كفرات( البالون / سلبياتها وإجابياتها??

[شمالي و الهوا غربي]

ياجماعة الربيع واحد يسئل عن استعمال
كفرات البالون هل تناسب الهايلكس
والدادسن ،هل تسبب رجة مع الزفلت وهل تثر علئ العكوس ???
نبي رايكم من واقع تجربة ،لهذه النوعين من السيارات
تحياتي

[4200]

ي مرحبا
البالون طبيعي يسبب رجه والأذرعه حسب سواقة راعي الموتر اذا يحاسب عن المطبات او لا
لاكن عز الله ان كفر انسى قرقعة الموتر خصوصا مع الصحرا انسى البناشر ومن سلبياته ماله عمر يعني يمسح بسرعه
لاكن اتحمل اغير كفرات كل 8 شهور ولا اجلس كل سنه اروح اربط الموتر بسبب الكفرات العاديه
بالنسبة للدسن والهايلكس اتوقع افضل مقاس لها 825/15 والبركه بباقي الاخوان يفيدونك

[AL-OTAIBI]

ما ينفع للددسن و الهايلكس، يهلكهن و خطير و شكله غلط عليهن

[شمالي و الهوا غربي]

بيض الله وجيهكم احبتي ، واستفدنا من ارشاداتكم
وياليت يزودنا احد مجرب البالون علئ النوعين من السيارات
او احد عنده الخبرة الكافيه في عيوب البالون
والمقاس اكيد 15" 825
.. ((وخصوصا الدادسن الدفرسين) ))
والشي الثاني ماهو النوع البديل عن كفرات البالون اذا ماناسبن،
بالنسبة (للبر )) والبطانيج وقليل بناشر

تقديري

[مجنون جمس]

السلام عليكم
بالنسبة لسلبيات البالون
بعض الاحيان يصير فيهن رجه والبعض لا
لكن تلعب بالأذرعه وغير كذا السياره ماتسيطر عليها زين مع الخط يعني تبتل تروح يمين ويسار
وانا بصراحه من المؤيدين لكفرات الشاهين
لينات ولامشاكل اذرعه ولارجه ولايتسحلن بسرعه
طبعا هذي قناعتي الشخصية وأحترم رأي الأخوه البقية
وشكرا ،،

[فايروخ 370]

انا ركبت على ددسن دبل بالون ماكسس 900 15 وممتازه فالبر والنفود

بس عيبها ثقل القومه شي بسيط يمكن لانها مقاس 900
والرجه سويت ترصيص ارضي عند العضيب وخفة الرجه صارت الين 110 وفكيت عمود الدبل ونفس المشكله
والجنوط كانت بلد

اذا موترك للبر فقط ركب بالون 900 والهوا 20
واذا تمسك خطوط الشاهين اخت البالون وارسى واقوى فرامل

[الحربي 591]

من اخطر سلبياتها وقت المطر ..... او اذا الطريقه فيه ماء

[شمالي و الهوا غربي]

الله يعطيكم العافيه
ومن خلال كلامكم ابستخير عن البالون
والدنلوب ذبحنا في البطناج،ولكن نبي ندور غيره..

[الحربي 591]

الله يعطيكم العافيه
ومن خلال كلامكم ابستخير عن البالون
والدنلوب ذبحنا في البطناج،ولكن نبي ندور غيره..

الدونلوب من اسواء انواع الكفرات

[طويق2010]

انا معي باترول قديم ومركب بالون ممتاز جدا في النفود
بس الموتر ثقيل
سوال الهواء للكفر كم طبعا زفلت انا حطيتة 20 واحس ماينفع
حطيتة ثلاثين احسة كسر السيارة
في الاخير ثبت على 25

[faisel121]

ينفع للحرة نسم بالحرة ودعس الحجر دعس بس اهم شي نسم الكفر مجرب ولاتاخذ الاابوجمل ماكسس

[شمالي و الهوا غربي]

ينفع للحرة نسم بالحرة ودعس الحجر دعس بس اهم شي نسم الكفر مجرب ولاتاخذ الاابوجمل ماكسس

بس يقولون مايصلح مع الزفلت ويخرب الاذعرة

[سقم المعادي 1]

اللي يخرب الاذرعة الزفلت عندنا و البركة بوزارة النقل ولا البالون بريئ من ذلك
ركبه و بيجوز لك دامك متوذي من البطناج فهو علاجك لكن تحمله في الزفلت لا رساوه ولا يبي ماء

[كايد]

اللي ركب بوالين15-825 على ددسن دبل ياليت يفيدنا
هل حس بفرق في النفود ....وهل العزم قل شوي
وكم يحط الهواء .وهل تفصخ على جنوط هلل مع التنسيم للنفود.

مجربها على النيساسين ...بس تعرفون 6سلندر ويقوم نفسه .

لكن بحكم الددسن4سلندر ياليت احد يفيدنا ولكم جزيل الشكر .

[m-a-z-d]

ياهلا ومرحبا بالجميع ✋🏼
بالنسبه للبالون انا ركبتها على موتري هايلوكس غمارتين دفرنس !
بالنسبه لمميزاتها / تتحمل الوعر والحصى وانس انها تنشلخ او تنشق .
غيرك كذا ترفع الموتر بشكل كامل . بطن الموتر وليس بدي فقط!! مثل اليايات.
ومن المميزات انها ليين مطبها تخفف شوي من القساوه !

اما عيوبها / اول شي اذا نسمتها حطيت فيها 25 او اقل ، يثقل الدركسون مماياثر على
دودة الدركسون . ( وحالياً الدركسون عندي يطلع ونه خفيفه ) يعني يلزمك تحط فيها 30 او اكثر . ثانياً مثل ماذكروا الشباب تضعف قومة الموتر فالزفلت ! كذلك فالنفود اذا نسمتها من باب اولى 😊 .

عذي بعض المزايا والسلبيات الي يمكن ماذكروها الشباب !

[تميم2222]

البالون التالي كله غثا وكذاب اللي يقول مايضر الموتر مع الزمن ويثقل الموتر اتمنئ الشركات تشوف حل لكفر يكون خفيف ويتحمل الوعر

[كايد]

طيب يالربع كفرات الدينا المضلعه750 .وش وقعها في الطرد والحجرة .