لأهل الخبرة والتجربة لباترول 93

[باترول-93]

السلام عليكم ورحمة الله وبركاته
وكل عام وانتم بخير جميعاً اعضاء ومشرفين وادارة
سجلت بالمنتدى لاني شفت منه فوائد كثيره ومشاركات ممتازه بخصوص السيارات واصلاحها وبعض نصاحكم التي لا نستغني عنها فلكم جزيل الشكر

نجي للموضوع الاساسي
شريت باترول 93 وحطيت عليه ولا قصرت معه واحس فيه مشاكل مدري وش حلها فأكيد انتم اهل الخبرة تفيدوني
اول شي عندي الماكينة فيها صوت طقطقه << وزنت بلوف عند واحد مدري وش اقول عليه بس حسبي الله عليه .
2 غيرت زيت الماكينة بعد يومين شيكت عليها ناقص تقريبا علبة ولا تحرك الجيب من المحطه للبيت
3 تدخل ريحه كربون داخل السياره ناس قالت لي من راس القزوز
4 كهرباء السياره فيها ضعف فحصت الدينمو اوك وغيرت البطاريه بس اذا شغلت المكيف تضعف الكهرباء
عزمه مش ولا بد غيرت بواجي واسلاك وصفايه وتنظيف كربريتر
اذا فتحت الشوتاالي فوق الكبريريتر احصل عليه دخان اسود
واسف على الاطاله وتحملوا اخوكم الصغير

[SAS2]

الحل تبيعه وتوفر على نفسك التعب ودور واحد نضيف وهالنوع من المواتر لا تركض ورى طلباته ما تخلص ابد

[ابوتركي1010]

1- بخصوص البلوف ارجع اوزنها صح عند واحد خبرة
2- بخصوص زيت المكينه شيك علی الشنابر يمكن فيها ضعف( يطلع دخان ازرق اذا دعست ) وكمان شيك علی الصوف وعلى جلد البلوف
3- بخصوص ريحة الكربون الشكمان ويش وضعه الوصلة الاخيره نازله ولا مرتفعه علی قد الصدام
4- بخصوص الكهرباء احتمال يكون الدنمو أو الماس مايوصل صح لأجزاء السيارة شيك علی الأسلاك
اما العزم يدخل فيه حاجات كثير مثل الديلكو يبي وزن أو الدسك والصحن فيها ضعف والله يسهل دربك ويسر امرك

[باترول-93]

اخوي SAS2
الله بلاني بحب من طرف واحد والنظيف ولا هك النظافة اسعاره غاليه

اخوي ابو تركي كل الشكر لك على دعمك
ننتظر باقي الاخوان

[الحميضاني]

السلام عليكم
البلوووف ما وزنها صح ونقص الزيت مستحيل صرفيه ما يمديه بس انت قل لنا كم علبه حطيت الكربوون فيه تنسيم عندك بالقزوز والكهرباء شيك على الماص من البطاريه للبدي

[batrol2002]

يفيدونك الشباب

[امير المشاعر]

اخوي صرفية المكينه عاليه انا معي اخوه وبعته كنت امشي عليه من الرياض للقصيم ينقص نص علبه طبعاً امشي عليه 180 وعليه هدرز اما سيارتك اعتقد يبيلها توضيب
هذي مشاكل السيارات القديمه تتعب الواحد
اعانك الله والله يجنيك بركته

[باترول97 لكزس]

شيك الصرة حقت الزيت يمكن تهرب زيت

من ناحية العزم الكويل مهم ... وفيه حركه ممتازة تخلي الباترول الكربريتر يصحصح :D
شوف اسلاك البواجي اللي طالعة من الديلكو رقم 6 ورقم 3 بدل الاسلاك مع بعض وشغل الموتر
بيشتغل ويترتر وما بيكون صافي عطه بنزين 5 دعسات او 6 دعسات وااافية ثم طف الموتر ورجع الاسلاك في مكانها الصحيح وان شاء الله يتحسن ويصفى معك

[باترول97 لكزس]

التبديل حق الاسلاك يكون في الديلكو ما هو جهة البواجي ...

[عبقري91]

نقص الزيت يمكن البنشري ماعبا الزيت كامل انت زده ولا تعايره الا يكون واقف له كم ساعه بعد مشوار
والكربون يدخل هذا طبع الباترول.
عندك عصا القير فيها ربلات تمنع الغبار جايز منها
وعندم الباب الخلفي. هو سبب الكربون دايم. الربلات. والسياره كبليتر مشكلتها الكربنه والريحه
البلوف. يمكن وزن

[عبقري91]

الكهرب. حاول توزع من السالب للبدي كم سلك. يعني اسلاك جديده. لدنمو واحد وللكمبرسر واحد والمكينه واحد والبدي. واحد بمكان مافيه صدا وانشاء الله تزين امورك.

[هويدي]

صوت طقطقه البلوف عادي بكل الباترول حتى لو وزنت يخف فتره ويرجع

بالنسبه لضعف الكهرب شيك على وزن الديلكو واسلاك التأريض مثل ما تفضلو الاخوان

وبالنسبه للمكيف المفروض اذا شغلته يرتفع الابنص كل ما شبك الكمبرسر

شغل المكيف افتح الكبوت وتعال من جهه الراكب ( وق ) خلف الكربريتر بتلقى ليات صغيره

واحد منها مسؤول عن الدعسه مع المكيف اذا لقيت اللي اشبكه وبيرتفع الابنص اذا ما لقيته سده بأصبعك وبيدعس

اعتذر عن الاطاله وركاكه الاسلوب اتمنى قدرت اوصل المعلومه :)

[باترول-93]

الله يجزاكم كل خير واشكر الجميع على التفاعل والصراحه استفدت منكم الشي الكثير اسال الله يجزاكم كل خير بكل حرف تكتبون لمساعده الاخرين
والي سويته الزيت طلع اليمني حسبي الله عليه منقص علبه
وصوت البلوف بوزنها والريحه طلع شكمانه يضرب بالصدام الخلفي وحطيت له وصله يقلعه برا طبعا حطيت والكهرباء الحمد لله زانت بعد ما سويت الي شرتوا علينا فيه تمديد اسلاك من السالب للبدي والماكينه يعني دبلتها
والله يعطيكم العافيه جميعاً سوا من رد وافادني وكل من قرا وسيقرا الموضوع بالمستقبل

[باترول-93]

طبعاً للمعلوميه اضفت مراوح اضافيه كهرباء عدد ٢ وكل مروحه كتاوت لحاله ركبتها قدام بين الشبك والرديتر فما ادري اذا تاثر او لا

[المضلي]

كم توضيب كامل مكينة باترول 93

[باترول-93]

الحمد لله للحين ما مريت بالمرحله هذي وان شاء يفيدونك الزقرت
بس اتوقع من ٣ الي ٤ ونص
والله يسهل لك

[جموول]

علي حسب أنا وضبت مكينة 4500 وغيرت عامود كرنك وثلاث أذرعه كلفتني 4000بس ركب بين اصلي وياباني وماشيه معي 100بالميه وان شالله بركب مكينة لكزس