أبي واحد يوصف لي الشوكي ياجماعه فزعه

[آبوعزآم]

السلام عليكم ورحمة الله وبركاته

هلا والله وغلا بالرجال حياكم الله وبياكم

ياجماعه والله قررنا نروح رحله الى الشوكي التنهاة واللي حولها

وجايين من القصيم

واللي نعرفهم معهم أجهزة القارمن ماش كلن يبي جهازه واللي بايعه

خميس وجمعه نبي نشوف هالربيع قبل تحمسه الشمس ونبي نرجع

مالكم طواله ابي ياجماعه واحد يوصف لي توصيف دقيق لمدخل الشوكي والتنهاة والمكاشيت الحلوة

لا تذخرون ياجماعه اللع يخليكم

ويبارك فيكم يارب

[آبوعزآم]

^_^

وينكم ياجماعه ؟؟

[أبرق الشقيقة]

السلام عليكم ورحمة الله وبركاته هلا اخوي

الشوكي ياطويل العمر وانت جاي يالحبيب من القصيم يالله من فضلك واحسانك له اكثر من طريق
1/ من عند كبري محطة الكهرب الي بعد المجمعه تطلع الكبري وتروح يسار بس الطريق اقشر شوي الطريق هذا يبي يطلعك علي بوضا ومبايض والشعب لكن الطريق مثل ماقلت لك منعطفات خطيره مرره المهم الطريق الي اقولك تستمر معه لاتلف لا يمين ولا يسار تستمر لحد ماتوصل الشعب بيدخل الطريق بين جبال وبعد ماتتعدى الجبال بتجيك محطه علي اليمين وعنده أمهمده تروح يمين تنزلك علي الشوكي .
وانصحك بالطريق الثاني الي هو وانت جاي من القصيم ياالله من فضلك تجيك لوحة تمير والشعب تطلع الكبري وتلف يسار يوديك لتمير وفي تمير بيجيك اشاره ثلاثية وانت مقبل علي الأشاره تشوف الطريق يتيامن شوي المهم من الأشاره عدال لا تلف وبالماريه فيه وانت واقف بالأشارة فيه محطه علي ايدك اليسرا ان احتجت شي سير عليه وكمل اغراضك . المهم تستمر بعد الأشاره ويبي يجيك حرف T وقبل حرف التي فيه محطة علي ايمين وبقاله عندهم طليان وحطب غالين يويل المحتد يقصبون الي جابه فرصتهم المهم حرف T يمين يجيك الطريق عداااال وتدخل الشعب هي نفس الديرة الي قلت لك قبل ومن الشعب عاد تستمر واذا جتك المحطه قبله يمين مع المهده .
هذا الوصف .
بالنسبه للشوكي يفضل لو يكون معك جيب او اي سياره رفيعه وترى الربيع الزين قدام وللمعلومية الشوكي يحير بالتنهات لو تستمر معه ينزل بالتنهات طول الشعيب تقريباً 30 كيلو الأرض وعره شوي لكن البريبي جلد وانتم قده يالنشاما .
استكمال للوصف ولو تبي التنهات تقدر تطلع له من الشوكي نفسه اذا بتقطعه او اذا طلعت من الشعب تستمر وتخلي الشوكي بيمينك وتستمر تجيك ديره اسمه (( ام رجوم )) من الديره هذي فيه مسحية بشرقه تودي لتنهات يمكن تجي 17 كيلو علي مااظن . علي فكره الجوال ينقطع من بعد الشعب بكم كيلو يعني الشوكي اطو قشك مافيه جوال ابد
واسف على الأطالة وانشالله اكون افدتك

اذا وصفي فيه خطاء ارجو التعديل واعذروني علي القصور والى كان نزلت شرح موجز مدعوم بالشرح لكن ماحصل
ان اصبت فمن الله وان اخطات فمن نفسي والشيطان
في امان الله

[ابو عدي الحاتمي]

السلام عليكم ورحمة الله وبركاته
ولد بريدة
رحت للشوكي والا توك

[آبوعزآم]

هلا والله وغلا بالرجال

كفو والله بـ أبرق الشقيقه وصف رائع ياغالي وان شاء الله معه ومتوكلين على الله

جزاك الله الف الف خير

أبو عدي يابعدي غداً الإر بعاء إن شاء الله نبي نتوكل على الله والرجعه يمكن السبت او الأحد والله ييسر الأمور

وحنا اثنين ومعنا باترول صالون اذا احد له خاطر نمرة ونفرح ترا هاه يا ابو عدي وش قلت ^_^ خوي ؟