المساعد الشخصي الرقمي

مشاهدة النسخة كاملة : (استشارات مطبخ مكشات) أي استفسار انتسبوه هنا


ls460
31/12/2006, 06:34 AM
السلام عليكم ورحمة الله وبركاته

ياحبي لمكشات وياحبي لكم بعد

المهم نخش ع السريع علطول

أي استفسار أي مشكلة أي سؤال عن أي طبخة اسدحوه هنا

من طبخ الذبايح(اطبخ إلى أربع ذبايح أنا مرة وحدة(قولوا ماشاء الله)

إلى كشنة الرز

والبيض

وحتى الحلى

اسألوا وأملي هو إفادتكم

رز

سليق

جريش

مرقوق

حميس

مقلقل

كودو

كلوب

بيض شكشوكة

خبز

زعتر

انتظركم يالأحباب

وأول سؤال إذا مانشط الموضوع بالاستفسارات هو :

أنت تطبخ الرز وغفيت عنه من جد واحترق وش تسوي وريحته نشبت في الرز وش تسوي ؟

وترقبوا كيف تطبخون بوقت قرب قدر الكاتم بقليل قريباً إن شاء الله وبدون الكاتم .

أبو ستري
31/12/2006, 11:43 AM
الله يجزاك خير .
الحميس لو كان على لحم حاسي تحترق المقادير واللحم ما أستوى ..
هل من رأيك أسلق اللحم قبل ..؟؟

والإ عندك طريقة سحرية ;)

أبو ستري
31/12/2006, 11:44 AM
وأول سؤال إذا مانشط الموضوع بالاستفسارات هو :

أنت تطبخ الرز وغفيت عنه من جد واحترق وش تسوي وريحته نشبت في الرز وش تسوي ؟







اضع خبر داخل القدر ويشفط ريحة الحراق .. http://mekshat.com/vb/images/smilies/smile.gif

اخوكم بري
31/12/2006, 12:05 PM
طريقة عمل الجريش بالتفصيل لاهنت
الكمية اربع اشخاص

ls460
31/12/2006, 06:28 PM
الله يجزاك خير .
الحميس لو كان على لحم حاسي تحترق المقادير واللحم ما أستوى ..
هل من رأيك أسلق اللحم قبل ..؟؟

والإ عندك طريقة سحرية ;)

هلا أبو ستري هلا بك والله

اكيد تحترق المقادير واللحم ما نطبخ تدري ليه ؟!

لأني إذا طلعت مع شباب واستلموا الطبخ تلقاه كل شوي يفتح الغطاء ويشوف اللحم كل دقيقة او دقيقة ونص:D

الحميس يالغالي على لحم الحاشي (الصغير خرافي )

الطريقة كالآتي :

قطع اللحم بشكل طولي طول أصبعك الصغير وسخفه شوي أو على شكل مكعبات صغيرة وتسلق اللحم على موية بس لا تضيف له أي شيء(ملح أو بهارات) حتى يستوي .

وتفرغ الموية تماماً ثم تضع بصل (يفضل يكون أبيض) وفلفل باردأخضر وحبحر (فلفل حار) والطماط ابتعد عنه لأنه يغير الطعم إلا إذا كنت من هواته

واضف قليلاً من البهار والملح

قلب اللحم مع هالمكونات حتى تذوب شوي وبالهناء والشفا.

عبادي البر
01/01/2007, 06:26 PM
مشالله علييك يا طباخ المنتدى :)
طريقة عمل الضغوط بالدجاج الله لا يهينك

ls460
02/01/2007, 06:29 AM
أخوكم بري


تبي تطبخ جريش مرررة وحدة:confused:

ترى طبخه يطول

لكن ماعليه أنت شكلك مفتون فيه

إن كنت تريد تاكله في البيت في الرياض فلايردك إلا القرية النجدية عندهم جريش يحبه قلبك (خرافي )

أما إذا كان في البر فالله يعينك يبيلك تطبخه أربع ساعات

لكن نعلمك الطريقة

جريش (3/4) وفيه انواع والأفضل التركي وفيه واحد اسمه لقمتي

إن كنت تبيه أبيض ناصع البياض أضف له نصف كأس رز مصري

وإن بغيت على لونه الأشقر (الأصلي ) لاتضيف له أي شيء .

يلزمك في الحالة عين غاز+قدر يكون غطاه متراص مهب متعرفط من كثر الرزح والدبج في العزبة:D

أو صاجه إن كان بتطبخه على الجمر(بس هذي للمحترفين):p

المهم وش يميز طعم الجريش عند الناس وإقبالهم عليه ؟!

شيئين اثنين هما اللون لا يصير أبيض (يحوم الكبد ) وشئ الثاني لازم يكون له حموضه

والحموضة هذي تجي من اللبن أو الجبن الحامض او اللبنة أو الخل والليمون أكيد

نبداأ العملية

بسم الله

افرم لك كمية لا بأس لها من البصل بشكل صغير جداً (البصل مهم للنكهة )

وخذ لك كمون

وليمونتين

وطلع حليب المراعي (اطن أنه الأحسن من ناحية الحموضة )

وكيف تخلي اللبن حامض ؟

هو أنك تطلعه من الثلاجة وتخليه يدفأ وهذا يرفع من حموضته ويخلي الحموضة مرتفعه(وهذي مناسبة لمن يحب اللبن الحامض أنك لاتخليه بارد وطلعه قبل الغداء بنص ساعة عشان تدوخ صح .

ويبغالك سمن أو ودتس

أو بالإمكان أنك تحمس لك لحم في قدر الجريش وتطلعه

المهم تكب اللبن في القدر وتخليه لين يسخن وانتبه ما تحركه لأنه بيتروب ويتكتل (يطلع له كتل )

واضف له الجريش لين مايغطيه اللبن

ومن ثم قصر على النار أكبر قدر ممكن وافصل بين القدر والغاز بصاج حديد (اللي كنه مقلى ومخرج من كل الاتجاهات شكله كنه خبر تميس محرووق :D )

وغط القدر بقصدير وفوقه الغطاء وخله يطبخ على نار هاااااادئة مرررررة

وافتحه كل نصف ساعة وحركه فيه إلى ان يتجانس مع اللبن واضف له الكمون والملح وعصير ليمونتين وإن اردته حامض اضف له جبن حامض أو خل

وخله إلى أربع ساعات

وترى الجريش كل مازاد طبخه زاد حلاوته ولذته:p

وبعد أربع ساعات جب لك حبحر أحمر يالله الجنة طويل ولا تفقشه انتبه واغمسه في الجريش إلى أن ينضج

وخله حول عشر دقايق

وجب لك مجرشة خشب وطلع الحبحر وابدأ اضرب بالجريش (قد تحتاج إلى تمليحه هنا بشوي من الملح )

واجرشه إلي أن تحس أنه تجانس ومن ثم حط عليه كشنة مسويها قبل أنت ببهارات وبصل وسمن

ومن ثم حطه في بوادي صغار(صحون صغار )

وبالهناء والشفاء

نمر بن حثلين
02/01/2007, 09:49 AM
الله يقويك اخوي
عندي استفسار

مادري شلون اتصرف اذا طبخت اللحمه بالكاتم وفتحته عشان انكب الرز

وطلعت المرقه خانسه










وفتشت العزبه واثر ما فيها ملح !












وجيت اكب الرز واثر مافيه رز !















وجيت اشب الدافور اثر مافيه كبريت !














وجيت مرو وقدحتهن واثر الغاز مخلص
















وجا اعصار وطار بالقدر

















شلون اقدر اتصرف اخوي واكمل الطبخه ؟ :p :p




المعذره اخوي حبيت امازحك وعجبتني فكرة الموضوع واقدم لك الشكر ومتابعين لاجاباتك ونستفيد منها

اخوكم بري
02/01/2007, 10:28 AM
الله يجزاك كل خير كفيت ووفيت
وكل عام وانت بخير عقب الزحمه

ls460
02/01/2007, 10:47 AM
اخوي أبو ستري


نعم صحيح

والأفضل أنك تقطع عليه طماط ني على شكل حلقات وتخليه فوقه فترة وتغطي القدر

طيب وإذا صار مامعك لا طماط ولا خبز ولاحتى بطاطس

افتش القدر وخل البخار يطلع منه على الأقل تروح ريحة الحرق :(

ls460
02/01/2007, 01:36 PM
مشالله علييك يا طباخ المنتدى :)
طريقة عمل الضغوط بالدجاج الله لا يهينك

هلا أخوي عبادي يا حبيلك :D

المقادير:بصل +ثوم(على حسب الرغبة يكون مطحون ومفروح ) +طماط أو صلصة إن كنت من هواة الإحمرار +ملح+بهارات+ليمون أسود +دجاج مقطع انصاف (يعني الفخذ لاصق بالصدر)+إن أردت أن تضيف هيل او دارسين أو مسمار على حسب رغبتك)+رز.

الطريقة :تحمس البصل وتكب الدجاج عليه وتحمسه سوا وتضيف له الطماط (الطماط دائما مايطرد ريحة صناج الدجاج خصوصاً المجمد منها ) تقلبه جميع إلى ينضج الدجاج قليلاً .

تضيف ماء حار بقدر ما يغطي جنحان الدجاج الطافية . وتضيف الملح والبهارات والاضافات الأخرى مثل الليمون الأسود

تغليهن شوي .

ومن ثم تضيف الرز(بعد ما يتخمر بالماء وبعد غسله ) تغلق الكاتم ومن ثم احسب 25دقيقة بالضبط ستسمع أن صوت الغليان ذهب وبدأ صوت حسحسة عندها أنت لك خيارات .

إن أردت الرز معبط (كأنه سليق ) فانكبه على الأبلام علطول .

إن أردت جاف قليلاً أضف عليها 8إلى عشر دقايق وإن أردت أجف أكثر أصبر أكثر

بعد الانتهاء سقط حبحر إن أردت في القدر بعد ما تنسم للبخار ....

(فيه ملاحظة أن ما هما كانت النار قوية زادت سرعة نضوج الرز يعني قو النار باللي تقدر عليه البخار اللي داخل القدر بيمنع من الاحتراق ) ...

وبالهناء والعافية

ترقبوا دجاج بالكريمة بالبر أو دجاج بالجبن

وترقبوا طريقة عمل الكودو في البر


والمسلوقة مع خبز القرصان في البر

وطريقة عمل الرز النثري في البر

وطريقة الشوي (المحتكرة لنا )
:D :D :D

عبادي البر
02/01/2007, 01:46 PM
تسلم يالذيب والله يعطيك الف عافية على الوصفة الممتازة

والله انك فتحت نفسي على المضغوط وشكلي بروح لاقرب مطعم وادق لين يطلع من خشمي.\

وشاكر لك الطريقة

ls460
02/01/2007, 01:48 PM
تسلم يالذيب والله يعطيك الف عافية على الوصفة الممتازة

والله انك فتحت نفسي على المضغوط وشكلي بروح لاقرب مطعم وادق لين يطلع من خشمي.\

وشاكر لك الطريقة

العفو ياعبادي

شكلي شغال هنا أشهوي هالعالم

المهم زين يطلع مع خشمك ولا يطلع من مكان ثاني :D

مدور ربيع
02/01/2007, 02:24 PM
تسلم اخووي ... ماشالله الله لايضرك

الا الكودو وش سالفته بالبر <<< ( اول ماشافه يحسبه تسوي عرض لجهاز كنود )



ولاهنت اخوووي

بغيت خلطة قرص الجمر وطريقة تزبيطه بالبيت ( يعني بالمشب )

وشااااااااكرين اخوي لس فاكر احمممم قصدي اخووي ال اس

::الرهيب::
03/01/2007, 05:28 PM
السلام عليكم...

والله إنك "قرم"... :d

يبغاااااالي رجعة,,,

راجع لكم إصبروا لاتاكلون... :d

أخوكم
الرهيب

صيهد
03/01/2007, 05:57 PM
جزاك الله خير
سؤال اذا كان الملح زايد ومااكتشفت هذا الا بعد مانشف الرز
هل فيه حل غير انك تصلح ثاني

ls460
03/01/2007, 07:31 PM
جزاك الله خير
سؤال اذا كان الملح زايد ومااكتشفت هذا الا بعد مانشف الرز
هل فيه حل غير انك تصلح ثاني

هذا جواب ع السريع وراجع للإخوة في الردود أعلاااه

زد الموية عليه بمقدار زيادة المطبخ وسكره غلين تبخر الموية وهو على الغاز يعني زده بمقدار كأس تقريباً بحيث يعمم على جميع جوانبه ومن ثم دعه يتبخر أي الماء :)

ls460
04/01/2007, 10:56 AM
الإخوة الأعزاء

تذكرون من أول يوم أن الرز كان له طعم لذيذ ؟!!

تدرون ليش ؟!!

لأن كان هناك فيه اهتمام ، تلقى الوالدة أو الأخت تقوم وتنقي الرز وتغسله إلى أن ينظف

المهم جربوا تغسلون الرز أكثر من مرة حتى تصفى مويته وتكون صافية جداً بحيث تشم ريحة الرز من بعد أمتار ، جربوها في الطبخ ولاتنسوني من دعاااكم

صيهد
05/01/2007, 01:57 PM
اخي is460
كلامك على متمه وقالوا لي بعد ماتزيد الماء اظيف معه بطاطس واترك القدر مفتوح

ls460
03/02/2007, 12:40 PM
شكراً لكل من شارك

وهذي وصفة على الطاير لطريقة عمل حشوة الرز أو الكشنة على ما يسميها بعض الناس

المكونات:

بصل

ليمون أسود مطحون(لومي)

صفار الزعفران(إن وجد أو على حسب الرغبة )

الطريقة:

تقطع البصلات بأحجام صغيرة سخيفة وشكل التقطيع على حسب الرغبة أطوال أو مربعات أو أو أو ألخ

نضيف البصل على المقلى ونضيف معها زيت (ممكن إضافة سمن إن كنت بتخربها ) وتحمسه وتضيف معه اللومي حتى يسمر البصل ، وأضف صفار الزعفران على الرز بعد نضجه أو بعد رب نضوج الرز وتبخر الماء ومن ثم أضف عليه البصل على جميع أجزاء العولية وأغلق القدر قليلاً .

عند التقديم شل الحشوة أو ( الكشنة) من فوق الرز ، وضعها جانب ، ومن ثم اعزل الرز على الصحون ورش الرز بالحشوة والبهناء والشفاء

ممكن إضافة صنوبر أو زبيب أو فستق ومكسرات وبالهناء والشفااااااء

مخالب الصقر
03/02/2007, 06:21 PM
الله يجزاك خير ياشيف Is 460

ودي الله لايهينك تشكيلة بهارات لكل الطبخات

واذا فيه خلطة بهار للمرق والايدامات والرز

مع المقادير المضبوطة عند خلط البهارات مع بعض


وفيه سؤال ثاني عن القهوة المحبوكة
ايش الحوايج الي تنضاف معها
اثناء الحمس وفي الترمس

والشكر لك

برق الصمان
05/02/2007, 04:09 PM
الله يعطيك العافيه اخوي لكن فيه ملاحظه انت كتبتها وهي ان مهما زادت النار على القدر الكاتم ماراح يحترق
لان البخار يمنع ذلك لكن انا حصل معي عكس كلامك وهو ان النار كانت قويه والماء كثير لكن تفاجأت ان القدربعد مافتحته كني صاب قار في اسفله محترق

ls460
05/02/2007, 04:40 PM
الله يجزاك خير ياشيف Is 460

ودي الله لايهينك تشكيلة بهارات لكل الطبخات

واذا فيه خلطة بهار للمرق والايدامات والرز

مع المقادير المضبوطة عند خلط البهارات مع بعض


وفيه سؤال ثاني عن القهوة المحبوكة
ايش الحوايج الي تنضاف معها
اثناء الحمس وفي الترمس

والشكر لك

والله أنت كذا تحرجنا أخوي مخالب الصقر ، يعني تبي البهارات لكل الطبخات :eek:

مشوااااااااار من جد تكتب :cool:

المهم للإيدامات :

كذلك بهارات من مشكلة من أي محل وفيه بهارات مشكلة مشهورة مثل مهران ومهب شينة إذا أضفت لها الثوم المفروووم

وبالنسبة لبهارات الرز بإمكانك أن تضيف إضافة للبهارات المشكلة حبات من الهيل أو المسمار أو الدارسين والليمون الأسود .

والإيدامات بإمكانك من باب التجديد تضيف (الكاري)

والقهوة ليس لي فيها لا ناقة ولا جمل :(

أخوي برق الصمان زيادة النار =قلة وقت الطبخ ، يبدو لي أنك زودت الوقت حبتين هذي المشكلة مع العلم أن بإمكانك طبخ نصف خيشة رز خلال خمس دقايق (قرابة خمسة كيلو) وعلى قدر عادي وهذي أسويها دائما (أهم شيء أنك ما تبطي +أن البخار ما يطلع(ويفضل تقصدر القدر ) وبسسسسسس

ابو عربج
05/02/2007, 07:46 PM
حط شرايح بطاطس على الرز

ابو عربج
05/02/2007, 07:50 PM
انف الرز با المنفاخ وتروح الريحة

عابر السبل
06/02/2007, 09:12 PM
أخي الكريم ..
أولا أشكر لك طرح مثل هالمواضيع ..
ثانياً ... عندي كم استفسار ..
1. ماهي أفضل وصله في الذبيحه لطبخ المدفون .. ( يعني الرقبه ولا الكتوف ولا الأرجل ولا الظهر ) أبغى الألذ .. :)
2. ما هي أفضل طريقة لطبخ الرز .. ( بالتفصيل ) <<<<<<<< طرار ويتشرط ... لكن سامحنا <<< يمووون :)

الله يوفقنا وياك ..

Alsafah
09/02/2007, 09:14 AM
كل الي تطبخ هذ سهل
تعرف الكوارع مهى الي بلحلة

ls460
10/02/2007, 12:38 AM
أخي الكريم ..
أولا أشكر لك طرح مثل هالمواضيع ..
ثانياً ... عندي كم استفسار ..
1. ماهي أفضل وصله في الذبيحه لطبخ المدفون .. ( يعني الرقبه ولا الكتوف ولا الأرجل ولا الظهر ) أبغى الألذ .. :)
2. ما هي أفضل طريقة لطبخ الرز .. ( بالتفصيل ) <<<<<<<< طرار ويتشرط ... لكن سامحنا <<< يمووون :)

الله يوفقنا وياك ..

بالنسبة لأفضل الوصل في اللحم فتعتمد على الأذواق وجميع ما ذكرته طبخ سهل جداً في المدفون لأنه مهب هبر واسهلهن الضلوع ...

أفضل طريقة لطبخ الأرز (لوحده) أو شيء تغسل الرز غسيل جيد، ومن ثم تخمره في الماء ، ومن ثم تغلي ماء يوافق كمية الأرز عندك بحيث يعلو الأرز متوسط سم واحد أو نصف اصبعك السبابة أو دونه شوي ، وضع الملح والبهارات وإن حصل ماجي ودارسين وليمون أسود وحبات هيل معدودة ، ومن ثم اضف الرز (بدون موية الرز اللي انت خمرتها فيها يعني صفّه قبل )..
أضفه الطماط أو الصلصة وبإمكانك أن تضيف قبل غلي الماء زيت أو زبدة أو سمن وتحمس عليهن بصل مع ثوم ، وبعد ما يغلي الماء بالرز ويبدأ يربرب قصّر على النار واكتمه ولا تفتح الغطاء لمده خمس دقيايق أو ثمان ومن ثم افتشه وانطل عليه حبحر وغطه خمس دقايق إلى ثمان دقايق وافتحه وتأكد من أن الرز نشف ، بإمكانك إن أردت إضافت سمن أو زيت في هذه الأثناء .

ls460
10/02/2007, 11:40 AM
كل الي تطبخ هذ سهل
تعرف الكوارع مهى الي بلحلة

جزاك الله خير أخوي Alsafah وياليت تعطينا من الطبخات الصعبة ;)

وبالنسبة لاسم الطبخة اللي أنت ذكرت ما أعرفها ورحم الله امرءا عرف قدر نفسه :)

غبارالماس$
13/02/2007, 02:40 AM
السلام عليكم ورحمة الله وبركاته اخوي الل يجزاك خير ويرحم والديك على هذه الفوائد ز

اخوي ودي انك تعطيني وصفه كيف اسوي السليق الي نعرفه حنا في نجد وكيف اسوي السليق الحجازي الي معروف بسم السليقه وماهي افضل طريقه للهريس وكيف اسوي شي والله أني ابحث عنه من زمان كيف اسوي افضل طبخه للرز مع السمك الناس داما ما يعرفون يسونه صح, دائما يسون كبست سمك ولا تطلع زي مره ذقتها ولا انساها في محل في القطيف شي خيال وانا اخوك. واخيرا ليش انت تركز على تنقيع الرز
واله يجزاك خير اخوي وآسف على لأطاله
وصلى الله على نبينا محمد وعلى آله وصحبه اجمعين ومن تبعهم بأحسان الايوم الدين والسلام عليكم ورحمةالله

emad747
14/02/2007, 08:25 PM
أخواني الأعزاء
تحية طيبة للكل
سؤالي واضح وسهل وهو:.
كم مدة الطبخ في قدر الكاتم لكل من (( اللحم - الدجاج - السمك ))إذا كان الطبخ كبسة؟؟


بارك الله فيكم وجزاكم الله كل خير مقدماً

ابوســــــعود
18/02/2007, 02:28 PM
سلام عليكم ورحمة الله وبركاته
الغالي ممكن وصف المقلوبه بل الكاتم والمندي وتتبلته والمشوي واجمل تتبيله له

صديقهم
19/02/2007, 03:45 AM
س : كيف اوزن موية الرز علشان ما يصير فصفص ولا سليق؟؟؟؟؟؟؟؟؟؟؟

صديقهم
19/02/2007, 03:50 AM
نبي جوالك الله لا يهينك تعرف بالبر اذا توهقنا مفيه انترنت