باترول موديل 98 وأعاني من مشكلة وهي ضعف العزم

[أبو ريشة]

موتري جيب باترول موديل 98 ، وأعاني من مشكلة وهي: ضعف العزم ، بالأضافة لتدخين الشكمان بدخان أسود .
أرجو من الإخوان الأعزاء الذي لديهم حلول لهذه المشاكل أن يدلوني عليها .

ولكم كل الشكر والتقدير

[مـسـير]

ابو ريشه حياك الله
يمكن يكون الكلتش ضعيف او وزنيه الديلكو يبي من يضبطها

وبالنسبه للدخان يمكن الكلبليتر يبي تنظيف وانصحك تستخدم بخاخ الكلبليتر المنظف لاتحاول تفكه وتغير اصلاح لأنه اذا غيرت اصلاح خلاص بيخرب زود

وترى غالبا الباترول مشكلته من اللهات ( البوابه حقت الهواء اللي فوق ) تكون قافله او حركتها صعبه من الرمال والغبار العالقه في اجزائها المتحركه

جرب اوزن الديلكون ونظف الكلبليتر بالبخاخ بشرط لاتطفي السياره وانت تبخ حاول انك تزود الدعسه وغير فلتر الهواء

( ترى الجنوط العراض تضعف العزم وأسألني يازين شد البلد بس )

[3BOOODE]

فيه أسباب كثيره منها
البواجي
أسلاك البواجي
وزي ماقال أخوي مسير
الكلتش ووزنية الديلكو
ويمكن إحتمال ضعيف
يكون من خرطوش البخاخ
الموصل من فلتر الهواء
شيك عليه
وأتمنى أنها تنتهي مشكلتك

[الحفولي]

أخي ابو ريشه اسمح لي على التعقيب

أول مانزل الباترول الــ 98 اعجبني شكله وطبيت في واحد سوبر سفاري فل اوبشن

لاحظت ضعف العزم + المكيف في الصيف مايبرد اذا كنت في بر والموتر عليه ضغط

وبما انه اوتوماتك , كنت اعاني من مشكلة تبديل القير اذا قابلني هواء قوي او كان الخط في طلوع (يبدل نمره من كيفه) بالأضافه الى انه كل 3-4 شهور يطلع صوت قرقعه في البلوف يعني لازم يبيلها وزن..

وصلت المشاكل بيني وبين الوكاله الى شكوى طويله عريضه الى ان قال لي شاب سعودي ان مشكلة المكيف خلل مصنعي وبقيت مع مشكلة ضعف العزم ..

سألت واحد من الربع خبير سيارات .. قال هذي مشكله ماتبي الوكاله ولا المصنع يعترف فيها .. واللي هي انهم كبروا حجم المكينه الى 4500 ولا غيروا عدد الصمامات (12) والمفروض ان عدد الصمامات(24)

اعتقد ان نيسان تجاوزت المشكله هذي في الموديلات اللي بعد الـــ 98

مالك في طويلن عازه .. بعته ياخوك بعد سنه و3 شهور بخسارة 50 ألف

اما مشكلة التدخين يبيلك توديه عند ورشه محترمه ويسوون لك تصفيه للمكينه
لكن العزم لحد يغشك .. ماراح تنحل مادام ان فتحة البستم كبيره والصمامات قليله (2 صمام لكل بستم)