لاندكروزر 2015

[hani356]

السلام عليكم ورحمة الله وبركاتة

يا اخوان انا احترت كثير قبل اختار نوع السيارة ولكن بعد اخذ المشوره توكلت على الله سبحانه وقررت اشتري لاندكروزر 2015 G
لكن عندي اكثر من استفسار لاهل الخبره

هل يجي فيه ثلاجة و دفلوك ولا لا ..!

وش الافضل القير العادي ولا الاوتوماتيك من ناحية الخرابات و الاستعمال اكيد الاوتوماتيك مريح من غير السؤال وهل فيه فرق في السعر كثير بينهم ..!

وش تنصحوني فيه وارد عبداللطيف جميل (السعودي) ولا (الخليجي) مع العلم اكثر اللي في المعارض اشوف انه وارد البحرين ..!

و ناوي بإذن الله اشوف المعارض بكرا واشتري وين القى ارخص سعر

والله يوفقكم وييسر امركم جميعاً

[SAS2]

والله يالغالي مدري يجي فيه ثلاجة ودفلك والا لا اما بالنسبة لوارد البحرين معي من ٢٠٠٩ مثله مثل البريمي والسعودي الاختلاف بالكماليات ويميزه سعره رخيص تقريبا بعشر الالاف لان الكماليات فيه اقل مثل المرايات الي على الشماسة و الانوار الجانبية والليمتد منه يجي اكثر مواصفات والقير افضلك التوماتيك مريح بالزحمة وتقدر تستعمله يدوي ويصبر فقط غير زيته كل ١٠٠ الف كيلو وانصحك وانا خبري قديم شوي بمعرض السبر ومقابله معرض نجد كلهم اسعارهم ممتازة معارض النسيم والاخوان يفيدونك بالباقي انشالله ومبروك مقدما

[المميـز]

:

وارد اليحيى GX تماتيك دفلوك وثلاجه والتماتيك ممتاز اريح من العادي
ويأدي الغرض ان شاء الله
والله يكتب لك اللي فيه الخير

:

[اسبيدر مان]

:

وارد اليحيى GX تماتيك دفلوك وثلاجه والتماتيك ممتاز اريح من العادي
ويأدي الغرض ان شاء الله
والله يكتب لك اللي فيه الخير

:

فعلا الجي اكس وارد اليحي افضل شي وسعره اظن 194 الف للاوتو وقيمة العادي نزل خمسه او سته الاف من المبلغ
اما ايهن افضل العادي او الاوتو هذا يرجع لاستخدامك
وانا شخصيا افضل العادي بسبب ضعف محرك السته سرندل مقابل وزن السياره

وفيه نقطه مدري تهمك او لا الى هي انه قرب يتغير شكل الاند كروزر
والله يكتب لك الى فيه الخير

[ساكن الحنو]

ال gx نزل ٢٠١٥ خليجي ثمانيه سلندر موتر يستاهل قيمته قوه وخفه ونظره انصحك افضل من السته سلندر

[التعـ King ـديل]

بشكل عام السياره ضعيفه خاصه انها سته سلندر

انا جربت الجكس 13 قير عادي وكان متعب وضعيف ولكن سمعت من بعض المجربين ان التماتيك افضل واقوى

نصيحتي لك اذا بتشتري جي خذ بحريني مواصفات البحريني في ال13 و 14 و 15 مميزه

الاستاندر منه يجي درج بدون ثلاجه اسبير علاق ونش بينما اليحيى يجي اسبير علاق بدون درج وبدون ونش
والسعودي وارد عبداللطيف يجي بدون درج واسبير تحت

في الختام الله يكتب لك اللي فيه الخير وفكر في بدائل مثل الفتك الفل منه ب 165 قير عادي فتحه دفلك تخشيب مكيفين ثلاجه مثبت سرعه والتماتيك منه ب 169

وتذكر ان الاستشاره لا تغني عن الاستخاره

[الذاهب]

اذا كان مافيه مكيف خلفي ابعد عنه
الراكب بالخلف بيتعب يدور البراد واذا كان به ضيق نفس بيدعي عليك

[قطب 999]

شف هذا معروض على النت ب 140

saudisale.com/SS_a_car.aspx?carid=37643 (http://www.saudisale.com/SS_a_car.aspx?carid=37643)

http://www.saudisale.com/SS_a_car.aspx?carid=37643

[عاشق الهدد051]

و عليكم السلام ورحمة الله و بركاته
شف يا اخوي بعطيك نصايح و انت لك الخيار
احرص على ان الموتر يكون مكيفين لان المكيف الخلفي
مهم بدرجة كبيرة جدا
ثانيا يفضل ان الموتر يكون بثلاجة
طبعا المواصفات الثانية على حسب احتياجك ان كانك راعي بر
خذ اسبير علاق و قير عادي
طبعا اشوف ان الجي خيار غير مناسب
لو تقدر تزيد فلوسك و تاخذ جي اكس افضل
اما بالنسبة للسعودي و لا خليجي اكيد خليجي
افضل و لا فيها كلام و الله ييسر لك اللي فيه الخير

[مخطط 2008]

قير عاديالافضل قير عادي

[فارس العمور]

والله حرام تشتري g
مافيه شي ابداااا يعني الهايلكس احسن مواصفات فعلاً
اما gx او فتك
صدقني بتندم خصوصاً اذا كان موترك الوحيد

[عاشق المسراء]

انصحك بالهدد الفل كامل تماتيك

تو شريت من اليحيى بـ 187 ارخص سعر بالمعارض

[hani356]

جعل والديكم بالجنة جميعاً ، كفيتم وَ وفيتم ويعلم الله اني استفدت من كلامكم

و ابشركم استخرت الله وشريت GXR3 2013 مستخدم