ياشباب الرجاء تعرفون الصيف جاي ودنا بمكاشيت صيفيه للي يعرف

[هايلكس 2003]

السلام عليكم
تدرون توي مطلع هايلكس جديده وودي اروح للمكاشيت
وتعرفون ان الجو هاليومين ماش مرة بارد ومررررررات اكثر من حار
المهم
احد يعرف مواقع تصلح للصيف يعني مكشات فيه طلاح وحول مدينة الرياض لو سمحتو

شكرا لكم مقدما

[العليمي]

اذا كانك تقصد مكاشيت في عز الصيف يعني و درجة الحراره 45 مئويه ما اعتقد انه احد يطلع في هذه الحراره بقصد النزهه فقط انما يخرج لوقت او موسم هجرة طيور، و غير ذلك وش يبي بحراره توصل 48 .
لاكن في الفتره القادمه بيكون الجو مائل للحراره في النهار و ممتاز في الليل و تتدرج درجة الحراره في النهار من 32 إلى 36 تقريبا ....

و بالنسبه لأفضل مكان حول الرياض للمكاشيت في الصيف على حسب كلامك فهو (( شعيب حريملاء )) 85 كلم شمال غرب الرياض و هو عدة شعبان و ممتاز بالنسبه للظلال و الاشجار الكثيره . لاكن !! (( قبل عدة شهور كنت مار من عند الشعيب و حصلت عليه لوحه مكتوب يفتح باب المنتزه من الساعه 9 صباحا حتى العاشره ليلا و ذلك يومي الخميس و الجمعه ، و من المعروف ان هذا الشعيب مسور بشبك و له بوابه ))

[أيمن]

أخوي هايلوكس:
حياك الله في مكشات ..
وبغيت أقول لك إن كل إنسان وله ميولة من ناحية الكشتة، لكن في الصيف يمتاز بجلساته الليلية خصوصًا إذا كان "المونّس" متواجدًا معكم ..
وأجد أن النفود هو أفضل الأماكن وأبردها خلال الصيف. ويوجد بالقرب من الرياض منتزهات الثمامة، عفوا أقصد النفود اللي حول قصر العاذرية (75) كم، نظيف وحليل وقريب .. أو حول نقا صلبوخ(90) كم إن ما بغيت كثرة أوادم، أو توجه للدهنا (170) كم.
فكما تلاحظ فإن المتنزهات في مدينة الرياض ليست قريبة لإاقرب متنزه بري حوالي (70)كم، بينما نجد في منطقة القصيم أو الشرقية أبعد المتنزهات لا تتجاوز (40) كم، وإن زادت المسافة عن ذلك عدوها خارجة عن متنزهات المنطقة !! :)

وأنت واختيارك ..

أخوي العليمي :
حياك الله وبياك وأهلا بك بالنسبة لشعيب حريملاء فهو يفتح الخميس والجمعة وفي بعض المواسم، وأيضا التسوير لا يشمل جميع الشعيب بل بعضه ..


تحيتي

[الفرعاوي]

اخواني

للي عندة بزران ...

مادري لكن مهوب هاحين وقت خروج الخشاش ؟
و اللي يكون بالعادة اخطر وقت للطلعات ؟

يمكن النفود هالحين ازين من الشعبان ؟؟

لو في احد يفيدنا ؟؟