هايلكس والتعديلات

[Waleed1]

السلام عليكم

طبعا منذ سنين وانا لم اعرف اتعامل او اقود الياباني واخص الهايلكس
استسلمت وشريت هايلكس سياره اثبتت جدارتها طبعا دفع رباعي مديل 2015

طبعا لاحظت بعض القصور علي الموتر وارجوا من عنده خبرات التعديل ان يعيننا والله المعين

اولا ضعف التعشيق رقم اثنين مع وضع الدبل بالرمل واذا بغيت ترقي صيهد او طلعه المكينه تموت
طبعا القير الاول قوي ويجمل القير اثنين قوي بدون الدبل

ثانيا السياره يابسه واغير مريحه تناقز واجد وحقيقه فكره بشيل السست ووضع يايات بالخلف واذا حد قد سواها يساعدنا
بهذا الموضوع كفرتها شوي يابسه نوع برجستون مع العلم وعلي خبري هذي كفرات لينه والهوا 30

وسلامتك

[Waleed1]

السلام عليكم
افا ولا احد يكتب لنا شي

[Waleed1]

ماش يااخوان وش بلاكم

[الحربي 591]

وعليكم السلام ورحمه الله وبركاته ..

مبروك ماشريت والله يعطيك خيره ويكفيك شره ..

بالنسبه لضعف التعشيق اعتقد السبب المكينه ماهي ذاك الزود خصوصا انها دفرنسين ..

اما ان السياره ماهي مريحه .........هايلوكس تراها:p
تفك ولا ما تفك تبقى هايلوكس:D

الكفرات اللي على سيارات تايوتا للاسف ما تسوى انصحك تغيرها بميشلان او اي نوع غير برجستون و دونلوب
في الجيب عندي كل لفه يفحط فيها و كل ما افرمل يفحط

[Waleed1]

جزاك الله خير. يظل بالامكان عمل تعديلات تساعد. وشكرا اخي علي المشاركه

[كشته وشاهي]

وعليكم السلام ورحمه الله
مالي خبره بالهايلوكس ولكن من تعديلات الاخويا
مرهمين مساعدات ويايات امامي لاندكروزر 98ومريح بالحيل
مركبين مروحه كهرب بدال الوكاله
حبيب الكل قزوز وهدرز بحريني
هذا اللي اذكره وبالنسبه للعزم فطبيعي 4سلندر هذا هو ضعيف ويبي دعس
اتمنى انك تسفيد منها واي سؤال حاظرين

[جني صغير]

العزم الثاني أكيد بيكون بطه
بس تراه يجمل الاول بالحيل

الونيتات كلها مناقز

فيه ناس يحطون خيشتين رمل بالصندوق عشان المناقز

[وسيع الصدرر]

حياك
انا اعاني من نفس المشاكل الي انت تعاني منها لاكن الراحه مافكرت اعدلها واخلي الموتر مريح لاني راعي مراقى وشغل واحتاج الموتر يكون صلب

لاكن فيه حلول اول شي العزم صدق او لاتصدق ان حله بصيط ولا يكلف فقط تفك الشخالات الي هي دبات التلوث بالشكمان بيختلف عزم الموتر بشكل موب طبيعي خصوصن بالثاني يسير عزمه نفس الواحد ولا يموت عزمه ابد حتى اني جربته بغراز تخبر الثاني دايم ينكب بالارض الغراز لانه يبدا يموت الين تطفي السياره لاكن اذا فكيت الشخالات انسا انه العزم يموت وحتى لو الموتر غرز يبتل الموتر شاد بالثاني الين تجلس على الدفرنس والعزم شاد ولا تحس بضعف ابد
السلبيات صوت شوي مزعج بس ماتسمعه الا اذا كنت شاد على الموتر هذا شي الشي الثاني يبدا الموتر يصرف بانزين بسيط جدآ يعني قبل موتري يمشيني بالديره 450 كيلو يوم فكيت الشخالالت سار يمشيني 430 كيلو فرق بسيط جدآ

اما الراحه فقط شل السسته الام وركب تانكي ما بالحوض وشف الراحه حتى ممكن تشيل اكثر من سسته حتى تاصل لراحه الي تبيه

وهذي فقط للي يبحث عن العزم بالهايلوكس بعد بحث وتجربه
يصفي المكينه ويفك الشخالالت ويركب كلتش رياضي كامل ويركب كارونت كلتشات وخذ عزم لامكينه لكزز ولاترهيم
المعذره كثرت الكلام

[الصيادالمليح]

سيارة 2015 توها جديدة و تبي تعدل و ترهم و تقص و تشيل و تحط ؟؟؟ وليه شريتها من الأصل ؟؟

[ابن عكاش]

معي 2015م هايلكس دبل اعطيها من جيد إلى جيد جداً جربتها في عدة تضاريس والكفرات خليت هواها على30 ديره وبر وصارت حلوه وبصراحه الموتر ينشد به الظهر للكشات وراعي التمشي والصيد المعتدل
علماً كان معي شاص قبله وجربت جيوب واشوف ان الموتر مافيه خلاف بس لاتحمل عليها واجد او ترفعه عن الوكالة علشان عزمه مايتغير
وبالنسبه للمطب مريييح خصوصاً انه ونيت وبالتوفيق

[Abdullah Fo.m]

حسب تجربتي في هايلكس 2011 دفرنس واحد غمارتين

الموتر يجي بلد 5 سست .. انا فكيت سستتين وما خليت إلا 3 سست في كل جهة
الموتر إختلف إختلاف عظيم.
لكن سالفة انك تشيل السست كلهم وتقل نظام التعليق إلى يايات فهي فكرة حلوة وانا مفكر فيها قبل واتوقع بيتغير الموتر
غير كذا اذا كنت تركب معك تانكي أو اغراض بالصندوق راح يكون الموتر أريح

( إذا خليت 3 سست فقط بدلاً من 5 سست إحتمال انك إذا ركبت اغراض ثقيلة ينزل الموتر أكثر من أول وممكن يظل نازل حتى بعد إنزال الأغراض)

بالنسبة للقوة
قدامك بعض الحلول :
1- تفريغ الشخالات ( مجربة والفرق وااااضح)
2- سبرنت بوستر , ما يقوي السيارة ولكن يعزز الإستجابة فقط
3- رقليتر ( ما اعرف عنه شي ولكن سمعت انه يفرق بالعزم)
4- منظم كويلات رياضي ( كذلك ما اعرف عنه شي فقط سمعت)
5- بدلاً من التفريغ .. أشتر هدرز لونق .. لونق لونق لونق لونق , انتبه يكون قصير لازم يكون لونق ولا ما راح تلاحظ فرق
لونق ويكون يستبدل ماصورة التفريغ ويركب على دبة بلد .. الصوت ناعم وأقل إزعاج من التفريغ بقليل
6- المراوح ممكن انها تقوي السيارة بأنها تبردها فقط .. اما لو كنت ما تكشت إلا بالبرد الشديد فما راح تحتاجها

[Abdullah Fo.m]

بالنسبة لموضوع انها بأثنين يضيع عزمها بالدبل
فشي طبيعي .. أنت لو تركب جيب 8 سلندر وفيه اغراض ثقيلة مره بيموت ب 2
الحلول اللي من وجهة نظري:
*تخفيف وزن الموتر
*عدم تنسيم الكفرات أقل من 20 ( عشان يفحط الكفر ولا يضعف عزم الموتر )
* المشي بالدبل الثقيل بنمرة مثل 4 .. لكن بيحتمي عليك الدبل والمكينة
* الحل الأمثل هو تغيير التروس لتروس أصغر .. يعني مثلاً الموتر بدل ما يمشي بالثاني 90 تركب له ترس يخليه يمشي 80
طبعاً في حال تغيير الترس الخلفي لازم تركب ترس امامي يتناسب معه وإلا ما راح يعشق الدبل
( اتوقع والله العالم ان تروس الديزل مناسبة .. )

[Abdullah Fo.m]

تظل الردود السابقة وجهات نظر .. قد تصيب وقد لا تصيب .. يجب عليك الرجوع لأهل الخبرة , وفق الله الجميع

[Waleed1]

السلام عليكم

أشكركم من كل قلبي على الردود الرائعة وشكرا لكم جميعا