مشكلة في الباثفيندر ؟؟

[عاشق المزون]

السلام عليكم ورحمة الله
اخواني احب نستفيد من خبرتكم في هالمشكلة :) :
واحد من الربع عندة باثفيندر موديل 2003 كانت الحرارة ترتفع عندة المهم ركب مراوح سوبارو وحتى الان نفس المشكلة :confused: وش تنصحون فية وكذلك وش الورشة الى ممكن يكشف عندها في الرياض او القصيم تكفون يالربع الاخ عزيز على وانتم عارفيم وقت طلعات وجيات لاتبخلون علينا ولو بسلام :D .

والشكر للجميع

[بوراشد]

السلام عليكم أخي الكريم

أتمنى أن تحدد إن كان الباثفايندر شد بلاده ولا صاحبك مرهم عليه شغلات غير المراوح لأنني كنت أستعمل باثفايندر من الموديلات التالية 1998 - 2001 - 2003
ولم أجد مشاكل إلا في موديل 2003 بسبب كشافات الهالوجين المرهمة عليه غصب تاليتها بصمت بالعشر لموديل 1998

مع العلم أن الموديلين 1998 - 2001 شد بلادهم ولم أجد فيهم مشكلة الحرارة نهائياً

[عاشق المزون]

مشكور اخوي بو راشد خويي شارية شد بلد ولا علية اي تعديل :)

[أفق]

تأكد من الأديتر يمكن متسكره الريش الي فيه لانه حساس مره خاصة من الموية الي فيها املاح تتراكم فيه ولا يبرد كويس

[ملك الباثفندر]

السلام عليكم ورحمت الله وبركاته

يا هلا والله بالاخوان

صارت لي هذي المشكله وهي ارتفاع الحراره بشكل مخيف والسياره ما فيها شي طبعاً فرحت غيرت البلوف حقت الحراره كلها الامامي والخلفي من الوكاله قيمتها حوالي200 ريال وتركيب 50 ريال ولا نفع ، الحراره مرتفعه ومقلقتني فرحت غيرت طرمبه المويه قيمتها حوال 800 ريال من الوكاله ( غاليه بالحيل ) وركبتها بثلاثمئة ريال

(يبغالها شغل لانها داخل المكينه ومربوطه بالجنزير ) ولا نفع ، فكرت ادحدرها من جبل وافتك ولا نفع :D ،رحت للوكاله وقلتلهم بكم الفحص الخاص بالحراره حقت السياره قالي مهندس الصيانه : بخمسمية ريال وعند إكتشاف خلل نخبرك به وتتوكل على الله او نصلحه وتدفع قيمه التصليح وتسقط عنك قيمه الفحص 500 ريال قلت كم تقعد عندكم قال حوالي اربعه ايام قلت كتك نيله ومشيت والحراره مرتفعه بالحيل وتسمع صوت غليان المويه واضح المهم دلني واحد على ميكانيكي يعمل في الصباح بالوكاله وبالليل بالورش بس فاهم مره المهم رحت عنده

وقلت له الموضوع بالكامل قال شيكت على اللديتر حق السياره قلت :لا ، قال : اللديتر حق الباثفندر حساس للغايه .والدليل ان حجمه صغير من العرض ويبرد السياره بالكامل (غريبه) قال :هذا اللديتر مدروس دراسه ،فرحت عند واحد حق لاديترات وقلتله فك اللديتر فكه وطلعت المصيبه كلها منه :mad: ، طلع مطعوج ( مضروب ) من الاسفل ومكان الطعجه سد مرور المويه للطرمبه داخل المكينه فترتفع حراره السياره

المهم تحسف على الفلوس إلا صرفتها من دون فايده :no: ورحت للوكاله ابغى لاديتر جديد قالو طلبيه وسعره 1300 ريال :mad: فرحت شاورت الميكانيكي الاول الله يجزاه خير قالي لاديتر الوكاله بيجي صغيرمن العرض مثل الاول ما ينفع مع حراره البلد هنا ووصفني على محل اسمه (وكالة العرب) لقطع غيار نيسان الاصليه رحت عندهم وطلبت منهم اللديتر وجابولي واحد نفس المقاس بس عريض ويشيل مويه اكثر من الاول ويبرد السياره قيمته حوالي 700 ريال وركبته و إلى اليوم و الحراره تحت الربع والحمد لله ;)


ملاحظات مهمه : :good:

بلوف الحراره حقت الباثفندر نفس حقت المكسيما بس الاختلاف شي بسيط وهو بلف الحراره حق الباثفندر مكتوب عليه c76 وبلف الحراره حق المكسيما مكتوب عليه c80 او c82 هذا بالنسبه للامامي وهو عباره عن كوع جزء يشد بالخرطوش وجزء يتسمر في المكينه اما الخلفي فله ارقام مختلفة عن الامامي والمعنى من هالارقام هوا درجه الحراره التي إذا وصلت له درجه حراره السياره يفتح البلف ويمر ماء اللديتر إلى المكينه

ودرجه الحرار هنا بالمؤيه c .


احذر من تركيب لاديتر من المعدن النحاسي او الحديد لانه خلال سته اشهر والمكينه يبغالها توضيب واحرص على تركيب لاديتر ألومنيوم اصلي عليه ختم nissan تلقاه مكتوب في الطبه السوداء بجنب الغطاء ان ما خاب ظني


غير مويه اللديتر الخضراء إلى حمراء والسبب هو ان المويه الخضراء سهل الغش فيها لكن الحمراء اضمن

فيه نوعيه ممتازه بالسوق مويه حمراء ويجي منها اخضر الجالون بعشرين ريال مكتوب عليها تويوتا الاصلي

لكن الحذر من تعبئة اللديتر كله بهذه المويه بل يجب ان يحتوي الثلثين على المويه الحمراء والثلث الاخير على ماء مقطر حقت البطاريه والسبب ان المويه الحمراء يوجد بها نسبه من الزيت حتى انك تلمساه بيدك تحس فيها لزوجيه الزيت وليست فقط ماء صافي


للمعلوميه سيارتي باثفندر موديل 2004


ارجو ان تكون قد استفدتم من تجربتي المريره وان لا ترون مكروه في سياراتكم

بالرغم من انها بهذلتنى بهذي المشكله إلا انني اعتز بها كسياره ومثل ما قال احد الاعضاء ( ما على الباث سياره )


إلى اللقاء

دمتم بخير

[Rahhal_xp]

بارك الله فيك أخوي ملك الباثفندر على المعلومات المفيدة.

[لمع السحاب]

السلام عليكم
انا كان معي نفس المشكلة نفس الموديل و كانت الحرارة في النفود توصل معي فوق النصف واجدددددد وبعدها رحت لمحل يمني في الصناعية موصيني عليه واحد من الشباب الله يجزاه خير وفك الاديتر على الضمان وووو شفت العجب وش فيه؟؟؟؟ متسكر 3 ارباع الاديتر من مويه الوكاله و قام بتسسييخة ومن ثم الحمدلله الى الان ما شفت منه شي و طلعت به للنفود وما فيه اي حرارة وهذه المشلكةحصلت في عدة سيارات من هالنوع لان الاديتر صغير
تقبل تحياتي

[القرم]

كلام الاخوان صحيح انا صار معي نفس المشكلة عندي باثفايندر 2003 والحرارة ترتفع صلحت اكثر الاشياء الي لها دخل في الحرارة ولا فاد لين غيرت الاديتر من الوكاله ورجع زي اول يوم كان جديد حرارته ممتازة جدا.

[عاشق المزون]

مشكورين يااخوان على المعلومات المفيدة عزلة دسمت شواربا الله يجزاكم كل خير :)

[ملك الباثفندر]

يا هلا والله بعاشق المزون بس علمنا وش صار معك علشان نستفيد ومشكور على طرح الموضوع
إلى اللقاء

[salehhd]

السلام عليكم

ياليت تفيدنا ايش صار معك لاني افكر اركب مروحة كهرب

[عاشق المزون]

هلا والله ماعليش با اخوان انقطعنا عنكم بس انتم عارفين لابد من كشتة :)
اخوي ملك الباثفيندر ولا يهينون الشباب الاخرين ابد السيارة على وضعها وخويي معه سيارة اخرى حتى يحل هذي المشكلة :(
طيب اخوي وين وصف محل "وكاله العرب" حتى اتصلنا على 905 ومافية فايدة فاذا ماعليك كلافة وصف المحل وين . وكذلك وين انت مركب الرديتر تحملني شوي حتى تعم الفايدة للجميع.
وشكرا :)

[ملك الباثفندر]

بكره إنشاء الله اروح لمهم واجيبلك العناوين والارقام بعد
إلى اللقاء

[ملك الباثفندر]

:confused: :D :rolleyes: :o >>>>>>>>>>>>

[عاشق المزون]

ماتقصر اخوي ملك الباثفيندر وانتظر على احر من الجمر وشكلك ملك الباث فعلا الى وش يقربلك الحمراني :) مشكور

[أبوناصر]

أخوي الملك

لو تدلني على الورشة الي يعمل فيها ميكانيكي الوكالة الله لا يهينك

[ملك الباثفندر]

السلام عليكم ورحمت الله وبركاته
مرحباً من جديد
بالنسبه لوكاله العرب لقطع غيار نيسان فهوا موجود في المدينه المنوره على طريق العيون باتجاه الخليل ولهم ورشه كان الحمراني يرسلهم السيارات قبل لا يفتح الورشه الموجوده خلف المعرض حالياً مع العلم انه ليس لديه فروع رقم هاتفه 048459490 سألته من فين تجيبون القطع قال من جده من كيلو 2 في محل قطع غيار كبير للنيسان مدري وش أسمه قلت وهم من فين يجيبون القطع قال من الميناء على طول . وسلامتك

اما بالنسبه للميكانيكي فهو موجود في ورشه اسمها الكسيبري لصيانه السيارات في مجمع الورش الصناعي بالقبلتين اليوم إن شاء الله ابروح اغير البواجي عنده وبحاول اجبلك رقمه .

شكراً لكم إلى اللقاء

[عاشق المزون]

مشكور اخوي على الوصف يعني في المدينة !!!! افا والله مشوار من الرياض :)
طيب اخوي حتى الميكانيكي في المدينة المنورة !!! ماادري وشي القبلتين ؟ ؟

[ملك الباثفندر]

المدينه خير لهم لو كانو يعلمون
القبلتين هو حي سكني مجاور له مجمع ورش صناعي سمي بهذا الاسم لان حي القبلتين مجاور لمسجد القبلتين

على العموم انا جاي الرياض يوم السبت إن شاء الله تبيني اجبلك واحد تراني حاضر

بعدين إلى الان ما ندري السياره وش فيها يعني مهو اكيد يكون الاديتر فيه مشكله حتى لو كان فيه مشكله لا تغيره على طول اول شي سوله تصيخ وجرب مده ان ما نفع اعرض السياره على مختص
وعسى الله يجيب العواقب سليمه
إلى اللقاء

[ملك الباثفندر]

وهذا رقم الورشه 048255832
إلى اللقاء

[عاشق المزون]

مشكور اخوي وما ادري وش اقول الله يسلمك من كل شر انشاء الله ودامك مسير على الرياض العشاء عندي والنوم كذلك انا رجال وحداني نضبط لنا كبسة على كيف كيفك كل تم :)

[عاشق المزون]

نسست اسالك وش قير سيارتك عادي او تماتيك لان يقال ان هناك فرق في الرديتر ؟؟؟

[ملك الباثفندر]

أصيل والله ما تقصر يا عاشق المزون عساك سالم
بالنسبه لسيارتي قير توماتيك وما أظن فيه فرق بس مجرد ترويج تجاري
و بما انك وحداني عقبال ما نشوفك معرس إن شاء الله :p ودي أسئلك سؤال بالنسبه للرياض وين أغلب الاماكن إلا توجد فيها شقق أجار سنوي للوحيدين مثلي ومثلك :( حول مخرج10
ولك كل الشكر والتقدير ;)
إلى اللقاء:)