:: نبي فزعتكم اماكن ومواقع تصلح للتمشية في حايل وما جاورها ::

[باترول4800]

السلام عليكم ورحمه الله وبركاته

مساكم الله بالخير

الله لا يهينكم يا أخوان نبي فزعتكم

ناوين نروح لحايل والنفود الكبير بإذن الله بعد كم يوم ونبي اللي عنده أسماء أماكن معينة تصلح للتمشي والتخييم يعطيناها مشكورا مأجورا بإذن الله

وإن حصل يعطينا أحداثيات لها الاماكن يكون أفضل

الله يجزاكم خير ويبيض وجيهكم

[محمد الشاوي]

جبل العليم ياحبيبي أهم معالم النفود يبعد عن طريق الجوف 14 كم فقط
عنده محطة ومزرعة وجمال الغضا غير طبيعي
2845692
4026687
إذا بغيت زود حنا بالخدمة إلى يوم الثلاثاء إن شاء الله .
تلقان على هالرابط أكيد لو نسيت أدخل موضوعك

http://mekshat.com/vb/showthread.php?t=73370

[sohib]

اي مكان في حائل جميل
نفود مليء بالزين والحطب
وجبال خلابه
وشعبان الله يرزقه بالسيل
وسهول ماناقصه غير الربيع
ولحواتن غانمه كل منهم مداهل للرجال
وماعليك زود يالغالي وحياك الله

[جباوي]

أنا في مدينة جبة شمال غرب حائل ( وسط ) النفود الله يحييك ابشر بسعدك مستعدين بأي خدمة تريدها
تحياتي

[شـهـاب]

انت سئلت سؤال عويص :) ( مادري وش معنى عويص )

المهم

ابشر بسعـدك يالغالي

اماكن تمشي اول شي عندكـ مقر الرالي والسوق الشعبي وعروض التطعيس وخيمة الدعوه والدبابات

هذي كله موجوده على طريق الجوف بداية طريق الجوف

طبعاً تمسك طريق حايل بقعاء بعدين مفرق الخطه القاعد بعدين لا وصلت قرية الجثاميه تقريباً يجي 30 كل هالسالفه
يجيك طريق الجوف وبداية الطريق تشوف الزحمه والعالم والاشياء الي ذكرت

اذا تبي مطاعيس الزقرت فأمسك طريق جبه يجيك قريه اسمه قنا 60 كم تقريباً وتشوف الناس تطعس

----------

اذا انت تبي آثار واماكن

فاول شي رح لم جبه 90 كم عن حايل ويوجد به مركز اثار واهلها طيبين

وفيه قبل تاصل جبه مفرق لـ جو - توارن - الحفير - النايلات ( التفيهي )

طبعاً جوا مكان جميل وفيه صحى وام الحلاقيم وفيه طلعة جو وفيها ماء تطلع بك لم مدر وهو مكان جميل مره

وتوارن فيه اثار حاتم الطائي بيته وغيرهـ

والحفير قريه جميله وانا دايم اشبه بالزلفي غاطسه بين الرمال

النايلات ( التفيهي ) مكان جميل للكشته وذرا وقريب منك كل شي

-----

اذا تبي بالنفود فأغلب الي يجون لحايل يروحون لم جبل العليم بس يبغا له قارمن وجيب

------

اذا تبي المغواة - مشار

هذي شمال حائل قبل لا تمسك طريق جبه يجيك مشار يسارك والمغواة

وهو مكان جميل وفيه بعض فعاليات الرالي

--------

فيه السمراء تقريباً جنوب شمال حايل وهو مكان مرتفع وللعوايل

---------

ويمكن واكيد اني ناسي شي كثير بس اذا انت مذكور لك مكان ذكرن به واعطيك وصفه

واي خدمه انا موجود

[هديب الشام]

ابشر والله بالكرم والفزعة النفووووود وجبال اجا

[باترول4800]

الله يعطيكم العافية


ماقصرتوا

[أبو ريشة]

فقط للتنبيه .....

إمارة منطقة حائل وبتعليمات مباشرة من أمير المنطقة (وبعد كثير من القضايا التي وصلت إلى حد القتل) وطوال الشهر الماضي تفرض حماية مشددة جداً على النفود لمنع الاحتطاب ، وتنفذ عقوبات تصل إلى حد السجن هذا بخلاف الغرامات والعقوبات الأخرى ، وذلك من خلال الدوريات الأمنية على الطرق ومراكز الإمارة في القرى ومن خلال تعاون أهل النفود بالإبلاغ عن الحطابة (الصراحة إنهم أناس طيبون وكرماء للغاية ، لكن حميتهم وغيرتهم على أراضيهم ومراعيهم شديدة ) :j



تدرون وش السبب ؟؟؟
مجموعة من العابثين والجهلة الذين يهلكون الحرث والنسل ويؤذون البادية ومواشيهم وهم بهذا العمل يحرمون بقية المسلمين من كل خير .



تحياتي........

[أبو ريشة]

اعتقد ان زيارة الحرة في هذا الوقت مناسبة لأنها جنوب حائل وهي دافية اكثر من غيرها ( حايل بردها هايل ) ... ههههههه

[الضاري]

مساك الله بالخير

أخي العزيز الباترول حبيت أهدي لك هذه الصوره ..

http://www.alwsm.com/wsmg/data/media/2/thum-hail-photo-gallry-10.gif

جيت أبي أضيف رد ما لقيت شي أضيفه

الأخوة ما قصروا بارك الله فيهم

ولا هي غريبه عليهم دائما أهل فزعه وأهل نخوه

لكن أخي العزيز الباترول هذا رابط لموضوع يختص بكل أخبار الرالي ومواقع الفعاليات المصاحبه له

ويوجد من خلاله موقع يفيدك بكل شي عن حائل أتينا بهذه الأخبار ونقلناه لكم من اجلكم

أنصحك بزيارته لأنه يسهل عليك اشياء كثيره قبل ما تمشي

تفضل من هنا أخي العزيز (http://www.mekshat.com/vb/showthread.php?t=72886&page=1&pp=15)

وهذا رابط لموقع لابد أن تزوره ووضع لخدمتكم ..

الخدمات السياحيه في حائل (http://www.barzan.ws/hail/services/hotels.htm)

ونصيحه اخي العزيز الباترول لاتنسى الصعود على جبل السمراء لترى خريطة حائل طبيعية وأمامك

http://upload.wikimedia.org/wikipedia/ar/f/fe/Alsamra.jpg