب علينا مساعدة المسلم لاخيه بما يفيده ويفيد دينه
والله يجزى خير ويبارك بهل منتدى واصحابه والمشرفين والمساعدين والمشتركين ((عشان مانزعل )):hot: اللي يعرفنا على رجال مثلكم وشرواكم

الرحـال

23/02/2003, 01:59 PM

قايلك ماشاءالله على سرعة الرد
وشكرا على الدعى حتى انا مشترك ياعني واصلنا من ادعى انشاالله
ومن ناحية شرحك ممتاز ماقصرت بس الصور لها منظر احلى سراحه

انت كذا :good:

راعي عنيزة

24/02/2003, 11:23 AM

يا مال العافيه يا كدرال وصادق ذي الطريقه تحافظ على شنطة الموتر وتعطيك مساحه كبيره لتخزين اغراضك وبانتظار الصور يا غالي

وعلى الطاري امس شفت راعي جيب لكزس مسوي ذي الطريقه في الشنطه شراع تنزاني وزايد عليها مخيط على جنوب واطراف المخابي شريط اسود
وصاير شكلها مثل شكل مراتب الفياغرا والبي ام الي يسمونها هيلويز :good:
واستحيت اوقفه واسئله وين مفصلها :rolleyes:

ابوالوليد 1429

24/02/2003, 05:10 PM

الله مير يعافيك ياراعي باريس نجد بس شكل الجيب اللي تقول مسويله حركات زيادة هذي اكيد فيها زيادت دراهم:confused:
وهذي الصور بس اتمنى تكون صافية يوم جيت احملها للمنتدى جتني رساله تقول الملف الكبر من المطلوب وقعت اصغر فيها لين ضبطت او انشاالله انها تكون ضبطت:rolleyes:
ياشباب لا صير وهقتكم المحل الي كنت اقولكم اسمه الحديثي طلع اسمه اليوسف والمحل الثاني مدري وش اسمه

http://www.mekshat.com/pix/upload/images/kdra2-1%20%20copy.jpg

http://www.mekshat.com/pix/upload/images/kdra2-2%20%20copy.jpg

http://www.mekshat.com/pix/upload/images/kdra2-3 copy.jpg

http://www.mekshat.com/pix/upload/images/kdra2-4%20%20copy.jpg

:mad: هبلتبي الصور لين قدرت احطهن

الخضاري

25/02/2003, 07:47 AM

السلام عليكم

لاتعبت يا kdral ويعطيك العافيه على الصور و على هل الفكره الممتازه وانا بحاول افصل مثلها هني
بالكويت و اذا ماضبطة تراني بجيك الرياض اشتري وحده اعمل حسابك :)

ابوالوليد 1429

25/02/2003, 09:03 AM

اي وقت انت تامر اخوي:good:

راعي عنيزة

25/02/2003, 09:13 AM

يا مال العافيه يا كدرال وبيض الله وجهك :good:

صور ولا احلى ومشالله فكرة وتنفيذ الشراع ممتازه بالحيل وصاير وذفه وماسكة زين وشكلها ممتاز وحتى ان البساط حقك نفس البساط الي عندي يعني احس ان بيننا قاسم مشترك :p

بس كاني منيب واهم انهم مبطنين الشراع باسفنج :o وش الحكمه ؟
ولا يبونها 2 في 1 شراع واذا جاك النوم سدح المراتب ويصير لك لحاف :D

وشوري عليك ياخوي تنسخ الصور وصف المحل والمعلومات وتحطها بموضوع مستقل عشان يستفيدون اكثر الشباب من فكرتك :light:

عبدالعزيز الدباسي

25/02/2003, 10:33 AM

مشكور جداً اخوي Kdra1 على هذا المجهود الطيب وعلى حرصك باستكمال الموضوع بانزال الصور .

خالي راعي عنيزة ، تصلح تعمل في الاستخبارات :cool: وش هالتدقيق :o ما بقى الا تقول وراك حاط الرادو على اذاعة FM .

ويالغالي اذا كانت البطانة من اسفنج تقدر على قولك تسدح المراتب وتنام ،،، وايضا ما يقرقع معك العفش ، وايضا لو امطرت عليكم واستعجلتوا بشيلة العفش ، ما عندك مشكلة ارم الفناجيل والبيلات سوا ، ،، مسموح الاختلاط .

بس الملاحظة اللي انا شفته ، و تفرق عن الشراع اللي مركبة بسيارتي ، ، هي ان الشراع قماش يعني لو انكب ماء راح فيها من الريحة . لكن اللي عندي قماش على بلاستك مقوى :cool:

ابوالوليد 1429

25/02/2003, 10:54 AM

اخوي راعي عنيزة هذي الساعة المباركه ان بيننا شي مشترك:D ----- لا وفيه قاسم مشترك ثاني اننا كلنا من عنيزة :good:
وتراهم مبطنين الشراع بسفنج عشان تجدع عفشك اذا صرت عجل ولا يهمك شي ينكسر ولا ينعفط زي ماقال اخيي الشقردي ومن ناحية نسخ الموظوع وخليه موظوع مستقل شكلي انشاءالله ابسويها وكثر الله خيرك على النصائح
--------------------
اخوي شقردي ياهلابك والله
والله مدري مين اللي بالمباحث انت ولا راعي عنيزة تدري ليش :p؟؟؟؟
وش دراك ان الرادو على fm :confused:
ويبيي تراك صدقت من ناحية لو انكب شي ---------------بس طريقتي انى مركب
الطبقة الاولى قماش تنزاني سميك ومن افضل ما بالسوق ((ضد الموية))
الطبقة الثانية سراع بلاستيك سميك
الطبقة الثالثة سفنج ((عشان التبطح:o )) والتكسير

راعي عنيزة

25/02/2003, 11:34 AM

الله يهديك يا شقردي ما بقى الا تقول ان الرجال مركب قراش رول من امهات الفين وخمس وما ركب قراش فيبر من امهات خمسة الاف :D

<===== طلعو الشهبان :D

كدراال عندنك بتحرم مرة ثانيه تنزل صور وشقردي موجود بالمنتدى :D

ابوالوليد 1429

25/02/2003, 12:02 PM

الظاهر اني اببداء اصور بالبر :eek: ماترك شي الشقردي الله يهديه حتى القراش عرفه :alarm:
ولا ياراعي عنيزة;)
:redcar: واحد يبي يسذب ((لا هذا القراش قديم مركبه قبل الرخص :D ))

الهباق

02/03/2003, 12:45 PM

الله يعطيكم العافية:light:

محبوب الجميع

02/03/2003, 11:50 PM

مشكور اخوي Kdra1 على هذا المجهود الطيب وعلىالتوضيح با الصور حقيقه انك ماقصرت

الرين

13/03/2003, 02:46 PM

:good: السلام عليكم اشكر جميع الاخو ه الاعزاء على توضيح محلت الرحلات وعلى الصور وبا الاخص اهل االقصيم واقو ل يامرحبا ترحيبتن كلها نور والله لايهينكم وماقصرتو

وارحبــــــــــو جمــــــيعاً

اخوكم الريـــــــــــــــن

ولد روضة سدير

13/03/2003, 05:22 PM

مشكور على الصور بس بغيت اسأل عن السعر بحدود ...........كم؟؟؟والله يعطيك1000عافيه

ابوالوليد 1429

15/03/2003, 07:19 AM

:butt3:

ابوالوليد 1429

15/03/2003, 07:22 AM

الهباق
محبوب الجميع
الرين
ولد روضة سدير

ياهلابكم والله هذي الساعة المباركه وانتم تامرون امر

والسعر 230 ريال

سيف السيف1

18/03/2003, 08:22 PM

أخي الرين هذه المحلات الموجودة في مدينة بريدة
1- السنيدي
2- غنام
3- القناص
4- الكشتة
6- عروق الشمال محل جديد ممتاز ورائع:good:

ذيب حضن

01/04/2003, 03:15 PM

الأخkdra1 والاخوه المشاركين تحية طيبة
هل يوجد محل بالقصيم يعمل مثل ماعرض او مشابه وشكرا

ابوالوليد 1429

02/04/2003, 09:58 AM

زي ماكتب اخوي ابو فارس في الرد الي قبل ردك

هذه المحلات الموجودة في مدينة بريدة
1- السنيدي
2- غنام
3- القناص
4- الكشتة
6- عروق الشمال محل جديد ممتاز ورائع:good:

انشاء الله اني قدرت افيدك ومعليش على التأخير في الرد:D

دله وفنجال

05/04/2003, 09:14 PM

مشكورين يا الاخوان لاكن ابسئلكم انا امركب الشراع ونفس الي بصوره لاكن المشكلة اني ابي شي يغطي شنطة الموتر كله يعني يغطي الديكور كلوه دار مادار على الزوايا والحوايفلان الموتر ارضيته ممتازه لاكن علويه امتمخش ومتوصخ ..... ارجو الافادة مع العلم اني رحت الى كذا شخص وما عطاني علم او يتعذر ...

ذيب حضن

29/04/2003, 05:19 PM

جميع الاخوة الكرام السلام عليكم
وجدت التلبيس الخلفي المذكور عند السنيدي ببريدة جاهز بدون اسفنج تنزاني وياباني
وطلبت منه تفصيل واحد مح اسفنج وطبقة قماش ابيض ودسوس اضافية في الجنبين بالاضافة الى الامامي بقماش ياباني بلاستيك وكلف 200 ريال بدون مكاسر واللي سواه يدعى ايوب وشكرا

ابوالوليد 1429

30/04/2003, 06:52 AM

اخوي الاستبنة
الطريقة اللي انت تقول عنها ممتازة بس ماخبر احد يسويه او احد مسويه بس الطريقة فعلاً ممتازة واذا سويتها انت بله عليك صورها وخلنا نشوف شكل الموتر بعد التلبيسه
والله يعطيك العافية:light:

---------------------------
اخوي ذيب حضن
عليكم السلام ورحمة الله وبركاته

ماشاء الله تقطعها بالعويفيه سراحه احسن للموتر وتحافض عليه خاصه اذا كانت عزبك دايم ورا
شكراً لك وماقصرت على المشاركة;)

أيمن

15/06/2003, 05:01 PM

( لقد تم إضافة هذا الموضوع إلى المواضيع المميزة والشيقة في هذه الخيمة (http://www.mekshat.com/vb/showthread.php?s=&threadid=8691) )
مع الشكر للجميع ،،
http://www.mekshat.com/pix/upload/images/flow12.gif

مشرف الخيمة

أيمن

20/10/2003, 02:53 AM

( لقد تم إضافة هذا الموضوع إلى مواضيع المبتكرات والاختراعات (http://www.mekshat.com/vb/showthread.php?s=&threadid=12308) )
مع الشكر للجميع ،،
http://www.mekshat.com/pix/upload/images/flow12.gif

مشرف الخيمة

ناصح

04/05/2004, 02:42 PM

ماشاء الله

فعلا موضوع رائع وقد استفدت منه كثيرا وطبقته على سيارتي ولكن باختلاف بسيط وهو بقاء
المقاعد في مكانها كما في الصورة
http://www.mekshat.com/pix/upload/images5/mk1937_shraa.JPG

وقد عملتها من شراع تنزاني اصلي لون رملي عند محل في الغرابي اسمه ( الحبيب )

ابوالوليد 1429

11/05/2004, 01:12 PM

سراحة فكر ممتازة اخوي ناصح ماشاءالله تبارك الله
وشغل العامل الهندي اللي بالمحل مسكت (يعني شغله ميه ميه)

القناص

11/05/2004, 03:31 PM

شكرا لكدرال على طرع هالموضوع.

مشكور اخوي الناصح لكن اسمح لي اسال بكم فصلت هالتنزاني الرملي من عند الحبيب؟

الضاري

24/05/2004, 08:45 PM

يقولون أذا بغيت لك حاجة ومالقيتة في شارع المية ..:D بنيويورك.. بأمريكا دمرها الله( اللهم آآآمين)..

.. المهم أذا مالقيت حاجتك في هذا الشارع فأعرف أنها لم تصنع بعد..

وأنا أقول أذا لم تجد حاجتك في القصيم فأعلم أنها لم تبتكر..

تحياتي للجميع

ناصح

25/05/2004, 03:59 PM

الاخ القناص و الاخ kdra1

مشكورين جدا على تعليقكم

وقد فصلته بـ 250 ريال فقط

لكن كنت اتمنى انه رفع السحابات حقت الجيوب شوي كان احسن

تحياتي

بــرق الشمال

30/05/2004, 03:43 PM

طيب فيه محل في القصيم (بريده)من افضل المحلات باالنسبه لي ولكثير من الناس
لا وتفوق على بعض المحلات او اغلب المحلات بدون ذكر اسماء واسعاره ممتازه جدا جدا
والاشخاص اللي باالمحل بشوشيين اذا غرضك يخلص بعد 4 ايام يخلصونه لك بيومين
اللي هوـــــــــــــــــــــــــــ(عروق الشمـــال)ــــــــــــــــــــــــــــــــــــــــ

مثابر

16/07/2004, 01:48 AM

شكراً لك اخي الكريم على هذا المقال

الربذي

19/07/2004, 02:38 PM

]السلام عليكم ورحمة الله وبركاته
ياحليلكم:p :p
المهم انا اعتبر اهل القصيم من الرواد بالاختراعات وتصدقون ياشباب كل اختراع يتعلق بالبر او اي مجال ثاني لاتتعب نفسك اسال راعي عنيزة الله يرعاة وانشاء الله يفيدك وانا معجب بهم مرة تصدق القصيم يستاهل انا نسمة مدينة الاختراعات وياحبي لهم وخصوصا عنيزة الانساب ;) منها;)
واشكر اخوي الي اثار هذا الموضوع وياليت تجمع جميع الاختراعات في موقع واحد واقصد بذلك اختراعات اهل القصيم تصدقون اذا رحت للقصيم لادورني الا عند السنيدي والبتار وعروق الشمال والحاجات هذى
اخوي الغالي ناصح فعلا ناصح بس لو شلت المراتب احسن لك لانهن رايحات يتشققن عليك ومبروك متاخرا [/color]

ناصح

19/07/2004, 04:48 PM

هلا والله بالغالي الربذي

والله يبارك ويسعد ايامك ومافيه شيء متأخر

بارك الله فيك وفي كل أعضاء منتدى مكشات

الكونترولCONTROL

12/05/2005, 12:49 AM

المهم الي قريب من مخرج 10 ترى غالي غالي غالي
=====================================
و ما هوب متخصص مجرد متاجر
========================
احذر اخواني منه
============== و ما اظلمه لكن جربوا و التجربه خير برهان

ضميان ابوحمد

08/02/2006, 09:24 AM

الاخ kar 1 ارجو اعلامى عن المحلات التى تبيع السلات التى تركب فوق لاندكرؤز م 2001 صنع القصيم وانسيابية ولاتؤثر على شكل السيا رة السعر والعنوان رجائن ضميان قطر

سحاب1111

11/02/2006, 12:57 PM

السلام عليكم ورحمة الله وبركاتة
هلا والله اخوي
بما اني من عنيزة
سوف افيدك بما يرضيك
1/ بيت الرحلات ويعتبر من الرخص المحلات والقائمين علية شباب سعودي (يوجد عندة تفصيل)
2/ رحال . نوعن ماء ارخيص ولاكن مهما شريت منه وكنت عميلة مع الاسف لايهاودك ولابريال . (يوجد عندة تفصيل)
3/ المرباع (يوجد عندة تفصيل)
وجميع هذه المحلات توجد على طريق عنيزة بريدة قرب فندق الواحة
4/ الميمان وهو من ارخص المحلات او ارخصهم ولاكن المشكلة انه لم يكمل بضاعتة . ويديره شباب سعودي كامل
ويقع خلف مكتبت خدمة الكالب . وبضبط اذا وصلت اشارة فندق الواحة ونت متجة جنوب اي جاي من بريده (اوضح) اومتجة شمال خل فندق الواحة يمين ونت انزل مع الاشارة يسار . بعدين تجيك مكتبت خدمة الطالب يسار انت خذ يسار مباشرة 100 متر يجيك المحل يسار
5/ محطة السعيد ومكانها اذا كنت واقف عند اشارة مدارس عنيزة الاهلية وتجاهك غرب اى طريق البدايع خذ يسار اى انك سوف تستخدم الدائري الشمالى (طريق السيب ) تمشي 500 كيلو يجيك مسجد الشيخ على الزامل بعد المسجد بــ100 متر تجيك المحطة يمين ومارية ان المحطة مغطاه بثلاث صبات على شكل خيمة .
6/محلات الحسون لزينات السيارات . عندهم قسم خاص لرحلات . ومكانهم بــ طريق المدينة يمين .(يوجد عندة تفصيل)
ومن ناحية اغراض الغاز (كل الاحجام والانواع) عند محل القوبع . ومكانة بعد مكتبت خدمة الطالب يجيك دوار الدوار يوديك لتجاهين واحد يمين والثاني يسار خذ يسار يجيك المحل بعد 200 متر تقريباً اواقل
وميزتة انة ارخص من غيرة + سعودي + خبرة + نصوح بل مرة
اتمنا لك زيارة ممتعة وموفقة لمدينة عنيزة

ضميان ابوحمد

15/02/2006, 11:25 AM

اخوى كادره 1 اسئل عن سله لأندكروزر 2001 صنع المحلأت فى الرياض او القصيم وتكون أنسيابيه وقوية التحمل تركب فوق السياره عنوان المحل والسعر بارك الله فيك

طارق الحربي

14/10/2006, 07:34 AM

قد يكون ردي اعادة لموضوع قديم وهذا شئ لا يحبذه مشرفي المنتديات ولكني لا اتوقع انهم لا يريدون استفادتي

اخواني

السنيدي يبيع الشراع او الغطاء ب 200 ريال لجيب فكس ار ولكنه خفيف جدا ولا يتحمل الاشياء الحاده الثقيله كالاطناب وزوايا العزب اذا كانت السله حديد او الحطب

ذهبت للغرابي ولم اجد احد يفصل لي مثل هذا الشراع

هل تصفون لي محل يكون تفصيله ممتاز ؟

وماهي افضل طريقه للتفصيل اي طبقه اسفنج وتنزاني وبلاستيك ام ماذا .؟

مع النصائح بالنسبه للجرابات ومقاساتها

مع العلم اني اريد ان ازود المسافه المغطيه للمراتب حتى تحمي المراتب من مرش الطيور اعزكم الله

اخوكم طارق

تحياتي :)

طارق الحربي

15/10/2006, 01:59 AM

للرفع لاهميه الموضوع بالنسبه لي

واعتذر عن الازعاج

طارق الحربي

16/10/2006, 04:34 AM

للرفع ياشباب قبل العيد :)

ابو فهد 1

16/10/2006, 05:32 AM

هلا والله

الصراحه الموضوع قديم قوه ........ بس ابشر يذيب

عندك عروق الشمال الي تبي يزينه لك يفصل شراع تنزاني امن تحته اسفنج امن بلاستيك ويتحمل وارخص من المحلات الثانيه

انشاء قد افتدك اخوي ... والي تامر به انا حاضر ..

والسلام عليكم.

طارق الحربي

16/10/2006, 05:35 AM

ابو فهد

يامال الغنيمه والبقا

مقاصرت

بس المشكله اني بالرياض :)

صعبه افصل بالقصيم وارجع اخذه

sh7bnah8k

04/11/2006, 08:45 PM

ماشاء الله عليكم ويعطيكم العافيه على هذا التوضيح ودمتم بود

الرهدن

04/11/2006, 09:35 PM

الأفضل بالنسبة للشراع الخلفي حق الشنطة يكون مفصول إذا كان عندك مرتبتين00علشان تقدر تنزل المرتبة الصغيرة الخلفية وبسهولة00

.

googl11

20/04/2007, 01:43 AM

ياجماعه والله ثم والله ان هال طربال لامن اختراعي واول مافصلته عند السنيدي قبل تقريبا ثمان سنين جيت للسنيدي وكان عنده خياط مصري اللي يخبره على العموم يومني دخلت المحل طلبت من ولد السنيدي الصغير اني افصل طربال للجيب باطريقه هذي وجلس يجرجرن بالكلام خليته يخرفن لانه ماحد فاضيلي من المحلات وذكائه واسترساله بالاسئله خلان القاء اللي يعطيني وجه بدراهمي وانا عارف انه يبي يستفيد من هالفكره والله يوفقهم والمسلمين على العموم قام ونادالي الخياط المصري وطرد الهندي وصرت اتدلع عليهم لمده اعره ايام وانا رايح راجع ابي تسوون مخبات بذا وسحاب هناك الى ان لقيت مبتغاي ومادريت الا وهو بكل جيب بس ودي اسئل بكم سعره هالحين انا كثر ماهبلتبهم اتفاقي الاول ب150 بس (0555592051)

سيف الظفير

05/01/2008, 10:33 AM

مشكور على المموضوع يا اخوووي

سيف الظفير

05/01/2008, 10:44 AM

مشكور على المموضوع يا اخوووي

المتر

05/01/2008, 02:01 PM

مشكور وماقصرت على الموضوع

الحرفي..

14/07/2008, 02:12 AM

يعطيكم العافة جميعا وماقصرتو يا النشاما

العرندس909

15/07/2008, 02:29 AM

عروق الشمال أفضل من يخيط هذا الشراع
حسب المقارنات التي عملتها

Hagaanaf

15/07/2008, 06:46 PM

اخوي الرين مع التحيه والتقدير

بالنسبة للمحل الى وصف لك على انه محل الحديثي الصحيح انه لليوسف وبالنسبة للمحل الذي قيل لك بعد سلاح الحدود هو للبريه والبريه انتقلوا خلف اسواق الربوه
وأنا اقولك رح لبرق الحياء على شارع (80) عند الهرم وايضا الفراسه على هذا الشارع وبعد الإشارة التي عند الهرم وأنت متجه للشرق ، وهذا الشارع بالذات به اكثر من محل لبيع أدوات الرحلات خاصة وأنت متجه من الشرق للغرب مثل المقناص