كم دقيقة تكفي لتسخين المكينة في الجو البارد قبل الانظلاق

[سهيل1]

كثير من الناس يقولون لا بد من تسخين الموتر قبل الانطلاق (( بالذات شيبانا الله يحفظهم ))
وبعض الفنيين يقولون 10 ثواني كافية


وبسبب الاختلاف احترنا ..


ونريد الخبر اليقين ... ميكانيكا وتجربيا ....... طبعا للبنزين وليس للديزل
ويا ليت تتحفونا بتوصيات الكتلوجات المرفقة مع السيارات

المهم الذي ينفعنا أن 5 - 10 دقائق إن كانت غير فائدة (( مضيعة للوقت والبنزين ))



.

[قناص رساوي]

اللي ينفعنا15دقيقه

تبي نصيحت أأخو 15دقيقه

[imksa]

http://www.mekshat.com/vb/showthread.php?t=65028&highlight=%CA%D3%CE%ED%E4+%C7%E1%D3%ED%C7%D1%E5

[بني حسن]

والله يا خوي اني شفت بعيني مهندسين شركة بي ام بألمانيا بمدينة ميونخ بعز الثلج يدقو سلف ويمشو لا تسخين ولا شي والله اعلم

[azd]

السلام عليكم

السيارات الالمانية لاتحتاج تسخين لكن حاول تمشئ فى البداية خفيف

اما اليابانى يحتاج اكثر والدسن اكثر واكثر

[عمار السفينه]

وعليكم السلام ورحمة الله وبركاته

أنا الصراحه ماأمشي بسيارتي الا بعد ماينزل الضغط عن الواحد

وإذا كان مثل مايقولون 10ثواني !!

فيكفي أنني ارتاح نفسياً إذا حميتها

[<<abuali>>]

السلام عليكم
انا ما اعرف اسخن السيارة شغل وامش لكن مرة مشيت وطلع صوت بالمكينه ورحت للورشه قالو يبيلها تفليش يعني نفس التوظيب واكلت اكثر من ألف وخمس مية ربال والقطع تجاري يعني أقل شي خل السيارة دقيقتين خاصة بالأجواء هاليومين
ابو علي

[أبو مجودي2]

كتالوج بعض السيارات الجديدة يقول يجب أن لا يتم الاحماء والسيارة في وضع اللاتعشيق ( يقصد واقفة ) وانما يجب ان يكون أثناء سير المركبة
بمعنى آخر شغل السيارة ثم اصبر شوي ثم عشق وامش ولا تسرع حتى تصير الحرارة في وضع الطبيعي .
أنا سيارتي برادو 2004 واسو هذا الشي

[هاوي الله]

بالنسبه لي أول مايتحرك مؤشر الحراره أمشي

[s3ed]

على حسب الجو بس تقريبا 3-5 دقايق
1-اهم شي لما اتشغل السيارة ماتعطيها بنزين لانة راس الشكمان يكون بارد ولما تعطي بنزين يتمدد الهوا البارد بسرعة وينكسر
2- امشي على قير السيارة اول كيلو وبعدين زيد سرعتك

[فارس عنيزه]

تبي نصيحت اخو شغل وخله لين يرتفع الامبير حق الحراره مكانه ومش مثل الامريكي ياصل النص مثل الياباني ياصل علا الخط وانت وسيارك

[المتهني]

والله اني اخلي سيارتي من 8 الى 10 دقائق وبد كذا امشي

[الضاري]

والله سؤال ممتاز

لكن الغريبه أني اشوف ناس ما يتركون المكينه تسخن

على طول يدقون سلف ويمشون ومع هذا سياراتهم لم تتعطل ولم يحدث لهم مشاكل ( مشاء الله )

اما بالنسبه لي أدوس على البنزين لين يتغير صوت المكينه وبعدين اتوكل على الله وامشي

[دسم الشوارب]

آآآخ .لاتقهروني . عندي ديمكس وبلشت به .البرد ومداراته من جهه ورخص البنزين من جهه
سقالله الددسن وايامه ..شغل وامش والسلامه
خلاصة القول: لااحد يشتري سيارات الديزل .والسلام

[أبو بدر333]

أعرف من بعض الميكانيكيين من يقول بأنك تمشي بالسيارة بدون تحمية لكن بدون دوس البنزين أي ببطء ، عند الحاجة فقط.
وهذا ما يدلني إلى أهمية التحمئة على الاقل 3 دقائق

[غالي]

من قال ان السيارات الالمانيه ماتتحمى؟؟
اخوي يملك سياره المانيه وموصينه الوكاله على التحميه اقل شيء 5 دقايق
وتخبرون ديرتنا حر بعد
اما عني شخصيا
ماامشي بالسياره الا لين شفت انبير الحراره فوق الشرطه وتوصل للربع
والسبب:
تحمية الزيت وارتفاعه بعد الوقفه لانه ينزل ولا يغطي البلوف
واكثر السيارات الي تسمعون صوتها كنها سيارات ديزل وهي بانزين السبب الرئيسي ان اصحابها مايحمونها
او يقاومون فيها ويشبون على مكينتها
والله اعلم
باختصار سيارتي علشان تلبي هالاحتياجات كلها تاخذ معي تقريبا 5 دقايق
والله الموفق

[القبقب]

رغم أني سمعت من ميكانيكي أنه مافى داعي للتسخين :no:
لازلت أسخن الموتر عشر دقائق وأحيانا لين يرتفع مؤشر الحرارة للربع .
من ألافضل تسخين السيارة خاصة في فصل الشتاء .

[حمد808]

افضل طريقة لتسخين السيارةوهي تمشي
عشان يحتمي الدفرنس والقير والمكينة جميع
مرةيذكرلى واحدمن العيال انة شغل السيارة لين ارتفع امبير الحرارةواسرع عليهاثم طلع صوت في الدفرنس

[أبرق دمعة]

والله موضوع يستاهل .. .. أنا من ناحيتي أحمي السيارة بحدود 4-5 دقايق ..

بعدين أمشي عليها من دون زيادة سرعة . . والله أعلم



http://www.mekshat.com/pix/upload/sign/images/mk39342.gif

[ك ه ك 777]

موضوع جميل وكل الشكر لصاحب الموضوع والمشاركين
انا كان معي سياره المانيه وقالي مهندس في ورشة ماي كار المرسيدس مايحتاج تسخن شغل وامش وصرت امشي علي كلامه ادق سلف وامشي مع العلم ان السياره اذا كانت بارده ماتعشق ثاني لين تسخن اذا كانت ساخنه تعشق ثاني وبعد فتره طلع صوت الصبابات وغيرت المكينه بقحشة دراهم وشريت سياره نفس نوعها بس اجد منها موديل وصرت الحين اخليها تسخن لين اسمع صوت المراوح وبعدها امشي علي هوني ويالله السلامه
واللي اعرفه قبل تجربتي واثبتته تجربتي .. لازم تشغل السياره وتخليها تسخن علي راحتها وبعدها تمشي علي هونك لين تصير السياره مستعده

*(اذا صار الادمي توه قايم من النوم لو مايتمغط ويتقلب ويسخن شوي علقت مفاصله فما بالك بكومت حديد صناعها بشر)

شكراً

[جرير الشاعر]

أنا أشغل وأصبر شوي ما تجي نصف دقيقة وبعدين أمشي بالهون

وأزيد السرعة شوي شوي


من سنين وما صار إلا الخير

[بركاني]

أخي الكريم أما نصيحتي لك فهي :

للسيارات التي قيرها عادي (5) دقايق كافيه جداً لان زيت القير لا يلزم تسخينه ويسخن قيرها بمجرد تحرك السيارة.

(أما بالنسبه)
لسيارات القير الأوتماتيك (10) دقايق مناسبه لتتأكد من تسخين زيت القير على أقل تقدير وذلك لمرور زيت القير عبر الراديتر للتسخينه.

أرجوا أن أكون قد قدمت ما ينفع إخواني المكشاتيين
وفقكم الله جميعاً

[بدوي جنوبي]

السلام عليكم :D

انا اخالفك يا اخ بركاني كون السيارة اتوماتيك او قير عادي :no2:

لا علاقة للقير في تسخين السياره


انا اشوف ناس كثير تبالغ في تحمية المحرك اعرف واحد يقول احمي السياره نص ساعه :no:

سيارتي 8 سلندر موديل قديم والله ثم والله ان ما اذكر حميت السياره في عز شتاء المنطقه الوسطي اكثر من دقيقتين والحمد لله المكينه زي الزبط وعلي فكرة مافي بلف حراره :j

لا صوت بلوف ولا نقص في الزيت ولا ولا ولا حتي بكره الصباح ...

واكثر الاوقات اشغل ودعستين علي كيفك وامشي :confused: بس اعاني من مشكله وهي ان السياره ما تمشي زين

لكن في شي مهم اذا ما عندك وقت تحمي السياره خلها دقيقه شغاله وبعدها امشي بشرط ما تتعدي اكثر من سرعة 60 او 80

حتي تشوف امبير الحراره ارتفع شوي بعدها وط رجلك :redcar:


بعدين يا اعزائي الكرام اكثر السيارات الجديده مصنوعه من الالمنيوم ومن مميزات الالمنيوم

انه يبرد بسرعه ويسخن بسرعه


البعض يقول

انت لاحظ لما تشغل السياره طبعا يكون ضغط الهواء واصل الي رقم 2 او 3 وينزل تدريجيا او بعد دعسه بسيطه للبنزيم تقل سرعة المحرك


انت احسبها يا ذكي سرعه المكينه علي رقم 2 * 1000 لفه في الدقيه = 2000 دروة في الدقيقه لما تترك السياره لمدة خمس دقائق يعني 5* 1000 = 5000 لفة في الدقيقه يعني بالله 5000 لفه ما تكفي للستخين

ان شاء الله تكون وضحت الفكره :director:



وتحياتي للجميع وبالتوفيق

[abadee]

السلام عليكم ورحمة الله وبركاته :-

حسب خبرتي وتجربتي الشخصية مشيت على السيارة قبل ثلاث سنوات بدون ما اسخن السيارة وكنت متأخر ودعست عليها والله على طول سمعت صوت البلوف وسألت مكنيكي قالي السبب عدم التسخي شرم البلوف عندك ويصر لها صرقعه 0
والنصيحه للجميع فيه جهاز انذار موجدود عند العليان في الغرابي ونوعيته ممتازه وعمليه حتى اذاكان عندك رموت وأمان يكفي انك تاخذه للتشغيل فقط ويشغل الموتر وانت داخل البيت وفي غرفة النوم اذا صحيت الصباح اضغطه وعلى بال ماتغسل وتلبس تكون سيارتك جاهزه والله الموفق

[بدوي جنوبي]

منتاز الجهاز اللي يشغل السياره عن بعد



بس ما انصح احد يركبه اللي عنده قير عادي امكن ينسي السياره في نمره واقرب جدااااار



تحياتي

[أبـو فـايـز]

ضروري التسخين
3-5 دقايق كافية
اذا ماسخنت احتمال يعلق معك بلف الثرموستات ولا يفتح المويه للمكينة واخرتها ترتفع الحرارة بعز البر وتاكل هوا

[يزيد_1977]

والله ياشباب محاكيكم كان يدرس في بريطانيا سنه وكنت ساكن مع شايب وعجوز

وكنت اشوفهم مايسخنون مواترهم ويوم شريت لي هناك موتر كنت اصخنه الصبح وانا رايح ادرس ومره سالت شايبنا هناك قال مايحتاج له تصخين وخبركم الانقليز حريصين مايحبون يصرفون دراهم على الفاضي وعلى فكره تراه مهندس ميكانيكي
هذا والله اعلم

[سهيل1]

أشكر الجميع على المرور والتفاعل

لكن سؤال للإخوة القائلين بضرورة التدفئة للمكينة
أين اهتمامكم بتدفئة القير والدفرنس والعكوس (( الأجزاء المتحركة الأخرى ))

ستتغير ثقافتي بدل ما كنت أشغل الموتر في حدود 10 دقائق وامشي بسرعة
إلى تشغيل لمدة 3 دقائق ثم 3 دقائق مشي دون سرعة


.

[ابوعزام]

انا سمعت ابو عدنان الجميع يقول الامريكي يكفيه 7 ثواني ـ يعني الين يرتفع الزيت ـ ثم امش على الابنص يعني من دون دوس على البنزين

لمسافة تحس ان السيارة تستطيع معها المشي بسرعة .

هذا ما سمعته انا من ابو عدنان شخصيا


والله اعلم بالصواب

[خيال 2007]

السلام عليكم ورحمة الله وبركاته ..

بالنسبة لي تسخين السيارة اقعد لين ينزل العداد تحت الواحد وبالأصح لين يصفي صوت السيارة ثم امشي ببطء لين يصير عداد الحرارة على الخط ثم اسرع او بالعربي ادعِس وإذا كنت رايح قاصد النفود والتطعيس يعني كشته اخلي عداد الحرارة فوق الخط بشووووي باااي .

[ابوشلاخ]

انا احمي موتري من 7 الي 10 دقائق

[أبو_خالد]

بالشتاء أقل شيء سبع دقايق

والا تقعد تكنكن السيارة ان مشيت وهي بادة

[خيال 2007]

وعلى فكرة الالماني ما يبي له تسخين لأن عداد الضغط تلاحظة واكثر شي في مرسيدس شبح تلقاه 10 20 30 40 مهب 1 2 3 4

يعني ان السيارة اول ما تشتغل يكون الضغط على 20 وتكون المكينة تلف 20.000 لفه يعني 20 × 1000 = 20000 لفه في الدقيقه ...

[بركاني]

[QUOTE=بدوي جنوبي]السلام عليكم :D

انا اخالفك يا اخ بركاني كون السيارة اتوماتيك او قير عادي :no2:

لا علاقة للقير في تسخين السياره


أشكرك على تعليقك بس الظاهر إنك مستعجل شوي .... إقرأ بتمعن لكي تفهم ما كتبت أنا

أنا قلت :
للسيارات القير الأوتماتيك (10) دقايق مناسبه لتتأكد من تسخين زيت القير على أقل تقدير وذلك لمرور زيت القير عبر الراديتر للتسخينه.

ودمت سالماً

[بدوي جنوبي]

طيب انا فاهم قصدك اخوي بركاني

انا اقصد من كلامي ان القير ما يحتاج انه يسخن بالعكس كل ما كان زيت القير بارد كل ما كان افضل في الاداء

بس مو يعني كلامي انو يكون بارد مررره


تحياتي لك وتعجبني اختلاف وجهات النظر

بالتوفيق

[محسن اليامي]

أنا عندي باترول2003 وحركت مرة وهو بااااارد بعدها القير علق عندي رحت للشركه قالولي لازم يسخن السيارة علشان القير يسخن شوي طبعا القير أوتوماتيك
(( كلام أخوي بركاني 100 % ))