وين أهل الترهيم

[شاص]

السلام عليكم ورحمة الله ...
عندي استفسار بسيط للإخوان أهل الترهيم ، به أبو شنب م84 نظيف عند واحد من الشباب ويبي يرهم له مكينة جمس ..
1- أيهما أفضل وأقل مشاكل 350 أو 454؟
2- كم التكلفة التقريبية للترهيم؟
3- ما هي القطع التي يلزم تغييرها؟
4- ما هي الورش الجيدة والمتخصصة في هذا المجال سواء بالرياض أو القصيم؟
وللجميع الشكر مقدماً:good:

[القماري]

أخوي شاص بصراحة ماعندي علم في ذا الموضوع ورديت عليك عل وعسى أحد من الشباب يفيدك .
تحياتي

[ابو الريم]

كلامك حلو بس ابي افهم وش ابو شنب هذا ؟؟؟؟؟؟

[laith]

اخوي ابوالريم..... ;)

المقصود بابوشنب هو الشاص ....

ولايهون شاص... وباقي الاخوه الكرام ..

وتحيات كثيرات:D

[شاص]

الأخ العزيز القماري .. مشكور على الرد وماقصرت يالغالي
الأخ الفاضل أبو الريم .. ابو شنب سلمك الله اسم يطلقه بعض العامة على مركبة تسمى (الجيب) وهو على أنواع منها ما هو ذو قفص ويسمونه (الربع) بضم الراء والباء وعند بعضهم (الكبسولة)ومنها ماليس له قفص ويعرف بـ(الشاص) أو (الحوض) وهي مركبات قوية ومتينة تستعمل للمهام الشاقة من طلوع الكثبان و قطع الشعبان ومطاردة الأرانب والضبان ..:D ;)

[الشيخ]

الاخ الشاص

بالنسبة لاختيار المكينة

اولا ما انصحك بالتغيير لانك ناوي على تغيير شامل وهذا بيزعجعك بالقطع والشغلات الثانية

ثانيا اذا انت معزم وموسع صدرك ومخباك على الموضوع خذ مكينة 350 اذا كنت ناوي تستعمل السيارة بالمكاشيت والطلعات بحيث انها اقل صرفا للبنزين
اما ان كنت ناوي الموتر للتطعيس بس حط 454
نرجع للمكينة الاولى ال 350 اسهل بالتركيب والوزن والصرف طبعا وسمعت انه بالامكان تركب على نفس القير
اما بالنسبة للثانية يمكن ما يستحملها القير وتظطر تغيره وتحط قير بليزر وطبعا الدبل معه ثم تجيك مشكلة الدفرنشات يمكنها تحتاج التغيير مع الجير يعني الشغلة مزعجة جدا بالنسبة لل 454

اما بالنسبة لل350 سمعت انها ما تحتاج تغيير للقير بالكامل فقط قطعه مدري شسماها الي قال لي هالسالفة ولا الدفرنشات هذا كلام واحد مجرب بس بصراحة ما شفت موتره

وبالتوفيق انشالله

[ولد روضة سدير]

اخي العزيز الصراحه مدري عن السعر بس الافضل 350 انه عندي وانيت جمس موديل 79 مكينه 350 قوية بالحيل وطياره ما شاء الله فالشاص اخ وزن وال350 اقل صرفية بالبنزين ويكم تحصلها بالتشليح ما يقارب 4000 او 3000 ريال

[شاص]

الأخوة الأكارم .. ليث ،الشيخ ،ولد روضة سدير مشكورين على ردودكم وحسن استجابتكم
لكن بقي سؤال مهم وهو كم التكلفة التقريبية للترهيم ووين؟ ودنا الشباب أصحاب الخبرة مايبخلون علينا

[Bader-M]

بعد التحيه
طبعا 350 افضل
من حيث خف الوزن و الصرفيه
وتعديها غير مكلف مقارنه 454
اما السعار القطع ( طبعا تقربيا )
طقم الاشعال كامل
الكويل والدلكو و البواجي واسلاك البواجي يعني الشغله تكلفك حول 1300 -2500 ريال انت ودراهمك
ثلاجه
2500 ريال
كلبريتر
2400 رايال
عمود
بين 2500 - 90000 ريال انت ودراهمك ...الخ
تبي نصيحتي
ركب مكينة ss 96
المكينه تعطيك قوه حول 300 حصان
وبنفس الوقت غير مكلفه
يعني الشغله كلها 5000 - 6000 ريال
مع التركيب
وريح بالك

تقبل تحياتي

[ابو الريم]

الاخ الشاص


اولا قبل ان اكمل ياليت من الاخوة الذين ليس لديهم خلفيه بالترهيم او التعديل ان لا يتفلسفون لان هذي الشغلات معقده مره واي خطأ لن يكون مجانا بل سوف يكلفك الالاف الريالات .........


الامر الاخر ....... انت ماذا تريد من السيارة ؟؟؟؟؟؟؟ يعني تريد محرك حق استخدام بر وروحات ورجعات ومكاشيت وسياره عمليه ........ ولا تبي سياره قويه تروح تطعس فيها ولا يهمك مصروفها وخراباتها .....

ان كانت تريد الخيار الاول فافضل لك انك تعدل مكينة الشاص وتوضبها او انك تحط مكينة 4500 اللي تجي في الموديلات الحديثه وهذا الخيار عملي واوفر وقوة تحمل الى ابعد حدود ......

اما الخيار الاخر ان كنت تبيه لازم تحط في بالك امور ......... انك متى ما بدأت ترهم معناها ان هذي السيارة مستعده تتعطل في اي لحظة ( لا تعتمد عليها ) امر اخر لا تحسب التكلفه لانها سوف تكلفك مبالغ ليست قليله .......

اما مكاين الجمس ال 350 التي اشاروا عليها الاخوان لا تفرق في القوة عن ال 4500 سي سي حقت تويوتا ان لم تكن اقوى يعني ليست بتلك القوة التي راح تفرق معاك الا في حالة تعديلها ( تلغيم ) وهذا اللي يسويه اغلب الشباب اللي يتسابقون في الطعوس .

......... اما ال 454 فهي اقوى بكثير ولكن مشكلتها في الوزن والحجم سوف تتعبك كثير في تثبيتها وقد تحتاج الى تقديم المقدمه قليلا .....


عموما انت خبرنا وش تبي بالضبط وان شاء الله نفيدك بالتفصيل
وبالمناسبه قير الشاص يركب على المحركات الامريكيه ولكن بتحويله تطلبها من امريكا بحدود 1500 ريال
وقير الشاص او القير اللي يجي بعائلة الشاص ( الربع والشراع والنص والشاص وعلى قولتك ابوشنب ) وكلها قير واحد يعتبر من اقوى القيرات الموجوده في العالم . ومستعد يتحمل اي قوة تضعها عليه حتى لو اكبر المكاين ويعيش معك سنين طويله دون اي شكوى وخاصة الموديلات القديمه .............. ومعظم شباب التعديل والترهيم ما يتنازل انه يستخدم قير اخر ......


تحياتي ابو الريم ,,,,

[شاص]

الأخ الكريم طاير بالعجة مشكور على المشاركة وعلى هالتفصيل الله لا يهينك..
أستاذنا الفاضل أبو الريم مشكور على دخولك ومشاركتك ومانستغني عن خبراتك المطلوب سلمك الله سيارة قوية مايردها شي بتكلفة مناسبة .. لك جزيل الشكر مرة أخرى:good: