استغلال اصحاب االورش للرحلات والمكشات (مركز شمس)

[بارق االوسم]

سلام عليكم مريت المحل ولقيت المصري وقلت له ابي بطاريه اضافيه ويمدد سلك للكنود ويركب محول بس طبعا الشد جاهز من قبل عند ورشه ثانيه ومطلعين اسلاكه.
قام يحسب المصري تخيلوا يالربع توقعوا كم طلع
3400 ريال
قسم بالله اللي هذا صار هذا استغلال

وانتم احكموا هل هالسعر مرضي يااخوان يجب ان نتكاتف حنا نبي شي معقول

البطاريه الاضافيه 280 كوريه بن شيهون 80 انبير
منظم رفيق الدرب 230 ريال
محول كهربا 600. كوري
الاسلاك مع الجرجور 150
خلوه ياخذ500 ريال تركبيات مكسب ماحنا حاسدينه
كلها طلعت 1760

وشلون ياخذ 3400 ريال هذا شغل لعب وفيه احتيال
اشوف مركز شمس اسعارهرخورافيه علما تحصل لك هندي كهرباي برا ارحم بكثير وجووده
اتمنئ ان يتقوا الله بهالاسعار
ان والله ياخون زعلت من الاسعاار وللمعلوميه والله مااعرف المحل ولاني من القصيم وماشي الفجر من ديرتي ع شان اوصلهم بدري وتفاجات بهالاسعار. وطلعت من عندهم ويسر الله لي محل
وركبهم لي بسعر ممتاز وشغل ممتاز باقل بكثييييييييير

[أبوصالح9]

سجل معك واحد - منول كنت ودي اشتغل عندهم بموتري مير يوم شفت اسعارهم قلت الهجيج - وعسى الله يرزقه بس الحمد لله ان الديرة مليانة من الفنيين والله لايحوجنا -

[حاميش]

لأننا يالسعوديين ما نعرف شي اسمه مقاطعه ، كل شي يرتفع سعره عادي

[tabtab055]

يااخي الكريم هذي تركيبها سهل جدا بس انت شغل عقلك واشتر لك عده وشف لك واحد خبير يساعدك اثناء التركيب ....
وخذ العلم ..دائما اذا وديت سيارتك لاي ورشه او كهربائي اجلس وتابع معه اثناء التركيب او الاصلاح راح تكتسب خبره مع الوقت....

واذا انت في جيزان اشتر الطلبات و تفضل تقهو عندي وانا اركبها لك وانت تشاهد ذلك بعينك

[الشيخ الظريف]

المشكله ان الناس تركض مع الدعايه وهذا من ضمن من عمل له دعايه وزين انك ماقابلت السعودي صاحب الورشه وأنا سبق ان انخدعت بمصلح ثلاجات صحيح انه عاقل ولكن يكتب المبلغ على الثلاجه ولا يخبرك بوضع الثلاجه وماذا تم واصلحتها عنده ثلاث مرات والنتيجه اشتغال شهر واحد تقريبا وتخرب وفي المرة الرابعه قررت عدم الذهاب له وفعلا بحثت ووجدت شايب سعودي بالرس واصلحها واخبرني عن الوضع وماذا عمل ومن يومها والثلاجه احسن بالتبريد ولها نصف سنه فالدعايه تجعل الناس يتكاثرون على الورشه وم ن ثم يبدأ بالأستغلال علما انني مستغرب من عدم دخول الأجانب لمسألة ثلاجات السيارات ويتخوفون منها

[بارق االوسم]

شكرا لكم لتفااعلكم .. لكن حنا مانساعد بعض المفترض مثل ماقال اخوي حاميش المقاطعه والله تخليه يفكر الف مره قبل رفع الاسعار .. يارياجيل اسعار خياليه سمعت يجهزون الموتر 20000 الف ريال … الله يصلح الحال حنا يوم كتبت هالموضوع والله مااهو حسد الله يرزقه لكن من الغبن والقهر اسعاار خياليه تخيلوا يقول لي المصري الاسلاك تكلفك 1000 ريال . طبعا الاسلاك بين البطاريات والمحول يعني الشد ماله دخل وسلك الكنود جايبه معي طوله 3م .. شي يجنن ليه مسلك بيت انا. ..

[الحربي 591]

الاشياء هذي المفروض انت تركبها ما يبغالها حريف!
النصب الان حتى لو بتغير فيوز يصلخك 30 ريال.. ولا تغير شمعه محروقه 80 ريال!!

[مجالس الرجال]

فيه شي مهم اذا اشتغلت عند مركز شمس لا يكون لك أي طلب شفهي لأنه التنفيذ مهب مضبوط وعنده عمال بهم كماخه تخيل اطلب منه يرجع الشد عن الغماره لانه يحتك به اجي القاه ملصقه تلصيق على الغماره والمواعيد معهم مهب على كلامهم وفعلا عنده اسعار خرافية الونش عندي كامل بقاعدته تركيب فقط يقول بـ 1200 ريال لكن بالنسبة لشغله جيد جدا

[النسر الجرئ]

السلام عليكم ورحمة الله وبركاته
بالطبع هناك فرق اسعار مابين الورش وبعضها . ولكن لما فرق الاسعارهذا. ان مركز شمس للامانه شغله كله مواد وخامات اصلية ليست تجارية وبصراحه ان حدث هناك اي خلل فان الناس بستقبلونك ويصلحون هذا الخلل بدون اي مصاريف .
مركز شمس كل مواده المستخدمه اصليه فاسلاك الكهرياء كلها حراريه
والعوازل ايطالي
والفيوز اصليه
وبصراحه شغل ممتاز مره

[ريان2002]

زبدة الكلام يا أخوان
طالما فيه ناس تدفع ففيه ناس أسعارها نار
بعض الناس العشره آلاف قيمتها عنده مثل العشره ريال عند غيره

[حصان القايله]

ليتك صورت المحل وارسلته لوزارة التجارة يأدبونه

يا شباب فيه تطبيق سهل للجوال تبع وزارة التجارة ،

بس تصور المحل وتكتب نوع المخالفة و البرنامج يرسل احداثية المحل لوزارة التجارة

و اترك الباقي عليهم يبردون كبدك

[6ariq]

مريتهم قبل شهر
وطلبت شد وتوانك وفرش للحوض وشنطه وقاعدة ثلاجه مع بطاريه اضافيه

قالي المصري 18000 :D

بالنسبه لشغلهم ممتاز وماعليه كلام لكن بهذي الاسعار ماينفع ابد ابد

[al faris]

السلام عليكم
من اراد ان اخدمه بشغلات بطاريه اضافيه وتوصيلات فانا مستعد
بالذات اهل الجبيل

[المضلي]

ياخوك كلها حنشل
اسعار مستلزمات الرحلات البرية والصيد غاليه جداً
وخامات رديئة لا تستحق نصف اسعارها

[بارق االوسم]

المقااطعه تجيب نتيجه وكلن على كيفه يلعب بالاسعار
واذا الشغل زين تصلخ الناس بالسعر ماهو منطق انا ماجيت لشغلهم ولاسبه ولاامدحه مااشتغلت عندهم
لكن اسعارهم والله نااااااااااااااار وخورااافيه
لكن مااحنا ملزومين بزي كذا
الله يصلح الحال

[111 أبو ضيدان]

السلام عليكم ورحمة الله وبركاته

صدقت أخي الفاضل وأنا شخصياً فصلت عندهم شد الفراشه للهايلكس وكان الاتفاق على إضافة زيادات ثم أعطاني السعر وهو 4000 ولكن بعدما ذهبت له وجدته لم يضف ما أردت وعندما سألته قال أنك لم تقل لي فقلت راجع رسائل الواتساب وعندما رجعها وجدها من ضمن الاتفاقيه فحاول جاهداً لوجود أعذار وهميه ليهرب من الحقيقه المره وبعد ذلك أردت زيادة سلك للثلاجه 10ملي وعندما أردت محاسبته كان الحساب 4000 للشد و300 لسلك الثلاجه !!! بل وجدته حاسب علي الجراجير والعوازل وكل الامور اللي استخدمها في تركيب الشد ويقول هذي زياده وكان الحساب الأول 4650 ريال تقريباً ولكني واجهته ورفضت ذلك لانه خالف الاتفاقيه فأنزل السعر إلى 4300 ريال وحسبنا الله ونعم الوكيل وفوق هذا كله جودته سيئة لم تعجبني وخرب علي القلب من ثالث اسبوع تقريباً لأنه صيني فاشتريت قلب تركي وما أقول ألا حسبنا الله ونعم الوكيل جشع وطمع وكذب

أخوكم في الله / أبو ضيدان

[ابو خليل 1324]

السلام عليكم ورحمة الله وبركاته

يوجد محل بالرس اسمه (( تمديدات ))
ما شاء الله تبارك الله شغل نضيف
وبأسعار معقوله وينصحك بأشياء انت محتار بها

[111 أبو ضيدان]

وأزيد على ذلك أن القماش الخارجي على ما أعتقد تايلندي وليس بي بي سي الممتاز والذي يتحمل أكثر من غيره وكذلك لا يعطيك ضمان على الشد والآن بدأت تظهر عندي فقاعات في الشد مع الجوانب وحسبي الله عليه

[بارق االوسم]

شي يقهر والله يعين من جد لعب عيني عينك ماااحد فكر في المستهلك اهم مخباتك ياخذ ذ اكبر قدر من الدراهم