أبي شوووركم عن تجليد المراتب والأرضية

[الوسم2]

يالربع نويت أنجد سيارتي الجيب من الداخل ولبسه بلاستيك
أبي شوور الأخوان وين أحسن محل ألقاوه بالغرابي أو وين أحصله لوتكرمتم أنا أنتظر رايكم يالاخوان0

[القويعي]

انا من رأيي اذا كنت راعي بر فلا

تحط جلد

[ولد عبدالله]

اخوي الوسم 2

اذا تبي تنجيد صح 100%
فلا تتعدى وضاح ( في الصناعيه القديمه )
شغل وكاله
وانا مجرب
واما الارضيه فالغرابي وبالذات محل الراجحي واحرص ان البلاستيك 5 مل
وتابعهم ان الخياط برم وانهم يحطون زوائد تحت البلاستيك حق السياره

واذا تبي رقم وضاح راسلني على الخاص

[العشة]

تبي شوري .. لا تركب لا عوازل ولا تلابيس

الحين الموتر جديد تمتع بالمخمل بدون تلابيس وشهابة الغبرات على التلبيس ..

واذا تقعطعت كلش لبس اللي تبي اهم شي انك تمتعت بالجديد بدون عوازل ..

[عمار السفينه]

أنا معك في تلبيس الأرضيه

فهو مفيد ومهم

وفيه محلات في الغرابي مشهوره بها الشيء

[بيرق العزة]

الغرابي فيه كل شي مثل ماقالك اهم شي سماكت البلاستيك عندك اسماعيل منتاز المناتيز افضلهم وهوعلى اليمين ونت جاي من ش البطحاء قل ابي اليمانين الي يلبسون بلاستسيك خياطه صح شغل صح؟؟؟؟

[غالي]

فيه محلات السماعيل بالغرابي
انتبه بس ترا له كذا محل بالغرابي حول 6 محلات
وواحد منهم تقريبا اهو الاول وانت جاي من البطحاء لاتروح له مايعرفون مركب عندهم ارضيات وتلبيسه دمااار
رح للي يجيك على اليسار
ترا الكل يمدحهم
اما اخوك الي هو انا سمعت عنهم والكل يمدحهم حتى البازعي يمدح فيهم يو سألت عن مراتب الجلد قالوا ياخي رح للاسماعيل
احسن من تلبسة عبداللطيف جميل :( ورحت لمحلهم هالداج عماله الظاهر كانوا توهم مبتدين
طبعا لو تنجد
وحتى التلبيسه عندهم ماكنها تلبيسه
مركبها في الاندكروزر الكل يحسبها تنجيد ماشاء الله
مشدوده ولها 3 سنوات ماتغيرت ولا صارت وسيعه
والله اعلم

[مدور ربيع]

اذا تبي النصيحه لبس الارضيه بلاستك شفاف فقط ...!!

والمراتب بتلقى شيء جاهز ومن اروع مايكون ( خصوصا اللي جاي م الامارات )


وانا ملبس تجليده جلد اصلي للمراتب الفكس ار المخمليه ,, ومكلفتني فوق 3000 ريال

والان متندم على تلبيسة المراتب ,, تشوفها كنها لها 10 سنوات ,, مع انه مامر عليه الا سنه


وشفت واحد من الشباب مركب جلد لاكن نوعية خياليه .. لون وملمس ,,, وقيمته بحدود 600 من الامارات

..

[ابونايف الروقي]

الاخ الوسم 2
السلام عليكم
احرص اخي الكريم على ان مسامير المراتب الي نفك ترجع وتنشد زين لاني لبست موتري وبعد فتره المراتب فيها طقطقه لقيت ان فيه مسامير ناقصه وبعضها مانشدت زين واحرص على ان يكون البلاستيك 5 ملم ويحطون زوائد تحت الديكور ويدبسونها صح واحرص على فتحات القواعد حقت المراتب وحزام الامان تكون صغيره عشان مايدخل معها غبار او اي شي ....
بالنسبه للمراتب انصحك بالمخمل الجلد بارد في الشتاء حار في الصيف ..

[الوسم2]

شكراً لجميع الأعضي
على سرعة الرد وسرعة الشور الي مابعده شور

[راع الاولة]

تبي شوري .. لا تركب لا عوازل ولا تلابيس

الحين الموتر جديد تمتع بالمخمل بدون تلابيس وشهابة الغبرات على التلبيس ..

واذا تقعطعت كلش لبس اللي تبي اهم شي انك تمتعت بالجديد بدون عوازل ..

صح بس ماهو في التلبيس ;) ;) ;) :good:

[راع الاولة]

يالربع نويت أنجد سيارتي الجيب من الداخل ولبسه بلاستيك
أبي شوور الأخوان وين أحسن محل ألقاوه بالغرابي أو وين أحصله لوتكرمتم أنا أنتظر رايكم يالاخوان0

بالنسبة للمقاعد انصحك بتلبيسة جربتها اسمها فياقرا جلد وسعرها حدود 400 ريال وبالنسبة للبلاستيك حط رقم 5 وليس رقم 7 ولو كنت من الرياض كان دليتك