مكيف صحراوي لطلعات الصيف على الطاقة الشمسية

[نجم سهيل]

حيا اللة كل باسمة.

اخوكم نجم سهيل مهندس ميكانيكي تخصص طاقة شمسية.

بسبب الجوى الحار في الصيف, اقترح على الي صامل يطلع للبر في الصيف ياخذ معة مكيف صحراوي اصغر مقاس موجود في السوق (80 وات استهلاك كهرب). لتشغيل هذا المكيف تحتاج لوحين طاقة شمسية قدرة 75 وات مع بطارية 150 امبير وشوية اسلاك ومنضم شحن.

وجة الألواح للشمال وشبك الدعوى وشغل المكيف. تحتاج برميل جرانيت فاضي تحط فية موية للمكيف.

الشغلة كلها ممكن تكلف حدود 3000 ريال, لكنها لك وللزمن.

طبعاً تحتاج موتر صحن علشان تقدر تشيل هالاغراض.

ابا سوي موضوع متكامل مع الرسومات ومكونات النظام وصور لة ومن وين نحصل على القطع المكونة للنظام, بس تكفون عطوني وقت شوي.

وسلامي لكم جميعاً.

[miokly]

السلام عليكم ورحمه الله وبركاته

اسعدتنى جدا بمشاركتك ياعزيزى الله يسلمك والله انى محتاج لمثل هالاختراع على العموم طلعت للبر هالخميس الفائت والله ماجت الساعه 10 الا اخوك منحاش تقول يطرده ذئب :D :D

وبعدين ودى تقول لى وين نلقى هالصفائح الشمسيه وين تباع فيه ولك منى جزيل الشكر والتقدير
ونحن فى انتظارردك

ولك اطيب تحياتى:rolleyes: :rolleyes:

[راعي الشاص]

هلا والله بنجم سهيل



كفو والله هذي الاختراعات :)

[فتى البراري]

أشكرك على هالمشاركة الطيبة..
وهذي هي المواضيع اللي نحتاجه بالبر..
وياليت..
بما انك تبي تكتب موضوع بالصور والرسوم البيانية..
تضيف لهن وتكتب لنا موضوع ثاني..
عن الثلاجات خاصة ثلاجات الغاز ..
واذا كان موجود ثلاجات بالطاقة الشمسية

وارجو اني ما اكون ثقلت عليك..
ولكن يا اخوي نجم سهيل من النادر نجد مهندس ميكانيكي طاقة شمسية و سعودي..
ويحب الكشتات..;)

أخوك..
نهاش فتى البـــــ ثقيل ــــــــــــراري والقفار;)

[مساعد]

وين ما خذيت المكيف بهاك الغار اللي انت خابره وفكيتنا من الحر....

على العموم صرنا متعودين على الحر ولكن مشكور على الفكرة الجيده بس تراي ما فهمت وشلون اسويها ..

[محب الشمال]

ما شاء الله تبارك الله عليك
وان شاء الله نشوف اختراعك الطيب والكثير من الاختراعات الاخرى

والله يحفظك

[seloo]

ياحبيبي كل الدعوة مكيف صحراوي أو حتى فريون وشرائح شمسية على قد قوة المكيف وبطاريات جافة خاصة بالطاقة الشمسية ومنظم وأسلاك وكلها متوفرة في السوق. في جدة عدة محلات تبيع هذه الأدوات وليس الموضوع صعبا فقط قرار ورغبة مع الشكر الوافر لصاحب الموضوع الباش مهندس.
بس الأسعار اليومين دول مرتفعة شويه يعني الشريحة من 1500 ريال أصبحت بـ 2500 ريال وكذلك المنظم ومع الأسف الصيني أصبح بسعر الأوروبي . والأوروبي سعره طار في السما والله يدبرها للي ما عنده قريشات واللي عنده يدف اللي ماعنده من باب التعاون ( ها ها ها ) صبحكم الله بالخيرجميعاً دمتم في رعاية الله وخاصة حبيبنا المهندس.

[أبو بندر 2005]

المهندس نجم سهيل بارك الله فيك على هالموضوع, لكن المكيف الي ذكرته وين يباع فيه؟ وكم سعره وهل فيه مقاسات؟

[المشكل]

يالسلام عليك طيب المحولات الي في السوق ماتنفع

[إعصار]

والله وانا اخوك ..



مع احترامي الشديد ..



الا مهوب طالع الا في ذا الحر بها الشغلة .. أحسن له يجلس في بيتهم ..




وياربي لك الحمد مكيفات وبراد ..
والي صامل ..
يشوف الوقت الزين ..
يعني من بعد الفجر الى الساعة 10او 9 ..


او من الساعة 5 العصر الى لفجر لو تبي ..




والله يعجل بالشتاء ويرزقنا بمطر وربيع يوسع الصدر .. ويعم الديار كلها ..



في الاخير تبقى وجهة نظر ..


:)

[قرم البر]

لو تنزل صور الله لا يهينك

[الشامخ997]

بارك الله فيك ونفع بك

[faris2006]

يوجد ابتكار خفيف وقتصادي


http://www.mekshat.com/pix/upload04/images170/mk41616_air 1.jpg

الصور منقوله

[مخاوي الليل1]

السلام عليكم

يعطيك العافيه وعساك على القوه وفي انتظارك

[ابو نايف التميمي]

يالربع الموضوع من 10 سنوات من الي رفعه الحين؟؟؟؟؟

[ابوسلوى]

هلا والله بنجم سهيل



كفو والله هذي الاختراعات

[لاتكب البيالة]

الله يذكرك بخير يا نجم سهل
اللي كان يكلف 3000 بوقتك الحين يمكنه ب 6000

لكن الطاقة الشمسية فكرة مناسبة وتستحق من يستخدمه