ايهما افضل الباترول بلاتينيوم 2016 او لاندكروزر 2016 gxr

[qariah]

السلام عليكم ورحمة الله وبركاته
اخواني واعزائي في هذا المنتدى الغالي
اتمنى ان تكونوا بأتم صحة وعافية
في الحقيقة انا محتار بين سيارتين الباترول بلاتينيوم او gxr لاندكروزر
مع العلم في الوقت الحالي السيارتين متقاربة جدا في السعر (الجديد)
ياليت الشباب اللي جربوا السيارتين يعطوني رأيهم بدون تعصب لاي نوع من السيارتين وانا انسان استخدم وتطول معي السيارة لايقل عن 5سنوات
انا شخصيا جربت الفتك واخر سيارة استخدمتها gxr 2010 v8
و استخدامي للسيارة كشتات وصيد بدون طرد ومطامر ولااحب التطعيس
واعتذر على الاطالة وما خاب من ااستخار و استشار
تقبلوا تحياتي محبكم ابوعبدالرحمن

[hgvfdu]

سلام عليكم
والله يا الطيب الموترين كلها شيوخ لكن من واقع تجربه رفيق لي كان معه لاند كروزر ظ¢ظ×ظ×ظ¨ وخذ له باترول se ظ¢ظ×ظ،ظ¥ ويقول بعد ما جربه حوالي سبعة شهور انه ما فيه مقارنه لا من ناحية القوة ولا الراحة طبعاً قصده الباتول افضل
اتمنى اكون افدتك

[المنيعي1]

وعليك السلام ورحمة الله وبركاته
انا مستخدم جديد للباترول ولا اقدر افيدك بكل التفاصيل ولكن عندي بعض الملاحضات الي لاحضته بين السيارتين حسب تجربتي للجي اكس ار مع بعض الزملا
يتميز الباترول برحابة بالمقصورة وتحس فيه فخامه زايده ومراتبه كأنه اريح وابر شوي ديكوراته وتصميمها افضل خفه وقوه عزل الصوت ممتاز.
ال جي اكس ار يتميز بالنور العالي افضل لأن العالي بالباترول فاشل لازم تغيره.

[المميـز]

البلاتنيوم مواصفات لاحصر لها وراحه بالقياده ووساع من الداخل خصوصا المرتبه الخلفيه
ومراتب الصف الثالث تسدحها على وجهها ويوفرلك مساحه اكبر للتحميل
شكل خارجي مميز ويجمع بين الفخامه وعشاق البر
الجكسار ينقصه كثير من المواصفات الموجوده في البلاتنيوم وبالاخير نفس السعر
والبلاتنيوم مكينه اكبر من الجكسار
والله يكتب لك اللي فيه الخير
ودامك جربت الجكسار 2010 غير هالمره وماتندم ان شاء الله

[qariah]

اخوي hgvfdu (http://www.mekshat.com/vb/member.php?24006-hgvfdu) و المنيعي 1 مشكورين وماقصرتوا
و ارآكم محل اهتمامي

[qariah]

هلا وغلا بمشرفنا المميز
مشكووووور وماقصرت
فعلا انا اميل للتغيير
ولكن قلت خلني اسأل الشباب في منتدى مكشات ماشاء الله خبرتهم وتجربتهم تختصر عليك الشي الكثير

[ابن كديميس]

وعليكم السلام
الباترول افضل .
المنافس له من الاندكروزر الفكسار

[qariah]

هلا اخوي ابن كديميس
طيب اذا قارناه بال vxr ايهما افضل البلاتينيوم او vxr

[ابن كديميس]

كل الموترين طيبات وفيه انظمة تجدها بالفكسار ولا تجدها بالباترول والعكس ايضاً.
والفكسار يجي ثلاث انواع وكل نوع يفرق بالسعر
والمواصفات والباترول نفس الشي
ميزت الفكسار حجم المحرك 5700 cc وعدد الاحصنه 362
وموديل 2016 تبديل الجربوكس 8 تبديلات واضافات جديده عن الموديل السابق .
وحجم مكينة الباترول 5600cc وعدد الاحصنه لفئة Le 400
ولفئة se 320
الباترول يتميز بخفة القيادة وحجم المقصورة اكبر
والسعر ارخص من الفكسار .

[الدوسري2010]

اذا تقارن جي اكس ار ونيسان خذ النيسان اما اذا تقارن الفي اكس ار ونيسان خذ الفي اكس ار افظل وشكراً

[ابوسند9]

وعليكم السلام
ما فيه مقارنه بين الباترول 320 والجكسار
عن نفسي
اذا الجكسار 2016 ب 219 الف فل كامل ,ازودها شوي واخذ فكسار اقل نوع ب 235 الف , مكينه 5700 لتر وقير 8 غيار
لكن انصحك تستاجر وتجرب سوء ددسن او فكسار

[فارس العمور]

ازيد على كلام الشباب يكفيك ان الباترول كل شي فيه اصلي شد بلد وليس ملصمك عند كل بنقالي مثل الجسار

اللاند كروزر هو الـ VXR اما الجكسار نص مميزاته تلفيق بتلفيق

[سحايب صيف]

فكسار او باترول 320 بلاتينيوم

مركب مريح

وسع

انعم

الباترول بدون مقارنه

بالنسبه للفكسار

اقوى

اعتمادي ولا يتفكك (بالنسبه للباترول صعب الحكم عليه عمره كله خمس سنوات فقط اما الاند تاريخ قديم ومشهود له بالسياره الاعتماديه )

واعانك الله على الحيره

لكن لا تنسى الاستخاره

والله يكتب لك مافيه الخير

نصيحه اخيره اذا رسيت على الباترول

خذ الدفعه الثانيه من موديل 2016

يوجد بها مروحه تبريد اظافيه

[بايسن حار]

الباترول افضل
بس حط في بالك ان التويوتا اي ورشه تستقبله عادي ومشاكله معروفه عندهم كلهم
النيسان من يوم يشوفك الهندي من بعيد يأشر لك تدق ريوس لأنه ماعنده استعداد يبتلش فيه

هذي معاناتي انا مع الفتك له معي 4 سنين وراح اشتري جكسار يكفي انك اذا فتحت الكبوت ماتشوف الا فلتر الهوا والبطاريه والباقي فاضي مافيه شي
النيسان اذا فتحت كبوته تشوف حرب
ليات صغار واسلاك ومواصير وخراطيش وهذا طالع وهذا نازل ماتقدر حتى تدخل يدك زحممممه

اذا الامور هذي ماتهمك خذ النيسان
لأنه اخف نفس وهذي ميزه مهمه جداً

[MNH]

بختصار
التويوتا
شيك يحفظ سعره وقوي بنيه متماسك موتر كد ومد وخراباته قليله واستهلاكه للبنزين اقل من النيسان وصيانته كلن يعرفها

النيسان اريح من التيوتا واخف نفس وافضل في البر يتمشى في اماكن يحن ويرن فيها التيوتا لكنه يتهرقل بسرعه وسعره يتهاوى بسرعه وعمره الافتراضي اقل من التيوتا بكثير ويصرف بنزين اكثر
شف وين ميولك والله يوفقك والاستخاره افضل من مشورتنا جميعا

وعفاك

[كومبو]

السيارتين عينين في رأس
معلومات بسيطة عن مستقبل الباترول
في 2017 سيتوقف محرك 5.6 ذا قوة 317 حصان على الأغلب وسيتوقف قير 5 سرعات أيضًا
محرك الباترول من 2004 وهو نفس المحرك موجود على التيتان والأرمادا يعني 13 سنة بينما محرك اللاند 4.6 موجود من 2010 على جيب اللكزس GX460
في 2017 سيكون هناك محرك جديد 6 سلندر للباترول بقوة 275 حصان وقير 7 سرعات
في 2017 من المحتمل أن يأتينا الأرمادا الجديد من أمريكا (اللي باختصار باترول ثان) بقوة 390 حصان + قير 7 سرعات وأكيد بسعر أرخص من الباترول لأن الأرمادا أمريكي والباترول ياباني
مدري إذا ممكن هذي المعلومات ممكن تجعلك تتريث إلى بعد العيد أو بالكثير بعد الحج لكني لو كنت مهتم بالباترول فأصبر هالثلاث شهور وشوف الخيارات الموجودة

لكن لو تقول ما أقدر أصبر أقول خذ اللاند

[john silver]

التويوتا مايطلب ، النيسان افخم بس يطلب

[turkiq]

متشابهين بس اذا تتكلم عن الأعطال الباترول الجديد مشاكله اقل واخف .. الللاند ظهرت فيه مشاكل مختلفة بعضها قوي
ولا اقولها تعصب للباترول بس خذ فرة على منتديات تويوتا ونيسان واطلع على الامر بنفسك

[قمة افرست]

تبي النصيحة

اذا تبي السيارة ديرة وبر خذ تويوتا
دايما نفكر بالشكل والمواصفات وننسى أمور مهمه
الصيانة والقطع

[بواسامه]

توني بايع الثنين
جربتهن
جكسار 8 سرندل
بلاتنيوم
وكلها فكيتها جددييييييييد
وكلها خسرتني حول 30 الف في اقل من ستة اشهر

وعن قناعة تامة تامة تامة

التويوتا موزون والتحكم بقيادته اسهل وصرفيته اقل وعزله افضل

النيسان ارحب واوسع واريح مطب وكمالياته رايقه وعيبه مواد تصنيعه لك عليها كديكور
وله ونة في الصيف بسبب المروحة الامامية والنور ضعيف والأسوء فيه فرامله اذا مفاجئ ممكن حادث لانه يقفل الابي سي

ولكن بعد التجربة ارشح تويوتا وبقوة


بذات فكسار او لكزس 5.7

وغيرها تضييع وقت

[Kato]

الله يكتبلك الخيره

[مطر وربيع]

انصحك بالباترول على الاقل يجيك شده وحدة من المصنع
اما الجكسار ملفق تلفيق حتى الخليجي صار تلفيق
والمصيبة العب في الكهرباء من تركيب حساسات ودعاء سفر وواي فاي وشاشات ديفدي وهذا تخلي كمبيوتر الفيوزات(كمبيوتر البودي ) يعلق ولاتستغرب لو علق كمبيوتر مثبت السرعة او الدعسة الكهربائية تعلق !!
السيارت الجديدة ماهي مثل القديمة علبة فيوز وضفاير وبس الحين كلها كمبيوترات او كمبيوتر رئيسي يوزع الكهرباء فولت فولت بشكل موزن

[بر وعزبة]

السلام عليكم ورحمة الله وبركاته

تبي أعطيك العلم وأنا أخوك من مجرب
كان معي 2008 شاريه عام 2011 واستخدام ثلاث سنوات والآن معي باترول 2012 استخدام سنتين

ابعطيك العلم من مجرب ولا تسأل طبيب .

GXR يمتاز بالرساوة أكثر وبالسفر ممتاز لكن فيه صوت حنه خفيفة مقارنه بالباترول

الصيانة شخصياً لم يفرق معي كثير الGXR فيه مشاكل القير مثل صوفة القير خربت معي 3 مرات
ومشكلتها تنزل القير كامل .
الباترول مشكلته الوحيدة الحرارة لازم تنتبه للموية باستمرار كل اسبوعين تشيك على الموية .

قطع الغيار متشابه الأسعار مع وجود العيسى الآن تغير الوضع للنيسان .

الباترول اوسع وأجمل داخل المقصورة لكن عيبه في المواقف داخل الزحمات لأنه أطول من GXR بحوالي 30 سم

الباترول صوت المكينة أهدى بكثير من الGXR وتحس أنه موتر سفر لكن لا يوجد رساوة في الخط يدك على الدركسون لازم
طبعاً يقال السبب جنط 20 والجنط 18 أرسى بكثير من ال20 لكن ال20 أجمل .

الGXR أكثر صرفية بنزين وأسأل مجرب السيارتين والباترول أقل صرفية بالديرة والسفر .

الباترول النور زفت مره كأنه نور كامري مع سواق ليموزين يالله يالله تشوف وأغلبهم غيره زينون VXR وأنا منهم .

الGXR المرتبه الثانية خلف السواق المسافة ضيقة مقارنة بالباترول أوسع .

الباب الخلفي للGXR افضل من الباترول لأهل البر بسبب وجود تكاية الباب للتقطيع للحم والبصل وغيره .
عكس الباترول لكنه يتميز بالفتح الكهربائي والتسكير من نفسه .لأهل الديرة عندهم أفضل حق الباترول .

زجاج الباترول خفيف وعلى طول ينكسر عكس الGXR

الGXR عيب مصنعي قوي في مثبت السرعة انك تحط ايدك على قلبك لو شبكته
عكس الباترول وهو مهم جداً في السفر الطويل .

الباترول عيب قوي اللون البيج الداخلي للديكور في الوسخ الزايد خاصة الي بياخذ SE .2 خاصة الي عنده بزران .

فتحة الباترول أصغر من الGXR .

الGxr عيب قوي فيه في الطعاميس ارتفاع الحرارة عكس الباترول شيخ .

الباترول في البر أشهد انه ذيب طيارة لحقين القنص وتشبك الدبل وأنت على سرعة 80 عكس الGXR

كفرات الباترول أغلى من GXR بحوالي 300 ريال أتكلم عن جنط 20


ودمتم سالمين وأسأل الله لك الخيرة في الشراء .

[ابوريان القحطاني]

يعني وش نشري ابلشتونا ههههه ماعد عرفة وش اخذ