₪)لا برامج..لا صور..لا دروس..لا عدسات..لا كاميرات....لكنه يُعنى بالتصوير الضوئي(₪

[عيناوي]

مسيكـــــــم بالخير يا عرب
بشروني عنكم؟عسى اموركم على خير ان شاء الله؟


فكره تجول في خلدي من فتره وكنت متردد حول رفعها بموضوع
لكن لا يوجد مانع
:)

نحن في هذه الصفحات يجمعنا مبدأ واحد

التصــــــــوير الضــــــــــوئي


نتحدث عن ارائنا حول صور بعضنا و ننتقدها و نرفع ملاحظات حولها
نتكلم عن افضل البرامج هناك عن هندسة الصور وعملها
نتبادل طرح الدروس الي تساهم في رقي نتاجنا
نساعد من هم في حاجه الي معرفه و خبرات اكبر ونصائح حول
الشراء او العدسات او اساليب التصوير
و الخ من الامور التي تدور في هذه الخيمه


لكــــــــــــــــــــن
موضوعي هذا لا يتطرق لأي أمر ذكرته سابقا او تم ذكره في هذه الخيمه

أكيد اغلبكم متعجب ويتسأل..طيب ايش هذا الموضوع؟

الموضوع وبكل بساطه هو سؤال لا أكثر

كل عمل يقوم به الانسان يكلفه
سواء وظيفه او عمل تطوعي او حتى هوايه بسيطه(كالتصوير)


سؤالي لكم هو:
حتى الآن..كم كلفتك هواية التصوير؟
اقصد
كم(صرفت)على هذه الهوايه؟


طبعا المبتدئ لم ينفق كالهاوي
والهاوي لم ينفق كالمحترف

بعضهم يكتفي بكاميرا واحده وبعضهم يحتاج الى حقائب من اجل نقل معداته من اجل التصوير
البعض قد يذهب الى اقاصي الارض لشراء قطعه واحده والبعض قد يشتري كاميرا قد اكل عليها الزمان و (تملي عينه)
التفاوت والتباين لا شك يظهر..و لولا اختلاف الاذواق لبارت السلعه..
و خيمتنا هذه خير دليل على ما ذكرت..


اتوقع ان يكون النقاش جدا رائع..حيث سيتم العوده الى البدايات والذكريات والمواقف التي حصلت
ستكون(سواليف) طيبه في رايي ومنها تتوطد العلاقه بيننا و نعرف اكثر عن المراحل التي توصل اليها بعض مصورين مكشات


بإنتظار تفاعلكم
وان شاء الله..فالكم مايخيب
حافظكم الله

[جنتلـ]

هلا بالعزيز والغالي والمبدع والمميز عينـــــــــاوي

مشاء الله عليك دائم تفاجائنا بفكرك الواسع الله يزيدك علم ومعرفة

حقيقة يشرفني ان اتفاعل واشارك في موضوعك الشيق والجميل والجديد بفكرته ومضمونة

بالنسبة لي كا مبتدئ في التصوير كلفني شراء الكاميرا Canon S3 IS
بمبلغ 2300 تقريبا من الكترو شامل الكامير + ذاكرة 1 ميقا + حامل
ايضا اشتريت حقيبتين واحد من جرير بملغ 35 واخرى من اكسترا بمبلغ 60
وكذلك اربع بطاريات قابلة للشحن من محل عالم سوني مايقارب 50
و اقمشة تنظيف من اكسترا بمبلغ 35
يكون اجمالي التكلفة مايقارب = (2400) ريال

[عيناوي]

يالله حي الغالي جنتل
حتى المبتدئين تكلفهم اول خطوه ..نقدر نقول مبلغ جيد

بعضهم يا جنتل يدمن على الااسعار المرتفعه والغاليه ويصبح من الصعب ارضاء غروره
هل يوجد في مكشات من هم من هذه الفئه ام لا؟
ننتظر الردود

وفالك ما يخيب ان شاء الله
وبدايه اشوفها جدا رائعه لك
:)

[جنتلـ]

يالله حي الغالي جنتل
حتى المبتدئين تكلفهم اول خطوه ..نقدر نقول مبلغ جيد

بعضهم يا جنتل يدمن على الااسعار المرتفعه والغاليه ويصبح من الصعب ارضاء غروره
هل يوجد في مكشات من هم من هذه الفئه ام لا؟
ننتظر الردود

وفالك ما يخيب ان شاء الله
وبدايه اشوفها جدا رائعه لك
:)

الله يحيك ويبقيك

اكيد فيه ناس الطموح ماله حد بالنسبة لهم وكل يوم يطلب اكثر واكثر
لان زي ما انت عارف عالم التصوير ماله حدود وكل ماتعمق اكثر يكبر

[Abu Saad]

السلام عليكم

.

.

.

.

.

والله كأنك تقرأ أفكاري!!!



فقد كنت افكر في طرح موضوع شبيه بهذا ويدور محور سؤاله عن:



س/ ماهي بدايتك والدوافع اللتي جعلت التصوير هواية لك!؟؟







عموما حتى لانشطح بالموضوع ..نرجع لسؤالك الاصلي :





كم كلفتك هواية التصوير مادياً؟؟

بما انني راعي مخمخة ولا احب انصاف الحلول .. فبعطيكم قصة حياتي والله يعينكم..

سوف اخبركم من البداية حتى النهاية حتى تكون الاجابة كاملة ومترابطة .. فأقول بسم الله :



لم اكن اهوى التصوير ... !!!

الى وقت قريب ...!!!

صحيح انني كانت لدي قديما كميرا ان لم تخني الذاكرة (كونيكا) ام فلم وتحميض .. سعرها اضن 40 ريال او حولها ..

وكان الهدف من شرائها ( شوفو وشلون كنت على نياتي) كنت ابغى اصور الربيع واصور كل عشبة عن قرب (وحط عشرة خطوط تحت عن قرب) واوثق اساميهن بحيث تكون مرجع نباتات صحراوية ..

الكلام هذا ايام الثنوي:)..قبل حوالي 16 سنة تقريبا..

الظاهر في ذاك الوقت مافيه شي اسمه كميرا ديجيتل!

المهم...

كنت متحمساً وكان شرائي للكميرا لأجل هذا الغرض ... فبدأ ابوسعد بتصوير العشب والزهور والنبتات الربيعية ..

وثلاث افلام كل فلم فيه 36 صورة (ان لم تخني الذاكرة) ..

المهم رحت وحمضت الافلام في البطحاء طبعا....

وكانت الصدمة !!

صور ركيكة وضعيفة ولاتكاد تميز ماهو الشئ المراد تصويره!!!!

بدون مبالغة ياجماعة (ولا ازال محتفظ بتلك الصور!) ..

والسبب اني اقرب الكميرا من الزهرة او النبته ..وكانت الكميرا ماتعرف الماكرو والزوم و الاشياء هذي ابد وامكانياتها محدوده ... وكل ماتقريب من المنظر تطلع الصورة ضبابية ومغبشه..

لو انزل لكم وحدة من الصور بالسكنر بتجلسون تضحكون

بالعربي تطالع في الصورة ماتدي وش انا قاعد اصور!!!!!

ماذا بعد..!!!



اصيب ابوسعد بأحباط وخيبة امل.. وحصة وسارة الخ....

واهديت الكميرا على ولد عمي( مسوي كريم)!

المهم..

اخذت موقف من التصوير ... سلبي طبعاً

وكنت اتعجب كيف الصور اللي بالمجلات تكون صافية وواضحة ( مع اني شريت كميرا وجربت بس مازبطت الشغلة!) ===> انواع البراءة!!

في ذاك الوقت ماكان فيه شي اسمه انترنت تبحث عن معلومات ..

حتى كتب التصوير مافيه...فكانت الثقافة صفر!!

ولايزال السؤال يبحث عن اجابة..ليش الصور اللي صورتهن ماضبطن؟؟؟

المهم...

تركت الشغلة كلها ...ونسيت الموضوع..ونسيت السؤال بعد...

بس كنت احب التأمل في المناضر الطبيعية و الصور ...وحط تحت التأمل خط !

فيه واحد من اخواني يحب التصوير وشرا كميرا كانون (مستخدمة) من واحد من اخوياه .. 2 ميقا بيكسل! ولونها اسود ولاتزال موجودة طبعا ديجتل..الكلام هذا قبل خمس سنوات او ست سنوات ان لم تخني الذاكرة ...

الشاهد في الموضوع .. انه يروح يصور .. ويرجع ويورينا بعض اللقطات ..

فيه لقطة من لقطاته او من صوره اللي صورها شدت انتباهي جدااااا!!!(شحنة اولى)

الى درجة اني اخذتها منه(يعني الصورة ) وصورت منها نسختين ورحت وكبرتها وببروزتها وحده حطيتها بالبيت ووحده اهديتها له ..

الغريب في الموضوع اكتشفت حاجة ... ان الكانون كميره وبس!!

تخيل البكسل فيها 2 ميقا فقط!!! ومع ذالك الصورة صافية وقزازة حتى مع التكبير .حوالي (40سم × 70 سم).



المهم ...

دارت الايام ...

وذهبت العام الماضي الى ايكيا ابغى اشتري اثاث وتلقيطات ...

ولقيت عندهم صورة في قسم الصور اعجبتني الى درجى اني جلست عندها ساعة اتامل فيها ... وكانت رائعة بحق...

وقررت اشتريها واعلقها في البيت ..(شحنة ثانية)

وتفاجأت بسعرها!! حوالي 400 ريال!! ( ومع ذالك شريتها ) ..

وكنت ائما اتأمل تلك الصورة ...

وادمنت .. حتى اننني كنت اذهب الى ايكيا لأرى ماهو الجديد عندهم من الصور!!

وشريت من عندهم حوالي 5 صور غير الاولى!!! واسعار نار طبعا.

قعدت اهوجس ...!! قلت هالحين يصورون صورة ويبيعونها عليك ب 500 -600 ريال !!؟؟

وش انت ناقص ؟؟ ليش ماتصور مثلهم وازين منهم .... بلعكس راح تعلقها في بيتك وتدري انك انت اللي مصورها :)

فطقت السالفة في راسي وقررت اشتري كميرا ديجتل! واصور بها واكبر الصور واعلقها بالبيت بدل صور ايكيا !

فلو تأملت في السالفة لتبين لديك ان تفكيري بالتصوير مرة اخرى هو عبارة ( وش انا ناقص!) مهيب ايكيا اطيب مني ههههه.

ما اطيل عليكم ...

دقيت على اخوي وانا في اكسترا فرع السويدي ..

سلام عليكم السلام ... ممكن سؤال؟ .. قال تفضل ! ... قلت انا في اكسترا وابي اشتري كميرا وش تنصحني اي ماركة ؟! ( سؤال برئ ) .

قال عليك بالنيكون او الكانون ...

المهم جلست عند اليماني حق المحل من بعد صلاة العصر الى صلاة العشاء !!! وانا اساله عن كل صغيرة وكبيرة ..

وبالاخير استقريت على كميرا باناسونيك Lumix .. والبكسل 5 ... والزوم الاوبيتكل 3 .. والسعر 999 ريال .

ولها معي الان حوالي 8 شهور ... وهي اللتي التقط بها صوري الموجودة بالمنتدى .

ولاتزال معي الى الان ..

وصراحة افكر اغيرها ومحتار كثييييييير .. لاني من النوع اللي قاعدته ( اذا شريت اشتر على سنع والا لاتشتري!)

فأذا جمعنا التكاليف 40 ريال الكميرا القديمة + 999 الكميرا الجديدة = 1039 ريال ( الف وتسعة وثلاثين ريال )

وناوي اخرب الدعوى واشتري كميرا ... تطيح اللي في راسي !

وش اللي براسك ؟

اسالو فتى الدهناء :)

وسلامتكم..
.
.
والف شكر على هذا الموضوع المهم استاذي عيناوي.
.
..


اخوكم
ابوسعد.

[جنتلـ]

مشاء الله اخوي ددسن 79

بصراحة قصتك تراديجية و فيها الفكاهة وفيها الاصرار والعزيمة لتحقيق الهدف

بصراحة بدايتك في التصوير تدل على مستقبل واعد ان شاء الله


ومالنا الا نصبر ونشوف ايش تشتري كاميرا جديدة وتتحفنا بالمزيد من صورك الجميلة

[الباحث_الصغير]

(حياك الله أخوي العيناوي )

وأسعد الله صباحك وصباح إخواننا الكشاته بكل خير

كل منا لم يتجه نحو مهنة التصوير عبثاً وتباعاً نتحمل مشاقه وتكاليفه.



وكل ذلك من أجل التقاط صورة لها معاني عند المصور. (إما لتعلقه بها أو لإيصال فكره معينه يصعب التعبير عنها أو ..أو )



أما من ناحيتي أنا فمراحلي الأولى في التصوير سببها متابعتي للسحب حيث أنها تنشأ بقدرة الله ثم تعطي مناظراً خلابة خلال فترات قصيرة فتحدث تغييراً في نفسي جعلني أعشقها وأتأمل فيها لساعات وخصوصاً إذا كانت من العيار الثقيل على قلبي (برق ودوي رعد)

وأول كاميرا اشتريتها هي كاميرا رقمية قيمتها 100 ريال ولم أكن أعرف فيها إلا صور وبس لم أعرف دقة التصوير والإضاءة وزاوية الالتقاط والعديد من الأمور التي تخرج الصورة بعناصرها المستهدفه.



التقطت بها مجموعة من الصور التي لم تعجبني بدقتها وصفائها.



ثم بعد ذلك اعتمدت في التصوير على كاميرا الجوال ( الباندا ) والذي تغلب على هذه الكاميرا.(قديييييييييييم باندا :D )



وأيظاً لم يفي بمطلبي



وأخيراً توجهت إلى الكاميرا الرقمية Canon PowerShot S3 ci



والحمد لله كانت رائعة بالنسبة لي كهاوي

((وبتوجيه الإخوة الأعزاء على قلبي نرتقي نحو الاحتراف))


التكاليف:



(1999) قيمة الكاميرا

(200) ذاكرة 2 جيجا

(84) شاحن البطاريات

(40) بطاريات باناسونك

(45) حامل للكاميرا



2368ريال فقط لاغير

ولكم مني أطيب التحايــــــــــــــا ,,,

[( برى بحرى)]

انا بصراحه وصلت الف دينار كويتى

العده المستعمله حاليا هى

نيكون D70

العدسات

زوم ثابت 300 نيكون (( تم البيع واستبدالها ))
زوم 70-- 300 صينيه الصنع (( نتائجها حلوه ))
زوم 80--400 نيكون
مايكرو 1--2.8 55ملم نيكون منول فوكس ( الفوكس يدوى )
عدسه 18 -- 70 نيكون
عدسه سيجما 28 -- 135 ملم
فلاش نيكون ss-800

والكثير الكثير من الاكسسوارات

الكامرات السابقه ماله داعى اذكرها

تحياتى لكم

[فتى الدهناء]

موضوع جميل وشيّق .. أخوي عيناوي ..


ماشاء الله عليك ياددسن 79 .. والله انك رهيب :good: ذكرتني بالنملة اللي تطلع الصخرة وتدبج على ظهرها وتقوم وتطلع .. هم تدبج .. ثم تطلع .. وتمسط .. لين طلعت .. << لاعمره يشبّه :D



قبل الكمرات .. أنا أقول كثيرا ممن يبدعون بالتصوير .. من لحظاتهم الأولى .. غالبا يكونون ..رسامين .. او يحبّون الرسم .. أو يتذوقون الجمال بالبصر ..


فكانت بدايتي .. الرسم .. منذ صغري .. وكان والدي يتعجب من رسوماتي في صغري( يمكن يجامل ) :D وكنت معطّر بيتنا بريحة الألوان الزيتيّة .. ماشاء الله علي .. وكل يومين طاق لي ريشه جديدة ..وشغل :) ,, أيضا حصدت الكثير من الجوائز ..في الرسم .. في المدرسة الإعدادية .. والمتوسطة .. وكنت على قولتهم ..رسّام المدرسة .. ( يدربونّي ):p



لكن قل التشجيع .. وأنشغلت بأمور أخرى .. فأصبح الرسم .. عندي ( مجرد ذكريات ) ..

ونفس الشيء بالنسبة للخط .. ( لو تشوفون كتابتي الحين تضحكون .. والله ) ..:D


عندها بدأت بمتابعة الإنترنت .. وتعرفت على مكشات .. لأنها تلامس هوايتي الأخرى ( الكشتات ) ..:)


<< كل يوم له هواية .. يعني لاتستغربون ..بكرة .. أجمع طوابع .. ولا أترك التصوير .. وأقلب وأصير هكر :D


المهم تعرفت على مكشات .. وبعدما تعرفت على مكشات .. تعرّفت على ( نفل ) وأقولها وانا صادق .. بدأت أستمتع بتصويره .. ولحس مخّي بصور خريم قبل أربع سنين تقريبا .. قبل معرّفي هذا ..:j



يتبـــع

[فتى الدهناء]

بعدها .. بدأت اتلذذ بالصور الرائعة .. ومتابعتها في مكشات وغيره .. وبدأ المشوار ..

أول كمرة شريتها .. كمرة فلميّة .. عادية جدا .. ونتائجها زي وجهها :mad:

ثم شريت كمرة فيديو ( فيها تصوير ثابت ) من سوني بــ 5200 ريال .. ثم ماعجبتني .. وبعتها :mad:

على أمل شراء نيكون ( d200 ) وكنت حاجز وحده .. وكانت توها مانزلت .. وسعر البدي فقط بــ 7000 ريال .. قلت ياولد بدال ماأنتظر كذا .. خل ادخل الفلوس في الأسهم ( وقت طفّة العالم بالأسهم ) :mad: .. المهم ان الفلوس .. اللي كنت مخصصها للكمرة .. تبخّرت .. :)
والحمد لله على كل حال .. << بدا يدمّع :)

فقلت والله مانيب قاعد كذا .. والقى اثنين من الشباب ماشاء الله عليهم يبون يشرون كمرات فغرّرت فيهم:D .. واحد ( الكهرماني ) معه كانون اس2
والثاني معه ( باناسونيك اف زد 30 )

وماشاء الله عليهم .. مبدعين بالتصوير .. المهم صرت أتعلم منهم وأستعير كمراتهم اذا ماعرفوا شي .. وأنفض الكتلوج .. لين أفهم وشلون أصور بالطريقة الفلانية .. وهكذا .. وبعدها .. قلت الحين وهذي كمرات ( شبه احترافيّة ) ماأفهم فيها .. وشلون أنا وجههي رايح أحجز ( d200 ) صدقوني يمكن أبيعها ثاني يوم .. :p

عندها اقتنعت .. بأنني يجب أن أصعد الدرج .. ولا أقفز .. لأنني قد أقفز .. فأسقط ..

فقررت شراء كمرة ( شبه احترافيّة ) .. وأكمل مشواري .. واتعلم عليها .. وأضبط التحكم اليدوي .. وأحاول أن أبدع فيها .. ثم أنتقل الى ( الكمرات الإحترافيّة ) بإذن الله .. وأنا مستعد و مقتنع وعندي بعض الخبرة .. بهذا المجال ..


فاشتريت canon s3 is بعد .. دراسة دامت لأكثر من اسبوعين ..

والحمد لله الكمرة مرضيتني .. ونتائجها حلوه .. وعقبال .. ماأجحدها للإحترافيّة .. لكنها ستبقى غالية ..:cool:

والحمد لله

[فتى الدهناء]

ماشاء الله عليك اخوي ( بري بحري )

بغيت أسألك .. هل هناك فرق واضح بين العدسات الأصليّة والصينيّة .. في النتائج .. وهل فرق السعر كبير ؟

[عيناوي]

حي الله الربع

وش هالردود وهالقصص العجيبه

حلو بهالنوعيه من المواضيع نعرف بعض اكثر





جنتل يا بعدي..ايه بالله صدقت..الخيال بهالمجال ما له حدود والذكي الي يوظف عقله وتصوراته

في اللامحدوديه ويفتح لنفسه افاق كبيره تعود عليه بالفائده اولا واخيرا..





ددسن..تدري وش اول شي جا في بالي عقب قصتك؟

فكرة توثيقها بالصور؟

هات ولد يشبه لك ايام الثانوي وصور مراحل قصته هذي..بتكون تحدي لك لان التوثيق فيه صعوبه قليله بحكم ان الصوره الوحده لها الف معنى وتعيش جو وقتك الماضي أكيد..

وش رايك؟:good:

وعلى فكره..الموضوع الي نويت تطرحه جدا رائع وشيق..توكل وارفعه طال عمرك





الباحث يالغالي..فعلا!!..كل شي لم ينشئ من فراغ وكل شي له بدايه بسيطه و (على قدها)

وهذي هي سنة الامور..كل مرحله أكبر من المرحله الي سبقتها..ومثل ما تفضل فتى (يتذوقون الجمال بالبصر)





بري بحري ياغالي..يبدو لي انك من محبي الاهتمام بالتفاصيل وعدم الاكتفاء بالاساسيات البسيطه..

يعني تحب (تصرف) ولا تستكثر صرفك نهائياً على هوايتك..

هذا الي بدا لي من ردك..





فتى الدهنــــاء الكبير..اجل رسام ما شاءا لله؟!..ليه تركت الرسم..ياليت ترجع له..

محسوبك يرسم لكن عكسك انا..بديت بالتصوير تلاه الرسم..

ونفس ما اقترحت لددسن..ليه ما توثق قصتك بالصور؟

لكن ما نسيت شي ..

موضوعي حكى عن امر انت غفلت عنه او يمكن ما حبيت تتطرق له..لكن هل انتبهت له

يمكن انجرفت في سرد قصتك ونسيته:p

يا حبي لك





ردود صراحه جميله جدا وتفاعل من اشخاص عزيزين علي..

لا عدمتكم


فالكم ما يخيب ان شاء الله

:)

[1500]

ماشا الله عننا ابداع وحنا ماندري

بكرا تموتون وماستفدنا منكم حاقه(قلب زيدي)

[( برى بحرى)]

اخى (( فتى الدهناء ))

نعم يوجد فرق بالنسبه الى السعر والفرق شاسع نفس العدسه اللى ذكرتها لك الاصليه منها سعرها تقريبا 200 دينار كويتى والصينيه 35دينار

شفت فرق السعر اشلون كبير جدا

اما بالنسبه الى النتائج انا اقول ما تفرق وايد وصعب تفرق بين الصور سواء عدسه اصليه او تقليد

على فكره حتى العدسه الصينيه نيكون

تحياتى لك

[راعي الكيف]

موضوع بالفعل رائع ...

اما عن قصتي في التصوير مهيب ذات تاريخ ... فقط منذ 6 سنوات ...

دخلت الجامعة ... وتحديدا في كلية العمارة والتخطيط ... كنا نُلزم بالتصوير دائما لاعداد البحوث والتقارير المختلفة من المباني ... سواء أكانت نواحي تقنية ... أم نواحي فلسفية .... وماتتخليون كيف كنا نتخسر على التصوير بشكل !!

وزي ماقال اخوي ددسن 79 ... كنا نُصدم ببعض أو بغالبية الصور ... لذا صرنا عشان نصور لبحث أو لتقرير معين ... نضيع عليه حدود فلمين إلى ثلاثة افلام حسب الميزانية طبعا !! ... وفوق هذا تكون الصور مشي حالك ...

إلى أني بالصدفة ... شفت عند اخوي كاميرا ماركة - كريتيف - ... ماركة مشهور في مقتنيات الكمبيوتر من فارة وخلافه ... طلعت كاميرا دقتها اتوقع انه 0.54 ميقا بيكسيل ... طبعا ديجيتال ... يعني سالفة التحميض ... وصلخ المكافآات .. راحت ... صحيح ان الكاميرا تذبحك في ان البطاريات ان طولت تجلس لغاية 10 صور فقط !! ... بس تهون اذا دريت ان التحميض افتكينا منه .... طبعا الذاكرة كانت الداخليه فقط .... يعني ما اقدر اطورها ... فكانت تستوعب 50 صورة .... مع انه مافيها شاشة عشان تشوف الصور ...

وتدبرنا حالنا معها فترة بسيطة ... لين ماقدر الله علي ورحت يم اكسترا ... وشفتها ووقعت في حبها ...هههههههه ... كاميرا كاسيوا إكسيليوم 2 ميقا بيكيسيل .. وبطارية قابلة للشحن... طبعا كانت كاااسحة السوق .... بحجمها الصغير ودقتها الكبيرة - في ذاك الوقت - .... بس القيمة كانت غالية نوعا ما حدود الـ 2000 ريال !!!

اضطريت اني اتسلف واجمع المكافأة فوق الثانية ... عشان اجيبها ... وفعلا وجبتها ... وكانت فرحتي فيها ما توصف !! فاصبحت في جيبي وين ما اروح ... ومنها بديت اهوى التصوير .... فصرت كل ماكشت ولا كل ماسافرت لاي ديرة ... اخذتها معي ... إلا ان وصلت عدد الصور المصورة فيها حدود 6500 صورة ..!!!

بس تخبرون الزين مايدووم ... نسيتها في مخبات بنطلون الترينق اللي كنت اروح فيه للشركة اللي كنت اتدرب فيها ... لاني كنت اخذها معي عشان اصور لاعداد تقرير مطلب للكلية .... واخذتها الشغالة وغسلت البنطلون باللي فيه ... ومافطنت إلا وهي جايبة لي الكاميرا وهي تتقاطر !!! ... ولا عاد اقدر اصلحها لان المذر بورد احترق كله ... وتكلفة اصلاحها تساوي قيمة وحدة جديدة !!

طبعا ما اخفيكم حزنت كثير عليها ... بس قلت ياولد ... لعلها خيرة ان شاء الله ... واروح وانقز يم وكالة أبار حقت كاسيو ... واشوف هاك العرض الممتاز على وحدة من كاميراتهم .... واطقها ... دقتها 7.2 ميقا بيكسيل ... والزوم 4 ... وفلاتر جديدة ... والماكرو والانفينيتي متوفرة ... بحدود الالف ريال تقريبا

والى يومك وهي معي عسا الله يرزقني بركتها ... والله ان نفسي تراودني على كاميرا احترافيه .... لان هاللي معي قدراتها متوسطة .... بس نبي نتعبر بالمنفوشة لين ماتجينا المنقوشة هههههههههه


ولكم مني احلا الود

[SilverSniper]

من ناحيتي.. عدتي هي:
كاميرا Olympus E-300 احترافية 8 ميجابكسل
عدسة 14-45 مم زويكو
عدسة 35مم ماكرو زويكو
عدسة 40-150مم زويكو
بطارية إضافية
كرتين ذاكرة ( 1 جيجا - 2 جيجا ) نوع كومباكت فلاش
مجموعة فلاتر Hoya 58mm:
- Polarizer
- UV
- Warming
- Diffuser
- Cross Screen
- cooling
- 52mm stepdown ring
ترايبود
فلاش خارجي
شنطتين حمل ( صغيرة وكبيرة )

تقريباً تكلفة المجموعة كلها في حدود 7000 ريال..
اضافة إلى كاميرا canon powershot S80 قيمتها 2500 ريال
وكاميرا ياشيكا 35مم فيلم احترافية ( طالعه علي ببلاش )
يعني التصوير خذ مني 9500 ريال..
وفيه خطط مستقبلية للنيكون D80.. أو الكانون Rebel XTi 400D.. لكن توني شاري سيارة ( تاهو 2007 LTZ) فما أقدر أسوي شي ألحين.. :)

[عيناوي]

مسيكم بالخير يالربع
تفاعل طيب تشكرون عليه

راعي الكيف..يالله حيه..
كامرتين في ست سنوات؟ ما شاء الله عليك..دليل الرجل الصبور
خصوصا ان التصوير ابتدا معك اجباريا حيث فرضته عليك دراستك الجامعيه
اجل تقول ناوي على احترافيه؟في بالك شي معين والا..بطبيعة الحال المواضيع متوفره بكم كبير بهالخيمه
وان احتجت شي لا يردك الا لسانك..
سُعدت بك امانة..

سيلفر الكايد..أرحب يا بعدي..
يبدو لي انك تحب البذخ في هوايتك..ولك سنين طويله تمارس التصوير الضوئي..
وبالعفل كنت من القلائل الذين ابدعوا ونتشرف بكونهم منا وفينا
يطول لي بعمرك..بس لي عتب ..
تواجدك قليل بهالخيمه..ياليت ما تحرمنا منك ولا من خبرتك وعلمك
وانت كريم واحنا اكيد نستاهل
وانا ما تشرهت عليك الا لمكانتك الكيره بين اخوانك امانة

فالكم ما يخيب جميع ان شاء الله
:)

[ibnalhaithem]

السلام عليكم ورحمة الله وبركاته ،،،

موضوع جميل وإجابات أجمل

أنا بصراحة مالي إلا أسبوعين شاري canon G7
بمبلغ 2199ريال من عند اكسترا


وقبل كان عندي كاميرا مالها داعي ديجيتل برضه بس من الرخيييييييييييص وناسي سعرها

بصراحة أنا مثل أخوي فتى الدهناء ،،،

ما أروق على شي
كل يوم وطالع بهواية وتارك اللي قبلها

والتصوير الآن يستهويني بشكل كبير
فقد قرأت كثير من المواضيع في هذا المنتدى وفي غيره
ثم قرأت الكاتلوج الابتدائي
وناوي أقرأ التفصيلي

أما الخطط المستقبلية فأنا أنوي شراء عدسات لكاميرتي ويبلغ سعرها 1050 ريال
وذاكرة 2جيجا ويبلغ سعرها 160ريال
وحامل للكاميراوبطارية إضافية ،،،مدري كم سعره

يعني بيطلع علي السعر في حدود 3500 ريال

هواية مكلفة ،،، أرجو أن أستعملها في طاعة الله


ابن الهيثم

[عيناوي]

حياك ابن الهيثم..
أكيد مكلفه..مثلها مثل اي فن او هوايه اخرى..

وفيه من المصورين من يسافر ويتغرب فقط من اجل التصوير..فتخيل كلفة هذا كله؟!؟!

تشرفت بك ومبروكه عليك الجي سبعه
فالك مايخيب ان شاء الله
:)