ايش الحل مع اصحابك اذا ابلشوك على انهم هم يساقوا سيارتك الدفع الرباعي بالبر ؟؟

[مخ الكشتات]

السلام عليكم ورحمة الله وبركاته
منورين الموضوع ...
القصة اني معي سيارة جيب دفع رباعي وطبعا اغلب او كل اصحابي وجيراني سياراتهم صغيرة او فانات مافيها دفع رباعي وانا بصراحة راعي بر وطلعات وكشتات .. وطبعا الطلعة بدون اصحاب تعتبر ناقصة او بدون معنى او مالها لزمة .. الانسان بطبعه اجتماعي كذا يقول علماء النفس .. المهم اني كل ماطلع للبر والرمال اخذ معي اثنين او ثلاثة اربعة واحيانا خمسة من اصحابي بالعمل او بالحارة او من قرئايبي طبعا علشان استانس وياهم وكمان اكسب اجرهم بالطلعة لان سياراتهم ماتساعدهم المصيبة انهم يطلبون مني انهم هم يقودون السيارة يحبون قيادة السيارة بالرمال
طبعا بعضهم يطلب وبعضهم حتى بدون استاذن يعني وانا نازل عند البقالة ابي اخذ اغراض ارجع القي احدهم ناط وجالس محلي بيغي هو يسوق او عندما نغرز تغريزة بسيطة وننزل ننسم الهواء يسابقني احدهم ويجلس محلي !! بكل بجاحة بصراحة ارحمهم واعرف انهم ينبسطوا على قيادة البر والرمال . . لكن برضوا انا ابغي اسوق سيارتي وحب قيادتها بالبر .. بصراحة صارت طلعتنا مشدودة وصرت مشغول كيف اعتذر لهم وكيف اصرفهم لو صرفة واحد ينط لك الثاني واحس اني كسرة خواطرهم
المصيبة اني لما اسوق انا يبدون يعيبوا سواقتي واحد يقول ادعس والثاني يقول هد والثالث يقول عشق نمرة والرابع يقول لف الطارة طبعا اشاهد بعيونهم انهم يبغوا هم يسقون !! معاناة
هالشئ تكرر بكل طالعتنا بعضهم والله بدون اي استاذان لم انزل على طول يلزق محلي ..
هالشئ مر معاكم ؟ وبنظركم كيف اتصرف معهم ؟ طبعا من الصعب اطلع لوحدي

[ابو البر]

انا كتبت موضوع ( احب اطلع البر لوحدي) طبعا البعض ما اعجبه كلامي
ولاكن هم ما مر بهم موقف مثل اللي مر بي او مثل موقفك .
ما يدرون عن البثاره اللي تصير حتى من ناس كبار وفاهمين / واذا طلعو للبر معك ينقلبون فاهمين في كل شي وعلماء (ذره ) بكل وقاحه .
او يقولون بنلحقك علشان ما يقطون معك / يعني ياكلون ويشربون يومين ثلاثه بكل وجه قبيح .
--------
ارجع لموضوعك / المثل يقول ...الكلمه اللي تستحي منها بدها .
وانت باين عليك تستحي سحا ما هو في محله .
غير اسلوبك وراح يتغير اسلوبهم .
او الله يغنيك عن هالأشكال
لأن البعض شنب ولاكن نشب
تله مع ثوبه وشوته برا السياره .
تحياتي .

[أبو بسام]

وعليكم السلام ورحمة الله وبركاته
شبنا يا أبن الأجواد وعلمتنا الحياة أن الحياء ممن لا يستحي ما يجيب خير
بل يزيد من قلة حياء من لا يستحي
وهنالك بشر عزالله لو تكلمه مئات المرات لا ينفع معه الكلام والبعد عنه غنيمة
الخوة بالأساس يقصد من ورائها الخوة الطيبة التي تثلج صدر الجميع
أما أن أعود لمنزلي وأنا متضايق من بعض الأمور فهذا الأمر لا يسر على الإطلاق
لذلك تجب المصارحة بكل شيء وبجدية وعدم السكوت عما مالا نرضاه
المجاملة هي ما أوصلت الأمور إلى هذا الحد بكثير من الأمور لذا لابد أن نعرف فيما نجامل
هذا وأسأل الله التوفيق للجميع

[الصيادالمليح]

الخيل ما ترضى الا بخيّالها

وانت يوم اخذتهم للبر .. فمعناة انك اخذتهم بعيوبهم

و اذا وقفت عشان تشتري شيء ارسل واحد منهم بدلا منك

او اتفق معاهم اللي بيسوق يحط عربون خمسمائة ريال غير قابل للاسترجاع اذا صارت اي مشكلة .. و اذا ما صارت مشكلة ان يتم سحب مائة ريال قيمة استخدام السيارة

[ابوسعوداليحيى]

انزل واركب والمفتاح معك وورهم العين الحمراء بتتعب بالبدايه لكن بترتاح

كان عندي مجموعه كذه واحد منهم بثر والثاني غادين كنه قبطان رح يمين ويسار ادعس للموتر الخ ....

صرت اواعدهم بالمخيم ولا اوجع راسي بالكشته معهم

هي يومين اجازة بالاسبوع غير معقول انها تروح عليك بعد

[منفلوط]

انت طالع البر المفروض تستانس
وش ذا شد اعصاب واعذار ولقافه

لو مكانك اطلع لو لوحدي اهم ماعلي الراحة

[azeezx]

انا شخصيا بصراحه مريح راسي اغلب طلعاتي لحالي وجدا مرتاح من وجع الراس واذا بغيت اخذ احد معي احرص اني اختار الي يستاهل اني اخاوية وتحمل كل مافيه. لاكن مو معناته ان كل الي نعرفهم مايصلحون لا بالعكس اكيد فيه منهو افضل مني لاكن راحتي اهم.

نصيحتي لك اذا انت ملزم بطلعاتك معهم خلك شديد بحيث انك ماتزعلهم لاكن تخليهم يدقون فرامل عن تجاوزاتهم بطيب وكيد انت تعرف كيف

والشباب فوق ماقصرو عطوك العلم واتمنى لك طلعه ترد الروح وتسعدك

[(هزاع)]

السلام عليكم ورحمة الله وبركاته

الموضوع باختصار يرجع لشخصية الانسان واسلوبه في الحياه

بالنسبه لي شخصيا لااسمح مطلقا لاي احد مهما كانت صلت قرابته لي بان يتصرف بحلالي ايا كان

وانا جاد بذالك ولااستحي في حفض حلالي من ان انفذ ما اريد

طبعا طريقتي تزعل الغير عاقل وهذا غير مهم لدي

[ابوهايلكس]

منتب ملزوم بخلق الله تجمعهم معك وشفايتك في ناس تضيق صدرك بالطلعة باخي اطلع لحالك انت وعيالك وسع صدرك وفلها احسن لك انا كنت مثلك كذا عندي اخويا وعيال عم مغثه نفس الاسلوب اللي يصير معك صار معي وكرشتهم واحد واحد قلت اذا شريتو سيارات اطلعوا معي منيب مكلف بكم احملكم معي زعلوا وقالوا ما قالوا بس في بليس ما فكرت فيهم قليل ا لادب وثقيل الطينة ما ينفع معه الا العين الحمراء هعهع صرت اطلع لحالي وعيالي وانبسط احسن من طلعاتهم

[متولع بالقنص]

السلام عليكم ورحمة الله وبركاته

الموضوع باختصار يرجع لشخصية الانسان واسلوبه في الحياه

بالنسبه لي شخصيا لااسمح مطلقا لاي احد مهما كانت صلت قرابته لي بان يتصرف بحلالي ايا كان

وانا جاد بذالك ولااستحي في حفض حلالي من ان انفذ ما اريد

طبعا طريقتي تزعل الغير عاقل وهذا غير مهم لدي





انشهد ...

نفس الحال ..

[حسين2002]

وعليكم السلام ورحمة الله وبركاته

سبحان الله وبحمده

سبحان الله العظيم

[برق البشاير]

أولاً أنت فيك خير كثير عندما رضيت باصطحاب أولئك الأخوة ! وهم يبدو أن فيهم خيراً كثيرا وصفات طيبة ولو لم يكونو كذلك لما رضيت بخوتهم . وذلك الأمر الذي يزعجك وهو استخدام سيارتك من قبلهم دون رضاً منك يبدو أن أمره يسير صارحهم بما يزعجك ومن لا يرغب في الصحبة بعد ذلك فلا بكاء عليه فهو يحب السيارة أكثر من صاحبها .

[ابوراكان تبوك]

انت تخاوي بزارين ؟؟؟؟؟؟

موتري يا صاحبي لا احد يمشي فيه غيري اما بالاسلوب اللي انت تتكلم عنه يظهر انهم صغار سن
واحد ماعمره مشى بسياره بر وتعطيه سيارتك وانت مطلعه بعد

انا من الناس اللي يدور الوناسه بالكشتات اللي ماتعجبني حركاته ما اخاويه واتجنبه قدر الامكان في الطلعات

[مخ الكشتات]

السلام عليكم ورحمة الله وبركاته
بصراحة اغلبنا ينطبق عليه المثل ابكيلك وشتكيلي او اشتكيلي وبكيلك (ملخبط بالمثل شوي)
المهم ياخوان السالفة مو انهم صغار او قليل حياء وادب استغفر الله لا السالفة حبهم لتجربة القيادة بالبر وبالطعوس
خليني حكي لكم بعض القصص المعاناة يعني وحنا جالسين وفارشين فرشتنا فوق طعس يجئكم احدهم ويقول موقف السيارة مو عجباني الهواء يجئ منا (مسوي فيها كراني على غفلة) اديني المفتاح ابي اعدل وقفتها ولم اعطيه المفتاح مع الاحراج الاخ علشان يديور ياخذ مسافة خمس كيلو دايورة ( طايرة صارت مو سيارة) طبعا علشان يتمشي ويستمتع بالقيادة فوق الطعوس !! والا سالفة الهواء مجاب لها خبر !!
من القصص وحنا جالسين يجئك احدهم ويقول افا جوالي مايمسك او يقطع وعندي مكالمة مهمة (( الاخ وزير المالية وحنا ماندري)) اديني السيارة بروح اقرب للابراج طبعا يروح شرق والابراج غرب بس ايش اسوي !! ومكالمته تاخذ ساعة طبعا الساعة هذي انت على اعصابك !!
ومن المعاناة وانتم جالسين ومستمتعين يقول احدهم : يالله نسيت حاجة مهمة من البقالة تقول يابن الحلال كل شئ جبناه يقولك نسينا شئ مايخطر بالبال!! تقول ماله لزمه يقولك لا بالعكس ماتحلوى الجلسة الا فيه اديني المفتاح اروح جيبه من اقرب بقالة طبعا انت على اعصابك ويرجع بعد ساعتين وتشم ريحت كرف المواتر من كيلو ولم يرجع برضوا مشري الحاجة ويقولك مالقيتها !!!
انا بصراحة احبهم وانبسط معهم لكن هالسالفة مخربها علينا من الصعب اطلع بدونهم وطلعها مع اصحابك بصراحة ماتقارن بالطلعة مع العائلة طلعت الاصحاب الذ
وبعدين العائلة معهم بقية الاسبوع ويومين هذي مع اصحابي
اني ماني اعرف اوصل المعاناة بشكل دقيق هم يحبوا يسقوا سيارتي بالطعوس مالومهم بصراحة القيادة بالطعوس لها سحرها ولا تقاوم لكن انا ابغي اسوق ..لم يسوقوا هم اصير مكتم وزعلان بداخلي استحي فعلا منهم لا ارد لهم طلب وبصراحة حاولت اتعذر لكن كل شوي مطلعين عذر يخلين اوافق ...
يعلم الله اني موفر كل حاجة العزبة ولوزم البر والموية ولاهي كثيرة عليهم بس ابي خوتهم لكن هم يحرجوني بالطلب
القيادة مستحيل استغني عنهم انا لم افضفض معكم يعني ابي اخرج هالشئ المكتوم بصدري وابي مواساة وبي حلول يمكن جربوتها ونجحت وسلامتكم طولت عليكم لكن اعذروني

[ابوراكان تبوك]

والله يا اخوي القياده في الطعوس خطره ماهي مثل الخطوط العاديه
انت اعتذر بأي شي خراب مثلا ولاتخلي لاحد فرصه يمشي بالموتر نهائياً

انا اكثر مايغثني في الرحلات

اذا احد نزل سلاحك وجلس يرمي فيه ساعه ويرميه ع التراب تكرمون
+
اذا انا بطول في البر وينقز واحد يقول لك يالله مشينا عندي شغل ( طبعا الشغل طلع فجأة وانا متفق معهم مسبقا مثلا بالمبيت ثلاث ايام او اكثر )

أصبحت اتجنب ننقل الاسلحه بالرحلات او اعتذر بعدم وجود رصاص
تجنب الاشخاص اللذين يملون الرحله ويقطعوها فجأة

بالمختصر اخوياك اللي تستانس معهم حاول بقدر الامكان تسايسهم وتبعدهم عن مايزعجك بأسلوب ذكي وكل شخص انت تعرف طريقة تصريفه ههههههههههه الا النشبه عاد امرك لله

[ارثمس]

نصيحة ونا خوك الحق ما ينزعل منه انت راعي الموتر ولو حاول يطلع اي مشوار من راسه انت وده واذا قال ابغى اغير وقفة السياره انت غيرها واذا قال ابغى اكلم انت وده والله صارلي موقف كان معي واحد من الاصدقاء كنت اعطيه سلاحي بالبر انا وياه اخليه هو اللي يتصيد وفيه مره من المراة نسية سلاحي وابغى اتصيد وهو كان معه سلاح والله ما عطاني ولى حتى طلقه والله هاذي الاشكال لو يشترون سيارات بر والله انك ما تقدر تسوقها انك تشوف التعامل يفترق ولو يصير لا سمحا الله اي شي بالموتر والله انه ما يصلحه يقول المثل جلد ماهب جلدك جره على الشجر ومصداقيت كلامي انت تقول انك تشم ريحه السياره مكروفه

[خوي السطحه]

اطلع انت وعيالك للبر يكون قريب ويوم وذا تبي البعد عندك الجنوب اكشت فيها بس لفتره وصبر على فرقاهم حتى يشغلونك بطلعات وتعذر وبعدين وافق ولاطلعت معهم غير اسلوبك ورهم شروطك والى تحبه يصير وتحسسهم انك تفضل الطلعه مع اعيالك كذا يحرصون على عدم زعلك وتكديرك وهذا الكلام عن تجربه وحتى لو ماحرصو على خاطرك خلهم يولون رفيقك موجود بس ابحث عنه وربما تجده بولدك او قريب او زميل

[خوي السطحه]

وذا تحب تجمع ارجال او شباب معك خل الطلعه على احسابك وخلك شديد وصارحهم بالى تحبه والى تكرهه بطلعات صدقني مارايح احد يزعلك لان اجيوبهم سالمه من المصرف ويمكن الظهر يهشون عنك الذبان لان الردي يحب الردا ونت تحمل عاد مايجيك لانك مستحبهم

[ابن عكاش]

السلام عليكم ورحمة الله وبركاتة
بصراحة انت ماقصرت معهم لكن يبقى انك تجامل زيادة عن اللزوم
نصيحتي لك حاول تشوف لك ناس حقين بر تخاويهم لكي يسندوك في هوايتك ولا والله بيجي يوم بتكره البر والمكاشيت بسبب انك انت اللي تتحمل الطلعات
ثانياً الصراحة طيبه ونصيحه خلهم يطلعون بسياراتهم ولو كانت صغار علشان يحسو بالمعاناة ويشرون سيارة تناسبهم بتتعب معهم في البداية بس صدقني راح يتغيرون للاحسن واللي بينسحب بسلامتة خلك حر
واضح انك متحمل العزب والسيارة انت كذا تقتل هوايتك بسبب مجاملتك الزايدة
على العموم انت شخص شهم وكريم وماقصرت حتى لو تغيرت عليهم الانسان له طاقة مايقدر يدوم الدايم الله سبحانه
وفقك الله ومن يقرا لمايحب ويرضى

[ذيب المراجل]

بسيطه وحلها عندي ونا ابو هندي

اشتر لكل واحد سيارة دفع رباعي

ماهو لازم يكون جديد دور مستعمل

وسلامتك ،،،

[خشكاري]

كلام الاخوان كله على العين والراس .. من ناحيتي بقول إللي بصدري .. إذا الموتر جديد او شبه جديد بمعنى إني مداريه ومحافظ عليه واعرف ربعي انهم نشبات ومطيحين الميانه بسحب المفتاح مع كل نزله. لان فيه ناس رجلهم ثقيله على الموتر وعلى الدبل .. هذا غير المطامر

اما إذا الموتر انا جالده واخذ حقه وزيادة والله ماهمني لو يسوقه الراعي مهوب عاد اخوياي ..

[الطبيعه 1400]

والله ونا اخوك ربعي الي اعرفهم قسمين

الاول وهم النشامى وهم الي احرص عليهم وهم الي طلعت معهم تروح مستانس وترجع مستانس اكثر ودمعتك تنزل على انتهى الرحلة \\\ ولكن مايعيب القسم الي اكلم عنه وهو انهم قلة لكن والله الواحد عن 10


القسم الثاني وهوم عندي سبير ايه والله سبير ومنفقعه بعد لا هي الي توصلك الحطه و مامنه فايده الا تخرب الجنط عليك

هم مثل السبير لا طلعت معهم قامو وخلك تشتغل بالحالك ون جطيت الاكل كلو ونسوك مخلينك خدام


ولك انا ما احرص عليهم حتى لو كلموني اعت\رت منهم الا في بعض الايام تطلع وانت راضي بالي يصير


وسلمتكم

[راعي الرائد]

مشكله بعض الناس ماترحم الذي يستحي ما تستقيم الا بالعين الحمراء

[م ح م د 17]

لاتعليق بصراحه .
انت طيب وهم مايستاهلون .. وانا اقرا موضوعك خجلت والله ..
على العموم أنت حاول توضح لهم أن الموضوع يضايقك .
ماهي حاله بصراحه لأني قد جربت شعورك هذا في يوم من الايام .

[ابو حسان الجنوبي]

كثير منا بطيبته الزائدة وحيائه قلت هيبته وانعدم احترامه من باب الميانه
قبل مايقارب الــ15 سنه أوصاني والدي حفظه الله وصيه لازلت ارددها على أخويايي وهي لارحت مكان خذ موترك وخلك شيخ نفسك
منها ربما لاترتاح لسواقة أحد أو يكون يدخن وانت تجلس طفايه لغيرك او يسمع الغناء وهذا يضايقك أو يتعجل ويكدر عليك أو العكس أو يسرع
فصارت عندي قاعدة يأني اسبقهم أو اتأخر عنهم واخذ عزبتي كامله وارتاح واريح الناس

[fashahry]

مستحيل استغني عنهم انا لم افضفض معكم يعني ابي اخرج هالشئ المكتوم بصدري وابي مواساة وبي حلول يمكن جربوتها ونجحت وسلامتكم طولت عليكم لكن اعذروني



دامها كذا وانا اخووووووووووك غير طبعك وارتاح لاتشغل بالك اذا ماتقدر تقول لا

والله يعينك على تكاليف الصيانه الدورية للسياره

وبالتوفيق والله يقنيك بركتهم

[خشكاري]

دعم للموضوع إللي اعتبره مهم وهادف .. ويحصل بين الأخويا وحتى بين الأقارب !! وأكرر الأقارب مهوب بس أخوياك .. اهمية الموضوع في فكرته ألا وهي : نشبة أللي يبون يسوقون في المكشات .. وتراهي تحصل أكثر عند العوايل.


عموما أغلب إن كان مهوب كل الردود اعجبتني واعتبرها نصايح من ذهب

واتمنى محد يقول "تعدينا المرحله ذي" .. ياما شيبان في سن الحكمة سمعنا منهم سوالف وأمور مشابهه .. مثل الشايب أللي في الشعيب وولده ناشب إلا يسوق .. وسلمه الموتر فيه سبعة انفس وقلبهم وتوفى منهم ثلاثة طلعوا من القزاز ووطاهم الجيب الله يرحمهم جميع .. والقصص كثير ..

وبخصوص الاخويا ياما حصل بينهم من مشاكل بسبب ان فلان صدم او تسبب بضرر لموتري وهو مامعه ريال يصلح به لمبه محترقه وناشب إلا يسوق !!

إللي ابي اوصل له إن الكشاته شباب كانوا ولا عوايل طالعين يوسعون صدورهم وينبسطون مهوب طالعين يتهيضون ويتسابقون على الطاره .. الموتر وسيلة توصلك وين ماتبي مهوب مغامرة وملاهي تعيشها في الكشته ..

[عاشق القصيد]

نظامي مع ربعي اختار خوي واحد احطه على يمناي
والى رحت للمكان الي ابيه ادق عليهم وقولهم سيرو علينا
الي بيجي حياه ربي والي ماهوب جاي الله يستر عليه
بكذا استمتعت برحلتي ولا ارتبطت معهم بشكل كامل

[الدليله1]

بصراحه انااختلف عن بعضكم اذا طلعت للبر وحصلت واحد شقردي وسواق وثقه يمكن اعطيه فلوس وخليه يسوق السياره:D:D:D

[يكفيني نظرة]

رأيي بالموضوع انك تتدرج معهم اولاً بتنبيههم عن هذا الامر انه يضايقك، ثم تتخذ معهم اسلوب الحزم وخلك ابثر منهم لأن فيه ناس يفعل الفعل عن حسن نية ولذلك اذا نبهته ونهيته قد يتوقف عن مضايقتك وان لم ينتهي يكون بعدها الحق لك حتى لوأخطأت في حقه لأنه قد اعذر من انذر وقد يكون هذا الاسلوب في صالحك ويحتسبون لك حساب بعدها في اي خطوة يريدون اتخاذها.

[جراح الجر]

السلام عليكم
ذكرتني بالماضي الجميل
كنت اعاني مثلك والله نفس الحركات انزل انسم ولا احفر الا ناقز الرجال و يسوق بالاول استحيت
الى مره من المرات ركب السيارة و حنا بالنفود صدمنا واحد و هنا نقطة التحول لكن بعد ايش
و الله ما اكذب عليك انو السيارة عفتها من هذا اليوم مع انها السيارة مو جديدة
لكن بسبب طريقة الحادث
طبعا الحين من سابع المستحيلات احد يسوق سيارتي و السباب اني ما احب و برضو ما ودي الموقف يتكرر
و على قولتهم اللي يبي يزعل من الحق مشكلة
و اذا على قولتك ان عذرهم يحبون قيادة البر يستأجر جيب ب 500 ريال و يلعن اللي هو حلاله لكن بعيد عن سيارتك

و شكرا
مع تحيات اخيك

[abohmad]

السلام عليكم جميعا سبقني اخي ابو حسان بارك الله فيه واطال عمر والده نصيحه من ذهب وما قصرو الاخوان انا صرت اذهب للبر لحالي واذا اردت ان اذهب مع اصدقاي اعطيهم فلوس القطيه واجيهم في المكان المتفق عليه بدون التزام في اني اروح معاهم وانطر هذا وهذا يعبي بانزين وهذا نازل للبقاله وهذا يبي يتغدي والثاني ما اعرف شنو يعمل انا جربت كل الطلعات خلك حر وواعدهم وتعال علي موترك لحالك فقط

[قناص الصحرآء]

انا كنت اول اكشت مع أي واحد يقول مشينا وللاسف صارت اغلب كشتاتي ارجع ضايق صدري من شخص او يحصل سوء تفاهم او هوشة وبعدها فكرت قلت وش حادك الحمد الموتر ومعك والعزبه جاهزة ؟

والان لي ثلاث سنوات الحمدلله وهذا وضعي بالقنص اطلع لحالي وبالكشتات اختار لي شخص نقوه يرد الصوت ويونسك بالسواليف .

[هاوي]

جرب قل السيارة يبيلها كفرات او اصلاح كبير
وشف احد بيفزع
لاتستحي منهم لاتجامل على حسابك الحق حق اللي يبي يطلع ترا سيارتي تعذره في القيادة

[تميم2222]

اللي تشوفه يركب مكانك هفه بكف ونزله وقله بلا حركات مبزره

[خوي السطحه]

تعال اكشت معي يوم على من طبخ وغراض وتنظيف ويوم عليك وختيار المكان يوم لك ويوم لي وخل الى مايقدرك على جنب يسده السلام لاشفته بديره

[كتاب]

الاخوان ما قصروا وأتفق معاهم أن الطلعة للوناسة وإذا كانت تصرفات البعض تضيق الصدر فلا داعي من وجودهم

طبعا نتحمل الأصدقاء شوي إذا كنا في مجلس أو نحو ذلك بس في البر الهدف الراحة والاستجمام وهذا لا يتم في وجود ناس تمثل عبء إضافي على الانسان

كل واحد منا أطباعه غير الثاني بس أنا مقتنع بطلعات خصوصية لنفسي لا أطلع مع أحد وهي اللي أريح فيها بالي وأعصابي
وطبعا طلعات أخرى عائلية أتسامح فيها لأني غير معتمد عليها في الراحة وأهم ما فيها راحة العيال

لذلك أقترح عليك ( بعض ) الطلعات تكون لوحدك أو مع شخص واحد عزيز عليك وتعرفه معرفة جيدة .
وهاذي الطلعات تكون للراحة والاستجمام و لا يدخل فيها أي كان

[da7ome]

الله يعينك عليهم

[اليامي قطر]

السلام عليكم ورحمة الله وبركاته
بصراحة اغلبنا ينطبق عليه المثل ابكيلك وشتكيلي او اشتكيلي وبكيلك (ملخبط بالمثل شوي)



لاتشكي لي ابكي لك

هذا المثل الصحيح

[ذيبان_]

خوي خوته تنكد عليك ريح راسك ولا تخاوية

[الحربي حاتم]

إذا الرجال يستاهل وقرم ورجل بمعنى الكلمة وإذا نخيته لقيته وهو بالمثل ، إلا أعطيه اللي في جيبي كله ماهو السيارة بس . لكن وين الرجال اللي بهذي المواصفات هلحين ماتلقاه أبد لذلك عاف ألناس وإبتعد عنهم وعندي كلام كثير من تجارب عمر طويل ولكن في الإشارة كفاية .

[أبومتعب]

وش المشكلة إذا ساق سيارتك بالبر ؟

نهاية العالم ؟

كبرو عقولكم يارجال ترى الموضوع مايستاهل هالشد كله ...

أنا موتري جيب ودايم نطلع مجموعة أربع خمس أشخاص نقوة ..

والموتر من يد نشيط ليد نشيط ...

ولو صار شي أتحمله والنفس طيبة ... ماحد متعمد الخراب ... والرفيق يمون على الروح ماهو قطعة حديد

ترى الدنيا فانية ... والحرص الزايد مافيه خير ...



اللي باله ماهو وسيع على اخوياه ووسيع بطانه يبعد عن الناس ويصير لحاله تقل جني ...

[ابوخلف..]

إذا الرجال يستاهل وقرم ورجل بمعنى الكلمة وإذا نخيته لقيته وهو بالمثل ، إلا أعطيه اللي في جيبي كله ماهو السيارة بس . لكن وين الرجال اللي بهذي المواصفات هلحين ماتلقاه أبد لذلك عاف ألناس وإبتعد عنهم وعندي كلام كثير من تجارب عمر طويل ولكن في الإشارة كفاية .

اختصرت علي

الخوي الطيب الي يقدرك وله مواقف يستاهل والناس الي ماتقدر منت مجبور عليها
ابعد عنهم بدون ان تجرح مشاعر احد

[Al3rands]

اطلع لحالي والله ياهي وناسه والحافظ الله

[خالد الشمري20]

السلام عليكم ورحمة الله وبركاتة


والله مشكلة تضيق الصدر وتحزن


لكن اصبر عليهم وصارحهم وقلهم بكل صراحة يا أخوان رجاء لا احب احد يسوق سيارتي


وأدعي الله لهم انهم يتقبلونها ان شاء الله بكل رحابت صدر


وان شاء الله تنتهي المشكله

[ابوريان 1972]

شهم وكريم وطيب في نفس الوقت وحياوي مثلي والحيا ماهوعيب وأنا أخوك والحل أمره بسيط
اقترح عليك انك تلكم واحد منهم تتوسم فيه الخير وهو بيوصل رسالتك أهم شي تتجاوز نقطة الحيا في البداية واهم شي الكلام بالطيب والهدوء في حزم

[قنا النفود]

تمام حلووووو

[بلجان]

والله انت بتتعب لانك تجمع لك اطرف ناس وتطلع معهم اكيد بتقابل عينات
عني انا طلعاتي مع ناس محددين لو مااطلع او اروح لحالي اتمشى ارجع
ولاوالله اطلع وانا متنكد ولاشايل بخاطرك على احد مايصير هالكلام هو بياخذ موترك
وبيستانس وينبسط وانت على اعصابك خاصتن لاصار جديد

[المكشاتي 1]

بارك الله فيك