في الصمان إنتبهوا من هؤلاء وأمثالهم .!

[محترف]

السلام عليكم ورحمة الله وبركاته

هذي بإختصار رحلتنا الى الدهناء والصمان والمشكلة التي كانت في الرحلة والحمد لله على السلامة !!!

كانت رحلتنا فجر الاثنين 24\ 1 الى الدهناء وبالتحديد عرق ود

وكان المبيت فيها الى الفطور ثم توجهنا الى الصمان
(آسف على عدم وضع صورة (ما عرفت !!!!))
ومعنا أحداثيات بعض الفياض وتمشينا فيها الى ما قبل العصر ثم نزلنا احد الفياض
وتغدينا فيها وانبسطنا وبعد صلاة العشاء بدينا نسولف ونضحك ....مبسوطين الى ان جاءة الساعة 12 ليلا وكان بعضنا نايم
إذا بنا نسمع صوت واحد جاي يقول : إنس انتم ولا غيلان ؟؟نحسبكم غيلان ؟ طفوا الانوار والكشافات الانوار طفوها ..ما ندري وش يبي؟؟ :mad:
قلنا له : تبي شي يالحبيب ؟: قال : سلامتك وارضاك يكرر الأنوار طفوها ..
ثم تركناة وأحدنا جالس يراقبه ولا ندري بعد قليل أكتشف ان معه شخصين مختبئين ورا القشع وسمع منهم صوت تعشيقة سلاح
نادا خوينا لأحدنا : ولع النور . وولعنا عليه الكشاف في وجهه : وش عندك؟ ..... :توكل على الله يالله ...
ثم شوي وجاااا بالسيارة أضنها فورد عائلية راكب ووقف عند الخيمة ويعيد الكلام طفوا الانوار أنتم تزعجون الطرقي؟؟ وتأسفنا منه وسلكنا له ثم راح
بعد يمكن 100 متر وطفوا السيارة ( والظاهر انه عراقي ) ثم صحينا النايمين :no: وضفينا عفشنا في أقل من 10 دقايق ( خيمتين _ العزب _ المراقد ..)
وركبنا السيارات وتوكلنا على الله وإحداثية الخط ... ( والحمد لله على السلامة )
ملاحظات :
_ ما ندري وش يبي بالضبط هم سكارا هم حنشل مره يقول طفو الانوار مره وينافخ مدري وش يبي .
_ كان فيه ناس قريبين منا في الفيضة _ مزعجينا الله يهديهم _ طفا نورهم فجأة وسكتو فجأة .
_ محلنا اللي صارة فيه المشكلة قريب من الرفيعة حوالي 20 كم .
_ أنا وضعت الموضوع لاخذ الحيطة والحذر في الصمان وفي غيرها ..
_ لا تنسوا التوكل على الله عز وجل وقراءة الاوراد ثم إقتناء السلاح والله خير حافظا .
_ انا أعتقد ان الصمان غير آمنة وغير مريحة في النوم ...
والله أعلم وآسف على الاطالة وشكرا ...

[Mr.Patrol]

اخي (المحترف)

الحمد لله على السلامه والله يعوض عليكم بخير.

[صقر20]

جزاك الله خير على التنبيه

حراااااااااااميه

اللي مثلهم خوافين جبانات طلقتين بالسماء ..ثم والله ماتشوف إلا غبرتهم

[ثقيل الرجلين]

الين نتو اكثر من واحد وش مروعكم

كان قضبتوه وعرفتو وش قصته يمكن الرجال لاهوب عراقي ولاهم يحزنون تلقونه كشات وازعجتوه ماخليتوه يرقد

وحكاية العراقين مهيب بعيده بس ماضنتي ان عراقي والا اثنين بيجسرون على مجموعة شباب

والسلاح زين لرجال اللي بالحاله اما اذا كنت في ذا الفياض والناس حولك ماعليك شر

ليتكم جازمين فيه يمكن الرجال فيه شر وتفكون الناس من شره وتتلونه لاحد المراكز

[صديقهم]

الحمدلله على سلامتكم
والقصص من هذي وامثالها كثير
واحد من اخوياي يذكر ان كان فيه واحد يجيهم (طبعا في الصمان والوقت بالليل) كم مره يسأل وين الطريق ومره يقول عندكم مويه
بعد ذلك شكوا اخويانا في الموضوع وخلو خيمتهم في مكانها واخذوا سليباقاتهم وناموا فوق التل القريب وجلسوا يراقبون الاوضاع من بعيد جاهم صاحبهم اللي يسال عن الطريق ومعه 3 مسلحين واقتحمو الخيمه واخذوا اللي فيها (والحمد لله مافيها شي يسوى) مع ان السيارة كانت موجوده الا انهم ما لمسوها (وهذي القصه باختصار)

[الأيقونة]

الحمد لله على السلامة
وليتك اتصلت على الشرطة ما راح يضرك شي

[ثقيل الرجلين]

اسف على الرجعه مره ثانيه

كفعل احترازي فيه طريقه كويسه اذا كنت متوجس من مكانك

اذا غابت الشمس غير محلك بس اذا مشيت منه لا تولع النور امش لك كم كيلو وانت مطفي النور ولا تلمس الفرامل ووقف

وبكذا اذا فيه احد راصدك يوم وقفت في النهار ماراح يعرف محلك ويهجدك تالي اليل

الطريقه ذي انا اسويها اذا كنت قرب حدود او في منطقه مكشوفه ولا معي احد خاصه شمال

<----- قلبها فلم بوليسي

تحياتي

[نمر بن حثلين]

ياخوي الحنشلي مهب موعيكم من النوم عشان يسرقكم

هذولا والله اعلم كشاته حولكم ازعجتوهم وعجزوا ينامون

خصوصا انك تقول انكم قاعدين 12
وهم ذولا تلقاهم يجولون بالبر من الفجر وما جت 9 الا وهم كل واحد يدور الفراش

[ALBDRANE]

الشباب الى يشغلون أغاني ويرفعون عليها حتى انصاف الليل يرفعون ظغطك ودك تثور فيهم .....لا وطلقة وحدة معاد تلقاهم !!!

[MAP330]

الصمان مليـــــان حنشل و حرامية و خاصة الرعاة العراقيين .

[راعي المعناء]

السلام عليكم ورحمة الله وبركاته
أنا اتوقع إنه سكران ومسكت عليكم يمكن لأنه مافيه إلا أنتم صاحين أو مولعين النور في هالفيضة والشر الحين كثير الله يدفع البلاء في هالأمور خاصه السكار والأغاني في الليل خاااااااااااااااااااااصه نسأل الله السلامة والعافية

[الوهـ قحطان ـاج]

اخوي محترف

الحمد لله على السلامه واهم شي انكم اتخذتم الحيطه والحذر منهم

لان في واحد من ربيعي يحكيلي قصة شباب في جنوب المملكه

انهم كانو كاشتين ويوم حل الليل عليه يبيون ينامون ويرتاحون مادرو الا وذاك اليماني الي جايهم

سلم عليهم وطلبهم مويه وعزموه بس رفض قال يبي يكمل مسيرته لانه جاي تهريب بدون اقامه ويبي يمشي في الليل يقلهم علشان ماتشوفه الجوازات او سلاح الحدود

طبعن واحد منهم شك في الامر وقل لخوياه خلونا نغير مكانا ماني متطمن لشغله هذي

ردو عليه اخوياه وقالو ماعندك اي مشكله يارجال محد بيجي والرجال اليماني هذا طرقي

قلهم يمكن ارجال يبي يتأكد ويفحص المكان لخوياه ويجون يسرقونا

قالوا له مانعتقد الكلام هذا لانه مسكين جاي من منطقه بعيده ويبي مويه والا فيه اي مشكله

طبعن كل فرش فراشه ونام الا هو مانام والا هو مرتاح

قام اخذ فراشه وبعد من المنطقه الي فيه اخوياه وقال بحرسهم لو جو لاخذ الحيطه والحذر

طبعن الرجال من التعب نام والا درى الا بشروق الشمس عليه

طبعن يبي يرجع لخوياه علشان يقنصون والا ولقي الفاجعه العظيمه التي كان يتوقع حصولها

طبعن لقي اخوياه كلهم مقتولين بسكين جميعهم ومسروقه جميع الاغراض ومن ظمنها سياره

وماكان خايف منه حصل لهم ؟؟؟؟

فلابد على كل شخص اخذ الحيطه والحذر من اي شي

ونأسف على الاطاله

وتحياتي لكم يالغالين

[ناصر العثمان]

الله يكفينا شرهم ويجب اخذ الحيطة والحذر ولا تنام في اي مكان اذا انت خايف وشاك في احد اطلق لك كم طلقة في السماء ولا احد يقربك هذول اهم ما عليهم حياتهم ويخافون من الذره
واتكل على الله في كل شي

[محمد الشاوي]

يمكن يكون مقلب من أحد الشباب اللي يعرفكم وطالع حولكم . ومدبر لكم هالمقلب

يمكن كل شي جايز .
عموما الحمد لله على السلامة .

لاتنسون الحصن الحصين ( الأوراد والأذكار ) والله خير حافظا

[عاشق التيتان]

الله يستر و الله يكفينا شرهم إن شاء الله .
يعني يا أخوان ما تنصحون أطلع للصمان أنا و العيال علماً أن العيال صغار 13 سنه و4 سنوات ؟؟؟؟

[Mohammad]

اذا تبى تنام روح يم ناس ونام حولهم ولكن يجب ان تحترم مشاعر الناس وجيرانك ولا تسوى ازعاج

ملايين العراقيين تركو بلدهم من الخوف والموت ومنهم المجرمين والمسالمين ولا استبعد ان منهم من تمكن من الخول الى البلاد وهم موجودين فى البرارى والذى لم يجد شغل ما عنده الا السرقه وقد يقتل الله يجيرنا وياكم!

هذه السنه والماضيه مررنا على رعاه واستطيع ان اجزم انهم موجودين بطريقه غير شرعيه اما متخلفين او متسللين واحدهم قهويناه واعترف انه ليس سعودى اعلمنا ببلده الاصل وحتى ديرته لانه كان يحاول ان يظللنا بلهجة البدو وفى الحقيقه عرفنا انه منهم!!!؟ قبل ما يتكلم!!

اصحاب الحلال يشغلونهم رعاه!! وبعظهم حذر جدا و يتجنب الكلام الكثير وحتى يتجنب ان يقابلك بوجهه لانه يعرف انه مخالف وايضا صاحب الحلال!! مخالف !

لو قامت الداخليه بمسح لمناطق البدو لوجدت الكثير من الرعاه اما متخلف او متسلل

خطر كبير

اللهم يكفينا شرهم ونتمنى ان يتعامل الامن معهم كذلك نتمنى توفير نقاط امن فى البرارى ولهم موجه ورقم تلفون مباشر لتوفير الوقت فكيف تتصل على الامن من خلال الثريا مثلا او من خلال الراديو!

ينقصنا التنظيم حيث يجب ان يكون هناك نقاط للامن تسجل فيها معلوماتك قبل دخول البر مثل البحر
لما لا؟؟؟؟

[المترو]

ثم صحينا النايمين :no: وضفينا عفشنا في أقل من 10 دقايق ( خيمتين _ العزب _ المراقد ..)
وركبنا السيارات وتوكلنا على الله وإحداثية الخط ... ( والحمد لله على السلامة )


افا ليش هالكلام ليش ما رحتو للرجال وعرفتم الموضوع وتحققتو من الامر واذا هم حراميه او غير ذلك مع العلم ان الامر لايمكن ان يكون حراميه وبهذه الشكل حراميه يسالون بهذا الوضوح :no2: ويطلبون اطفاء الانوار :confused: :confused:

اذا كل واحد طلع للبر واشتبه بأمر هج هجيجك انت واخوياك يخلف الله على الرجال :no2: :no2:
ليس المقصود ان الواحد لايخاف لكن ليس بهذا الشكل وهذه الطفاقه
الله لا يبلانا
والسلام

[الباحث]

هونت ماعادنيب رايح للصمان

:j

[جيب خربان]

الله يستر و الله يكفينا شرهم إن شاء الله
والله يجزاك خير

[ابو شكاع]

الحمد لله على سلامتكم ...
أما سالفة الوهاج فما أقول إلا ياساتر :eek:

[محترف]

أشكركم جميعا على المرور والتعليق والله يسلم الجميع .
تعقيب على الردود ::
_ مسألة أننا نمسكه ... فيها مخاطرة شويه ولا تسوى عليك يموت أحد من ربعك او نذابح على شان واحد مزعج مايستاهل
على قول القايل : وفدوه لو يموت ( ن ) القطيع ويسلم الراعي
مايهم نخسر الكشته بس شي أهون بكثييييير من شي ..وهم على فكرة ثلاثة ..( معنا سلاح على فكرة)
_ التبليغ عنه : على فرض ان فيه أبراج جوال وش بي تقووووول مافيه دليل انج بحياتك وأمش واحمد ربك ..
_ حنا ما عندنا نور شغال دايم لكن كشافات صغيرة ( كهربان _ بجلي. فقط؟؟ ) وهو قال لنا من كلامه :(( مولعين ثلاث كشافات)) ؟؟ . هذا دليل على انه يراقبنا من فترة والله اعلم ..
_ هو ما صحا نا من النوم النايمين كانوا اثنين بس . وقاموا من الصوت ( كان لسانه طويل وصوته جريئ ومزعج )
والباقي منا صاحين خمسة رجاجيل شرواكم .
_ ومسألة انهم سكارا ما أعتقد..
_ الاخ المترو المحترم انت يمكن ما فهمت السالفة أو تحاول تستفز الرياجيل؟؟؟؟
السالفه انامختصرها والسالفة مهوب جانا واحد وقال طفو النور .. وضفينا عفشنا وششششششت ومشينا لا وانت ما عشت الموقف
وهذي ماهيب ( جبانه ) بالعكس وماهيب مرجلة اننا نتحداه في هذا المكان ونتذابح معه على شان شي ما يسوى ...
بعدين حنا حاولنا نفهم منه شي ما قدرنا ما يعطيك أي علم مثلا قلنا له وين محلك مايعلم !! وين محلك يالحبيب على شان ما نزعجك بالأنوار؟؟ ما يعلم ....
إعرف انه ما بقي الى نثور فيه بالسلاح الله يجيرك ونرتكب جريمة قتل الله يستر (( تسوى علينا ))
اكرر أشكر الجميع على المرور وخذو الحيطة والحذر في البر ...

[سبيع الغلباء]

الحمد لله على السلامه
والله يكفينا الشر ومن فيه شر

[منتعش]

الله يستر
أنا حصلت لي مثل هذا الموقف
كنا كاشتين حول مليجه
وقابلنا واحد مرتبك وخايف
وسألنا وش أنت وش جابك
فقال : أنا من العراق جاي تهريب
وسألنا واحد من الربع من نفس الديرة
وقال : هؤلاء ( بياعين ) ومتكاثرين في البر وخاصة حول النعيرية

[المترو]

السلام عليكم ورحمة الله وبركاته

اخي الكريم المحترف لا تفهم ردي بالغلط لا ما عاش من يستفز الرجال او اي احد
لكن انا شرهت عليكم قطعت رجال وتمشون لان واحد جاء وقال لكم طفو انواركم ازعجتونا الا اذا انتم فعلا مزعجين احد هذا امر اخر
اما واحد يجي ويقول هالكلام بدون توضيح وعلى غير سنع وواضح انكم الى الآن انتم انفسكم ما فهمتو السالفه ولا توضيح من الشخص
وقولك انك ترتكب جريمه بسبب واحد ما يستاهل لا لاسامح الله لكن على الاقل اعرف لماذا طلب منك المغادره ومنهو وبصفته ايش وبعدين اذا وضح الامر لها حلال ليس مطلوب هوشات وطلايب لكن المطلوب الوضوح شوي حتى انا شخصيا غير مقتنع بروايتك للقصه بهذا الشكل احس ان فيه جزء مفقود من القصه ؟؟؟؟؟؟؟؟؟
واعتذر عن الخطاء بحقك او حق خوياك لكن هذه وجهة نظر شخصيه بالموضوع برمته :confused:

والمقصد من الرد والمشاركه بالموضوع هو حفاظا على مصداقية المنتدى واعضائه وعدم المبالغه ببعض الامور وتحويل المنتدى الى مصدر اشاعات ومبالغات غير مجديه
والسلام

[ريم البراري]

الحمد لله على السلامة

اولا لاتنسون الورد صباحا ومساء يااخوان
ثانيا خلوا مبيتكم قريب من مخيم ثاني وبالنهار دوجوا زي ماتبون:D
ثالثا لازم يكون فيه سلاح ولاتبيتون الا بعدد كبير
اذا واجهكم واحد مثل هذا تكلم معه بقوة وبدون تردد وخليه يشوف سلاحك:mad:
الله يحفظ الجميع

[ابو ريان .]

ياأخي الكريم شف وش صار للمحترف هو وأخوياه فما بالك أنت وعيالك ، أنا أقول اكشت لخريم وماجاورها من المناطق الربيعية وتكفيك إن شاء الله ، وعذراً على الإطالة .

[Strike]

اولا حمدلله على سلامتكم

ثانيا انا مع الأخ المترو ، أشعر ان هناك حلقة مفقوده في القصه

القصه بهذا الشكل غير مفهومه ولا تبرر خروجكم من المكان بسبب ان الرجل طلب اطفاء الأنوار

أنا لفيت الصمان ولا شفت الاشياء هذي
لكن كونكم اصحاب كشافات وصاحين الى نصف الليل ، من الطبيعي انكم ازعجتوا جيرانكم هذا اذا كان حولكم احد
وربما الرجل راعي حلال ومعاه عائله او كاشت ومعاه محارمه وانتم مجموعة شباب ازقرتيه امولعين الكشاف تالي الليل طبيعي انه هو يخشى منكم مو انتم اللي تخشون منه

راعي المكشات خصوصا في الصمان لا يضوي كشافاته الى تالي الليل ، الغالبيه من اهل المكشات ينامون بدري ، وإطالتهم في السهر مع الاضاءة امر غريب وغير محمود في نفس الوقت

عليكم بالاذكار والادعيه ، والله هو الحافظ

[والد شمر]

[QUOTE=عاشق التيتان]الله يستر و الله يكفينا شرهم إن شاء الله .
يعني يا أخوان ما تنصحون أطلع للصمان أنا و العيال علماً أن العيال صغار 13 سنه و4 سنوات ؟؟؟؟

/QUOTE]
نصيحه لوجه الله :no2: لاتذهب انت واولادك الا صمان . خليك بتنهات او خريم او فيضه نوره او الخفس احلا وافضل . تحياتي:D

[saag]

الحمد لله على السلامة
وكل شي جايز هالوقت
وزين ما سويتوا تجنبا للعواقب الغير متوقعة

[weather]

بسم الله الرحمن الرحيم
روحوا للصمان وغيرها لا تخافون الا من الله لكن خذوا الحيطة والحذر واجب أولاً الإتكال على الله القوي العزيز الجبار ولا تخافون من غيره بس أهم شيء الإستعانة بالله وحده والإستعاذة بكلمات الله من كل شر وقراءة الأوراد وترك اللهو والأغاني والجد والإجتهاد في طاعة الله الحمد لله أنا أضرب الأسفار أنا وزجتي وحدنا وما قد شفنا شرمن فضل الله
المسألة ليست شجاعة لكن من توكل على الله كفاه وأنا مضطر والا الحديث معروف ان الواحد مايسافر لحاله .
أهم شيء الإتكال على الله ثانياً أخذ الحيطة والله سبحانه الحامي من كل شر .

[الوانيت1]

ما خفي أعظم و أؤيد تصرف أخوى المحترف وعين العقل مافعلة حيث لاتستطيع أن تعرف خفايا الناس من وجوههم يمكن هذا الشخص سكران او فية أعصاب تنتابة الحالة فى ظروف معينة وما فعلة أخوى المحترف قمة الشجاعة وعين العقل وهو ان تدفع بالتى هى احسن وتتجنب المشاكل مستخدما عقلك مادام الامور يمكن تجاوزها ودفعها وأكرروأحذر لاتلقوا بأنفسكم للتهلكة بقلة العدد فى المكان البعيد عن المراكز الصحية والمخطور وبدون السلاح والسيارة اللى ماينشد بها الظهرأوأن تكون من المديلات الجديدة المرغوبة ومع كثرة الهوام والعقارب والحنشل وقطاعة الطرق حول الحفر ومناطق الصمان الشمالية وشمال العويقيلة وحذا الحدود الشمالية والحافظ الله سبحانة وتعالى وشكرا//////...

[طارق الحربي]

السلام عليكم


اولا من غير المستحسن انك تنام بالفياض على الاقل من وجهة نظري

حاولو تنامون متفرقين ومكانكم لا تقعدون فيه يوم كامل خصوصا اذا صار فيه حولكم حركه


اما العراقيين فوالله ياهم يمشوم مشي ويقطعون مسافات طويله بسرعه وقصصهم واااااااااااااااجد خصوصا اذا مريت بدو وسألتهم عن العراقيين

على الطاري تراهم ماياكلون الضبان :)

تحياتي

[كن مع الله]

لالالالالا احد يروح بالعيال اخاف يندم لاسمح الله

[رحال2010]

الحمد لله على السلامه والله يكفينا الشر من هذولا الحنشل

[مويثل]

عليك بابو عطفه ياخوي وطلقتين خارق حارق
اكبر غلط تمشي للبر بدون سلاح
على الاقل( ربع )!!!!!!!!!!!!!
لاعاد تعود لها يالحبيب

[ملاعب الريح]

عليك بابو عطفه ياخوي وطلقتين خارق حارق
اكبر غلط تمشي للبر بدون سلاح
على الاقل( ربع )!!!!!!!!!!!!!
لاعاد تعود لها يالحبيب




السلام عليكم

أخوي مويثل شكلك ما قريت الموضوع كاااااامل

الرجال يقول السلاح موجود ولا يمنعه من إستخدامه إلا قصرة الشر....


تحياتي (ملاعب الريح)

[بيتر]

طالما انك غير مرتاح اذا لن تسطيع النوم وسوف تشعر بالقلق والارق معا....فمن الافضل تغيير المكان وعدم المكابره ...ولو افترضنا انك اطلقت اعيرة من سلاحك في الهواء ثم اتتك وابل من الرصاص ....فمنطق العقل يقول ابعد عن الشر مو كذا وبس انما ابعد عن الشر وغني له.....نعم قد اشهر سلاحي حتى يراه الغريب للمهابه وانادى باسماء اصحابي الموجود وغير الموجد لاشعاره باننا كثر ولاكن لا استخدم السلاح الا في الشديد القوي ....والمرجله هي بتحكيم العقل وليس بفرض القوه......ونصيحه باخذ جوله حول موقع مبيتكم وان تكون حول ناس اجاويد....وتحاول ان تتعرف عليهم وذلك بهدائهم مثلا كيلو تمر ...او بالسلام عليهم واستئذانهم بمجاورتهم في الفيضه او الشعيب "المقصد ليس الاستئذان بحد ذاته انما لمعرفت وشهم من لحية"
نعم التوكل على الله والاذكار شئ واجب.... وكذلك اتخاذ الاسباب مثل حمل السلاح كذلك واجب....وتحكيم العقل ايضا واجب
واعجبني تصرفك بتغيير المكان...............والله يحفظنا....آمين

[الظافر]

الحمد الله على السلامه
واخذ الحيطه والحذر واجب , بس ودنا انكم عرفتم وش عندهم حتى تكون الصوره واضحه

[محترف]

السلام عليكم
الاخوان بيتر و الوانيت1 متفهمين الوضع وكلامهم هو عين الصواب . وشكراً للجميع على المرور..
ونسأل الله السلامة للجميع .

[دايم البر]

الحمد لله على السلامه وتصرفك عين العقل

ادفع بالتي هي احسن

نسأل الله السلامة للجميع

[خويكم]

ما قصروا الاخوان في ردودهم على محترف وستجد دائما أن هناك كثير من الآراء التي تبدو متباينة.

ولكن الشأن في قصة أخونا الوهاج التي يرويها عن صديقه الذي يحكي عن شباب الجنوب مع حنشل اليمنيين.

وعندي فيها التعليقات التالية مع رجائي بأن تتسع الصدور :

1. هل نحن بحاجة الى ترويع الناس لكي يأخذو حذرهم فقصتك بدت لي مروعة ؟

2. هلا حددت لنا زمنها وهل باشرتها شرطة أو أمارة المنطقة ؟

3. ألم يكن ممكناً أن تحيلنا على سند مباشر؟

أعلم اني أقسو بأسئلتي ولكننا مجتمع يتناقل كثيراً قصص غير حقيقية ويجعلها وسيلة لوعظ أو تخويف الناس .

سامحني اخي الوهاج ولكن من الصعب أن نصدق كل كلام يقال مالم يكن كلاماً ثبتاً وعلى كل حال لست ملزماً بشيء من هذا ولكن أرجو من الجميع التنبه في سرد ذلك النوع من الروايات .

[الشاقي]

اخوي محترف
بحكم خبرتي في الصمان احب اوضح لك شي
اولا العراقي عمره ما صار معه سيارة وغير كذا العراقي ينصاك ويسلم ويجلس كضيف ويشوف الوضع ثبل يسوي شي
هذا اللي جاك إحي ثنتين
أما انهم حنشل مثل ماقلت واكثرهم صلب ولوحات سياراتهم كويتية
أو انهم وعلى ما اتوقع انا انهم ساكنين حولكم بس بيطردونكم عن ارضهم وهذا هو الأرجح
وفيه إحتمال ضئيل انهم من اهل بسم الله وجلستوا بمكانهم ياليتك رحت تشوف جرة السيارة واقصد لو مالقيت جرة كان تقول عنهم انهم جن
حنا يا شباب عيبنا اننا مانقرأ مايجب علينا قرآئته ولازم نأخذ هذا الموضوع بجدية لازم نسمي قبل ننزل

وبالنسبة للأخ اللي بيطلع بأطفاله للصمان اقول له لا توهق الا اذا صرتوا مجموعة كبيرة والأفضل اننا نطلع بعيالنا ولا نبعد لإسباب كثيرة منها لاسمح الله الاسباب الصحية لإن المدن بعيدة

[الحسكولي]

الحمدلله على سلامتكم

وعين الصواب ماسويتوا واضيف الى ردي هذا جميع ما كتبه الاخ بيتر ولايهونون باقي الاخوان .
وخيرا اقول الاذكار والاوراد حرس وبلاش مع تقوى الله .