بشتري فتك جديد واخاف يبهذلني بعد سنتين

[فاسيلي زايستي]

يااخوان ودي اشري فتك قير عايدي جديد واخاف يبهذلني بعد الاستخدام بسنتين ولا ثلاث
وانا راعي بر ومطاليع ومرات اقول سكويا احسن لاكن السكويا ثقيل اللي جرب الفتك هل خراباته واجد واقدر اعتمد عليه في السفر بعد الله يعني مايطفي ويتفتف ؟

[الصيادالمليح]

إذا كانت رجلك ثقيلة على السيارة و راعي مطامر ومالك خلق تعتني بسيارتك بانتظام

فما أعتقد فيه سيارة تتحمل سواقتك أكثر من سنة وراح تظهر لك خراباتها بسرعة

فحاليا كل السيارات تحتاج دلع و عناية فكثروا فيها الحساسات و قللوا من جودة التصنيع و خلوا عمرها الافتراضي 5 سنوات فقط

[ناصح]

يااخوان ودي اشري فتك قير عايدي جديد واخاف يبهذلني بعد الاستخدام بسنتين ولا ثلاث
وانا راعي بر ومطاليع ومرات اقول سكويا احسن لاكن السكويا ثقيل اللي جرب الفتك هل خراباته واجد واقدر اعتمد عليه في السفر بعد الله يعني مايطفي ويتفتف ؟

يعيش معك
المهم تحافظ عليه
المطامر والمطاعس القوي اللي ماله داعي يدمر أي سيارة مهما كانت
أعرف ناس معهم مواتر وجيوب بر موديلات قديمة
وماشية أمورهم رغم أنهم لفو السعودية كلها والسبب الركادة
..
الركادة مالها ثمن سواء على الخط أو في البر
وهي لسلامتك ثم سلامة سيارتك :good:

[سيد النشاما..]

أخذت فتك 2009 قير عادي داخلية بيج كان ماشي وقتها 180 الف كيلو تقريبا
ولكن ساعة تعدا 200 الف قام يستهبل بالكهرب وبهذلني يشتغل تمام اروح لمكان
معين اطفيه لما ارجع اشغله مايشتغل واشياء كهربائية ثانية اجلس اتعجب في خرابها
وكل شي له كتاوت وله حساس وفيش دعسة وفيش حساس دعسة
وحساس قربة ومدري ايش ماعرفت هالأشياء الا بعد ماجى معي الفتك
وكذلك لاحظت أنه مشحوط مررة يعني لو سافرت وتمشي 140 او 150 عانك بترحم
المكينه من شحطة القير اللي مسوينها علشان يقضون على برودة عزم المكينة
عموما الموتر بشكل عام مايجمل صراحة وبعته بيعة حراج ابي الفكة منه بأي ثمن

[الكا111شت]

اولا السلام عليكم ورحمة الله وبركاته



السيارة قد ما تعطيها تعطيك تكدها وتلعنها بالمطامر وتقطع بها الشعبان وتغامر اكيد يبيلها صيانة وبتطلع بها مشاكل خاصة الجديد كلة حساسات ..



انا معي ولله الحمد فتك 2003 مشي راكد ومطاليعي للبر 70 بالمية الموتر ماشي الحين ما يقارب ال 500 الف والحمدلله عال العااال ان شاء الله امشية للمليون ...

[أبومحمدالشهري]

الفتك حاليا أفضل سيارة جيب 4*4
سيارة دفرنسين والدبل عصا ، وبصراحه فرصة للي يبي يقني سيارة
ولعلمك أسمع من ناس ماخذينها كرت على يدهم ، ولاتسأل واحد ماخذ مستخدم لأنه مايدري كيف استخدام اللي قدامه
ولو حسيت أنك متخوف من الفتك ، جيب لي سيارة قوية ومتينة وتتحمل الجور لأني لاحظت من كلامك رجلك حاره على السيارة
عموما أي سيارة تشتريها كرت وتعطيها صيانة مثل ماتعطيها كرف بتعيش معك
ولد خالتي شاري سوبر سفاري فل كامل 2005 على أيامه جديد وباعه وماشي 750 ألف ومافيه الا العافية ، بس يخدم السيارة من صيانة مثل ماتخدمه من عطاء

خلاصة الكلام خذ سيارة مقتنع فيها وحابها ، والله ييسر أمرك

[المنيعي1]

السلام عليكم وصبحكم الله بالخير
انا ماجربت الموتر ولا اقدر افيدك بشي .
بس حصلي موقف اليوم ومن شفت موضوعك طرا علي

واحد من الزملا اليوم معه فتك 2009 وطلع بدري من عندنا وكان قدامه صبيه برتفاع نص متر او اقل شوي ولا انتبه له الوكد ضربه بنص وتعلق الموتر عليه ودق ريوس وشبك الدبل والدف لوك ونتل الموتر ريوس وطلع ماشاء الله عليه مافيه الا الكفر يمين بنشر من قو الضربه انا يوم شفت شكله وهو على الصبيه قلت الله يعين اكيد الكرتير والاذرعه انعدمه ولا جاه اي شي معه انه كار نص الصبيه صارت الضربه كله بالدفرنس .

[المنيعي1]

السلام عليكم وصبحكم الله بالخير
انا ماجربت الموتر ولا اقدر افيدك بشي .
بس حصلي موقف اليوم ومن شفت موضوعك طرا علي

واحد من الزملا اليوم معه فتك 2009 وطلع بدري من عندنا وكان قدامه صبيه برتفاع نص متر او اقل شوي ولا انتبه له الوكد ضربه بنص وتعلق الموتر عليه ودق ريوس وشبك الدبل والدف لوك ونتل الموتر ريوس وطلع ماشاء الله عليه مافيه الا الكفر يمين بنشر من قو الضربه انا يوم شفت شكله وهو على الصبيه قلت الله يعين اكيد الكرتير والاذرعه انعدمه ولا جاه اي شي معه انه كار نص الصبيه صارت الضربه كله بالدفرنس .

[فاسيلي زايستي]

نظامي في الاستخدام نظام شايب اغير الفلاتر واواظب الزيت والماء بس مشاويري دايم سفريات وبر 65%

[احمد النزهه]

اشتره وتوكل على الله واحرص على زيت وسيفون اصلي وكاله والاشياء الاستهلاكيه
موتر يخدم ويتحمل بس اهم شي السيفون

[ابوسند9]

اهم شي حاجتين با الفتك وانتبه تستغني عنها
مكيفين ودفلك
واذا انت راعي بر وارض حجره ركب بالون وحط الهواء 20 منها ترتاح وتريح السياره واضمن لك باذن الله تمشي 500 الف كيلو ما تسمع لا اصوات ولا هربده
وانصحك قبل تشتري تجرب هذا وهذا

[بربنجي]

يعيش معك
المهم تحافظ عليه
المطامر والمطاعس القوي اللي ماله داعي يدمر أي سيارة مهما كانت
أعرف ناس معهم مواتر وجيوب بر موديلات قديمة
وماشية أمورهم رغم أنهم لفو السعودية كلها والسبب الركادة
..
الركادة مالها ثمن سواء على الخط أو في البر
وهي لسلامتك ثم سلامة سيارتك :good:

كلام اخونا ناصح اكيد سليم
اقولك حاجه عطني اقوى سيارة بالعالم اقدر خلال مشوار واحد للبر احوسها واخربها
وعطني سياره عاديه مثل جيب عادي اقصد سواء تويوتا او باترول مع ركاده اكيد بيصبر معك
بمعنى اخر انا ما اقول لك لك امش على قشر بيض بالبر
لكن اقصد داري السيارة بالبر عشان لما تحتاجها تلقاها جاهزه ان شاء الله
يعني ما انت خسران شي لو داريت على السياره سواء بالبر او بالمدينه
بالعكس المداراه زينه للسيارة وقت الزنقه لا سمح الله تقول يا ليت ما شديت على موتري

يعني داريها عشان تداريك
والله يحفظك ويرعاك

[آآآبو سعود]

ي رجال محد يضمن يعيش سنتين علشان يضمن الحديد .

[الفهيد بدر]

توكل على الله عز الله أنه شيخ المواتر واللي يسب النيسان تلقاه ما جربه ولا ماخذ مستعمل مهلوك