أغسل المواعين وإلا أتركهن للمعزبة ..؟؟

[سماوي]

أغسل المواعين وإلا أتركهن للمعزبة ..؟؟
مشكلتي مع المواعين ( الأواني ) الغير نظيفة يا أخواني ودي آخذ رايكم في المواعين المتسخة في آخر الكشتة ، حيث أن بعض الناس عندما ينوي الرجوع من الكشتة يترك المواعين ( الأواني ) المتسخة ولا ينظفها ويقول أتركها في البيت أقل تكلفة وتوفير للوقت والماء و...... ، وبعضهم يقول أنا أغسلها حتى لا أضطر لتنظيمها مرة أخرى والمعزبة عندها مواعين البيت وتكفيها.:D :D
فما أدري يالربع وش رايكم ؟؟؟؟
أعطوني حل .... الله لا يهينكم .......
سماوي

[قتال]

السلام عليكم ورحمة الله وبركاته ،،

أخوي سماوي .. دائماً تتفرد في مواضيع بسيطة وحساسة في نفس الوقت .. الله يعطيك العافية ..

بالنسبة لي في كل الحالات المواعين تنغسل أول ما تاصل البيت .. أما بخصوص غسيلها في البر إذا لم تغسل جيداً غسلت غسل على الماشي حتى لا تطلع ريحة في السيارة وكذلك للمحافظة على نظافة الموتر ..

بس أنت علمنا وش تسويبها .. شكلك مقروص منها :D :D :D

[أيمن]

أخوي العزيز ..
والله إن الغسيل من أكلف الأمور في البر- سابقا - بالنسبة لي .. بس ما قد فكرت إني أرجئها للبيت ولا تخطر على بالي .. سواء الكشتة الطويلة أو حتى القصيرة ..
لكن وبعد ما إهتديت لطريقة حلوة وهي أن أغسلها بعد ما أنتهي منها على طول .. وهذا أسلم حل ..
حيث إذا انتهيت من القهوة قلت بها على الطاير وركيتها تنشف هي والفناجيل وكذا الشاهي أو أي قدر أستخدمه..
وأي أمر من العزبة .. سكين، ملعقة .. إحتجت لها بمجرد الانتهاء منها أقول بها وأرجعها مكانها .. وعلى هذا أتفق أنا ومن معي ..
بهذا الشيء ماجعلت الأمور تتراكم علي ولا أتفاجأ بمواعين تاصل التندة .. :)

من الأمور التي سهلت علي أمر الغسيل هو وضع سطل متوسط الحجم مثل حق التمر، بمجرد ما آصل المكان اللي أبستخدم العزبة فيه أملاه موية وأركيه حول الضو، ومغير "أسلقط" يعني "أذب" -"أحلت" -"أنطل" :) (اللي يجي) في هالسطل من بيالات وفناجيل وملاعق - بشرط ماتكون فيه زيت أوزفرة - وإن بغيت شي منها مرة ثانية فركتها في الموية واستخدمتها.. ولا في النهاية غسلتهن جميع بالموية الدافية؛ لأنها حول الضو وركبتهن بالعزبة ..

أدري إني طولت وهذري واجد لكن .. ودي أفيدكم بأن الحل الأسلم للمواعين هو التغسيل الفوري ..
ليكن هذا شعارك :)

[al-nashmi]

اخواني اعضاء وزوار مكشات

السلام عليكم......
انا اوافق اخونا ايمن بكلامه حول غسيل اواني البر وخاصه القدور وما ينتج عنها من روايح الطبخ خاصه داخل السيارات المصندقه( الصوالين)

وبلاش كسل وتسدح بعد ضرب الكبسه وبيالت الشاهي الخادر



وطبقوا الحكه اللي تقول؟؟؟؟؟؟؟؟؟؟؟؟؟؟؟؟؟





(( اغسل قدرك اول باول حتى يسمحلك تطلع للبر وتبقى الحبيب الاول)):D :D

[الشيخ]

وانت الصادق يا النشمي
غسل قدورك أول بأول
الظاهر الشباب كلهم مقروصين :D :D

[سماوي]

شكراً يا أخواني ( كل باسمه )
المشكلة هي أننا أحياناً نحتاج الماء ويصر البعض على التغسيل ، أو يضايقنا الوقت فلا يرضون إلا أن نغسلها . مع أنني مؤمن بوجهة النظر المخالفة .
مع أن البعض يرجع بها ويعطيها للشغالة وتحوفهن حوف وهو يضمن غسلهن ولا يكلفه شي .
والله يرعاكم
سماوي

[الشيخ]

انا معاك يا السماوي
لكن من وجهة نظري لو كنت ناوي تستعمل المواعين مرة ثانية تغسل اول بأول ويستحسن ان الي يغسله يكون جلف حبتين ويحافظ على الماي اما اذا مالك نية ترجع لهم مثلا يكون قدر كبير ولا صحن كبير وما تحتاجه في باقي الكشته اغسله اي كلام بس لا تطلع منه ريحة ولا يجمع عليك الحشرات ولما ترجع بالسلامة يتنظف وينغسل في البيت ولا اعتقد المعزبة تخليك ترجع من البر وما تامر بتنظيف العزبة بالكامل سواء نظيفة كانت ام لأ
ولا انت شرايك
:D

[شاهد عيان]

أنا أقترح بأن يتم تغسيلها بالبر ... وتتم بمعاونة جميع الزملاء دون إحتكارها على شخص واحد ... فهذه أفضل طريقة وأسرع .

[أيمن]

أخوي "شاهد عيان" ..
لكن إذا صار بعض من تطلع معه "تنبلي" .. ويا كثرهم :(

[البلشان]

ترى مافيها شيء اذا تكرمت وغسلتهن( بدل التايد تلوفهن بالتراب)


ان ضاق بالي جبت ضبة اجرومي **ودنيت مني دلتين ومصفاه
ومحماسة تركى على النار دومي**عقب اللهب من صافي الجمر يصلاه
واحمس من اللي ماشراه الغشومي**نذ العرق باركانها كنه اياه

[laith]

اقول اغسلهن الله لايهينك..:mad:

اعتبر المساله تمرين...مافيها شيء:D :D :D :D

اما الطريقه حاول تجعل اكبر ماعون لتجميع ماء الغسيل المستخدم..وبعدين تغسل كل ماعون من هالغسيل..ومايبقى عليك الا الشطف الاخير..

ليث

[أيمن]

( لقد تم إضافة هذا الموضوع إلى المواضيع المميزة والشيقة في هذه الخيمة (http://www.mekshat.com/vb/showthread.php?s=&threadid=8667) )
مع الشكر للجميع ،،
http://www.mekshat.com/pix/upload/images/flow12.gif

مشرف الخيمة

[سماوي]

شكرا أوي أوي أوي
يا أحسن مشرف ... إنت مشرف أد الدنيا " مصري على غفلة":D :D :D

[السحقان]

الأخوه الأعزاء أصحاب الكشتات المتكرره

لابدمن غسل (المواعين أول بأول)جلدي جلدي
للتخلص من السمن بسرعة (أفرك القدر أوالصحن با لرمل أوالتراب)
أذاأحرق القدر(ربصه شوي بماء حار)ولا مانع من وضعه شوي على النار
يكون الغسيل كل وجبة على مجموعة معينة(هذا نظام الكشتات)
اللي مايطبخ يغسل والعكس صحيح
الفناجيل يوضع لها أناء خاص تجمع به وتغسل مباشره وتنشف

ودايم أغسل الأواني أول بأول وترك العجز عنك والرخامة والا وشوله تكشت
:D

أما المعزبة المسكينة تغيب عنها وتستانس أنت وهي بالبيت:mad:

واخر شي ترجع بمواعين وصخه هذا حقه من الكشتة:heart:

تراه بجنبي يوم أكتب;)

[أبو فراس]

السلام عليكم ورحمة الله وبركاته

انا عندي ام فراس موسوسة شوي ... لو اني مغسل المواعين بصابون فيري لازم تغسلهن مرة ثانية ولذلك بعض الاحيان ما انزل العزبة اذا كانت نظيفة حتى لا اتعبه

ولكن يازين الغسيل على طول

ولا تؤجل عمل اليوم الى الغد

[العنكبوت]

موضوع ينزع من همه

دايم لا جيت ابكشت ااخذ معي صابون وليفه بزعمي بغسل كل

شي لا قضيت لاكن ,,, للاسف بعد ضرب النثريه تجين حاله

خثران اشك انها تدخل بحكم المفترات والمسكرات وانسدح

واقعد اهوجس وش الله باليين بهالطبخ لوني ضاربن شابوره

والا كليجا موب ابرك !! واهون عن الغسيل وبالاخير صرت

ااخذ معي صندوق فاضي احط به كل شي وصخ ياني اخليهن

للبيت والا لا نشطت ,, والحمد لله الوالده ماتقصر خصوصا

انها تستانس لاجبت القدور وصخات تقعد تفك شفرات بقايا

الاكل ,, انتم طابخين كذا وكذا ومكثرين زيت ومقللين ما و و

ماقول الا الله يكفينا شر الكسل

تحيتي

[راع الاولة]

السلام عليكم

ياخو خذ معك عامل يشيل الاغرض ويغسل الصحون وافتك وكلها يومية . اعرف واحد لاطلع المقناص
يأخذ عامل يشيل البندق واذا صاد صيدة خبرك مشوار بم خمس قالة روح جيبها وكل شي بحقة طبعاً.

[عبد العزيز العجاجي]

الأصل كُتب بواسطة راع الاولة
السلام عليكم

ياخو خذ معك عامل يشيل الاغرض ويغسل الصحون وافتك وكلها يومية . اعرف واحد لاطلع المقناص
يأخذ عامل يشيل البندق واذا صاد صيدة خبرك مشوار بم خمس قالة روح جيبها وكل شي بحقة طبعاً.

[جنون الليل]

لوووووووووووووووووووووول يااااااااااااااااااشين حوستكم وأنتم راجعين من الكشتات
تجيب الهم حتى وأنتم جايبين مواعينكم نظيفة كيف أجل لو تجيبونها مو مغسولة؟؟؟
مع إنو فيه خدامة تنظف بس ولو يكفي التراب اللي تجيبونه معكم

[راس الرعيلة]

أخوي ((العنكبوت ))

أضحكتني أضحك الله سنك

أجل مسكرات ومفترات
((خخخخخخخخ))

عز الله أنك جبتها

كل شي ولا تلحقها بهولستن بعد
((خخخخخخخ))

عز الله كملت

.......

((الله يخلي لك والدتك ولو ريحتها كان أحسن لك))

[صبي غلباء]

بعد السلام على الجميع
اقول ارجع وهن ماغسلن وتغسلهن هي ورجله فوق رقبتي اسف رقبته:::d
والله موضوع حساس المشكله بالقدور اما الباقي يهون يعني ظربت الكبسه وبعده نص لتر لبن الخبراء بيصير فقدان للذاكره :::d الله يجزاهم خير اللي طلعووو الجارمن ولا بدونه والله من الضياع حتى الخط ماله سنع
لكن زي ماقالو الشباب غسيل على السريع عن الريحه وبالبيت الشكوى لله نتعاون عليهن انا ويها
وشكرا

[خالد777]

هههه
خل المعزبة تجي:D
واحلق شنبي اذا طلعت للبر الا كان قهوة عصرة والا مغربية


الصراحة حسب الماء
وكمية القدور و حاجة التنظيف
وربعي اذا تعاونوا

[رأس الزعامه]

يا حبيبي إذا ما نظفتها في البر أعتبر نفسك ما كشت

[آمري يا كامري]

المهم أن يكون أهل الكشته متكاتفين وتوزع المهام بينهم هذا عليه الطبخ وهذا عليه ينصب الخيمه وهذا عليه غسل المواعين بعد إنقضاء الرحله وكما قيل قوم تعاونوا ماذلوا

[abu.bandr]

اخر واحد يقوم يغسل الصحن والقدر ( معقدتني هالسالفه)

[سوبر152]

دايم أغسل الأواني أول بأول وترك العجز عنك والرخامة والا وشوله تكشت
:d

[بوسعود 180]

انا بالنسبه لي فالبر اغسل المواعين سريع سريع

واغسلها مره ثانيه فالبيت

مب كل شي على الحريم كفايه ان بعضهم شايله البيت كله على راسها

وبعضهم تنام وتاكل

[راعي البخاخ]

ههههههههههههههههههههههههههههههههههه موضوع فله على كيفك
والله يابعض المرات ,انها تحدك الامور انك ماتغسلهن الا بالبيت ,بالنسبه لي
انا من الناس الي ماحب اكثر من الماء معي لارحت للبر, لأني مااحب اسرف بالماء
بس اللهم اجيب لي( سطيل مويه حق الفناجيل والكاسات ,ولابقى منه شىء غسلنا منه الماوعين<<<<<<<<<<< الورقه الرابحه اخررررر الحلول بعد الجركل )
لو مويه بس علشان ريحة الطبخ ,وبالبيت وانت راجع هههههههههههه مر المحطه واشتر
فيري ,وخل الشغاله تفركهن فرك لك.
الله يجزاك خير

[الأجودي]

غسلهن عقب ماتقضي متغدي او متعشي يعتبر شي مفيد
والله اغسلهن وانا اضحك واخلي ايدي كما الافغان تعرك الدزدر عرك وبدقايق يصير لك كما جنط الباترول الجديد

[سليمان 10]

انا اقول اي شي يتعلق في البر والكشتان انت مسؤل عنها وتنضيفها وترتيبها اول باول ولاتؤجل عمل اليوم الى الغد 0والزوجه جزاها الله كل خير يكفي انها متحملة البيت باكمله وزياده على ذلك الابناء ومجاهدتهم الله يهديهم وجلوسها لوحدها ليوم او اكثر ومع ذلك نقول نترك الاواني المتسخه لتنضفها الزوجه 0ارحموا من في الارض يرحمكم من في السماء000

[سوبر VTC]

اما انا:D و اعوذ بالله من كلمت انا
ما رتاح نفسيا و لا اقدر احرك من مكاني
لمان اغسل كل شي:D حتى الموتر:j
و معي مكنسه صغيره او (عرجد):D :p
انظف التلبيسة اللي ورى من رمل و غيره
همن اركب العزبه و الفرشات و كل شي
طبعا الفناجيل و البيلات اخليهن ينشفن
اما القدور و البريقات بعد الغسل اشب على الدافور
لا صرت مستعجل و انشفهن على الضوء
لانه اي بريق او قدر لا جيت بعد كم يوم تصلح شاهي و الا قهوة
و الا بغيت القدر تحصل و انتم بكرامه ريحه
شينه بسبب الماء المتبقي تقل (غربه):looney:
تحياتي

[جمعان 22]

اذا ما غسلتها.... بيصعب غسيلها بعد ان يجف الاكل في القدور

اغسلها وترتاح نفسيا :)

[المغرز]

انا المغرز اقول احلى مافي طلعات البر الطبخ وتنظيف المعاميل والقدور والي مهوب شقردي لايطلع للبر والى يتذمر يجلس عند حريمته بين اربع جدران ويقول يم فلان جيبي القهوه والشاههي ويم فلان جيبي ودي وريح نفسك من تذمرك للمواعين ودمتم سالمين

[وسيع البنايد]

موضوع ممتاز

ان كان وراي طبخ في البر فلازم علي اغسلها

اما اذا كنت بامشي للبيت فلا والله خلها
(الضمير يعود للمواعين) للخدامه

تطقطق عليها وترتب العزبه

[اسير الغضا]

انا عزوبي وبعز شبابي وما اغسل المواعين الا بالبييييييييييييييت

[فل اوبشن]

أنا اذا كان العشاء الاخير وبنرجع تخنقني العبره ودي ارمي المواعين اتعيجز اغسلها ..

[القطاوي 2008]

أنا أقترح بأن يتم تغسيلها بالبر ... وعن نفسي ما اذكر اني خليت أحد يمسكها لأن النظافة شئ مشروط عندي

[سوبر VTC]

أنا أقترح بأن يتم تغسيلها بالبر ... وعن نفسي ما اذكر اني خليت أحد يمسكها لأن النظافة شئ مشروط عندي


انت:good:
لاحد يقرب عزبتي عند التغسيل:mad: :mad:
و الا كسرت يده :D

[سيف الظفير]

اذا مطول بالبر اكيد تغسل بعد الانتهاء من الاكل مباشـرة او اذا انت بترجع للبيت في نفس اليوم تغسلها الحرمة او الخدم