الرجاء المساعدة أرغب في شراء باثفايندر من نيسان ..

[بندر عبدالله]

ارغب شراء جيب نيسان بايثفيندر 2003 قوة المحرك 3500
اناء أول مرة ارغب في شراء سيارة ذات دفع رباعي
ارغب طرح الرأي الجميع من حيث
استهلاك البنزين وكم تسهلك من ليتر في 0000 كلم .
القوة في الطعوس.
القير الاوتوماتيك أو العادي.

ارغب الحصول على هذه المعلومات باسرع وقت ممكن حيث أنني ارغب
في شراها خلال الثلاث اسابيع القادمة إن شاء الله .
:(

[راعي لأولة]

وانا لية نفس الطلب اخي العزيز ياليت الشرح يكون وافي

[راعي عنيزة]

على البركه مقدما واختيار موفق

حصلت في موقع ان صرفيتها في الخط 11 كيلو لكل لتر وفي المدينه 7 كيلو لكل لتر

مدري عن صحة معلوماتهم لكن عموما اي سياره دفع رباعي لازم تكون صرفيتها مرتفعه

وانا جربت قير تماتيك 240 حصان والصراحه السياره نشيطه بالحيل مشالله عشق تحت الطعس ب 1 وحط رجلك وما يوقف

ولاشك العادي اقوى وازود بالاحصنه 250 حصان ولكن التماتيك اريح وقوته مهب سهله

والموتر مريح بشكل غير طبيعي لدرجه انك تحس انك راكب كدلك :p

[ابو الريم]

السيارة ما عليها كلام مثل ما ذكر الاخ راعي عنيزه سواء في الخطوط والطعوس والمدينة ..........

اما عن الصرفية فكل سيارات الدفع الرباعي لها صرفيه اكبر ......... بسبب ( حجم اكبر - والوزن - الارتفاع - الدفرنشات الامامية )

اضف الى ذلك ان المحرك كل ما كبر 3500 مقارنه بالاول 3000 صارت صرفيته اكبر ولكن بالمقابل عزم اكبر .

اخوي راعي عنيزه بالنسبة للملومة التي حصلت عليها اظن ان فيها نظر لان مسافة 11 او 7 كيلو مسافة قصيرة جدا حتى تستهلك لتر بنزين ...... وحسب معلوماتي ان قياس الصرفيه يؤخذ على 100 كيلوا . وهو مكتوب بكتلوج السيارة وياليت اي واحد من اصحاب الباثفندر يذكر لنا لكي يستفيد الاخوة .


تحياتي ابو الريم ,,,,,,

[الشيخ]

الاخوان بندر وراعي الاوله
انا معي باثفايندر موديل 2000
والموتر ممتاز بالحيل من ناحية الاتساع والقوة والنعومة بالقيادة والثبات
والجديد افضل مكينة اكبر واقوى وصرف بنزين اقل
معدل خزانه يمشي معاك 600 كيلو بالخطوط و500 بالمدينة
خزانه يجي 70 لتر لموديل 2000 مدري عن الجديد كم حجمه يجوز انه اكبر
و بالنسبة للجديد اقل صرف لكني ما ادري كم بالظبط
بس عندك مشكلة القير اذا انت ناوي تشتري الموتر ولك طلعات للبر كثيرة انصحك بالعادي
اما اذا انت من الي طلعاته للبر قليلة خذ التماتيك
وعلى العموم ما يفرق بالعزم اكثر من 10 حصان لكن تفرق معك الراحة خصوصا وقت الازدحامات
اما قطع الغيار فهي مقاربة لاسعار السفاري
هذا الي عندي عنه وعساني اكون فدتكم
ومبروكين مقدما

[راعي عنيزة]

ابو الريم هلا بك اخوي
حسب تجربة الشيخ اعتقد ان المعلومه صحيحه وحسب ما سمعت ايضا ان محركه الجديد اقتصادي اكثر من المحرك السابق
ونحسبها
في الخط 11 كيلو لكل لتر
والخزان يحمل 70 لتر
11 في 70 = يمشي التانكي 770 كيلو في الخط

وفي المدينه 7 كيلو لكل لتر
7 في 70 = 490 كيلو

================

الشيخ

مشكور اخوي على المعلومه
بس انت ذكرت ان فيه مشكله في التماتيك
وما اخفيك انا ناوي باذن الله افك واحد تماتيك وجربته في البر وعجبني عزمه جدا
فما ادري ايش مشكتله بالظبط ؟

[بندر عبدالله]

راعي عنيزة وابو الريم والشيخ
الف الف الف شكر وما قصتورة يا شباب الحقيقة أناء لست متردد لأن السيارة من ناحية النوع والشكل داخله من جد مزاجي ولأكن تنقصني بعض المعلومات.
والمعلومات التي حصلت عليها منكم تبشر بالخير ولأكن لدى سؤال موجه لراعي عنيزة (ولا يهون الحضور)
كيف تكون الصرفية في الخط 11 كيلو لكل لتر والخزان يحمل 70 لتر.
واستنتاجك 11 في 70 = يمشي التانكي 770 كيلو في الخط، أناء لا اعترض على وجة نظرك بس لازالت أتوقع أن تكون الصرفية أقل من كذا بكثير من ناحية الكيلو مترات.
واستنادي على ذلك من ناحية السيارات العادية وصرفها في المدينة تكون في حدود 450 إلى 560 كيلو متر في المدينة، لذلك بالاحراء تكون السيارات ذات الدفع الرباعي في المدينة واستهلكها 430 إلى 500 لتر في المدينة.
وللملعومية فربما تكون وجة نظري خطأ ولاكن؟؟؟؟؟؟؟.....
هل من هو المخالف والمؤيد لذلك.
مره أخرى أشكر كل من توصل معنا في ذلك.

[راعي عنيزة]

اخوي بندر
رجعت لعدة مواقع وكلها طلعت لي نفس النتيجه وفيه تصحيح ان تانكي الباثفايندر 2003 يشيل 80 لتر وليس 70

اخوي بالنسبه لل 770 كيلو فانا قلت انها خاصه بالخطوط فقط
اما في المدينه 490 كيلو مثل ما حسبتها فوق

ولو قلنا ان كلام المواقع نظري ويختلف الواقع وزياده السرعه وعدم تثبيت السرعه والمكيف كلها لها دور في زيادة الصرفيه
لكن كلام الاخ الشيخ من تجربة سيارته موديل 2000 ان
معدل خزانه يمشي معاه 600 كيلو بالخطوط و500 بالمدينة

ومحرك 2003 اكثر اقتصاديه ويمشي اكثر

والرأي للجميع وخصوصا مجربين السياره

[عبدالعزيز الدباسي]

حيا الله الجميع

والظاهر ان الآراء مختلفة ، واخونا بندر عبدالله مستعجل ، وشكلكم حيرتوه .

وانا ابعطيكم تجربتي مع الباثفايندر ، حيث شريت السيارة اول ما نزلت في السوق السعودية وذلك عام 98 ، والحقيقة اول ماشفتها اعجبتني ويوم سألت عن امكانياتها جزمت و اشتريها .

ورافقتني السيارة اربع سنوات في كل الكشتات والرحلات والسفريات . ((الين زعلت عليه وبعتها))

على العموم تفضل عيوب وحسنات الباثفايندر .

الموتر نشيط بالحيل في الطرق العادية ، ونوعاً ما مريح المركب

لا يتفكك مثل باقي سيارات نيسان بل يظل متماسك وبدون قرقعة .

افضل القير الاوتماتيكي (لاني من سكان الرياض) اما الاخوة الذين خارج التغطية :p اعتقد ان القير العادي افضل .

اما عن صرفية البنزين فهي لم تصل معي ابداً اكثر من 420 كيلو في الديرة ، وفي الطرقات 500 كيلو اما في الرمال فلا تتعدى 250 كيلو

وعن عيوب الباثفايندر

عزمه ضعيف جداً في الطلعات الطويلة (مجرب في ابها ، وسوريا وتركيا) وتذكر انه كان موديل 98

بعض قطع الغيار غالية ولا يصلح لها الترهيم وذلك مثل المساعدات ، سريعة الخراب ولا يركب عليها الا حق الوكالة وسعره 720 ريال .

اذا جزمت وشريت السيارة ، على طول غير الكفرات حيث ان البرجستون لا يتناسب مع الباثفايندر وثقيل وجاسي على غير فايدة (ركب يوكوهاما والا مشلان)

هذه بعض المعلومات ، واذا بغيت اكثر تفضل بالاسئلة .

وتقبلوا تحياتي

[الفرعاوي]

هلا واللة بالاخوان جميعا

أنا عندي باثفايندر موديل 2001 و مبسوط جدا منة (بس تحسفت ودي اني شريت قير اتماتيك )

الميزة في 2001 عن الموديلات الجديدة هي توفر السبير فوق و بالتالي يمكن تركيب تانكي موية 65 لتر. إذا تقدر تحرص على هالميزة و لو طلبية يكون زين).

و من ناحية صرف البنزين ، اقول يمشيك التانكي (70 لتر) تقريبا 450-500 كيلو في الديرة و على الخط تعتمد على سرعتك ( اذا مشيت فوق 130 بدا يصرف اكثر من الديرة !!!)

بالنسبة للقير ، يقال ان التماتيك يصرف اقل ؟؟

قوة المكينة (2001) بعض الاحيان تفشل ... خصوصا اذا كنت مركب معك ناس و مالي تانكي الموية !!

كذلك لا يمكن تركيب بطارية اضافية.


بالنسبة الكفرات ، زي ما قال اخوي الشقردي ، تقل حفارات على الرمل (مرة دخلت الرمل انا و عيالي بعد المطر و كانت الكفرات على 40 ، المهم مشيت شوي و بعدين غطست على جرف ، بديت انسم .... و ما دريت الا مر علي فورد كراون فكتوريا 87 يطعس و اللي فية قام يناظرون و يتكلمون مادري وش يقولون ... قمت و تلطمت و طلعت السيارة و انحشت )

(قرأت في احد المنتديات ان قوة المكينة في 2003 لا تتناسب مع امكانيات القير و يمكن يقصر من عمر القير و اللة اعلم )

اذا عزمت ، احرص على ال GPS داخلي . اشوفة بدى يتوفر في السيارات الجديدة ..

لكن ما سألت عن البرادو الجديد ؟؟ المعروف ان تويوتا دائما افضل من نيسان ...

و سلامة الجميع

[الشيخ]

الاخوان بندر عبدالله وراعي الاوله
اقول يوم ان الموتر عاجبكم توكلوا على الله
ويعطيكم من خيره ويكافيكم شره


----------------
الاخ راعي عنيزة
انا ما قصدت مشكلة في القير التماتيك قصدت مشكلة في الاختيار عادي ولا تماتيك
لكن الوالد معه واحد موديل 2001 تماتيك وماشي معاه مظبوط

--------------------------
الاخ شقردي
بالنسبة للمساعدات واجهتني نفس المشكلة حيث المساعدات الاصلية تبلغ قيمتها 75 دينار كويتي
سواء خلفي او امامي رحت وركبت Heavy Dutey
بسعر 15 دينار فقط للواحد مع التركيب
ومثل ما انت عارف هذا اقوى وارخص بس انه متوفر منه اثنين كندي وامريكي والامريكي افضل
وبنفس الحجم بالظبط ولا يحتاج ترهيمات او شي من هذا القبيل


---------------------
الاخ الفرعاوي
جربت الجيب بالطعوس وبالطين ممتاز ولا قد وقف معاي ودخلت فيه اماكن جيوب واجد ما قدروا يدخلونها لكن يستحسن تستعد قبل دخول الطعوس وهذا بالنسبة لكل السيارات تنزل ضغط الهوا خصوصا انك دخلت وضغط هواك 40 والركادة بالطعوس ما تخليك تغرز اما مثل بعض الناس الي يجي للطعس مبدل رابع هذا اكيد يغرز تعال للطعس بكل ركادة بالغيار الثاني ولا بالاول وشفه يوقف ولا لأ


وسلامتكم

[بندر عبدالله]

اشكر كل من تواصل معنا وطرح الرأي ...
ونحن في انتظار الجميع ....

[القماري]

أخوي بندر عبد الله والجميع يصبحكم أو يمسيكم بالخير
بخصوص الباثفايندر ( هذا الموضوع طرح من قبل ونزلت فيه موضوع كامل بالمواصفات والمزايا والعيوب ) بس مع تحديث السيرفر للموقع حذف الموضوع وصار في خبر كان ... عموما وبإختصار
السيارة الحالية ( نيسان باثفايندر ) جيدة وأفضل من السابق بكثير وإذا كانت قروشك محدودة وأنك تستعمل السيارة يوميا للذهاب والرجوع في الخط و تحب طلعات البر الخفيفة فباثفايندر سيارة مناسبة جدا لهذا الأمر.
مثل ما تفضل الجميع بخصوص إستخدام السيارة أضيف أن أخي عنده باثفايندر 2000 ومشاء الله كادها للآخر سفر وذهاب للعمل يوميا ولم يشتكي من سيارته بل هو مبسوط بها وأحد الأصدقاء إشترى 2003 من قبل 3 شهور وبصراحة السيارة أعجبتني بالمواصفات .
وبحسب الأخبار 2004 سوف يتغير شكلة لهذا الشكل والله أعلم.
http://www.freshalloy.com/site/cars/nissan/2004/pathfinder-armada/photos/001.jpg

[الشيخ]

الاخ القماري
الشكل هذا سابق وقته
وما اعتقد بعد كل هالتطورات الي نزلت بموديل 2003 يبدلون شكله بالكامل
انا اتوقع تغيير بالوجه يمكن يغيرون مكان الكشافات او اي تغيير بالاكسسوارت
على حد علمي ان 2003 نزل للسوق بدون سلة مثل الموديلات الي قبله
يعني يمكن يجي تغيير طفيف اما تغيير جذري ما اتوقع
بس عطني كم يوم واجيب الخبر من موظف بشركة نيسان
واكيد عنده اخبار اكيدة عن الموديلات الجاية

[عريدان]

الإخوة والقراء السلام عليكم ورحمة الله وبركاته
أود ان أوضح بأن الصور هي أسكتش يدوي للباترول الصالون الحقيقي 2004 مع محرك جديد V8 والذي نزل نوع منه على شكل شاحنه خفيفه (باترول حوض) فعلاً.http://www.autointell.com/asian_companies/nissan/nissan-titan/nissan-titan-03.htm

[راعي لأولة]

والله اشكال غريبة ياخي وانا ماتوقع نيسان تصنع مثل هذي السيارات

[راعي عنيزة]

للاسف يا شباب الصوره الي نزلها الاخ القماري هي الموديل القادم للباثفايندر وسيتم تصنيعه في امريكا وسيكون حجمه كبير وهذا الخبر تم اعلانه رسميا في موقع نيسان

وما اتوقع الشركه بتصنع سيارتين بنفس الاسم مع اختلاف الشكل


لذلك اتوقع ان موديل 2003 اخر باثفايندر يوصل عندنا

وهذا شي متوقع لان نيسان تصنع ثلاث سيارات جيوب من الحجم المتوسط وتبي تسوقها عندنا بدال الباثفايندر
وهي

مورانو
http://www.nissanusa.com/m/cma/i/3mu/3murano_gal_med11.jpg

و اكس تريل
http://www.nissan-me.com/xtrail/images/xtrail_mod_home.jpg

و تيرانو

[الشقردي]

معليش ولو طلعت بكم عن الموضوع شوي, لكن تو وانا اقرا الردود تاملت في حال المنتدى وقلت صدق انكم فزعات وبس :ردود متكاملة,مشاعر كويس(في هاذي خانني التعبير) والمعنى في بطن الشاعر....

جزاكم الله بالجنة لكن اخلصوا النية وتذكروا انكم بفعلكم هذا تمشون في حاجة اخوكم ....
غير انكم تقدمون له المشورة الطيبة


ما أقول الابعدي ياربع مكشات

[مخاوي الليل]

سلام الله عليكم يالربع
انا عندي باثفندر 2002 قير توماتيك الصراحه الموتر ممتاز ولا عليه كلام وانا اطلع للبر يومياً ولاشفت منه اي عذروب حتى بالسفر يعجبك سافرت فيه أول ما شريته لصلاله
لكن من ناحية صرف البنزين اشوف انه يصرف يعني انا اعبيه فل من الدمام وامسك خط الرياض اذا وصلت الديري الشرقي التانكي فيه الربع او دون شوي
وبعد يوم رحت لصلاله كل 350 كيلو لازم اعبي لآن التنكي في الربع ( السرعة 130-140 )

[هذا الكلام]

يا عزيزي انا كان معي با ثفندر 2001وماشي 72000
الموتر حليل من نا حية حجمه بحيث انه وذف ( مقبول ) بالديرة و البر مب مثل الباترول والاند كروزر غثيثات بالديرة خا صة بالرياض ومركبه حليل لا صرت راكب قدام اما مراتب ورا تقل (كأنه) سيكل ثلاث كفرات ومشكلته مطبه قاسي شوي ومن نا حية القرقعة اناعندي الباب اللي ورا لا اكلت مطب تسمع صوت تقل (كأنه) احد رامي بشوزن يمكن لانه اللي عندي الكفر قوق مب تحت بس الحقيقة انا من النوع اللي يمجر الموتر بالبر والديرة.
اما من ناحية صرف البانزين فهو يصرف وبقوة بعد يعني بالديره يالله يمشيك 450كيلو قير عادي طبعا والخط مثله بالطبط فمثلا انا معبي من محطة خط القصيم فل ووصلت لبريدة بالتحديد الشقة ولمبة البانزين مولعة ومعدل مشيي 150 وبالنفود ممتاز بس يبيلك تنسم بزود شوي وما ياقف شي قدامك.
والخلاصة( ما تحس اني زودته) كانك راعي ديره وبر على خفيف وما تمجر السياره فهو ممتاز لك ونصيحتي خذ تما تيك ومبروك مقدما والسيارة الصحيح انه حليله ولا تنسى تعزمنا على النزاله...................