شي محير بين اللاندكروزر وبين اليوكن اكس أل

[حصان القايله]

السلام عليكم ورحمة الله
يا اخوان انا بغيت سيارة عائلية كبيره وتصلح للبر و السفر على الخطوط الطويله
لقينا افضل شي ( يوكن اكس أل) أو( اللاند كروزر )

لكن الشي المحير
الأمريكي فيه تقنية تشغيل اربع سلندر عند عدم الحاجة للثمانية عشان كذا صرفية الوقود أقل
أما الياباني متفوق في تقنية الدفلوك والتراكشن يعني شغلات البر والتطعيس لكن يصرف بنزين كما هو ملاحظ في اللاند ثمانية سلندر

الامريكي انواعة معروفة و محددة بالسوق وعيبة يطيح سعرة كثير بعد الاستخدام وما يجيب سعر
اللاندكروزر أنواعة لحسة مخ سعودي وبريمي وقطري واردني ويمني و فكس آر و جكسآر و جكس رقم 1 و2 و3 شي له صيانه وشي ما تشمله الصيانة
لكن يميزة انه شيك في جيبك ما يطيح سعرة

سؤالي للأخوان أصحاب الخبرة وش تنصحون فيه ، الله يسعدكم ويجزاكم خير على النصيحة مقدما

http://o.aolcdn.com/dims-global/dims3/GLOB/legacy_thumbnail/750x422/quality/95/http://www.blogcdn.com/slideshows/images/slides/358/577/4/S3585774/slug/l/land1508-08-1.jpg
http://suvcarson.com/wp-content/uploads/2015/07/2016-toyota-land-cruiser-interior-luxury-suv.jpg

http://image.motortrend.com/f/features/consumer/1409_2015_2016_trucks_suvs_vans_ultimate_buyers_gu ide/63097100+w644/2015-gmc-yukon-xl-slt-front.jpg
http://2016suv.com/wp-content/uploads/2015/02/2016-GMC-Yukon-interior.jpg

[الفهيد بدر]

إذا تبي الشور خذ سكويا عز الله أنه موتر العائلة الأول راسي ويصبر وإذا ودك بالفخامه خذ باترول بلاتينيوم أفضل من اللاند وارخص

[بني سعد]

وعليكم السلام

اذا عدد افراد الاسرة اكثر من 5 و يمكن يزيد في المستقبل فخذ اليوكن مع دبل
مريح جدا في السفر الطويل و يخدمك في البر الخفيف اذا احتجته

وبالتوفيق ان شاء

[حصان القايله]

إذا تبي الشور خذ سكويا عز الله أنه موتر العائلة الأول راسي ويصبر وإذا ودك بالفخامه خذ باترول بلاتينيوم أفضل من اللاند وارخص

صحيح كلامك السكويا موتر مهوب بسيط حسب علمي مكينة لكزس 5.7 قوية جدا عشان كذا بيكون صرفية بنزين وكذلك عيبة شكله قبيح جدا لا وجه ولا قفى

والباترول سيارة قوي ورزة لكن يصرف بنزين و اعادة البيع يطيح سعرة كثير .

تسلم اخوي بدر

[حصان القايله]

وعليكم السلام

اذا عدد افراد الاسرة اكثر من 5 و يمكن يزيد في المستقبل فخذ اليوكن مع دبل
مريح جدا في السفر الطويل و يخدمك في البر الخفيف اذا احتجته

وبالتوفيق ان شاء

مثل ما تفضلت مريح جدا في السفر لا يعلى عليه . يا سلام لو كان فيه دفلوك وتراكشن

[بني سعد]

اذا تبي دفلوك و تجهيزات بر مع راحة اليوكن انصحك تشوف

Taho z71

ولكن المشكلة انه يجي شاصيه قصير ما هو مثل اليوكن XL

[المميـز]

صحيح كلامك السكويا موتر مهوب بسيط حسب علمي مكينة لكزس 5.7 قوية جدا عشان كذا بيكون صرفية بنزين وكذلك عيبة شكله قبيح جدا لا وجه ولا قفى

والباترول سيارة قوي ورزة لكن يصرف بنزين و اعادة البيع يطيح سعرة كثير .

تسلم اخوي بدر


اذا كان الباترول في وجهة نظرك
يطيح سعره عند البيع !!!
اذا مايحتاج تفكر وتحتار بين اللاندكروزر واليوكن
لأن اليوكن يطيح من سعره اكثر من الباترول وثقيل عند البيع ماله طلب دائما مثل الجيوب
مع ان الباترول بالسنتين الاخيره اشوفه اصبح منافس قوي جدا لتويوتا بمسك السعر عند البيع والطلب عليه عالي
مثل ماقلت لك اذا تفكر بطيحت السعر ... خذ تويوتا لاندكروزر :good2:

:

[فؤاد الزهراني]

صحيح كلامك السكويا موتر مهوب بسيط حسب علمي مكينة لكزس 5.7 قوية جدا عشان كذا بيكون صرفية بنزين وكذلك عيبة شكله قبيح جدا لا وجه ولا قفى

والباترول سيارة قوي ورزة لكن يصرف بنزين و اعادة البيع يطيح سعرة كثير .

تسلم اخوي بدر




بخصوص ردك عن السكويا فعلا لا وجه ولا قفى

اما الباترول فمن وجهة نظري ما احسنت الإجابة عليه

لمعلوماتك الباترول تعبي بنزين من الإمارات ويوصلك الين الرياض

بتانكي واحد يعني وش لون يصرف بنزين؟

اما البيع فجميع المواتر تنزل سعرها بعد الشراء

مستحيل تمسك نفس سعرها

الله يرزقك ويدلك على ماهو افضل لك

[باوزير]

يعتمد على ميزانيتك
عدد الافراد
مدة الاستخدام

[ابوراكان تبوك]

اليوكن واللاند اسعارهم حول بعض

لكن لاتقارن بينهم في البر ( يجيني واحد متعصب يوكن ) مافي مقارنه نهائي
اللاند مخصص للبر جلد وطعوس


من ناحية الاسعار تطيح وان تويوتا يمسك سعره

غلطان

كل الاسعار تطيح حتى اللاندكروزر

اللي يمسك من تويوتا المرتبة الاولى الربع وبعده الشاص وبعده الهايلوكس وآخر شي اللاندكروزر

اللي يميز اللاند عن اليوكن انه اسرع بيع

مثال

اذا اليوكن شريته بـ 160 سعر البيع بعد سنتين 85-90 وممكن مع الصبور يصفي 100 وانا اعتبره انجاز
اللاند مثلا بـ 160 سعر البيع بعد سنتين 105-115 بالراحه

باختصار اللاند افضل من ناحية السعر
والصرفيه ما اعتقد انه في فرق طريقة قيادتك هي اللي تزيد وتحدد الصرفية

انت مركز على شيئين
الصرفية
والدفلوك واستخدامات البر

اعتبر فرق سعر البنزين 500ريال بين السيارتين خلال سنتين

اذا البنزين رادك عن اللاند ماهو شي مقنع في اشياء وخدمات افضل للاند ولاتنسى فرق السعر عند البيع

كد اليوكن 10 سنوات وشوف شكله
وكد اللاند 10 سنوات وشوف شكله تكفيك هيبته اللي يحتفظ فيها


هذا ماعندي والله يوفقك بالموتر اللي يريحك

[ميكا مكشات]

المثل يقول إشتر تبيع يعني إشتر شئ أي شئ عليه طلب ومرغوب

[الصيادالمليح]

السلام عليكم ورحمة الله
يا اخوان انا بغيت سيارة عائلية كبيره وتصلح للبر و السفر على الخطوط الطويله
لقينا افضل شي ( يوكن اكس أل) أو( اللاند كروزر )


خيارات جيدة ولكن هل حتختار الفل أوبشن ؟؟ لأن فرق السعر بينهم كبير


لكن الشي المحير
الأمريكي فيه تقنية تشغيل اربع سلندر عند عدم الحاجة للثمانية عشان كذا صرفية الوقود أقل

و الأمريكي في الخطوط أريح من اللاندكروزر من ناحية الجلسة للراكبين و أبرح


أما الياباني متفوق في تقنية الدفلوك والتراكشن يعني شغلات البر والتطعيس لكن يصرف بنزين كما هو ملاحظ في اللاند ثمانية سلندر
هل بتشتري سيارة فوق الـ150 ألف ريال عشان تطعس بيها ؟؟و تغامر بدخول الصحراء بيها ؟؟ حدك رملة خفيفة وكلا السيارتين ممتازات فيها


الامريكي انواعة معروفة و محددة بالسوق وعيبة يطيح سعرة كثير بعد الاستخدام وما يجيب سعر



قيمة اليوكون فل اوبشن تقريبا 190 ألف و اللاند كروزر قريب 300 ألف فإذا بعت اليوكون بعد فترة بيجيب لك تقريبا 90 ألف و إذا بعت اللاند كروزر بيجيب لك 200 ألف يعني الفرق في الخسارة متساوية و لكنك دفعت في اليوكون 190 و في اللاند كروزر 300 ألف وهنا الفرق


اللاندكروزر أنواعة لحسة مخ سعودي وبريمي وقطري واردني ويمني و فكس آر و جكسآر و جكس رقم 1 و2 و3 شي له صيانه وشي ما تشمله الصيانة

هذا غير أن بعض أنواعه باسعار عالية و بمميزات قليلة مقارنة بسيارات في نفس فئتها
لكن يميزة انه شيك في جيبك ما يطيح سعرة

كلام غير صحيح لو قارنت السعر بعد الشراء بالسعر بعد البيع مع عدد سنوات الاستخدام

سؤالي للأخوان أصحاب الخبرة وش تنصحون فيه ، الله يسعدكم ويجزاكم خير على النصيحة مقدما



إذا كنت من النوع اللي بيشتري و بعد فترة تمل من السيارة و بتبيعها فاللاندكروزر خيار أفضل

و إذا كنت من النوع المستخدم و ترغب في الراحة وما في نيتك تبيع إلا بعد 15 سنة استخدام

فخيارات اليوكون و الاكسبيديشن و الساكويا و الارمادا خيار أفضل

[مطر وسم]

السكويا افضلهم ارخص واقل خراب لك وللزمن

[أبوصالح9]

مثل ماقالوا بعض الاخوان وانا مؤيد لهم - سيكويا انسب شي سعر وراحة وقوة وتنفع للبر - طبعا بر عائلي - وحط خطين تحت عائلي مهب تطلع للدهناء وتنشب وتقول لعب علي ابو صالح - واذا على الشكل تراه مهب شين - حط دقن خليجي وثوب طبعا الكم يصير كبك وساعة تبلص حتى لو من راعين البسطات وشغل لمبة السقف واذا وقفت بالاشارة لاتلفت واجد شرط ان يقولون والله ياموتره رزه - اتمنى انها وضحت الفكرة - وبالمختصر المفيد رضا الناس غاية لاتدرك - تركب بنتلي ويقولون الرولز احسن والعكس صحيح - اهم شي خلك قنوع ودور اللي يناسبك ويناسب قدراتك ونظرتك انت

[tabtab055]

احسنت ياابوصالح....ماهنا زياده على ما قلت

[تميم2222]

انت حطيت خيارين فقط وانا ارشح لاند خذ لاند والله يعينك على التعب
بعدين قوله ماطيح لاند ترا هذي كذبه شريطيه ابو جميل واخوي كلها في لاند 2015 شرينا 222 موتر ممشاه 20 الف وقف 190 في الساحه اي شيك تتكلم عنه ؟؟؟ ابي اعرف بس

[الحربي 591]

انا ارشح اليوكون

اما بالنسبه للدفلوك متوفر في جميع فئات اليوكون والتاهو يشتغل تلقائي مافيه ازرار
والتراكشن ما شفت افضل كفائه من تراكشن اليوكون والتاهو في السيارات الكبيره......
طبعا التراكشن في الجمس اذا فصلته يفصل الدفلوك و مانع الانزلاق.. وتثبيت العجلات على الارض...
السيارات الامريكيه ثباتها افضل من اليابان
الياباني يتفوق بوزن خفيف... قد يساعدك في بعض المواقف... لكن هذا ماهو دليل ان اليوكون ثقيل... عندي بدون دبل.. وماطلعني الا الدفلوك بعد الله سبحانه
وانا مجرب لاند 2007 و تاهو 2008

[حصان القايله]

الحربي 591


تميم2222


tabtab055


أبوصالح9


عاشق ام سيلان


الصيادالمليح


ميكا مكشات


ابوراكان تبوك


باوزير


فؤاد الزهراني


المميـز


بني سعد



بيض الله وجيهكم

و جزاكم الله الف خير

والله ما قصرتو عالنصيحة

الله يرزقكم من واسع فضلة



بديت أميل للسفاري مع انه خارج الخيارات السابقه

عشان لو خذنا نفس المواصفات تقريبا و نفس الموديل والنظافة ينزل عن اللاند كثير

[abuslman88]

أخي المبارك
من خلال تجربة اليوكن واللاند
اليوكن زين وحلو ورخيص سعره لكن الخرابااااات ومشاكل الكهرباء وكل يوم وانت مع مشكلة لمبة ويوم طلب فحص ويوم ....والله يعينك على الغثة
اللاند راااائع وسعره غالي شوي والتقنية قليلة لكن سيارة بمعنى الكلمة خاصة الجديدة مريحة وصبورة وشكل رزة
نصيحتي لك من خلال تجربة ...هين قرشك وريح بالك واشتر لاند

[نزف الابداع]

السلام عليكم

من العجيب اللي يقول أن الاندكروزر ما يطيح سعره
كلامكم من نسج الخيال وأقرب إلى قصة ألف ليلة وليلة


الاندكروزر موديل 2013 أشتروه الناس بحدود 230 ألف ريال
والان سعر أحسن واحد فيهم 165 ألف ريال يعني نزل بحدود 60
الف ريال ؟؟!!
اليوكن 2013 أشتروه الناس بـ 150 ألف ريال والآن سعر أحسن
واحد فيهم يوصل إلى 120 ألف ريال يعني بخلال 3 سنوات نقص
30 ألف ريال ؟؟!!

أرجوكم شوي منطق وبلاش نجامل تويوتا على حساب جيوبنا
وفهمنا

تحياتي لكم

[نزف الابداع]

أضيف على كلامي
اللي يقول أن اليوكن كثير خربات مع إحترامي الشديد
لعشاق تويوتا
اليوكن يعيش أكثر من التويوتا ولنا أسوة بكدادين الخطوط
نشوف الأمريكي بموديل الثمانينات ما زال يكد الخط
والتويوتا موديل الثمانينات موجود الأن بمزابل التاريخ

[* الخطيب *]

ربي يوفقنا واياك للخير

معي لاند ، ويوكون اكس ال دبل
ولكل واحد جوه واستعماله وتقنياته
ولامجال للمقارنة لاختلاف النوعين ...

تقارن لاند بباترول : صح .

لكن سؤال على معلومة انت ذكرتها :

كيف اشغل 4 سلندر بس في اليوكون اكس ال دبل 2012 ؟