يرحم والديك( لاتحرمني نصيحتك )

[م س ح]

وش رايكم في الجيب فورتشنر الجديدة من تويوتا (( إيجابياته وسلبياته ))

[أبو حـــمد]

و الله هالجيب خاش مزاجي من مبطي ... بعطيك اللي أعرفه عنه :
1.الجيب تم تجميعه في مصنع في تايلند مثل الهايلكس " و هذا ما يقلل من جودته لأن أغلب قطعه يابانيه".
2.الجيب هذا أول موديل له 2006 يعني توه جديد و أغلب الورش ما تعرف له ( حط هالشيء في بالك).
3.يجي منه مكينتين الأولى نفس الهايلكس "4 سلندر"2700 CC و الثانية "6v سلندر"4000 CC.
4.موديل 2007 طوره عبداللطيف جميل و حط فيه فئات جدد هم GXوVXوSPORT((السبورت لونه جديد هو أزرق نيلي))أنا شفت VX و هو فل كامل 6Vسلندر و فيه ميزات غير موجودة في 2006 مثل المثبت و الجنوط و مكيف خلفي .
هذا اللي أنا أعرفه ...و الله أعلم و الشباب ما يقصرون معك

[أبو حـــمد]

معلومة ترا سعر Vx اللي هو الفل 98,000ريال و الله أعلم

[ع.ف.الدرويش]

مسح.. مساء الخير

بصراحة الجيب مايخش المزاج وسعره غالي جداً بالنسبة لفئته..!
تفضيلي واقتراحي لك بانك تتوجه للبرادو عرفت 2 جربوه وما شاء الله تبارك الله موتربمعنى الكلمة

هذا اقتراحي لك.. وما يبقى بالأخير إلا أقول أستخر الله قبل كل شيء
والله يوقعنا وإياك الموقع الصالح..

أخوك..( أبو فهد )

[أبو مسفر]

لا تصير حقل تجارب
على الاقل خذ برادو
ووجه تعرفه ولا وجه تنكره

[م س ح]

مشكورين يا أبوأحمد والدرويش وأبو مسفر على المرور والنصايح الحلوه والله يحرم ها الوجييه عن النار.

[بارود برنو]

ماينفع ولا بريال نصيحه لاتاخذه
وريح بالك وخذك هدد او vxr

[salehhd]

السلام عليكم

الموتر حسب علمي ممتاز وعملي وحرك 4 سرندل ضعيف ويصرف اكثر من 6 سرندل بسبب الوزن

يعيبة ارتفاعة الكبير فقط

وكذلك المقعد الخلفي ضيق وهو مبنى على قاعدة الهايلوكس

وانصحك بالاستخارة قبل كل شي

بالتوفيق

[الدحبول]

شكله حلو
بس وش مواصفاته ؟؟؟
لان شفته من الخارج
هل فيه ديفلوك 2 تانكي بنزين مثبت سرعة
توكل على الله وخذ قير عادي لان فلتر القير مارح تحصله الا في الوكالة ويقولون غالي و 6 سرندل 4 ليتر مكينة برادو
والله يعطيك خيره ويكفيك شره

[طخيمان]

والله يالغالي الوالد معه فورتشنر 6 سلندر والله سيارة راااااااااااااائعة وممتازة بكل ما تحمله الكلمة من معنى

قوية + مريحة + متماسكة

ومن قوتها ماشاء الله الدبل ما أشغله في البر أبد ورقيت به طعس التحدي بدون دبل

بس فيه مشكله ان تانكي البنزين صغير شوي (ما يزبن) في الخطوط الطويله

ومن نا حية الفزَة الظاهر لو تشغل الدبل وتقاوم لومينا اس اس تقوم عليها

بكل اختصار

رائعة

[المدمرة]

انا من ناحيتي انه الافضل

[م س ح]

مشكورين يا الحبايب على المرور والتوجيهات الحلوه (جعل ربي يحطكم في الجنه)

[الفتى المجازف]

ماخبرت ان التايلندي يرجى منه خير..وهذا عن تجربة
تصورو حك بي كابرس 2005 وشال الصدام الامامي كاملا
يوم وديته للورشه قال تدري وش مثبت به مشبت مسمير بلاستيك
وكلها انكسرت المهم ثبته بمسامير حديد واقعد لي اسبوع والقى كبس الصدام طايح
يوم جيت اشوفه لقيته ملزق بالغراء شد بلد.
اضف لذلك الاكسسورات الداخلية كل شوي طايح لي شي سواء من المفاتيح او من الغطاء
لحديد المراتب.
تبي الصراحه موتر تايلندي مائة بالمائة ماعدا القير والماكينة فهي للبرادو القديم
اللي من موديل 2001 وتحت يعني انواع التصريف والبركه في ابو جميل
له نسبة 10% من الشركة الام.
تحياتي للجميع

[ملبق غلـــــط]

والله نصيحتي سعره غالي ولا يسوى
خذ لك نيسان ابرك لك والا لاندكروزر

[غالي]

انا ماعندي خبره كافيه فيه
رغم ان واحد في العمل توه مطلعه اقساط ويقول انه غير مريح
والله اعلم
وعندي انا شخصيا ماينفع
اول شيء رفيع ونحيف
قد قد قد يكون سبب في سرعة الانقلاب والله اعلم
ومن رايي تلفت النظر عنه اخوي
وعندي تشتري باث فايندر ابرك منه بالف مره
يا 2005
او 2006
واتمنى لك التوفيق

[system]

مثل ما قالوا الاخوان ال4 سلندر ثقيل ولا يمشي الى درجت انه ما يتعدى 140 من رداه هذا من ناحيه والاشياء الثانية من عيوب ومزايا ماادري عنها والله..........

[م س ح]

مشكورين يا الحبايب على المرور و التوجيهات ( يسلموا ) الظاهر مافيه إلا الفتك وبس وش رايكم

[برهوش]

انا معي طال عمرك فورشنر 2006 قير اتوماتك 4 سلندر
طبعا ال 6 سلندر اقوى مكينة لكن الي معي جربتة في النفود وماشاء الله ماتحتاج الدبل نهايا ليش :
الموتر خفيف ورفيع ونشيط في نفس الوقت.
نهاية الكلام ال 4 سلندر ماهو شين بالمرة اذا كان الهايلوكس يسمونه غزال النفود وهو بدون دبل فما بالك بالفورشنر وهو دبل .