المساعد الشخصي الرقمي

مشاهدة النسخة كاملة : ممكن افادة وتوضيح عن المستوي ؟


أبوناصر
07/02/2007, 02:29 PM
السلام عليكم ورحمة الله وبركاته

اخواني الكرام أرغب في المرور على المستوى ورؤية الربيع فيه لكني ما أدري من وين أبدأ

ولا أعرف فيه احداثيات ولا شي


ولا سبق المرور به


فقط أعرف المانعية مكان تجمع التطعيس


لكن فياض المستوي لا أعرفها


يا ليت أحد يتكرم علي ويعطيني وصف للمستوي بحيث يعطيني أهم الأماكن فيه


ودي أبدأ من جنوبه الى أقصى شماله


إن حصل بالاحداثيات يكون أحسن


وجزاكم الله خيرا مقدما
المنبسط
07/02/2007, 05:06 PM
السلام عليكم
اسعد الله ايامك ابو ناصر
اللي اعرف في الوسيع فيضتين ما تحتاج لأحداثية لأنها تقريبا واضحة
ادخل مع مخرج سعد ثم ارجع كانك تبغى الرياض تدور ثلاث ارباع دوره تجيك لوحة ابار سعد ادخل معها يمين ويصير وجهك شمال ثم يجيك حرف تي رح يمين وابتل الى ان يفترق الطريق كنه صروال يمين تروح للنفود وتبتل تجيك براميل صفر قريبة لف معها يسار وابتل تجي في وجهك ارامكو كأنك بتدخلها لا تخاف رح معها يسار ثم رح يمين ثم يمين تصير ارامكو خلفك امش كيلو تقريبا وناظر يمين تشوف طلحة كبيرة واضحة مره وفيه غيرها لكن هي الأكبر وعلى يسارها شعيب فيه طلح اتجه للطلحة الكبيرة هي في الفيضة وهذي اسمها المسعودية وفيه فيضة ام القطا عنها شمال شرق .
أتمنى أني خدمتك
ودمت بود
المنبسط
أبوناصر
08/02/2007, 11:51 PM
مشكور اخوي المنبسط

وشاكر لجهدك


لكني أسأل عن المستوي في الوشم وليس عن الوسيع الله يعطيك العافية
صقر الفهدة
09/02/2007, 07:43 AM
المستوي من بعد شقراء وأشيقر إلى طريق القصيم السريع.

أنت من وين بتجي؟
صقر الفهدة
09/02/2007, 08:17 AM
هذي صور من طلبك أخوي:


http://www.mekshat.com/pix/upload/images26/mk43589_dsc00635.jpg




على هذا الرابط :

http://www.mekshat.com/vb/showthread.php?t=72643&page=1&pp=15&highlight=%E3%D3%CA%E6%ED
أبوناصر
09/02/2007, 09:24 AM
اخوي صقر مشكور وأنا جاي من جهة الرياض


وودي أعرف من وين أبدأ وين أنتهي بحيث يمر الواحد على أفضل ما فيه
برق تميم
09/02/2007, 09:47 AM
حياك الله يا ابو ناصر شف وانا اخوك اذا تبي تطلع مع طريق القصيم السريع وتوجه للقصيم واذا جاك مفرق ام حزم اشيقر شقراء افرق معه ووجهك جنوب طبعا يجيك المفرق قبل ما تاصل القصيم 65 كيلوا قبل ام سدره اذا فرقت امسك هالخط تمشي 30 كيلوا تجيبك على اليمين مفرق ام حزم تعده وابتل الين يجيك لوحه الخويش الجنوبي الطريق هذا تقريبا 85 كيلوا فيه فياض تشوفها على الخط قبل اشيقر فيضة الهوبجه واذا تبي تقدم الى قبل شقراء 15 كيلوا تجيب فيضة المنيصف وجميله ونظيفه وذا تقول ابي المستوي اذا جتك لوحة الخويش الشمالي تعدها الين تجيك لوحة الخويش الجنوبي لف يمين ووجهك غرب وبار النفود وكل المنطقه هذي ربيع وزينه ووجه شمال غرب تمر مفيض الخويش الجنوبي تعده تجيك السحله صفاة يمكن تلقى باقي فيها ماء ابتل الين يجيك الخويش الشمالي وفيه غدران باقيه اذا تبي الفياض الي داخل وجه للابراج تشوفها قدامك اذا جيت الابراج تبي تلقى خطوط قويه تحول للنفود غرب حول معها وتجيب الفياض بس الطريق اقشر شوي يبي لك دبل وهي تقريبا سبع فياض ازينها الشماليه .


386...35....25ش
074...39....44ق

076...41...25
200...35...44


395...37...25
244...38...44

هذي بعض الاحداثيات

واذا تبي تجي من عند ضرما ومرات زين الطريق وربيع طيب اذا جيت شقراء تعدا مرات والقرائن وثرمداء رح ووجهك شمال تعد شقراء على طول يجيك مفرق الدوادمي كبري خله وعلى طول تمشي 15 كيلوا تجيك روضة المنيصف على اليمين تشوفها ابتل تجيك اشيقر والشعبان في هالطريق كلها ربيع وفقع تشوف بعد تعدا اشيقر يجيك السد وماء سبيل يمين روح 20 كيلوا يجيك برج جوال يمين بعد بشوي روضة الهوبجه وابتل الين يجيك لوحة الخويش الجنوبي لف يسار وبار النفود ووجهك شمال غرب والباقي في الوصف الاول

حياك الله ابو ناصر

http://www.mekshat.com/vb/showthread.php?t=68728
صقر الفهدة
09/02/2007, 12:00 PM
ما قصر برق تميم , ابن العم ما خلا لي شيء.