اين توجد هذه الشلالات واللي يعرف له جائزة ملقاط :)

[سرهيد]

السلام عليكم
مرحبا بالجميع وهذا اول موضوع اكتبه في هذا المنتدى العامر بأهله

هذه صور لشلال من شلالات المملكة العربية السعودية وبالتحديد من نجد فأين يقع

واللي بيعرف له مني جائزة ملقاط :) :)

ملاحظة : بيرق التوحيد غير مسموح له بالمشاركة:D :D


http://www.mekshat.com/pix/upload/images25/mk40450_shlal.jpg



http://www.mekshat.com/pix/upload/images25/mk40450_shlal2.jpg



http://www.mekshat.com/pix/upload/images25/mk40450_shlal4.jpg


http://www.mekshat.com/pix/upload/images25/mk40450_shlal3.jpg



http://www.mekshat.com/pix/upload/images25/mk40450_shlal5.jpg

[OTHMAN65]

بسم الله انا اقول الداهنه كاني مانيب واهم وتقبل تحياتي

[القوبع]

هاذي طال عمرك على مفرق الصمان بعد مزرعة الملك خالد الله يرحمه.

[فتى الدهناء]

اذا نزلت مع القدية .. بالجبال اللي يمينك ؟

[قناص القصيم]

حياك الله أخوي
أنا أعتقد أنها شلالات
" جبال طويق "
أتمنى أن تكون الاجابه صحيحه

[سرهيد]

اخوي عثمان

ما لك لوا

واسعدني تواجدك

والاخ الكريم القويع

وانت بعد ما لك لوا

وترا المشاركة مفتوحة بالاجابة لعدة مرات والملقاط جاهز:p ههه

[رحاااال]

انا اعتقد والله أعلم انها بين العيينه وحريملاء ولكن لم استطع تحديد المكان بالظبط :confused:

هاه وين الوعد عشان تعطيني الملقاط :D

[مشار حايل]

الله والعالم انها حول جلاجل أو الغاط !!

[الساهر2003]

يمكن انها اللي في الشعب في تمير !!!

[OTHMAN65]

يمكن تكون الغاط ؟؟؟

[هاوي البر]

انا اقول انها و الله اعلم في وادي لبن غرب مدينة الرياض
هاه عاد وين الملقاط :D
و انت عارف الملقاط ما ينفع بدون نار و النار تبي حطب و الحطب يبي مشب و المشب يبي خيمة شعر وخيمة الشعر في الغربي و الغرابي يبي فلوس و الفلوس راحت في سوق الاسهم
:j

[ذيب ساقان]

هذي يالسرهيد شلالات الواشله تحت ديراب

[سلام1]

اعتقد ماني متاكد انها في الغائط

[طــامــي]

ولله روعه وشكرآ (حوطة بني تميم )

[يزيد15]

منتديات مكشات وراعين البر ولا عرفتوا
هذي الطوقي
وقيمة الملقاط تصدق به

[فهد1415]

بعد نقطة ديراب تروح يسار مع مفرق الحائر وبيجيك شعب على اليسار..مقابل مزارع هناك..هذا الشلال فيه..

[الأصاله]

بعد مزرعة الملك خالد
الطوقي

[شاهد عيان]

اعتقد ماني متاكد انها في الغائط
ههههههههه
بعض الأخطاء تكون مضحكة !!


[line]


إجابة محشش :
أتوقع أن تكون بالدهناء !!

[دغيم]

السلام عليكم


الله العالم انها عند قلته الواشلة - طبيعة الأرض والشجر - نفس المكان -
وانا مشبه على شجرة الحماط اللي فوق .

تحياتي

[الضاري]

مشاء الله على هالمنظر

الظاهر الصور بالجوال لو كانت بكميره ديجيتل لكانت اروع

[هاوي كشته]

هذا شعيب القطارة اللي في الواشلة اللي يجي على اليسار وانت رايح للحاير والله اعلم

[سرهيد]

اخوي الحبيب فتى الدهنا

تقول
اذا نزلت مع القدية .. بالجبال اللي يمينك ؟

واقول ولو شكلك رايح ذيك المنطقة

بس ترا اجابتك خطأ

اخوي الحبيب قناص القصيم

قلت حياك الله أخوي
أنا أعتقد أنها شلالات
" جبال طويق "
أتمنى أن تكون الاجابه صحيحه

منتب يم قلم :) اعذروني تراني احب المزح والميانة الزايدة

[abo-saif]

هذي والله أعلم في متنزه الثمامة البري من داخل المتنزه عند الضلع العلوي اللي طاحوا فيه الاخوان الله يرحمهم من كم سنة

[سكّين]

شمال الغاط

ولو شفت الرجم حلفت لك انه بالغاط

[مكشاتي للنخاع]

اضم صوتي مع قناص القصيم واقول والله اعلم انها موجوده بجبال طويق :)

[الكشاتي]

الغــــــــــــــــــــــــــــــــــــــــاط

[روح الهنا]

اتوقع الزلفي

[راعي المستوي]

شلالات الداهنة على يمين الطريق اللي يروح لجلالجل وبجانب العين
و الله اعلم

[عبد الله الفايز]

أنا ماأدري وين

بس يمكن في العلا ( الهويه ) شارك الأخ الضاري قبل كم يوم بوضع مقطع فيديو .

يمكن

[ولد الخاتله]

المهديه

ولاتنسى الجايزه

[جناح الطير]

اتوقع والله اعلم انه في العماريه اذا ماكنت واهم

[تــــوني]

ما عاد يمديني ارمح ....

[الطارق2]

هذا شلال الطوقي
وارسل الملقاط لو سمحت

[بـلـيـهـان 1]

هاذي هقوتي في سدير

[مخطط 2008]

وين مكانة اعتقد ان المكان المكان المكان في الخفس طريق الخرج

[بواسامه]

اشوه الملقاط اول يابو عبدالله
هذي الله يسلمك اذا وجهت لديراب فافرق للواشله يسارواستمر نزول لين يجيك حرف تي فافرق يسار تجاه بلدة الحاير وامش وعلى يمينك مزرعة الامير لين يجيك خشم والماريه عليه انتل فافرق يسار وخش للشعيب وانص الضلوع ووجهك شمال لين يجيك مفرق يمين ويسار خذ يمين واتشوف الشلال من بعيد واستمر بالموتر لين يوقف بك ثمن واصل كعابي لين ترقى وتقرب من المصب الاول وااستمر في الصعود الى المصب الاكبر وهو فوق واذا تبي شريط فديو عام 1418 وهو يضرب ضرب الله المستعان
يالله ابي ملقاط مذهب

[رمال النفود]

يا سرهيد وينك ؟ الشباب طقاق يبغون الملقاط ..
يا أخي اذا ما عندك فلوس قل لنا ..
الموضوع من شهر واحد عام 2007 ..
وحنا اليوم في 28/8/2008 وعام 2009 يبغى يدخل قريب ..
لحق علينا .. اذا ما عندك حق الملقاط رح للبنك وخذ منهم قرض ، وأوف بوعدك ..

يا رب أنا اللي أفوز يا رب ..
أنا أقول في محافظة الغاط ،، وهذي الجبال نفس جبال طويق ..
هاه يا سرهيد رحت للبنك والا لا ..

[عبدالله العلاج]

عافاك الله يالغالي على الصور الرائعه
الرد متأخرا لذلك
اكتفي بشكر شخصك الرائع على هذه الروائع

[طارق البلوي]

والله انا اللي اعرفه انه بالسعودية غير كذا ماعرف

[راعي الصطحه]

يعطيك العافيه على الشلاالات ونتظر القادم


وتقبل تحياتي

[مزون نجد]

أتوقع انه بالمجمعه :good:



وأرسل الملقــط على الأيميل

mo0o0d_000@hotmail.com :D

[صدى الحادي]

هههههههههههههههههههه ..

والله يا شباب أنه شي مضحك .. الموضوع قديم ولا زالوا الشباب يبون الملقاط ..

عالعموم لازم نصير مثل الشباب ..

أنا أحدد هالمناطق : الحريق (( أو إحدا قراها اللي حولها )) أو حوطة بني تميم (( أو إحدى قراها اللي حولها )) أو جبال طويق وامتدادها (( العمارية - صلبوخ - غيانة - حريملاء - ملهم - المهاوي )) .. : ) .. أو يم سدير ..


وتتبعنا الردود حتى اكتشفنا الفاعل :) .. اللي هو أخوي الغالي : s h a g r a n ..

تراني أمزح معك يالغالي .. وأحب الميانة شوي .. : ) .. تقبل شكري وتقديري ..

..

[بوعبيد السويدي]

تسلم على صور الشلالات...

[حساس جدا]

هذا في جنوب الرياض قرب حوطة بني تميم( اذا قربت قل قربت)




ولكم تحياتي حساااس جدا

[شاص2006]

أنا مع راي أخوي يزيد هذي الطوقي ,,,,,,,,,,,,,,,,,,,,,,,,,,...................

[الدرعيه]

هذي الشلالات في القديه علي يمينك وانت نازل

[صقر العثمور]

لاتعليق وجاري التفكير

[المؤمن كالغيث]

جنوب غرب قارة الرياض

:)

[زعفران1]

ماشاء الله الرحمن

[نمر البراري]

الصراحة ماعرفت وينها فيه

[حساس جدا]

هذا في الحريق اذا ماكنت واهم

[EFI.4500]

عند تمير ومكشات لاهل تميربوقت المطر وش رايكم ياهل تمير
والملقاط اباخذه منك لو انت بالعرااااااااااااااق

[ابووولجين]

هذي بعد مزرعة الملك خالد مع المفرق تلف يمين تجيك في الطلعة اللي فيها منعطف يعني (( الطوقي ))

[الرحااال]

هذي في سدير الظاهر بالروضة اخبر في شلالات هناك

[آل مغيرة2011]

في فرنسا ..جنوب جبال الألب بخمسين كيلو وأنت طالع من باريس .

وخل ملقاطك لك .

هاهاهاهاها .

لاتزعل اخوي تراك مصختها ..مر حدود سنتين ولم تعطي الاجابة .

[الخيال2006]

اعتقد انها بحوطة بني تميم

وشكرا لك

[speed 557]

سبحان الله العظيم

[الدرعيه]

خلاص عاد طولتها علمنا وين المكان

[ابوحماد]

هذي في واحدي نساح او ماوان

او الحريق

[هدير الموج]

كل هذي الردود والجائزه ملقاط ولا عاد رجع راعي الملقاط

شلون لو كانت الجائزه غضاره وش بتسوون هههههههههه

كل عام وانتم بخير

[رمال النفود]

أقترح ترك الموضوع ينزل بالأرشيف ..
واقتراحي يعود لسببين :
1- الموضوع قديم جدا جدا. 2- لا يوجد تفاعل من صاحب الموضوع.
ياسرهيد الساحات شكلك تتجاهل الرد ..
و مبسوط من ردود الناس ،، وشكلك تبي تلعب بأعصاب المسلمين .
المتوقع ياجماعة أنه يتابع الموضوع بشكل دوري (لأنه لا يزال يكتب في المنتدى بشكل مستمر) ولكن لا يريد الرد هنا !
مع العلم حاولت مراسلته بالخاص (قبل شهرين) ولكن بريده مليان !!
تحياتي .. ليست لكم بل للملقاط !!!!
وعيدكم سعيد 3/10/1429هـ

[رمال النفود]

قبل ثواني تم ارسال رساله بالخاص ، للأخ سرهيد الساحات .. للتذكير لعل الرجال حقا نسي الموضوع ..

[a7a7]

رد والا مارد سنتين والا ثلاث ملقاط والا وجار
للفائده : الشلالات هذي وانت رايح للتنهات قبلها لازم تمر علي الطوقي وانت رايح للطوقي تجيك الشلالات وانت متوجه للطوقي يمين وانت طالع الطلعه وقبل تلف يسار الزامي

وسلامتكم

[mntf13]

السلام ...
كل عام وانتم بخير ..

حسب توقعي انها في الطوقي ...

ابو لين ..

[سلايل كحيلان]

الدعوه يبيلها ملاقيط مهوب ملقاط يا سرهيد العالم كلها جابت لك الوصف


ههههههه

[عمر السليمان]

اخاف ما حصل ملاقيط

[شمالات نجد]

الملقاط ضاع..!!

ههههههههههههههههه

عسا خوينا مافيه شي الله يستر عليه

سلام

[عاشق البن]

الله يخلف عليكم
هذي والله العالم
انها في الحاير
والملقاط لي
تقبل مروري

[آل مغيرة2011]

أقترح ترك الموضوع ينزل بالأرشيف ..
واقتراحي يعود لسببين :
1- الموضوع قديم جدا جدا. 2- لا يوجد تفاعل من صاحب الموضوع.
ياسرهيد الساحات شكلك تتجاهل الرد ..
و مبسوط من ردود الناس ،، وشكلك تبي تلعب بأعصاب المسلمين .
المتوقع ياجماعة أنه يتابع الموضوع بشكل دوري (لأنه لا يزال يكتب في المنتدى بشكل مستمر) ولكن لا يريد الرد هنا !
مع العلم حاولت مراسلته بالخاص (قبل شهرين) ولكن بريده مليان !!
تحياتي .. ليست لكم بل للملقاط !!!!
وعيدكم سعيد 3/10/1429هـ
لاتتعب نفسك الله العالم ان عنده واسطة يعني موضوعه لن يحذف .. :no2: :no2:

بس لايحذفون معرفنا :j :j

زمن العجايب :confused: :confused:

[سرهيد]

السلام عليكم

المعذرة يا اخوان

والله الذي لا إله الا هو اني لم اترك الموضوع تجاهلا مني لكم

ولكن لأن الموضوع كان في خيمة الرحلات البرية واكثر تواجدي في العدد .

ثانيا - الموضوع قديم ولو تلاحظ تاريخ كتابته لرأيته

16/01/2007, 11:53 PM

واليوم تاريخ 6-10-2008

يعني تقريبا فوق السنة والنص

وولولا رسالة تنبيه من الاخ الكريم رمال النفوذ لم انتبه له

والاخ الكريم sh a g r a n (http://www.mekshat.com/vb/member.php?u=45445)

هو من قام برفعه واجزم انه لم ينتبه لتاريخ للموضوع

وعلى العموم ولاتمام الموضوع واغلاقه في نفس الوقت اقول ما يلي :

اولا من جاوب او دار حول الحمى هو :


هذي يالسرهيد شلالات الواشله تحت ديراب

لكن للآسف لم يحدد بالضبط وين ، لان وقت المطر يكون هناك شلالات ولكن هذا يكون اكبرها

ثم جاء بعده الاخ الكريم فهد1415 اللي هو اول من جاوب الاجابة الصحيحة


بعد نقطة ديراب تروح يسار مع مفرق الحائر وبيجيك شعب على اليسار..مقابل مزارع هناك..هذا الشلال فيه..

وهذي هي اول اجابة تكون اقرب للموقع

ثم جاء الاخ الكريم :



السلام عليكم
الله العالم انها عند قلته الواشلة - طبيعة الأرض والشجر - نفس المكان -
انا مشبه على شجرة الحماط اللي فوق .
تحياتي



مع انه ما اكد بالضبط لكنه قال انه في الواشلة ولكنه لم يحدد وين تكون .

ثم جاء الاخ الكريم





اشوه الملقاط اول يابو عبدالله




هذي الله يسلمك اذا وجهت لديراب فافرق للواشله يسارواستمر نزول لين يجيك حرف تي فافرق يسار تجاه بلدة الحاير وامش وعلى يمينك مزرعة الامير لين يجيك خشم والماريه عليه انتل فافرق يسار وخش للشعيب وانص الضلوع ووجهك شمال لين يجيك مفرق يمين ويسار خذ يمين واتشوف الشلال من بعيد واستمر بالموتر لين يوقف بك ثمن واصل كعابي لين ترقى وتقرب من المصب الاول وااستمر في الصعود الى المصب الاكبر وهو فوق واذا تبي شريط فديو عام 1418 وهو يضرب ضرب الله المستعان


يالله ابي ملقاط مذهب


وكان وصفه دقيقا بالمرة مما يعني انه قريب من المنطقة وممن يعودها :) كفشناك يا ابو اسامة انك من الأحياء القريبة من ديراب .

:no2: لكن كان الاخ الكريم فهد1415 سبقه بالاجابة الاقرب


ثم جاء رمال النفوذ مطربق يبي المليقيط على باله انه ما سبقه احد :no: وارسل على الخاص على باله ان الملقاط والم له ، الظاهر انه ما قرأ الردود اللي قبله بالموضوع وجابوا صح

بس علشانه نبهني وكان حريص ومتابع يبشر بمليقيط اخوه الجائزة توصل لين حد بيته

ثم جاء اخونا عبدالله الحربي متأخر ويشكر لحسن الصور الله يرفع قدره ويغفر له ولوالديه .

ثم جاء طارق البلوي مدرب راسه يقول انها في السعودية :D الله يضحك سنه شكله راعي وناسه وساعة صدره الله يخليه لعين ترجيه .

بعدينا جاءنا راعي الصطحة ، يوم شاف طاري شلالات قال اكيد فيه ناس بتغرق وتنسحب سيارتها :)

ثم جاء ص م س 985 الرجال واثق وحاط بريده ما عاد الا يوصف بيتهم بعد يقول بالمجمعة :) الله يضحك سنك يا راعي البريد

ثم في الرد رقم 42 واحد ذهين كفش السالفة على ان الموضوع قديم بس انه مشى مع الربع وما بقى مكان ما ذكره ... راجعوا الرد رقم 42 علشان تعرفون من الذهين هذا .

ثم مرنا راعي السويدي منبسط بالصور الله يوسع صدره بالعافية آمين

وحساس جدا على باله انه قريب قال انه في الحوطة ، هو اقرب لك من الحوطة ، لاني متوقع انك من سكان السويدي :)

وراعي الشاص ما لك لوا جعلك تسلم

راعي الدراعية اقولك قريب بدوا حوله

[سرهيد]

المؤمن كالغيب ، مع الخيل يا شقرى مع انه من المدينة :) بس يعجبني اللي يعيش مع الناس

وزعفران ( تسني به ) قاعد يتمقل في الشلال من زينه .

وحساس جدا عاود الكره الظاهر عرف اني متعيد في الحريق قال خلني ارمس هالرمسة اشوف اجرب حظي .

الا وش معنى ارمس :) :)
و efi4500 الرجال واثق يبي ملقاط شمالي عراقي

واقوله منتب يمها ولا حولها :)

ابو لجين ما لك لو ، الا انت ابو لجين راعي الساحات رفيقي :)

الرحال ما لك لوا

عبدالله 2005 يمون شكله من الربع قاعد يقولوا مصختها وين الملقاط ، لكن وسع صدرك تمون جعلك تسلم يا راعي فرنسا .


الخيال ولو شكله من الحوطة ، لا مو من الحوطة


والاخ الكريم speed تلفظ بالفاظ الله يأجره عليها آمين فقد ذكر الله عندما رأى هذا المنظر الله يسعدك ويهنيك قل آمين

وراعي الدارعية طفش الله يهديه وما تكرم ينبه عبر الخاص لاني والله ما انتبه للموضوع

وراع البل ابو حماد على انه قريب من تلك المناطق ما جاب العلم . لكن ما ينلام راع البر يتوه من كثر تشابه الاماكن


وهدير الموج ما اعجبه العلم والا كل هالعيصة اللي علشان ملقاط ، بس عاد اي ازين بذمتك الغضارة والا الملقاط وخاصة ان الشتاء قرب وجت حاجة الملاقيط :)

وانت بالف صحة وعافية يا الطيب واحب المزاح مع الجميع

ورمال النفوذ في رده رقم 62 جاب طبلونه وطفش الله يهديه وبعدها ما صبر كتب تنبه لي على الخاص الله يرضى عليه ويالتيه كتبه مبكر يوم كنت متواجد قبل العيد . لكن اشوى انه نبه والا ما انتبه الا يومكم

واعترف لك اني ما تابعت المووضع الا بعد رجوعي من السفرة بعد العيد وان عيني ما شافت الموضوع في رمضان كله الله يرضى عليك وعلى الجميع .


ونعم انا اكتب بشكل مشتمر ولكن في خيمة واحده فقط ونادر اطلع منها اللي هي خيمة العدد اللي القى نفسي فيها .

ولا اعتقد ان كل راعي بر يترك مثل هالخيمة لان فيها خبرة الجميع يطرحونها ويستفيد من الجميع

لذا ادعوا الجميع بمتابعة الخيمة وسيجدون ما يسعدهم فيها

وفي الرد رقم 63 واحد يعجبني امثاله ، مطنشين يقولو رد والا ما رد

مع ان معلومته ليست صحيحة

واخونا mntf13 الا لا ينتفنا ولا اياه آمين لا في الدنيا من هوامير الاسهم ولا في الآخره آمين

قال انها في الطوقي وهذا طبعا خطأ

وسلايل كحيلان يقول لا تجي الا ومعك ونيت محمله ملاقيط :)

مع ان اللي جابوا قليل

وعمر السليمان شكله راعي مزح :)

واخونا في الرد78 الله يرفع قدره عرف اني ما تأخرت مطنش وحس ان الامر فيه شيء وقال عسى ما فيه شيء ، لانه عارف اني ما اتردد على الرد على اي شخص .

وما اقول له الا الله يرحم شيبانك اللي حسيت بالامر وحسيت باخوك انه ما غاب الا بسبب .

وتسلم جعلك في الجنة

وراعي اللين او مدري البن :) ترى امزح

يقول في الحاير هي حولها

اما اخونا عبدالله الله 2005 الله يهديه ما ادري وش مزعله ما غير قاعد يقول هذا له واسطه ليش ما حذف موضوعه

يا اخوك عسى ما في موضوعي سب والا شتيمة :)

والله اني موضوعي من الاساس هدفه توسعه الصدر وتعريف الناس ببعض المناطق الجميلة

وعلى العموم تراني ما ازعل جعلك تسلم ووسع صدرك ، بس عاد لاتضيق على اخوك تراه يحب اهل مكشات كلهم ويغليهم من قلبه وانت واحد منهم

[سرهيد]

فيكون الاخ الكريم فهد1415

هو اول من جاء بالاجابة

فهل انا مصيب في ذلك اما لا

ويستاهل انه يوصله لحد بيته

تقبلوا احترامي والعذر والسموحة على التقصير حيال الموضوع

اخوكم ومحبكم

ابو عبدالله

سرهيد

[رمال النفود]

جزاك الله خيرا ..
وعذرا إن كان عصبنا عليك شوي ..
تحياتي ..
ليست لك ،، بل للملقاط !!

<<< تراه يمزح

[بوسلملم]

هذي الشلالات في القمر :p

[شمالات نجد]

الله يجزاك خير وردي رقمه (67) أخوك أبو عزام

الحمد لله على سلامتك

وأخونا فهد يستاهل الجائزة لكن مع تعويض عن التأخر بيز وكبريت أصلي :)

الله يوفقك والجميع

سلام