ترهيم مرتبه سياره لسيارة اخرى

[w9l]

السلام عليكم ورحمة الله وبركاته . وكما عودونا الاخوان الأفاضل بهذا المنتدى الجميل في مد يد العون والمساعده بالخبرات . أتمنى تشاركوني في محاولة إيجاد بديل لمرتبة الجيب البرادو حيث انه قااااااسي ولا يصلح للسفر وكذلك يسبب تعرق للظهر . فأرجو ممن لديه خبره او محاوله او تجربه سابقه في هذا الموضوع ان يتحفنا بخبرته لعلنا نصل الى حل يفيد شريحه كبيره من المستخدمين . انا فكرت صراحه في جيب لكزس gx اللي يشبه البرادو اتوقع ان مرتبته اريح من البرادو وتركب بدون ترهيم (مجرد توقع ) المهم لا تخلونا يالربع من مشورتكم ولاهنتو جميع مقدماً

[w9l]

سبحان الله

[Blue Diver]

السلام عليكم
اللي فهمت ان عندك برادوا وتبي تحط مرتبة gx
فأول امر نشوفه او نستنتجه ان الموترين من نفس الصانع وهو تويوتا
فما ادري هل بيكون فيه فرق بينهم او لا
لو فيه فرق كبير جرب تسافر في gx او تمشي فيه مسافة طويلة
قد تكون الراحة ليست بسبب الكرسي وانما بسبب ضغط هواء الاطارات او امور اخرى في السيارة
مراتب الامريكي وخصوصا بيوك رود ماستر القديم اريح
وفي التشليح ممكن تلقى شي سعره بسيط وبالتالي تجرب ترهمها وانت مو خسران كثير
يمكن تزبط ويمكن لا

[المميـز]

:

اختر المرتبه المناسبه وابحث عنها بالتشليح وشف قواعدها
وقارنها مع القواعد اللي بالسياره اذا كام الفرق بسيط
يمكن تعديله وتركيبه بسهوله
بالنسبه للتجارب اللي شفتها / بعض اصحاب الفورتشنر يركبون مرتبة سوناتا
والفرق بمسمار واحد فقط يتم توسيع فتحة المسمار الموجوده بقاعدة مرتبة السوناتا وتركب بسهوله
ويمدحون راحتها

:

[فارس شراز]

عليكم السلام.

مجرد فضول ع موضوعك وربما لقافه ولك الحريه في وصف مشاركتي.

أشور عليك تروح محل قطع غيار وتطلب قاعدة المرتبتين البرادو واللكزس وتقارن بينهما ع الطاولة وتقرر بعدها هل تصلح بدون ترهيم أو هل ينفع الترهيم أو لايمكن .

ربما تختصر عليك تكاليف كثيرة .

بتوفيق لك .

[w9l]

السلام عليكم ورحمة الله وبركاته . حيالله النشامى . ردود تثلج الصدر صراحه . اما بالنسبه للرود ماستر عزالله انه مريح جدا وقد استعملته ولكن هل يركب ولالا ؟ هذي نقطه . والنقطه الثانيه والاهم هي موضوع الكهربا ولا ودي احوس بكهربا الموتر وهو جديد 2014 وبالنسبه للسوناتا معلومه جديده . وان عودت للراحه عندك مرتبة الالتيما 95 القديمه ياااااااااهي مريحه . واعتقد ظلم نقارن بين مراتب الجيب والصالون لان فيه عوامل تساعد الصالون بالراحه اكثر من الجيب .. الحقيقه ما اخفيكم قريت مشاركه لاحد ملاك اللكزس gx يشتكي من المرتبه حقته هههههههه وين نروح يعني ؟؟؟؟ ههههههه انا قلت لكزس اكيد بتهتم بالراحه اكثر عشان كذا فكرت بالموضوع . عموماً حبة خشم لكل اخ عزيز نورني بمشاركه فكره . شكراً من القلب

[ABO BASIL]

خذ مراتب الكنبة قصدي اللينكون
طبعا إذا تركب بس ما أظن على العموم عندي نفس فكرتك ناوي اركب مراتب مريحة بس على موتر ثاني وش أفضل مراتب سيارة لأني بشتغل ترهيم ماعندي مشكلة

[w9l]

يا مرحبا ببو باسل . الترهيم كل شي تقدر تسويه ولكن تختلف نسبة النجاح لعدة عوامل ولكن أهمها بإختصار ( شي يركب على السياره بنسبة 70 بالميه) يحتاج نسبة ترهيم 30 بالميه هذا اعتبره نجاح ويستاهل انك تسويه . اما العكس ما اشجع لانه بيكون مكلف هذا اولا واحتمال كبير ان النتيجه تكون ماهي مرضيه ( كإنك يابو زيد ماغزيت ) وبالنسبه للمراتب أتوقع من جيب لجيب ممكن او من صالون لصالون . اما من صالون لجيب او العكس اتوقع مشاكلها وااااااجد وما تسوى تعبها ... ونستفيد من خبرات باقي الاخوان

[AL-OTAIBI]

عند الترهيم لا تغفلون جوانب السلامة و منها حزام الامان حفظكم الله.

[---ابو يوسف-]

السلام انا رائي رح لبس المرتبة قطن لو دبل اسفنج واذ مارتحت غير السيارة لان تغير المراتب يترتب عليه اشياء كثيرة من ناحية السلامة عادي تصير المرتبه نازلة وماتشوف السيارات زين او مرتفعة ويضرب راسك التنده وغيره كثير ترا المسالة مهب مسالة مراتب بس 70 بالمية من السيارة