وش انت مغبي تحت المرتبه ؟؟؟

[راعي عنيزة]

:D
السلام عليكم ورحمة الله وبركاته

حياكم الله يا اخوان

المساحه الفارغه تحت مراتب السياره توفر مكان ممتاز لتخزين اغراض قد تحتاجها في الكشتات او في اوقات الطوارىء ولعل اكبر ميزة في هذا (المغبى :) )انه يحفظ الاغراض بعيد عن الشمس ويخليها ثابته ويوفر لك اماكن التخزين الثانيه في الموتر لذلك ودنا نطرح للنقاش كيفيه استغلال كل واحد منا لهذي المساحة الفاضيه

وهذا الموضوع يعتبر عايم بين منتدى السيارات ومنتدى العدد ومنتدى الاجهزه الاسلكيه لذلك نزلناه في ارض محايده منعا للخلاف والهوشات :D

بسم الله ابدا بموتري :

تحت مرتبة السائق :
==============
- ماطور هوا سفاري مثل ذا
http://www.carmatedubai.com/product_window_images/compvaccum_volcanoinflator.gif

تحت مرتبة الرديف :
==============
- عدة خفيفه للموتر
- نازع السم وهذي صورته للاخ كاشت من زمان
http://www.mekshat.com/pix/upload/images/naz3sem.jpg

عدة رقع تيوبلس
http://www.mekshat.com/pix/upload/images/Dscn0176.jpg
وهي مفيده جدا جدا جدا وتفكك ذا صرت كاشت من غثا تنزيل قشك وفك السبير حيث مرة كنت في التيسيه والارض وعرة بالحيل ولعلي وطيت فرش شق الكفر وكان الشق كبير وعلى طول نام الكفر وحطيت مكان الشق رقعه ونفخت الكفر وبرضه كان ينسم ورقعته جنبها رقعه ثانيه ووقف التنسيم ومشيت على الكفر حوالي الساعه كلها وعرة لحد ما وصلت ديره فيها بنشر وعايرت الكفر واثره على تعباتي وما نزل


تحت المرتبة الثانيه :
================
واير سحب حديد <= لزوم التغريز :D
اشتراك بطاريه
اريل ستيشن سيار
مسحاة صغيره
سير احتياط
نجفه صغيره


تمت بحمد الله
وتكفون يا شباب لاحد يرد ويقول شكرا :mad:
ما نبي مجاملات ولكن نبي نقاشات وتبادل خبرات لذلك يالله شدو حيلكم وكل واحد يعلمنا كيف مستغل ذي المساحه بموتره وسلامتكم :)

[فرد حمزة]

انا حاط تحت مرتبة السايق

أمبيليفاير 200 واااااااااااااااط :D

وش رايك بالإستغلال للمكان :p

[قتال]

السلام عليكم ورحمة الله وبركاته ،،،

يا راعي عنيزه تكشت بالباص ولا بدينه :D :D :D وش كل هالغراض إلي تحت المراتب هذي ..

صراحة أنا ما فكرت أحط تحت المراتب إلا الحبال والجزم الله يكرمك ومن يقرأ .. والدربيل وبعض الخرائط والإحداثيات ..

[al-nashmi]

والله انا يراعي عنيزه ماحط تحت المراتب الا ((عجرا)) وسلالسل:D :D :D

[ابو سلطان العتيبي]

تحياتي للجميع

أخي راعي عنيزة

الحقيقة أكثر ماحط تحت المرتبه الأمامية هو صندوق الأسعافات الأولية- الدربيل-
مفتاح انجليزي قابل للتعديل (adjustable wrench) - مفك عادي ومربع (screwdrivers).

وسلامتكم

[المرصاع]

هلا بخوي راعي عنيزه ......

أنا تحت مرتبتي 2 شمعة نور أمامي - الآيكوم - الفصفص;) .......

اليمين كميره - قفاز ..........

وتقبلوا تحياتي.........

[laith]

السلام عليكم...

الاخ راعي عنيزه...

ولو ان الخاطر متكدر منك شوي :mad: ..لانك شلت مشاركه لي..وكنت ادور من وراها الاجر..:(

لكنك مسموح و تبقى غالي:heart: ..وعلى كل حال نحن اعضاء جدد وانتم ادرى بالموقع..فلاتشرهون..

اما اللي تحت الاسيات حدث ولاحرج.:D .!!خذ عندك..غرشة ماء ام4 ريال واشتراك بطاريه و مغك عجل وبعض العده المنثره ...ومنشار حديد.. وخيشه فاضيه..... وسلامتكم..;)
;)

[الاجودي]

والله من العدة الي حاطه انا

1-كبس 1000000 وات

2-وايرين

3-مسحاة ((تنسفط))

4-سلك اشتراك

5-عدة سكاريب ومفكات وزرادية

6-قفازات

7-عيار هواء



هذا اذا مانسيت شىء

[خوي راعي كيف]

والله مادري عنك ابو حمد ان كانك مانتب طايح بسرق السيارات ;)

وودك تعرف وش اللي تحت المراتب اسرع واضمن علشان اذا فتحت السيارة تلقا اللي تبي

لاكن ترا ماتحت مرتبتي الا دربيل ومار من تحته اسلاك الكنود وسكاريب

وحوسة شرطان متنثره وقراطيس .

والعلم كله بالشنطه ورا مع العزب يعني اذا جيت تكفى لاتقرب البيبان اللي قدام عليك بالباب اللي ورا :p

[سيف السيف1]

والله من الشي:
1- عدة
2- رقع تيوبلس
3- لصتك
4- سير
5- كبس
6- سلسلة
7- منشار
8- ملقاط
9- كرسي
10 -رباطات
11- مرقعة - رقع- لياور
12- ذراية13-

[الفرعاوي]

فرد بس:rolleyes:

[راعي النبيطه]

قسم بالله ماغبيت شي

[شاص]

كيس تمر (ضميد) أم كيلو لأوقات الزنقات :D

[عبدالعزيز الدباسي]

تسلم اخوي راعي عنيزة على طرحك هذا الموضوع الشيق ، ،

لكن للاسف اكثر واحد فاهمك هو خوي راعي كيف ;) وعرف المقصد من طرحك للموضوع :D

لكن معاليش ابي اعلمك كل شى عندي بالسيارة .

الحقيقة ان تحت المرتبة يعتبر فاضي نسبياً لانه ما فيه الا كشاف يدوي فقط (( وبوك صغير فيه الف ريال للاحتياط )) :p

وعندي طال عمرك في الساحة الخلفية للموتر حاط صندوق بلاستيك اصفر اللون فيه كل شى يخطر على بالك :

شنطة عدة متكاملة (مفكات ، زرادية ، ابو جلمبو............الخ) .
اشتراك قوي وعريض جداً (تفصيل).
واير سحب .
منشار.
قفازات .
كرسي للنار.
كرسي صغير للجلوس عليه عند الطبخ او تغسيل المواعين .
كرسي حجم عادي للجلوس عليه (عند الازمات).
ماطور هواء صغير (احتياطي) لان في كبوت الموتر عدد اثنين ماطور هواء مشبكين مع بعض 2=1 .
محول كهربائي من الولاعة الى كهرب خط 110.
عدد ثلاث لمبات بيضاء (ام اصبع).
توصيله كهربائية .

ما ادري الظاهر اني ناسي شى ،،،،،،،،،،،،،،،،، بس ما ادري وشوووووووووووووووو

مشكور مرة ثانية ،،، وتقبلوا تحياتي

[صقر]

الاخ راعي عنيزة

السلام عليكم ورحمة الله وبركاته

مشكور على هذا الموضوع المهم وهو استغلال جميع الاماكن في السيارة الاستغلال الامثل بحيث يمكن الوصول الى ما تريد بسهولة وعدم ترك مساحات فارغة بالسيارة لم يتم استغلالها على الوجه الامثل

وبالنسبة للمكان الذي تحت المراتب .... يوجد في في السيارة مرتبتين اليسرى وهي مراتبة السائق فقد وضعت تحتها شنطة عدة من نوع (حبة وتتكون من 75 قطعة) اما المرتبة اليمنى ونسميها مرتبة الراكب فقد وضعت فيها ما طور الهواء بشكل مثبت.

[عاشق الصحراء]

انا في الحقيقة لافز قطعة بيب بلاستيك ابو انش للحنش .
و قطعة صابونة و صرة صابون تايد .
و في الحقيقة يوم شيكت عليهن اليوم لقيت ما هب و دب من
القراطيس و كراتين عصيرات و حوسة ما له حد . صراحة
مشكور يوم نبهتن لاني تعبت و انا انضف و اطش .
اما باقي العزبة في خلف السيارة مجمعة هذا على هذا .

و اهم شيء حبل للسحب و قفازات غليضة.و شنطة عدة للمفاتيح.
و شكرا

[رحال]

هلا وغلا اخوي (( راعي عنيزه )) وحياك الله يالغالي .

مشكور اخوي على طرح هذا الموضوع الشيق , بالنسبه لي ما عندي مساحه كافيه تحت المراتب لكن اللي اذكره :

1 - عدة السيارة .
2 - دربيل .
3 - بواجي للحين ماركبتهم :D :D :D
4 - اريل صغير .
5 - واير سحب .
http://www.mekshat.com/pix/gallary/data/images/RAHAAL22.jpg

[سعود مسعود]

السلام عيلكم ورحمه الله وبركا ته .......يا راعي عنيزه وجميع الاخوه الاعزا.....
انت سأ لت عن الي تحت المرتبه وهذا طيب ولكن الا هم السؤال عن الي ورأ المرتبه.............
وش ببببببببببببببببه ؟؟؟؟؟؟؟؟ ولك يحيا تي

[البانيلي]

سلام ...

حيالله راعي عنيزة ...

شف اخوي انا صراحة احب النظام والترتيب ..

اول تحت المرتبة كل شي لو تبي صخنة لقيته .. بس اذا بغيت

شي غديت تقل دسيسة تحت المراتب ..

مره من المرات وانا غارق في التفكير قلت لطالب طلع لي

الوانك .. واذا هالشنطة الي كلها جيوب وسحابات . ومنها ولدت

فكرة شنطة الحوايج ..

اشتريت لي شنطة طالب وضفيت كل اللي تحت المراتب ..

كينود + قارمن + صتم ام حبه + سكاكين + لصاق جروح+ واير+ اشتراك

+ رادو + محول كهرب + نقاش شوك + والله صراحة مليانة من كل شي

وارتحت الحمد الله اذا بغيت اي شي نزلت شنطة الحوايج ..

سلام ..

[أيمن]

شنطة الحوائج:good:

[راعي عنيزة]

الرسالة الأصلية كتبت بواسطة فرد حمزة
انا حاط تحت مرتبة السايق

أمبيليفاير 200 واااااااااااااااط :D

وش رايك بالإستغلال للمكان :p

ابو همام
كلن على همه سرا :D
الناس تحط عده للبر وانت حاط عدة للتقطيع والتلحيط :p

[راعي عنيزة]

الرسالة الأصلية كتبت بواسطة قتال
السلام عليكم ورحمة الله وبركاته ،،،

يا راعي عنيزه تكشت بالباص ولا بدينه :D :D :D وش كل هالغراض إلي تحت المراتب هذي ..

صراحة أنا ما فكرت أحط تحت المراتب إلا الحبال والجزم الله يكرمك ومن يقرأ .. والدربيل وبعض الخرائط والإحداثيات ..

وعليكم السلام ورحمة الله وبركاته
واحلالات دينه اكشت فيها كان احط بالحوض ماطور هوا حق بناشر :p

وكثرت الاغراض كل واحد حصل لي موقف بدونه لما تليعت وبديت ما امشي بدونه :rolleyes:
مثل تغريزه وما معي واير
او بنشر والسبير دونه اغراض وقش !
او انسم وما معي ماطور هوا !
لذلك يطلع لك قلب ووحنا ديريتنا ديرة بر ياخوك ونطلع واجد وبصوره شبه يوميه ومحنب مثل حقين الرياض الواحد يكشت في السنه مره وحده ووينه عند روحه ذيب بر :p

[راعي عنيزة]

الرسالة الأصلية كتبت بواسطة al-nashmi
والله انا يراعي عنيزه ماحط تحت المراتب الا ((عجرا)) وسلالسل:D :D :D

عجرا وسلاسل :eek:
الي يسمعك يقول كل يوم ذابح لك سبعه وتفطر وتعشى لحم اوادم :p

[راعي عنيزة]

الرسالة الأصلية كتبت بواسطة oqab
تحياتي للجميع

أخي راعي عنيزة

الحقيقة أكثر ماحط تحت المرتبه الأمامية هو صندوق الأسعافات الأولية- الدربيل-
مفتاح انجليزي قابل للتعديل (adjustable wrench) - مفك عادي ومربع (screwdrivers).

وسلامتكم

حياك الله اخوي
مشالله عليك عده مفيده و مختصره

تحياتي لك

[راعي عنيزة]

الرسالة الأصلية كتبت بواسطة المرصاع
هلا بخوي راعي عنيزه ......

أنا تحت مرتبتي 2 شمعة نور أمامي - الآيكوم - الفصفص;) .......

اليمين كميره - قفاز ..........

وتقبلوا تحياتي.........

2 شمعه نور امامي ;) اكيد انك مدبل الكتاوت ودايم يحترقن عليك الشمعات :p

وهلا بك يا خلفهم

[راعي عنيزة]

الرسالة الأصلية كتبت بواسطة laith
السلام عليكم...

الاخ راعي عنيزه...

ولو ان الخاطر متكدر منك شوي :mad: ..لانك شلت مشاركه لي..وكنت ادور من وراها الاجر..:(

لكنك مسموح و تبقى غالي:heart: ..وعلى كل حال نحن اعضاء جدد وانتم ادرى بالموقع..فلاتشرهون..

اما اللي تحت الاسيات حدث ولاحرج.:D .!!خذ عندك..غرشة ماء ام4 ريال واشتراك بطاريه و مغك عجل وبعض العده المنثره ...ومنشار حديد.. وخيشه فاضيه..... وسلامتكم..;)
;)


وعليكم السلام

افا اخوي ليث لا تشيل بخاطرك :confused:
يا بعدي لو الشور شوري كان ما يحذف شي ابد لكن ذا شور المعازيب وعلى قولتهم المعازيب ابخص وعلينا السمع والطاعه :rolleyes:

وعدتك منتازه جدا لكن قلي وش تبي بالخيشة الفاضيه لا تصير تحتري الجراد :p

[راعي عنيزة]

الرسالة الأصلية كتبت بواسطة الاجودي
والله من العدة الي حاطه انا

1-كبس 1000000 وات

2-وايرين

3-مسحاة ((تنسفط))

4-سلك اشتراك

5-عدة سكاريب ومفكات وزرادية

6-قفازات

7-عيار هواء



هذا اذا مانسيت شىء


الاجودي عزالله انك اجودي وعدتك بعد اجوديه :good:

مشالله اغراض متكامله ومثاليه

[راعي عنيزة]

الرسالة الأصلية كتبت بواسطة خوي راعي كيف
والله مادري عنك ابو حمد ان كانك مانتب طايح بسرق السيارات ;)

وودك تعرف وش اللي تحت المراتب اسرع واضمن علشان اذا فتحت السيارة تلقا اللي تبي

لاكن ترا ماتحت مرتبتي الا دربيل ومار من تحته اسلاك الكنود وسكاريب

وحوسة شرطان متنثره وقراطيس .

والعلم كله بالشنطه ورا مع العزب يعني اذا جيت تكفى لاتقرب البيبان اللي قدام عليك بالباب اللي ورا :p

تدري وش اشين شي فيك ؟؟؟؟؟؟ :mad:
انك فاهمني وفاضحني :D

اجل قدام مابه الا قراطيس ؟؟ طيب والمسجل وكالة ولا مغيره ؟؟؟ <= غيرت التخصص لحرامي مسجلات :D

[راعي عنيزة]

الرسالة الأصلية كتبت بواسطة ابوفارس
والله من الشي:
1- عدة
2- رقع تيوبلس
3- لصتك
4- سير
5- كبس
6- سلسلة
7- منشار
8- ملقاط
9- كرسي
10 -رباطات
11- مرقعة - رقع- لياور
12- ذراية13-


مشالله عليك يابو فارس بنشر متنقل :) رقع ومرقعه ولصاتك ولياور وتيوبلس
واحلالات يصير معك جوال فضائي والا بنشرن كفرات الموتر بالبر دقيت عليك :D

[راعي عنيزة]

الرسالة الأصلية كتبت بواسطة الفرعاوي
فرد بس:rolleyes:

فرد ؟؟؟ عاد من صغره فرد حمزه يوم انك تدعسه تحت المرتبه ؟؟ الا كانها مرتبة شيول :D


ياخوك الفرد زينة شيلته الا صرت مسافر ولا كاشت باهلك ، لكن دايم بالموتر اعتقد انها شينه لانك ممكن تهاوش مع احد وما تملك اعصابك وتستخدمه :(

الله يكفينا وياكم الشر.