عيوب الفتك بكل صراحة

[طيرك]

السلام عليكم ورحمه الله وبركاته
الشهر مبارك عليكم
والله يتقبل منا ومنكم صالح الاعمال امين
ياخوان .. انا ناوي لي ان شاء الله على فتك 2015
رفارف سود - تماتيك - بدون ثلاجة - بدون فتحة - فيه دفلك
ب 149 الف
هل الموتر يتحمل مثل السيارات اليابانيه الاخرى
يعني هو صبور وخدوم ؟
لاني فيه واحد من الشباب يقول لي تفكه وكالة سنتين يبدا يطلب ..
فما ادري هل الموتر راعي غدرة
اخشى اشريه ثم انكب معه !
انا ما افكر بالبيع يعني ابتخذ استخدام
ورايكم بكل صراحة وشفافيه
جزاكم الله خير

[ابوحسام9]

عليكم السلام
الله يكتبلك الي فيه الخير والله انا ماجربته لاكن شكله
حلو خذ قير عادي اذا انت راعي بر

[النو]

عليكم السلام
إذا تقصد الباترول الفتك ف كلام رفيقك جانب الصواب
النيسان وخص الفتك سيارة لك ولزمن .عمليه وقوية .
ولكن حسب إستخدامك اذا بتحافظ على السيارة باذن الله خمس سنوات بس زيت وكفرات
انا معي فتك فل كامل 2014 والحمدلله ما شفت منة الا كل خير
كلاً له وجهة نظر وانت صاحب القرار
إستخر وإستشر وتوكل على الله

[الوعب]

السلام عليكم

تقبل الله طاعاتكم ،،، بنالنسبه لتحمل السياره و قله الخرابات ،، فالتيوتا اصبر من النيسان بقليل
النيسان الفتك خصوصا التماتيك انا جربته سنوات طويله و اعرف استخدامه و عيوبه .

اذا كنت ناوي عليه ،، و استخدامك استخدام معتدل (يعني تحن السياره) فا توكل على الله ولكن ،، بشرط
من اول يوم تشري السياره فيه اتبع ارشادات الصيانه الدوريه ،، يعني تبديل زيوت المحركات في مواعيدها تشييك على السياره في الوكاله عند الـ 40 الف و الـ 80 الف
بهذي الطريقه النيسان راح يكون افضل سياره في العالم .
احذرك من الترهيم في النيسان خصوصا في الامور الكهربائيه فهو حساس من تقطيع الوايرات و اعاده تشبيكها .
ختاما النيسان نهائيا لاتركب عليه تواير بالون .

هذا تعليقي و انا من مستخدمي النيسان بجميع موديلاته .
وبالتوفيق ان شاءالله

[الكدن1]

الفتك سيارة مريحةلكن فيها ضيق من الداخل
سيارة الطرد والمقناص
لا انصحك بالشراء الا اذا كانت قيادتك باعتدال
بالنسبة للخرابات تطلع مع راعي الجور على السيارة وخاصة في الرمال
اما القيادة المعتدلة فلا خرابات وانت تحكمك حاجاتك للسيارة
ومع الصيانة الدورية تسلم من الاعطال
والسيارات الجديدة زادة راحتها على حساب الجودة

[hail_ksa]

مشكلة الناس يآخذ الموتر جديد ولا يحافظ عليه ويقول ليش تكثر خراباته !!

إذا بتحافظ على صيانته فأبشر بموتر يكد ويمد .. والباترول موتر راحة وقوة وعزم ونشاط ويطربك وين ما رحت

أنصحك تحافظ على الصيانة الدورية بوقتها .. وما تآخذ إلا الزيت الأصلي أو تروح الوكيل أو محلات ون ستوب
وأنصحك تشيك على زيت الدفرنسات والقير كل 40 ألف كيلو إذا كان قير عادي
مع تغيير (الراديتر وبلف الحرارة أصلي) كل 80 ألف كيلو أو كل 100 ألف كيلو بالكثير
وإذا كان قير تماتيك لازم تغير زيت القير والفلتر كل 80 ألف كيلو مع تركيب مبرد خارجي

وبكذا بإذن الله إنسى الخرابات والحرارة

[aklubiam]

والله اذا بتاخذ جديد وانت هاوي شكله خذ وتوكل على الله سياره حلوه وقويه ومبروك مقدما.

[الخالدي999]

والله على سيارات هالوقت اعتبره سلعه نادره وثمينه مكينه طوليه العزم فيها عالي دفرنس امامي قليل الاعطال وسعر مغري للاقتنا والله يكتب لك الصالح يارب

[جنيفاوي 503]

السلام عليكم ورحمة الله وبركاته
اخوي انا كنت متردد بين شاص تويوتا وشاص نيسان فتك وكل ماسالت واحد قال يقولون ان الفتك حساس وخرابات و يتهربد بسرعه ولايمسك سعره مثل التويوتا والتويوتا اصبر وتلقاه ماقد ركب فتك حتا والله اني كرهت الفتك كره وصرت ما اشوف الا التويوتا احسن موتر ويوم من الايام ينعرض على شاص نيسان فتك نظيف وتوكلت على الله وشريته ولا شاورت احد والحمد لله توفقت في الموتر والموتر قيره ودفرنسه ومكينته اقوى من التويوتا ومكيفه ابرد وراسي في الخط ومتماسك وحتا الوالد الله يطول في عمره ما يعجبه الا الجمس السييرا ساقه واعجبه وسعره مناسب وعند البيع مايطيح فيه واجد مقارنه بسعره جديد مهب مثل الشاص تويوتا ٢٠١٢ بريمي فل كامل سعره على وقته ب ١٤٠ الف والحين النظيف ماتعدا ممشاه الميه بتسعين الف او اقل طاح فيه حول الخمسين الف ويجيك واحد التويوتا شيك الشيك من ٢٠٠٩ وتحت وترا حنا في هالديره مايحكمنا الا كلام الناس وكل موتر فيه ميزايا وعيوب والفتك موتر ماعليه كلام بس اهم شي استخدامك انت للسيارة واهم شي استخر ربك قبل لاتشري وان شاء الله انك احسنت الاختيار والله يكتب لك اللي فيه الخير

[طيرك]

لاهنتم يا شباب واحد واحد
وانا حريص ع صيانه السيارة
واستخدامي بالشتاء بر والصيف عادي خطوط مدن ومشكل
لاكن يالوعب ليه البوالين تاثر ع الفتك ؟
يعطيكم العافيه

[شغب007]

انا اخذت واحد نفس مطلوبك لي حدود شهر والله يعطينن خيره ويكفينن شره

ماشفت منه الا كل خير ولله الحمد راحه وعزم تطربك واي سياره مهما كانت بدون عناية بتخرب

والله يكتبلك الخير واذا شريته الله يعطيك خيره ويكفيك شره

[المميـز]

:

توكل على الله وخذه وحافط عليه ويبي يعيش معك بإذن الله
موتر ياباني غني عن التعريف
الان السيارات الكوريع تحافظ عليها تعيش معك خمس سنوات من غير اي طلب
هي على الاستخدام

:

[ابوخلف..]

عليكم السلام ورحمة الله

موتر حلو وقوي ولا اشوف فيه عيب ماشاءالله
بر وسفر ممتاز
الله يبارك لك فيه مقدما

[الوعب]

لاهنتم يا شباب واحد واحد
وانا حريص ع صيانه السيارة
واستخدامي بالشتاء بر والصيف عادي خطوط مدن ومشكل
لاكن يالوعب ليه البوالين تاثر ع الفتك ؟
يعطيكم العافيه

بكل حياد ،، تماسك بدي التويوتا افضل بقليل من تماسك يدي النيسان .. البالون في مطابات الازفلت طبعا هواه رايك يكون تقريبا 35 فا البالون مع هذا الهوى يهز السياره وحتى في البر المطبات الصغيره هذي تلخلخ بدي النيسان و بتبدا تسمع قرقعه بالسياره و هذا الشي مايصير مع التيوتا الا اذا استخدام الشخص عنيف .
هذي وحده ،، و الثانيه الله يسلمك ان الرود الامامي .. ما عرف بالسعوديه ايش تسميته الصحيحه ،، ولكن الي يركب فيه مساعد الدركسون ،، هذا في النيسان مع البوالين ماينفع ،، بعد ماتركب البوالين ب 10 الاف كيلو تبدا عندك رجه في الدركسون بسبب ان الربلات الي في الطراف هذا العمود بدت تتوسع و تخترب .

من الاخر انسب تواير للنيسان من تجربه طويله هي الميشلان ltx و الدنلوب

و البرجستون هو ابيخ تاير تركبه على النيسان مع انه ماينزل من الشركه جديد الا و عليه برجستون ،، ولكنها وعره جدا و غير عمليه .

خذ و توكل على الله و احشم الموتر و حافظ على الصيانه و ان شاءالله مايجيك الا كل علم طيب

[طيرك]

لاهنتم يا شباب

تقصد كراسي المساعد

[abohmad]

سلام عليكم ورحمة الله وبركاته اخي العزيز الوعب النيسان يجي توايرة من اليابان بريجستون وذلك لسبب وجيه وهو قوة تحمل التاير في الارض الوعرة ويتحمل الجور ودمت بخير انت واخواني الموجودين

[أبومحمدالشهري]

خذ فتك وبإذن الله ماتندم على اللحظه اللي شريته فيه

ولعلمك أي سيارة تحافظ عليها تعيش معك أيا كانت صناعتها والعكس صحيح بالعنف على السيارة

والله ييسر لك مافيه الخير

[سقم المعادي 1]

من ناحيه اعطال فالباترول يعتبر قليل اعطاله

و ان حصل به اعطال فهي معروفة و فيه ناس متمرسين باصلاحها

مافيه موتر مايسلم من الاعطال خصوصاً مواتر البر مع الطربقة الواجدة لابد من القرقعة او عطل بسيط

و بما ان الموتر دارج بين الناس فالامر هين بتكون القطع متوفرة و الفنيين المتخصصين بالموتر متوفرين بكثره لذلك هالشيء يهون الامر قليلاً

على عكس لو كان الموتر قليل الانتشار هنا المشكلة

[الجنوبيييي]

عالببركه مقدما مافتيك فيه لاني ماقد استخدمته لكن سمعة النيسان سابقته في كل مكان والله يكتبلك اللي فيه الخير

[مكسر الشداد]

20 سنه مع الباترول
الان فتك 2008
هذه الفئه من الباترول @ تحتاج@ حتى تسلك معك التالي:
استعمال باعتدال يعني عدم مهابد بالصحرى بسرعات عاليه وبعدين الموتر قرقع بدى يحذف بدى يرج بد بدا،،،،
الواضبه على تغيير زيت القير كل 60 الف عند @ون ستوب@ وخذ الزيت من الوكاله
تغيير طبة الاديتر بعد 100 الف او اقل اذا شفت تنديه او نقص بالماء
او بدون ذلك احتياط يعني بعد مرور خمس سنوات حتى لاينكسر فجاءه
ويروح الراس مع الحراره
بالضافه الى الامور البديهيه من محافضه على تغيير الفلاتر والزيت في وقتها المعروف ،،، تمنياتنا لك بالتوفيق

[ابو عبدالإله]

انا معي فتك ٢٠٠٩ سواقتي دفشه لكني اواضب على صيانة السيارة
وتغيير زيوتها والحمدلله ماشيه الامور معي تمام . اعيب عليه الطبلون يتنقب
تقول به جدري وباب الراكب في بعض المواتر يفرط مايقفل مع باقي الابواب
لازم تروح وتقفله بالمفتاح وهذي عيوب مصنعيه ، ومثل ما قالوا الشباب اي سيارة
بتهربد بها في البر حتى اللاند كروزر وماتصينها بيتهربد بديها ، واللي يقول لا ،
يعطيني موتره اللاند وبسوقه سواقتي المعتاده وبنشوف . الفتك موتر يطربك في البر
لذلك يجيه جور بعكس اللاند انا اشوف اغلب الناس يهمز عليه ويحن عليه دافع افاليس
الدنيا فيه ولد عمي موتره لاند كروزر وسواقته جنون في البر وهذا موتره متهربد
ويحتاج صيانة ويصينه ويرجع كما كان .

[بونهيان]

وعليكم السلام ورحمة الله وبركاته
اذا كان كلامك على نيسان سفاري وليس بطل الدروب
أولا بالنسبة للسعر المعروض عليك غالي

أنا شريت الفتك 2014 سفاري فل " فتحة دفلوك مثبت سرعة ثلاجة سي دي مكيفين " بـ 150 ألف درهم اماراتي

أما بالنسبة للفتك فمميزاته أكثر من أن تحصى لكن أخبرك ايش اللي رغبني فيه وانا كنت أشد كرها للنيسان
1) سعره رخيص مقارنة بسيارات الدفع الرباعي
2) الدبل ما زال يدوي وهذا مهم جدا عندي
3) وجود دفرنس أمامي وليس اكسل وهذا أكثر قوة وأمانا وعملي
4) قوة المكينة
6) لاجل عين تكرم مدينة فهي رغبة العيال ولبيتها :good2:
7) البدي كما هو لم ينفخ ويعرض ويمدد


أما عيوبه ولا اراها عيوب :
1) أسود من الداخل
2) مقاعد السفاري اخر فئة
3) لا يوجد مقياس درجة حرارة الجو
4) لايوجد مأخذ الولاعة في الخلف
5) الثلاجة صغيرة نوعا ما
6) يبغي له لمسات داخلية وتحسين

[مكسر الشداد]

20 سنه مع الباترول
الان فتك 2008
هذه الفئه من الباترول @ تحتاج@ حتى تسلك معك التالي:
استعمال باعتدال يعني عدم مهابد بالصحرى بسرعات عاليه وبعدين الموتر قرقع بدى يحذف بدى يرج بد بدا،،،،
الواضبه على تغيير زيت القير كل 60 الف عند @ون ستوب@ وخذ الزيت من الوكاله
تغيير طبة الاديتر بعد 100 الف او اقل اذا شفت تنديه او نقص بالماء
او بدون ذلك احتياط يعني بعد مرور خمس سنوات حتى لاينكسر فجاءه
ويروح الراس مع الحراره
بالضافه الى الامور البديهيه من محافضه على تغيير الفلاتر والزيت في وقتها المعروف ،،، تمنياتنا لك بالتوفيق

ابشرك رحت اشيك على الاديتر لقت الطبه العلويه فيها تهريب
حقيقه مشكلة هالموتر الحرااااااارررره