تكـــفون يالــربع (( وش )) تنصحــــوني فيه و الثانيه خــوذو حذركم حتى لاتصيرواضحايا

[واحد من الناس]

أخـــــــــــــــواني السلام عليكم و رحمه الله أولا أريد النصيحه و الثانيه عقب اللي صار لا بد أقولكم وش اللي صار و الله على ما أقـــــــول شهيد حتى لا يقع أحـــدكم في اللي انا وقعت فيه . الله يسلمكم عندي لاندكروزر 2003 gxr وكاله مشى 1000 تم تشيكه . مشى 5000 تم تشيكه . . و أنا خارج من الوكاله قال لي أحـــد الفنين و بحسن نيه . ليه الجنوط غير أصليه ؟؟؟؟؟؟؟ قلت من اللي قال ؟!!! . كأنه تردد وشوي إلإ ينادونه . و من غير أساله قال لا . لا . أمزح معك أصليه . في الحقيقه صار عندي شك . و رحت للوكيل الخاص بــ الكفرات و قابلت فني فلبيني و سألته هل الكفرات و الجنوط ok قال لا و ناظر تاريخ الكفرات و إلإ كل واحد له تاريخ . و قال الجنوط تجاريه و البلوط مفكوكه أكثر من مره و بايزه . أرجو منكم وش تنصحـــــــــــوني فيه . و كيف أثبت حقي ؟ و هل فيه تعويض أو ماشابه . أرجـــو تأخذوا الموضوع بجـــــــــديه . و لكم جزيل الشكر .

[أيمن]

المفروض أن هالموضوع في ورشة السيارات ..

[واحد من الناس]

أخـــــــــــوي أيمن . السلام عليكم صدقت و الله ولكن من حـــــــــر ما بي كتبته هنا ( السوحه ) و معليش فــــــــــــوت الآوله ( الشكوى ) و خـــــــــذ الثانيه

[أيمن]

على العموم الله يحييك ..
وأبرك الساعات في انضمامك لعائلة مكشات، متمنين لك قضاء أفضل وأفود الأوقات معنا ..
ومتمنين أن تجد حلا لهذه المشكلة قريبا ، وبانتظار مشاركات أخرى ..

تحيتي

[الباهي]

يا جماعه الخير

هذي الوكاله مافيها خير والله والله والله

اناحصلي مواقف كثيره الله لايبارك فيهم والله اني ما اتبلى عليهم وبقولكم موقف واحد

من المواقف الكثير اللي حصلتلي معهم نقطه من بحر

والسالفه هذي توها صايره لي عندي لادكروزر 99 طلع فيها خراب وهذا الخراب ان المكينه تخلط الماء مع الزيت اخوكم توهق فكرت ايش اسوي ا يش اسوي قلت اضمن شي اوديها الوكاله حتى لو خسرت زياده دراهم بس ان السياره تضبط احسن من اني اوديها لاي ورشه ثانيه يقعدون يتعلمون عليها المهم ما اطول عليكم وديتها الوكاله
منا ومنا قالولي السياره يبيلها تغيير سرندل لا حول كم يالحبيب قيمته قال قبل الخصم سطعش الف ريال حبيبي بعد حب الخشوم وقهوه عندي في البيت صارت ثلاثطعش الف
قعدت السياره عندهم شهر ونص وانا انتظر تطلع بالسلامه على احر من الجمر ابشركم استلمت السياره ونا قلبي يغلي دفعت لهم الدراهم وقلبي يتقطع المهم لازم بعد الف كيلو ارجعها لهم علشان يشيكون عليها يعني عندها مراجعه عند الدكتور اقصد المهندس ابشركم بعد يومين من خروجها من الوكاله ارتفعت حرارتها شوي شوي الا والله وتطق الحراره ويجيني عقر بقر ياويلي ويلاه توني ناق ثلاثطعش الف ريال مهوب ليره
وطوالي وين وين وين على الوكاله حسبي الله عليهم علمتهم السالفه قالي خلها عندنا
قلت السمع والطاعه المهم ايش طلع فيها ايش طلع
واتصل عليهم ماقدرت اتحمل رد علي المسؤل وقال السياره المذكوره تخلط الماء والزيت
احسب انه يخربط قلت له تمزح ياشيخ قال والله هاذاهو السبب يعني طلع البلى مهوب من السرندل البلى من الراس راس المكينه والله انا اللي راسي قام يدور يعني الفلوس راحت على الفاضي لا وبعد حب الخشوم راح خالي بلاش وكل هذا اللي صاركله من هالمهندسين التعبانين اللي عندهم طلع التشخيص خطا خطا بكل بساطه
يعني لوانهم مضبوطين كان من البدايه قالولي المشكله من الراس ويغيرونه وماراح يكلفني اكثر من الفين وخمس ميه وهم دفوني ثلاثطعش الف لا وياليت السياره صلحت هاذا واحدمن المواقف عطوني رايكم:mad: :mad: :mad: تراها مقفله معي الى الآخر <اخوكم الباهي>

[قتال]

السلام عليكم ورحمة الله وبركاته ،،،

يا أخوان .. واحد من الناس + الباهي .. ولا يهونون الربع .. ما ودي أقول تستاهلون لكن .. :D :D يقول المثل ما يضيع حق وراه مطالب .. الدوله حطت لكم حماية المستهلك ومراكز الشرطة والمحاكم .. وحقكم تضيعونه ..

أخوي واحد من الناس .. إرجع للوكالة وحاول الوصول للحقيقة .. وتوجه إلى حماية المستهلك .. إذا أنت بالسعودية هذا رابط وزارة التجارة ( وزارة التجارة السعودية) (http://www.commerce.gov.sa/) يوجد فيه نموذج لتبليغ عن أي حالة غش ، والموقع يدلك لأماكن الشكوى ، وإذا في غير السعودية بأي دولة من الخليج بلغني أفيدك عن المكان اللي تحتاج مراجعته ..

ثانياً والأهم لكم إخواني .. يوجد مندوب لشركة تويوتا لدى الوكيل عادةً يكون ( ياباني الجنسية) يتواجد عند الوكيل بصفة دائمة بخصوص الكفالة وإلتزام الوكيل بخدمة تويوتا .. مفروض على الوكيل من الشركة الأم .. حاول الوصول له بصفة شخصية وإبلاغه بشكواك وسترى الحلول العجيبة من الوكيل لإرضائك وإرضاء الشركة الأم ( تويوتا) .

أخوي .. الباهي .. لك حق الشكوى بخصوص التشخيص الخاطئ من الوكيل ومن حقك التصليح مرة أخرى على حساب الوكيل .. لكن قدم شكوى لدى وزارة التجارة قبل تصليح السيارة .. لقد أصبح عرف عند العرب بشكل عام بأن الوكيل لا يمكن أن يراجع على كلامه وهذا أكبر خطأ .. فهو تاجر يخضع لقوانين الدوله .. ويحق لك رفع القضايا عليه للحصول على حقك .. لكن تحتاج قليل من الكياسه للحفاظ على حقك ..

هذا الرابط مهم للمستهك العربي
المستهلك (http://www.mostahlik.com/)

أخواني سامحوني إذا كان اسلوبي حاد في ردي هذا .. لأنه شي يفقع الكبد وماينسكت عنه فسكوتك عن حقك يضيع حقوق الآخرين .

[راعي عنيزة]

كان الله في عونك

للاسف عبداللطيف جميل ما يستاهل يطلق عليه لقب وكيل والمفروض يقال عنه : تشليح

يطلب السيارات من اليابان ناقصه نص مواصفاتها الرئيسيه عشان يلفق لها قطع صينيه في ورشتة بجده
مثل الحساسات والريموت والمسجل وغيره وغيره كله صيني وصيني مخيس بعد عشان يوفر ويبيع السياره بسعر يزود عن سعرها الاصلي !!!!!!

وبالنسبه لوزارة التجار عندنا تطلبك الحل وهي ما فتحت الا عشان تحمي التجار الابرياء من جشع المواطنين :confused:

لذلك مالك الا تروح لاداراتهم وتطول لسانك وتبين لهم انك راعي مشاكل ومنتب مسكت عن حقك وهددهم انك تشتكي لشركة تويوتا مباشره

وصدقني كثير من الي معهم جيوب خليجيه ومعهم ضمان دولي ماخذو حقوقهم من ذا الوكيل التعبان الا بذا الاسلوب

[عريدان]

:alarm: :alarm:
السلام عليكم يا إخواني ورحمة الله وبركاته
يبدو أن رأيي زي راي أكثر الأخوة "شركة عبداللطيف جميل" فاشلة في مواضيع إرضاء المستخدم أو الزبون وناجحة في الخدمة السيئة والعناية بالمضهرة قبل المصلحه ، وبجلب سيارات ذات مواصفات تخلي الواحد يحس كنه ماخذ السيارة منهم كصدقه والسؤال ماذا يجب أن نبداْ به لحماية أنفسنا من هذا الاستغلال والاستغفال و ماهي المقترحات لكي يبدأ عندنا المستهلك من فرض أولوياته على هؤلاء التجار المتلاعبين على حقوقنا:
أولاً : سأبدأ بما عندي لكي تتواصلو معي لنصل إلى الخطوات النظرية المعقولة "قانونياً" لبدء التأثير على مثل تلك الوكالة وغيرها كثير وتلك هي إقتراحاتي :
1- أنا مستعد لتقبل إستعراض وجمع كل المشاكل التي تتعلق بين كل متضرر "ووكالة سيارات" فقط ومن ثم التنسيق مع الإخوان المتضررين للبدء بخطوات المطالبة.
2- أرجو من كل شخص يكتشف سوء إصلاح أو تلاعب حقيقي ومتأكد منه أن يحتفظ بجميع الأوراق التي معه بخصوص عملية الإصلاح وإن لا يوقع على أي كرت إصلاح مباشرة إلا بعد إجراء عملية طلب كشف و تشخيص أولاً تحدد مكان العطل والتكلفة التقريبية. من قبلهم على كرت آخر منفصل قبل عملية البدء في الاصلاح.
3-بما أن الوكالة لها شخصية قانونية ومسئولة عمن تخوله بالكشف أو الاصلاح فهو تحت مسئوليتها وتتحمل جميع الأضرار التي يحدثها بسبب سوء مهاراته الفنية.
4- إن يد الله مع الجماعة فإن وجود عدد كبير من الشكاوى بيد شخص موكل من قبل المتضررين على شركة معينة في وقت متقارب جداً يمكن أن يكون ورقة قوية للضغط على تلك الوكالة أو الخرى لكي تعدل مكمن الخلل لديها وإصلااح وضع المتضرر مهما كلفها من جهد ومال.
5-أرجو أن يستم النقاش حول ذلك الموضوع لأن كل واحد منا قد أكل علقة أو تلقى صفعة من وكالة بسبب الغباء الذين يعملون عندهم وبإسمهم .
:burnout2:

[القماري]

لن أضيف أكثر مما تفضل به الأخوان، وبالخصوص ما ذكره الأخ ( قتال ) .
وأقول ما عليك فعله:-
أول شيء صور الكفرات الحالية وأحتفظ بورقة التشييك إلي صار في الوكالة.
ثانيا تأكد من أكثر من أخصائي لنوعية الجنوط وهل هي أصلية أم لا - حبذا لو تذهب لفرع آخر للوكالة وتسأل إن كانوا أصليين أم لا ؟ وإذا تمكنت من هذا الأثبات كتابيا فهو الأفضل.
ثالثا توجه للوكالة (للمسئول عن الصيانة) وأخبره بالأمر (مدعزم بالصور والوثائق) إن فادك فأهلا وسهلا وإن ماطل معك فللمدير رأساُ.
وإن لم يفد فأتصل بالوكيل نفسه وأخبره بالقصة كاملة وإذا لم يقتنع فعليك بما ذكره ( قتال ) وإتصل بالمصنع وأرسل الأيميل مدعوم بالصور للمصنع وللمنتديات وأفضح المسألة.
الأوراق في معظم الأحيان تفيد وتخيف الخصم وإذا تمكنت من تسجيل المحادثه بينك وبين خصمك فهو عز المطلوب وهو أكبر إثبات وحجة.
أهم شيء أن لا تسكت عن حقك ( قد يكون الفاعل أحد العاملين بالوكالة قد غير الجنوط في الفحص الأخير وليس شرط أن يكون الوكيل نفسه )

[Y&Y_4X4]

مع احترامي للجميع ماوالله تاخذون حق ولا باطل من ورطة عبده جميييييييل آسف عفوا لا،، تبون تأخذون باطل فقط وبالهبل.
تبي تشتكي رح وافلقني اذا استفدت شي غير المشاوير والمرمطة وقلة الحيا ..

الحل.

لا تشري منهم شي ولا تصلح عندهم شي البتههههههه.

تقول ضمان ، يأخي الضامن الله سبحانه وتعالى وضمانهم هذا ببلاش يأخذون اكثر من المعقول تخيل تشييك ال 500 كم بأكثر من 200 ريال على ويش.

واخرتها مثا اخوي هالضعيف اسأل الله العلي القدير انه يخلف علية وعلى كل من كان ضحية لهذه الشبكة من النصابين المحتالين .

ودمتم

[شاص]

أنا الحقيقة أؤيد كلام الأخوة عريدان والقماري في الإلحاح في طلب الحق وإن لستدعى ذلك مخاطبة الشركة المصنعة لأني حسب ما سمعت من بعض الشباب اللي صارت لهم مشاكل مع بعض المنتجات وماردهم إلا الشركة الأم وصلوا لنتائج طيبة خذ على سبيل المثال أحد الأقاري اشترى سيارة bmwجديدة على وقتاها كان موديل 93 فئة il730 الحاصل أن السارة كان فيها خلل تصنيعي دخلها الوكالة كم مرة يطلعونها يقولون صلحناها إلين أنفقعت مرارته من كثر مايوديها الرجال خاطب الشركة وزودهم ببيانات كاملة عنه وعن السيارة كم يوم إلا والوكالة تدق عليه ويطالبون السيارة وتعرض على مهندس ألماني ويتضح أن فهيا خلل تصنيعي ويبدل بسيارة جديدة من نفس الفئة مع اعتذارات من مسئولي الشركة ، فأنا أقول أن كثرة الطق تلين الحديد ولاتتنازل مهما كانت الأسباب...

[الباهي]

والله ياشباب ان هالوكاله ماوراهم نتيجه
تصدقون ان السياره الى هالحين عندهم وهاذي بعض فواتيرهم عندي تعرفون تاريخ دخول السياره13 12 2002
يعني خساره فلوس وحجز السياره بدون فايده وازيدكم من الشعر بيت شكلهم قاعدين يتعلمون على سيارتي طيب ايش الحل انا وراي دوام وتخيلو سيارتي مااقدر استلمها لان
الاخوة الاعداء المهندسين ماخلصو انا مااقدر اتحرك لايمين ولا يسار بدون سياره

والله وشكلها السياره راحت فيها وشكلي انا بروح فيها

اخوكم
الباهي

[راعي لأولة]

اشتك وريح راسك والى واللة ماتطلع بشي لكن زي ماقلو لك الاخوان رح للغرفة التجارية او وزارة التجارة حماية المستهلك بس قبل هذا قابل المدير يمكن يكون رجال متفاهم وينحل الموضوع واللة يكون بعونكم

[واحد من الناس]

الســــــــــــــلام عليكم و رحمه الله أولا مشكورين يا أخــــــــــــوان على هذا التجاوب ثانيا و الله ما أشتركت بهذا المنتى إلإ لطرح المشكله فقط ثالثا يعزعلي افــراق هذا المنتى لما فيه عقول واعيه و نيره و يحتذى بها أخــــــــوي الباهي يكون الله في عونك . و أحب أقول لك إني تلقيت من مسؤل منهم يقول لي أطلب سياره تأجــير و سوف يوفرونها لك . و إذا لم يوفرونها عطني خبر. و كان ردي لا أريد إلإ سيارتي كما كانت . (( و هنا لي و قفه أقــولها لك في ردي النهائي )) ........... يعني بأمكانك طلب سياره منهم . أخـــــــــوي قتال كثر الله من أمثالك و نـــّـــــور الله عليك من أجل هذا الـــرائ طرحت الموضوع أخـــــــــــوي راعي عنيزه صدقت و الله هذا ما قاله احد المهندسين لي أخــــــــــــــــوي عريدان ( اعجبتني هذه الجمله ) كأنك ماخذ السياره منهم ((( كصدقه ))) والله مــــّــر علي هذا ألآحســـــاس و أنا أتكلم مع أحدهم أخــــــــــــــــوي القماري الله ينور عليك و يحفظك عندي مايثبت و موقع عليه أخــــــوي y&y 4x4 أقول لك ما قاله أخـوي ( قتال ) مايضيع حق وراه مطالب . أخــــــــــــوي شاص كثر الله من أمثالك و نظره (( حكيمه من رجل حكيم )) أخــواني يمكن أطول شـــوي و لي رجعه .... ((( بس يرجع الموضوع للخيمه العامه حتى تعـــــم الفايده ))) أعـــــــطوا المشرف خبر... و هـــذا لســت شرط .. لآن اللي شاركوا بأرائهم أكن لهم كل أحتـــرام و تقدير و أحب أن يطلعوا كيف أنا أستفدت من أرائهم وكيف أثروا في المــوضوع لا يرجــــــــون إي شئ لا يرجون إلإ قولة جزاكم الله كل خير ........... و لهذا لي رجعه ................................................. مــــــــــــلاحظه مهمــه (((( اللي عنده راي أو نصيحه أو فكره ممكن أضافتها لإني راح أزور الخيمه العامه بأستمرار ))) و راح أرد عليكم رد نهائي في و قته أنشاء الله

[دخيل67]

اخوانى اسمحو لى بالمشاركه بالاتى
ليش ما تراسلون الشركه الام باليابان بالشكاوى الى حصلت معاكم من الوكيل
اطلبوا منهم التصرف مع الوكيل باخذ الحق منه لصالحكم وارسال مندوب من المصنع للاطلاع على مشاكلكم مع الوكيل بانه يدخل قطع غير اصليه فى منتجهم واذا ما تجاوبوا بالشكل الى تبونه ارفعوا شكواكم بالصحف الى الناس وادخلوا الحذير من الشراء من الشركه المذكوره لانهم يمارسون الغش مع المستهلكين
انشالله تحصلون حقكم من الشركه الام

[اسير الصمان]

الله يخلف عليكم يا اخواني علي الي صار لكم بس انا قصتي عكس قصتكم الكلام صار في وكالة نيسان معي باثفندر 2000 مسكين عالكه عالك من يوم شريته كان فيه رجه بسيطه جدا يالله تحس فيها رحت للوكالة وسويت لهم فلم لين غيرو لي طقم كفرات برجستون جديد وبعدين رحت مبسوط الا واالله الرجه موجوده ما راحة بعد وارجع واسوي فلم اقوي من الفلم الاول وغيرو برظه طقم ثاني جديد طبعاً يعطوني ورقة تحويل لم وكالة برجستون وبرجسوتون يغيرون لي الطقم ايه عاد الله يسلمكم برضه بعد الطقم الثاني فيه رجه وكذلك طقم ثالث رجعة قالو وش نسوي لك قلة ابد رجعو موتركم وعطوني فلوسي طبعاً انا اجيهم من سبع الصبح ارتز علي مكتب مديرهم وبعد القلق الي سويته لهم ركبو لي جنوط حقة فل كامل انا جنوطي حديد يوم ركبو الجنوط الكروم ما حطو لي اكواع قلت لا ولله لازم اكواع قالو وللله ان تبطي توكل علي الله قلت الله يسامحكم .

اسف علي الاطالة بس ابعلم الشباب كيف ياخذون حقهم من الوكاللات:p

[Y&Y_4X4]

ياخوان كل الوكالات زينين شوي لاكن ورطة عبدة جمييييل ماتاخذ منهم حقك

انا كان عندي الله يكرمكم دوج 95 العيسائي غير له كل شي حتى بعد ماخلص الضمان والله ما دفعت ريال واحد.

لاكن ابي واحد منكم يكتب لنا مشاركة يقول فيها ان ورطة عبدة جميييل صلحو لسيارته شي على الضمان وبدون مايدفع زلط (يعني فلوس).

[انس المخلص]

للاسف رددو ياليل ماطولك

القضية ليست قضية وكالة و تلاعب القضية قضية انى مافى احد يسئل عنك

نصيحتى المدير و خطابيا و صورة لاحد الجرايد الشرية

و اذا مافى حل المصنع و بس وكثر عليهم الهرج

و لا تنسا اثبات الحالة

اللة يعيننا وياكم على وكالات النصب

:confused: :confused:

[واحد من الناس]

الســـــــــــــــــلام عليكم جمعيا يا أخــــــــــــــــــــــــوان أنا مازلت معكم و لكن طولوا بالكم شـــوي مثل ما أنا مطول بالي و كل شئ بوقته و أبقول لكم ألاســباب . .ياجماعه وش رايكم نقل الموضوع للخيــمه العامه لآن اللي صاير ماهــــو مشكله فنيه !! المشكله و صارت و أنا اريد حلّ ونصــيحـــه و في نفس الوقت تأخــذون بالكم من اللي صار لي .........و المقصد من العامه لآن أغلب الزوار يدخل للخيمه العامه ويذهب لمنتدى أخــــــــــر . و يقول وش لي بوجــع الراس و الورش و هم ألآصــــــــــــــلاح .... و حتى يكون هناك أكثر تجاوب من الزوار و كل يقول رايه . لآن الآراء تختلف . و الله من وراء القصـــــــــــــد...... للمعلوماتكم هناك ضحيـــه أخـــرى و نفس مشكلتي بالضبط و نفس سيارتي جنوط تجاريه + كفرات قديمه و يمكن الموضوع وراه (( مافيا )) أشكر الاخـــــــــــوان اللي قالوا رايهم و إلإ ماقالـــوا و يكفي أنهم عرفوا كما أشكر أخـــــــــواني اللي راح يقولــــــــــون رايهم

[هذا الكلام]

الاخوين الفاضلين واحد من الناس والباهي
الحقيقة شكلكم حليلين بالحيل وضعيفين مثلي والحل اللي جربته معهم ونفع والله هو :
شف لك واحد لسانه طوله مترين بدون مبالغه وقوي حجه ووسيع وجه( اتكلم جاد والله ) لأن انا حصلي مشكلة مع وكالة تويوتا فرحت اكلمهم وتكفون والله يخليكم بس طلعت بدون فايدة ثم بعدين قابلت واحد من اخوياي وقلت له السالفه قالي بكرا العصر تمرني ونروح لمهم (ما تلاحظون قصة حياتي) :D المهم مريت الرجال ورحنا لمهم رفيزي نصا المدير على طول وبدا يلجلج عليه والله انا بدون مبالغة بالصالة واسمع زعاق رفيزي المدير انهبل وش يبي ذا :mad: والنتيجه اللي طلعنا به
صلحولنا السيارة مره ثانيه وبوقت قياسي وعطونا سيارة بديل وهذي للاخ الباهي وعطونا بعد كرت (VIP).
عشان كذا انصحك تسوي:
رح للمدير مع واحد بنفس المواصفات السابقة وهدده انك بتشتكي لليابان وان ما نفع اشتك للمقر الرئيسي بجدة فيه تلفون للشكاوي وشد عليهم بالكلام وان مانفع للشركة الام باليابان مثل ما قالوا الشباب وان شاء الله بتطلع بفايدة وأهم شي طول اللسان ووساعة الوجه مع مثل ها لجنس.
الاخ الباهي ازين حل اشوفه انا انص حقين جدة على طول على الاقل يرجعون لك شي من المبلغ السابق او يعطونك سيارة بديلة لان الخطأ منهم حسب كلامك100%.
والله يعينكم:mad:

[الخبير]

السلام عليكم جميعاً
انا من فترة و أنا أشوف النقاش إلي داير عن موضوع هل يستحق الوكيل هذا اللقب الكبير؟؟؟؟

اشكوى على الله يا جماعة مالك إلا خشمك لو هو أعوج.
و إذا أوجعك أصبعك لا تعالجه اقطعه!!!!

معليش يا شباب كنت منفعل حبتين :D
منذ مبطي و المشاكل هذي تتكرر بشكل مستمر و على ما أضن أن اصحاب الشأن ( انت يا مدير الوكالة ) ما يدري وش إلي صاير. و مدراء الفروع هم إلي ينقلون له كل إلي يوسع صدره ( و الله يا طويل العمر الوكالة حائزة على جائزة أفضل وكالة في العالم العربي و عن ما قرب في العالم كله).

واحد من الشباب كان ماخذ سيارات عن طريق نظام التأجير المتهي بالتمليك من تويوتا ، المهم الرجال تأخر في الدفع فسحبوا السيارات و قالوا له سدد تأخذ مواترك ، المهم الرجال سدد إلي عليه . لكنهم ما رجعوهن له قعدوا يماطلون به لين قرب يدخل الشهر الجديد قالوا له سدد ( لاحظ إن السيارات إلى الآن عندهم ) فما كان في يده إلا إنه يسدد.

على العموم من الصعب جداً إنك تأصل لأحد عيال عبد اللطيف جميل ، و مدراء الفروع ما في الحمض أحد !!!!
لذلك أنصح أي واحد عنه مشاكل مع اي وكالة يشتكي للشركة العالمية على طول.

[راعي عنيزة]

هذا الوكيل غريب عجيب !

اخبرني رفيق لي شاري GXR من ذا الوكيل وبعد شهر اتصل على جواله بنت مغربيه قالت له انه موظفه من المقر الرئيسي لعبداللطيف جميل وتسئله عن انطباعه عن السياره وعن خدمة الوكاله ‍‍!!!!

شبابنا متسدحين بالشوارع ما لقو شغل وذولا رايحين يجيبون مغربيات ؟؟
-
-
-
-
-
-
-
-
-
-
-
من واحد وواحد بيشتري جي اكس ار ماله حاجه فيه بس يبيهم يتصلون عليه ;) :D :D

[هذا الكلام]

ايه والله انك صادز يا راعي عنيزة انا رفيز لي معه جيب لكزس يقول كلما دخلته الصيانه تدق علي هذي يالله من فضلك اللبنانيه وتسألن عن الصيانه وهل انا راضي عنه والا لا بس رفيزي ما يجمع على طول يقول ايه جايزتن لي والظاهر هذي خطه منهم دارين ان الشعب السعودي شهبان :D :D
بس الحقيقة ان هذي الطريقة ممتازة في جلب الزبون والضحتس عليه




وشدو حيلكم يا واحد من الناس والباهي لا تخلونه تروح عليكم

[المنطلق]

لافاح .؟.؟.؟.؟زله


ههههههههههه
والله حلوة

بالنسبه للموضوع من رأيي مثل ماقال
اخوي ((( هذا الكلام)))


تروح للوكالة وتجيب طويل لسان ههههه

[Y&Y_4X4]

عبداللطيف جميل ( الله يرحموه )

يمتلك 51% من اسهم شركة تايوتا اليابانية الام ...............


هذا للعلم ودمتم,,,,,,,,,,,,,,,

[دله وفنجال]

واحد من الناس و الباهي تبون النصيحه اسمع سالفتي شخصين وحكم :

انا اطال الله اعماركم اشتريت كامري فل كامل موديل 99 على وقته جديدة المهم مبصوط الموتر فتحه وجلد ومراتب كهرب وغيره والمشكله شاريها 79000 ريال ناقده نقد وهي ما تستاهل والله .
المراد خربت عندي الفتحه ووديته لفرع عبد اللطيف جميل بعنيزة وقالولي تعال بكره ويجيهم ولد خالي المهم يوم اني ناضرت الموتر لقيتهم امكسرين التخشيب ومخشين الديكور بسياره رجعته لهم وشتكيت وقالو معليش انصلحه لك بس القطعه بجدة ولازم تنتظر اشوي قلت لا انا ابروح للرياض وبطلبه من الوكالة الي بلرياض وليتني ما جيت للرياض .
المهم اني دخلته الوكالة الي برياض يوم الخميس وقالولي الموتر يخلص يوم السبت قلت معليش مافيش موشكله .
المراد جيتهم السبت قالولي ماخلصت وجيهم الاحد قالولي ما خلصت وجيهم الاثنين وبرضة نف الشي ودخل على مدير الصيانه شفه اليماني الي اول ماتدخل فرعهم الي بخريص تلقاه على اليمين الدب ابو كرشه لا بارك الله فيه وشتكي وقوله المتر فيه شي قلي ونذل يقولي لا الموتر ما جاه شي قلتله اجل مايستاهل انه يجلس كل هلجلسه عشان تركيب ديكور وكسسوارات الي خربت اربع تيام وونتم كل يوم تخلص الي بعده عشان شي تافه قالي انت تعرف موترك (سؤال غبي اليماني ) قلتله ايه اعرفه اجل ماهوب موتري المهم جاني المهندس المصري الله لايحلله ويقولي بكل بجاحه (الدنيا قضاء وقدر ومعرفش ايه احنا خبطينبسيارتك وحاولنا اننا نكلم عليك ومئدرناش والواحد يمكن يخروق بلعربيه ويخبط بيها ) المهم المصري قام يعطين من الكلام الي زي وجهوه القبيح
ورحت اشوف السياره ولقاهم اعيال الحرام امسمكرينه ومزينينه ما كأنه جاه شي ولا هم امغيرين الرفرف اليسار والكبوت والباب كلهن رايحات وطي وسبب ان سواقهم الهندي حق الدينا الله يعميه مريوس على موتري وظاف السياره ضف وناضر القطع القديمه ولاه امشقق الرفرف والكبوت ولباب تشقيق .
شف اعيال الكلب يبون ايماطلونبي عشان ما ادري ويسلمولي السيارة كأن ما جاه شي شفت وشلون .
المهم رحت ودخلت على مديره الكبير وشتكيت وفعلت وسويت والله المدير ما قصر معي والله يجزاه خير سعالي بلموضوع وقعد شهرين ثمن دقو على وقالولي تعال اختر الون الي تبيه وروح لمهم وختار الون وستلم سياره جديده لاكن بعد الملاجد ولعان وب نفس الوقت المسايس .
والسبب انهم اعيال الكلب حاطين بلتقرير الي توقع عليه عند دخول السياره للصيانة فقره : ان الشركه تتحمل اي مكروه يحصل للسياره من صدم وغيره .
والمسكين العميل يوقع وهو مايدري وذا جات الطامه الهم يحاجونه بلفقره الي انت اموقع عليها وكذا تسكت ونت ماتشوف الدرب لاكن الحمد لله اني عوضون بسياره .
والله علطول على المعارض بصطحه وبيعه بخسارت 4000 اريال لاكن على قولت المثل (الفكه من جحه غنيمه )
ارجو ان تكون هذه القصه ستفيدكم وغيرها كثير مع سيارتي الحاليه .

[الباهي]

السلام عليكم ورحمه الله وبركاته
اشتقت لكم ياشباب
بالنسبه لسيارتي الين الحين ماخلصت والموضوع كبر لكن ماراح اخليه وما يضيع حق وراه مطالب وبلعن الطيب والردي خلاص رفعو ضغطي وماراح يرتاح لي بال الين اطير مدير الفرع(زول)+مدير الصيانه ((ونا ابو فهد))
وسوف اوافيكم بالتفاصيل الممله في وقت لاحق (بعد ما احوس مريرهم ويضبطون لي السياره غصب))
ادعو لي ياشباب
ودمتم
اخوكم
الباهي

[Y&Y_4X4]

وبأنتظار اخبارك .....

[zlzal]

بسم الله ارحمن الرحيم
اخوي الباهي تحيه طيبه لك ولأمثالك من الرجال الصبورين ويسعدني انك الى هذه اللحظه لم يتسرب اليك الملل أ وفقدان الامل من هذا الوكيل الحرامي سير على نفس الدرب وانا على ثقه بانك سوف تأخذ حقك منهم والله يوفقك وماتشوف الى الزين
وانا بأنتظارالعلوم الي تسر الخاطر منك

[واحد من الناس]

الســـــــــــلام عليكم جمعيا أدري طولت شـــوي (( أعذروني )) لإنــي و الله لهحــين أنا و ياهم !!! بس قربت ـ و بعـــد ما ودي أجيب إلإ الاخبار ( السنعــة ) جارنا أشترى جي أكس أر 2003 هذا اليوم الاحد 10/3/1423 رحت وباركت له و دعينا له أن الله يعطيه خيرها و يكفيه شرها ـ وقلت له يا بو...فلان عسى ما شر !! قال و ش فيه !!؟ قلت له حصل لك بنشـــر ؟ قال لا ! قلت وش في المسامير عندك متأكلة !!!؟ قال غريبة!!!!!!!!!!!!! قلت لة لا ماهي غريبة أسمع قصــــــــــتي قصتي معهـــم قصة و بديت وشرحتلة ســالفتي وياهم و الله أني ما ودي أكدر خاطـــر الرجال (( فرحان )) بس وش أقول !! اللي كدر فرحـتـــة هو عبداللطيف جميل و كما وعدتكم راح أقولكم الســـــالفة و بالتفصـــيل !! بس اللي عرفتة و من مصدر موثوق و شاهدتة بعيني أن جنوط الجي أكس أر موديل 2003 كلها صناعة صينية (( أي تجارية )) و عرفت أن قيــمة ألآربع جنوط تكلفتها 1000 ريال و هي صناعة ألالمنويم و صناعة صيني و الاساس اللي من المصنع حديد و قيمة الجنط الواحـــد 1500 و اللة هذا ما قاله لي و احـــــــد من عندهم

[zlzal]

حسبي الله على الوكيل الظالم لكن ولايهمكم يجي له يوم
!!!!

[الأشهـــــب]

حسبنا الله ونعم الوكيل

عزيزي الأخ قتال الفاضل: يبدوا انك ماخذت لك علقة غش ونصب واحتيال من أحد الهوامير والروس الكبار علشان تعرف تقول رح إشتك لوزارة التجارة وحماية المستهلك؟! وجعله مايصيبك شي لامنهم ولامن غيرهم.
الحقيقة ماقاله الأخ راعي عنيزة هو الصحيح من أن هؤلاء من يبحث من ورائهم أي تفاعل يذكر فهو الخسران بالطبع ، ولكن لو أن هناك من يردع مثل هؤلاء الأنذال لما وجدت من يتلاعب بأملاك الناس ولابمشاعرهم ، ولكن إذا عرف السبب بطل العجب.
سبحان الله العظيم !!!أين الذين وضعتهم الدولة لحماية وراحة المواطن؟!أين هم أين هم من هؤلاء الخساس؟!
من الذي يأخذ بحقنا نحن الذين على قد حالنا؟!
ولكن مع ذلك أضم صوتي للأخوان بأن لانسكت أو تتخاذل بهذه السهولة ولكن مع ماسنلاقيه من تعب ونكد لاينبغي أن نسكت جميعاً عن هؤلاء الأوغاد.
سائلاً الله العلي القدير أن يحفظنا ويحمينا من عبث العابثين ومن الظالمين والغشاشين والنصابين.إنه سميع مجيب.
كما أسأله سبحانه بأن لايجعل كل ضالم وكل عابث بأملاك المسلمين إلا ويفضحه ويخذله ويذله على رؤوس الخلائق.وأن يرد لكل مظلوم مظلمته.
وصلى الله وسلم على نبينا محمد وعلى آله وصحبه اجمعين.

[Y&Y_4X4]

وواصل الله يعطيك العافية.

[mohamad1121]

واحد من الناس بعد التحيه

لك الحق بالمطالبه بما لك من حقوق ولك الحق بالشكوى ( والشكوى لله )

واكرر لابد لك من التأكد من المشكله اولا وبعدها تقوم بالتقدم بشكوى رسميه ولاتتردد بالمطالبه بحقوقك فانت صاحب المشكله والمتضرر اولا واخيرا ، لقد شاركت وهو رأي صائب لسماع نصائح من اعضاء المنتدى والكل وان اختلفت الاساليب في ابداء الرأي انما الجميع انشاء الله متفقون على ان لك حق وانت صاحب القرار اتجه للوكاله اولا وان لم ترى حلا فخاطب الشركه الرئيسيه عبر الانترنت او عبر ارسال فاكس وان لم تجد حلا فالحكومه (( الله يعزها )) لديها المراكز الرسميه من حماية المستهلك وغيرها من الجهات الرسميه فالشرطه موجوده وتقدم بما لديك او ارفع الموضوع للشرع وان لم تجد حلا فالاماره موجوده وكلهم خير وبركه .

والله يوفقك انشاء الله .

اخوك ابوكاسر

[قتال]

السلام عليكم ورحمة الله وبركاته ،،،

أخي الكريم .. الأشهـــــب .. حياك الله ..

يا أخي .. نحن نعيش في مجتمعات طيبه وصافية النية .. فمن هذا الباب يجد المحتالون الطريقة السهلة للنصب والإحتيال على أفراد هذا المجتمع .. فسكوت الناس عن الظلم هو مدعاة لتفاقمه .. ولو قام كل شخص بالتبليغ عن هذه الحالات لوجدت هذه المجتمعات متفهمة لمثل هذه الأمور .. وإذا كان فيه أي تقصير من قبل الجهات الرقابية فلك أن تشتكي عليها .. لأنها تتبع حكومات وليست مصلحة شخصية .. فالمصالح الحكومية لها وزراء .. حاول الوصول لهدفك بالطرق السليمة لتحصل على حقك ..

ولو نظرنا للمستهلك الأجنبي نجد أنه لا يقبل بأقل من المنتجات ذات الجودة العالية والخدمة الراقية والسعر المناسب لهذه السلع في أغلب الأحيان وذلك لوجود رقابة تامة على الأسواق ووعي المستهلك الكافي بحقوقه التجارية .. أما عندنا .. الله يخلف علينا بس .. جهل المستهلك بحقه وعدم الوعي الكافي لأقل أساسيات التعامل التجاري يجعله عرضة لهذه المشاكل .. وللأسف ..

أما بخصوص كلامك عن أنه ما حصلي ..

أنا يا أخي الكريم حصلي أشياء كثيرة مع التجار .. ولي مواقف كثيره معهم ، والحمد لله بأني لا أرضى أن يسلب لي حق وأنا أتفرج عليه مهما كان صغيراً أو تافهاً ..

أما بخصوص تعقيبي ..

أخي الكريم أنا لي عرف جيد بهذه القضايا .. من ناحية القوانين .. والشكاوى .. المحاكم .. وهذا بحكم عملي ..

[الأشهـــــب]

الأخ الغالي : قتال رعاك الله.
أولاً دعني أسألك بكل صراحة ياعزيزي .
لاشك ياعزيزي أنك تسمع مايقطع القلب من القصص المأساوية التي يرويها لك أصحابك أو أقاربك أو جيرانك أو غيرهم من المماطلة والنصب والإحتيال والتلاعب بحلال المسلمين.
والأخر سمع والأخر حصل له، وغيرهم سمعوا وحصل لهم.
وأنا كذلك سمعت وحصل لي الكثير من هذه التلاعبات .
فسؤالي هنا ياعزيزي قتال :هل من المعقول أن تكون الجهات المسؤلة تقوم مع صاحب الحق خير قيام وتأخذ بحقه من المجرمين المحتالين والهوامير الكبار ، ثم أنا وأنت وغيري وغيرك يحصل لنا مايحصل ونسمع مانسمع من المآسي المغبنة؟!لاتقول لي ياعزيزي أننا مجتمع طيب نسكت ولا نحب المشاكل .
والله الذي لاإله إلا هو لو أن كل شخص ٌظلم وغٌبن يعلم بأنه سيجد من ينصفه ويأخذ بحقه لما توانى لحظة واحدة عن تقديم الشكوى.لكن أنني أقوم وأتعب ومواعيد وتطنيشات وغيرها من الأمور التي تهد البدن ، وفي الأخر ماأطلع بنتيجة أو أحياناً يطلع الحق علي!!!!!!!!!! فبالتأكيد أن التحطم المعنوي الذي بداخلي لن يجعلني أتقدم بأي شكوى لعلمي بالنتائج.ولاتقول لي أن فلان قد أخذ حقه بالكامل، لأقول لك الله يخلي له الواسطه ياقلبي.!!!
ياعزيزي دعنا نعترف ونقولها بصراحة متناهية أن الجهات المسؤلة مقصرة بل ومقصرة جداً في هذا الجانب.
هذا هو الصحيح مع الأسف.
والله من وراء القصد.
وتقبل خالص تحياتي،،،،،،،،،،،،،،،،،،،،،،،،

[قتال]

السلام عليكم ورحمة الله وبركاته ،،،

أخي الكريم .. الأشهـــــب .. حياك الله .. مرة أخرى ..

يا أخي الكريم لن أطول عليك .. كان عندي سوبربان موديل 99 ماخذه من الوكيل في الكويت وسافرت عليه لقضاء العطله الصيفية في الطائف في سنته .. وبعد شهر في الطائف نويت أذهب لرحلة أخرى لأبها فقررت أن أفحص الموتر كعادتي عند أحد الربع في كراج في الصناعية لعدم وجود وكيل في الطائف .. فأخبرني بأنه يوجد صوت في القير .. وبعد سؤال إكتشفت بأنه يوجد كراج لبالبيد في الطائف فتوجهت له وكان عندي كفاله من الوكيل .. وبعد فحص أفاد بأنه لا يستطيع عمل شيء لعدم وجود قطع .. فأخذت تقرير منه .. فأخذت السيارة إلى جدة لشركة الجميح على شارع المدينة المنورة .. وأدخلت السيارة وتم الفحص أكد مسألة القير وبعد مماطله قال لي الوكيل بأنه سيصلح القير ولن يتم تبديله .. فرفضت .. فقمت بالإتصال بالوكيل في الكويت وأكد ما قاله الجميح .. فقبلت بالأمر شفوياً وتم التصليح ( ولم أقبل إلا لحاجتي الماسة للسيارة ) .. وعند الإستلام رفضت أوقع على الكرت .. وبعد مداولات وقعت على الكرت مع كتابة رفضي لطريقة التصليح وأخذت تقرير كامل من الجميح .. والحمد لله ذهبت لأبها ووسعت خاطري وبعد شهرين رجعت للكويت وذهبت للوكيل .. وبعد مماطلة والإتصال بشركة جنرال موترز تم تبديل القير بالكامل على حساب الشركة .. ولم أدفع فلس واحد ..

المسألة تحتاج شوية صبر .. وأيضاً قليل من الحكمة ومعرفة القوانين والحقوق ..

أما بخصوص الواسطة .. فأنا واسطتي ربي والحمد لله .. أشتكي لله وأتوكل عليه وآخذ حقي .. وبعدين إذا ضاع حقي عند واحد .. هذا ما يخليني أسكت عن حقي عند الثاني .. وإذا سكت أنت وسكت أنا وسكت المظلوم .. راح يكون هذا دافع لإستغلال بهذي الطريقة ..

هذا اللي عندي أرجو إني ما أزعجتك يا خوي ..

[الباهي]

بسم الله الرحمن الرحيم
الحمدلله والصلات والسلام على اشرفالانبياءوالمرسلين سيدنا محمد وعلى آله وصحبه أجمعين
اخوتي الاعزاء اتمنى أن تكونو بأتم الصحه والعافيه المثل يقول(من طول الغييبات جاب الغنايم) أبشروبالشحم السياره بأذن الواحد الاحد خلاص الامور ضبطت ومابقى اللى ان استلمها من الوكيل على كلامهم انها خلصت
وبشوف الوضع تصدقون يا أخوان انهم غيرو( راس) المكينه وهذاماكنت اطالب به من سنه جدي لكن تنكرو لي
(اللي مايعرف الموضوع يتابعه من بدايته في هذا القسم) وبعد غيرو لي (الرديتر+المروحه) بدون ما أطلب منهم وللمعلوميه الكلام هذا حصل في وكاله عبد اللطيف جميل التي تبعدعني حوالي اكثر من 160كيلومتر تخيلو تعرفون ليه أقسم بالله العظيم أنها مصيبه لي ولكم و الذي يملك سياره من نوع تويوتا السالفه والموضوع كبير
بالمره وانا والله العظيم ماصلحو السياره بشكوى ولابواسطه والله انه يوجد لدي واسطه تقدر تسوي شي لكن ماعطونا فرصه ولا الواسطه نفعت على اني على حقك وما احتاج واسطه لكن سدوها بوجهي لكن بتقولون لي
ايش سويت بقول لكم كل شي بس بعد ما أستلم السياره من عندهم واضمن التصليح ، وبأفضحهم وبالتفصيل
وبخاصه الوكيل اللي بمدينتي وبذكر اسماء المتورطين بغشي وحتى انهم غشوا الاداره( بجده) لكي اطلع أنا على
خطأ والفرع على حق لكن أنشاء الله اني على وشك آخذ حقي حتى لو على طريقه من تحت الى تحت زي ماسوو فيني (أنقلب السحر على الساحر) وصدق الاشهب

[الباهي]

اقسم بالله العظيم اني ماقلت اللى الصدق والله على ماأقول شهيد
وللحديث بقيه
اخوكم
الباهي

[واحد من الناس]

الســـــــــــــلام عليكم جميعا بجــــــد و الله أتحفتوني بأرائكم و نــــّـــــــورتوني الله لا يّحـــــــــرم الاجر من أدلى برايه أ و من قدم نصيحة أ ومن قراء الموضوع و لي رجعة قريبة مثل مقال أخوي الباهي

[الأشهـــــب]

عودة مرة أخرى مع الأخ الفاضل: قتال
أخي الفاضل قتال لقد قرأت كلامك والذي تقول فيه أن طيب مجتمعاتنا التي نعيش فيها وصفاء قلوبهم هو السبب في مايحصل من تلاعب وضحك على العملاء ، ثم بينت انا وجهة نظري في هذا الموضوع ، ثم بعد ذلك ذكرت لي القصة التي حصلت لك مع الوكالة التي إشتريت منها سيارتك(الله يبارك لك).ولكن إسمح لي ياعزيزي فيما سأقول لك:
أخي الفاضل قتال :إذا كان الله جل وعلا قد أنعم عليك وفضلك عن غيرك بأن أعطاك الله لساناً سليطاً ، وفكراً رزيناً، وطولة بال على أناس كؤلائك الكائنات التي تتقنع بقناع الإنسانية ، فهل كل الناس مثلك ياعزيزي؟!
أعتقد أنك تعلم أن الناس أحوالهم وأمورهم تختلف طبعاً ، فهل يستطيع إنساناً مسناً أن يقوم بالعمل نفسه الذي قمت به؟! وغيره الذي لايملك الوقت للمماطلات والروتينات المملة والمقرفة لأن عمله لايسمح له ، وذلك الذي المسكين الذي لايعرف كيف وماذا يصنع .
أخي العزيز قتال ليس كل الناس يستطيعون أن يوظفوا ألسنتهم وعقولهم على أهوائهم فهي ميزة يضعها الله فيمن يشاء من عباده. ثم أنني إذا كنت لن أستطيع أن آخذ حق لي إلا بعد مشادات وتهديدات باللسان فهذه في الحقيقة جداً مشكلة. إذاً مادور (جناية المستهلك) هنا؟! أين الذي يفصل في المسألة هنا ويأخذ بحق الضعيف؟!
ثم ياعزيزي لماذا لانكون صريحين ؟!ثمة أمور كثيرة ياعزيزي نحن ننغبن فيها وحبيبتنا(جناية المستهلك) تتفرج بل وتصفق للمجرم.
خذ عندك ياعزيزي على سبيل المثال لاالحصر:
أسعار قطع الغيارللكثيرمن ماركات السيارات ، وكذلك الصيانة التي أكثرها سرقة جيوب المسلمين؟!!!!!!!!!!!!!!!!!!!!!!!!!!!!!!!!!!!!!!!!! !؟
كوكالة لكزس ، ولاتهون وكالة متسوبيشي ووكالة سزوكي وBMW و........و.........و........
فهل يعقل مايحدث يابشر؟!!!!!!!!!؟
أسعارقطع الغيار في هذه الماركات أصبحت تضاهي بل قد فاقت في بعضها أسعار الذهب؟!؟!؟!؟!؟!؟!؟!؟
وهذا مثال على ذلك وهو فيض من غيض.
في سيارة لأحد الأقارب وهي من نوع سزوكي فيتارا، كانت أنوار الشمعات فيها شيء من التقطيع وعدم ثبات قوة الأنوار ، فبعد الكشف عليها قال تحتاج السيارة إلى كتاوت ، فذهبنا إلى محلات قطع الغيار فلم نجد لها أثراً !!!!!!!!!!!!!وقال لنا الكثيرمن الباعة أنها لاتوجد إلا عند الوكيل (إنظر كيف الإحتكار والظلم ، والقادم مذهل) عموماً ذهبنا إلى الوكيل وسألناه عن القطعه فقال موجوده ، سألناه بكم ؟كم بالله عليكم تتوقعون أنه قال ؟!
أتعلمون كم قال لنا سعرها؟ قال بـــ 500 ريال والله بعدما قالها ذهلت من كلامه؟!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!؟
وهي والله قطعة لاتتعدى ربع حجم الماوس(الفأرة)؟!
ولكن إذا عرف السبب بطل العجب.
فهل يابعد قلبي لو أن مثل هؤلاء الكائنات السافلة والظالمة وجدوا من يردعهم ويعلمون أنهم لو تعدوا حدودهم، وحاولوا الإضرار بالمواطن فهناك من سيقف لهم بالمرصاد، هل سيتجرؤون؟!لاأعتقد ذلك بل ويستحيل .
أخي قتال لاتزيد المواجع مواجع وانا أخوك وخلها على طمام المرحوم على مايقولون.
ونسأل الله أن يريد بنا خيراً ، وأن يصلح ألأمور ويصلح أحوالنا وأحوال المسلمين أجمعين.آمين ....آمين.....آمين.
وبالمناسبة أخي قتال أنا لم أقصد أنك انت الذي تخلص أمورك بالواسطة ، فإنك إن لم تكن أنت فغيرك كثير .
هذا وصلى الله وسلم على نبينا محمد وعلى آله وصحبه أجمعين.
وتقبل أطيب تحياتي،،،،،،،،،،،،،،،،،،،،،،،،،،،،،،،،،،،،،،،،

[Y&Y_4X4]

كلام موزون الله يعافيك.
بس فية شوية انهزامية واستسلام, انا اعتقد بعدم الاستسلام للواقع المرير والمحبط في كثير من الاحيان ان لم يكن في كل الاحيان والمحاولة الحثيثة للحصول على الحق الضايع واستخدام جميع الوسائل ما عدا العنيفة منها .

والسلام عليكم,,,,,,,,,,,,,

[الأشهـــــب]

حياك الله أخوي:Y&Y_4X4.
الحقيقة أنا لاأقصد من كلامي هذا أن الشخص يجب أن يستسلم لهذاالواقع المرير مع الأسف ، ولكن يجب أن يقاوم في إسترداد حقه الذي يحاولون هؤلاء السفلة أن يمنعوه منه ، وأن يحاول في ذلك بجميع الطرق المشروعة سائلاً الله التيسيرفي جميع الأمور.
أخوي الكريم Y&Y_4X4. كل مافي الأمر هو أنني كنت أود أن أن أوضح كيف أن هؤلاء القوم يفعلون مايحلوا لهم من ألوان الظلم وكيف أن حبيبتنا (الجناية على المستهلك) تقف متفرجة!!؟؟
أرجو أن تكون فهمت علي وانا أخوك ياY&Y_4X4.
وتقبل أطيب تحياتي،،،،،،،،،،،،،،،،،،،،،،،،،،،،،

[Y&Y_4X4]

واضح الله يعافيك !

لكن عندي كمحة أسئلة للجميع

(((((( حماية المستهلك ))))))

س1 : تعريفها؟
س2: أهدافها ؟
س3: انشطتها الميدانية ؟
س4: تحت اي تصنيف تقع اذا كانت هيئة مستقلة ام منظمة في النشاط الاقتصادي ؟
س5: كيف يطبق افرادها النظام ؟
س6: من هم الاشخاص القائمين عليها؟
س7: هل يقبلون رشاوى ام لا ؟
س8: هل افرادها ومدرائها والقائمين عليها يندرجون تحت المسمى ( مستهلك )؟
س9: ما هي انجازاتها؟
س10: ماهي الآلية المستخدمة لتطبيق النظام المناط بها ؟

تعبت من كثر الاسئلة الرجاء الاجابة وشكرا :confused:

[elshamri]

اللة يوفق الجميع ولا تخلون حقكم يضيع .........

سؤال للأخوان الخليجيين: هل عندهم مشاكل مع وكلاء تويوتا هناك؟

أخيرا ودي لو تكرمتو تنشرون البريد الأ لكتروني لشركة تـويوتا الأم في اليابان و صفحتهم في الأنترنت حيث أنني دائما أتصفح Toyota.com ولكن أكتشف أني في Toyota.com التابعة للوكلاء الأمريكيين.

نبي نلتفت على الجميييييل و نكشر الأنياب عدل!!!!!!!!!!

[واحد من الناس]

السلام عليكم الاثنين سوف أكتب لكم وش اللي صار يعني اليوم تاريخ 16 -ربيع الاخرة

[واحد من الناس]

السلام عليكم أسف على التأخير و لكن صار حل مؤقت و مازالت المشكلة قائمة في البدايه مع هذه المشكلة كانو ينفون ... و في النهاية أعترفوا !!!!
إي و الله أعترفـــوا ... و كم من كاذب فضحــة الله سواء من مدراء أو مســؤلين في هذة الشركة المهم : أعترفوا أن الجنوط فيها عيب و أنها صناعة صينية و أن المقاس مختلف .
و ألآصلي من الشركة في اليابان يكون صناعة يابانية و يكون مقاس 17 أنش مثل الفي أكس أر . على فكرة 17 أنش بس في 2003 الجي أكس أر أما 2002 فهو 16 :
تم تبديل الكفرات و الجنوط جميعها بـ أصلية صناعة يابانية و مقاس 17 أنش هذا مقابل 2500 ريال مع ألاحتفاظ بـ الكفرات و الجنوط التجارية و مازالت المعاملة قائمة بأسترجاع المبلغ و النظر في بعض الحقوق و سوف أكتب لكم إذا جــد جديد

[ق ح ص 411]

اخوي الغالي واحد من الناس
بعد التحية
والله ان صار لي مشكلة مع الوكالة وبالكلام اللين مااخذت شي وجلست لمدة اسبوع كل عصر عندهم لحد المغرب وكل زبون يجي يشتري سياره اشرح له العيوب والخدمة الزفت
لحد مازهقوا مني وصلحو لي الملاحظات الأي عندي بالمجان
عموماً الله بيعينك ويصبرك ........